HAKHOKHMA Post Post New Entry

Parashat Bemidbar

Posted by icolney2 on May 29, 2019 at 3:20 PM

Parashat Bemidbar :- Harel Kingbol

Tunkar kan Parasha (Parashat Bemidbar) hming chawiin Sefer Bemidbar a awm a. Hei hian chhan hrang hrang leh hrilhfiahna hrang hrang a nei bawk. Kan Parasha chang hmasa berah chuan Bemidbar tih inziak kan hmu tel a, chuvang chuan a ni tiin hrilhfiahna a awm a. Hei aia hrilhfiahna rilrem zawk awm theiah chuan Israel fate thlaler (Midbar) ah kum 40 chhung zet an vahvaihna chungchang sawi lanna ber anih avangin.

Kum tin Sefer Bemidbar hi Shavout kut bawr velah hian chhiar thin a ni a. Ngaihruatna atanga a chhan ni thei turah chuan Torah kan dawnna chu Sinai tlang (thlaler ah/midbar) anih avangin.

Kan Torah mithiamte chuan engvangin nge thlalerah kher chuan Torah chu pek/dawn anih tiin nasa takin an chhut a. Ni e, thlalerah chuan hmanlai rohlu emaw thil tha tak lo inphumru te pawh a awm mai thei. Mahse chung thil hai a zawng chhuak tur chuan thlaler chu mihringte chenna/khawsakna hmun a ni tlat si lo. Anih chuan mihringte tana hmun nuam leh ropui zawk Torah dawn theihna tur hmun nuam leh ropui zawk chu a awm lo em ni?

A chungah zawhna ho bakah khian engatinge thlalerah kher tih nen a inkungkaihna tamtak zawhna awm thei te chu Midrash in kawng hrang hrangin a chhang a ni.

Hrilhfiahna pakhat-ah chuan Juda ni ve lo hote lak ata invenna a awm theih nan. Gentiles hoten, "P-thian chuan ama ramah Torah a pe a, chuvangin kan ta a ni ve lo" an tih theih loh nan. A awmzia chu hnam dangte chuan Torah an dawn duh lohna avanga chhuanlam engmah an neih theih lohna turin. Torah chu Israel ram chhungah ngei pek anih tlat si a, kan ram ah min pe nise chuan keini pawhin kan dawng ve duh tho alawm an tih theih lohna turin, neitu tumah awm lohna thlalerah chuan Torah chu pek/dawn a ni.

Hrilhfiahna dang lehah hnam leh hnam (Israel hnam 12) inkarah innghirnghona a awm lohna turin. Israel ram chhungah Torah chu pek lo ni tase, hnam 12 zinga hnam engemaw ber chanpual chhungah Torah chu pek/dawn a ni ngei ngei dawn a. Chutiang chu lo ni ta se, hnam 12 zinga eng hnam ber emaw chuan kan hnam/ram chanpual chhungah Torah chu dawn/pek a ni a, kan hnam chanpual bik a ni ti a hnam leh hnam inkarah buaina a awm lohna turin, thlalerah Torah chu pek/dawn a ni.

Midrash chuan ti hian a tlangkawmna a siam a, "hei vang hian a ni Torah chu thlaler....(neitu awmlo/tuma ta ni lo) ah chuan pek/dawn anih". Torah chu thil/kawng 3 in pek a ni a- thlalerah, mei leh tui hmangin. Heng thil 3 te hi mi zawng zawng, a duh apiang tana neih theih a ni. (Mekhilta D'Rabbi Yishmael).

Eng pawl, hnam, ram leh mimal ta bik/neitu bik awm lohna thlalerah chuan Torah chu pek/dawn a ni. Chu hmun, neitu bik awm lohna thlaler hmun paltlang a, a awmdan te chiang taka hre thei tur chuan harsatna leh hrehawm, thlan tui tamtak sen angai a ni.

Chutiang chiah chuan Torah chu thlaler ang a ni a. Khazalte'n an sawi angin - "thlaler kal chhuak tur a miin nasa taka kawng a zawng a, a bo thin ang hian Torah tan inpumpekna tak tak a awm loh chuan Torah chu dawn/neih theih a ni lo."(Midrash Yalkut Shimoni)

 

Categories: Torah, Shabat

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments