HAKHOKHMA Post Post New Entry

Shimona ram chan

Posted by Moshe Ilan on September 2, 2019 at 3:25 PM

Joshua hunlai khan Israel fate khan Kanaan ram, ram tiam chu lut in an la ta duai duai mai a, thum te vawrin a hnam zir zel khan an mahni ram chan tur te chu an luh atanga kum 14 chhung khan an insem thu ka hmu a ni.


Shimona khan ama pualin ram kha a dawng ve ta hauh lo mai ah.. eng vang nge ni ang aw.. tiin.  hman ni ah group pakhat ah ka zawt a, ka zawhna chhan chu kei ang thovin thian te hian an lo chhiar liam ve mai mai thin em tih ka hriat chak vang a ni .


A zawhna khi ngun deuha kan chhiar chuan, " ama pualin ram kha a dawng ve ta hauh lova...." tih a ni.


Ni e, Joshua hova ram thumvawr hmanga an semna ah khan Shimona chu a hming a lang ve ngei a lawm, mahse, a hming lan dan kha ngun taka kan bih chian chuan awmzel ril tak a nei a, ama pualin ram a dawng ve lo a ni. Chumi awmzia chu Hnam pakhat ram chhung ah an in zep ve ta mai mai a ni.


He thu hi Yehoshua 19;1-9 thleng ah khan heti hian a inziak a, "Tin, thumvawr vawi hnihna chu Shimona chungah, Shimona thlahte hnam chungah an chhungkaw zir zelin a tlu leh ta a. An chanpual chu Yehuda thlahte chanpual zingah a tel ve a ni. An chanpuala tlute chu Beer Sheva te, Molada te, ....." tiin a sawi chho ta diat diat a, tichuan, a chhunzawmna ah khan chiang takin heti hian a inziak leh ta a ni, a chang 9 naah, "Shimona thlahte chanpual chu Yehuda thlahte chan zinga mi a ni." tiin a rawn sawi nawn leh kher bawk a ni.


Hemi awmzia hi Shimona thlah te chuan Yehuda ram chhungah inzar pharh ve theihna turin hmun pek ve an ni tihna a ni a, Nakhalat Yehuda chhungah an khawsa ve tihna ani.


Mahse, hei hi eng vang nge ni ta ang le, hetiang khera mi ram chhunga an chenna tur khua pek ve an nih mai? a unau dang te zawng zawng pawh mahni ram nei veka pek an ni si a, kan tih chuan.. hei hi a chhanna a ni.


Bereshit (Gen) 49;5 "Shimona leh Levia hi unau an ni a, an khandaihte chu thisen chhuahna hriamhrei a ni. Aw, ka thlarau, nang zawng an inrawnnaah chuan inrawlh ve suh, ka ropuina, nang zawng an inkhawmnaah chuan tel ve suh, an thinurin mi an that a, an tihmawhin bawngpa tha an chhat a. An thinurna chuan anchhia dawng rawh se, kawlh tak a ni si a, an thinrimna pawh chuan anchhia dawng rawh se, nun chhe tak a ni si a, Yakov hovah chuan anni chu ka ti then ang a, Israel hovah chuan ka tidarh bawk ang.


He kan pu Yakova a thih dawn a, a fate hnena malsawmna an dawn tur a pekna ah hian Shimona leh Levia dawn hi anchhia a ang zawk hle a ni. Hei hi heti taka an chungchang thu hi chhe taka phuhchhuak ta mai nge kan tih chuan, P-thian thik thu an thik pui avangin Shkhem khua mipa ho zawng zawng te kha an that vek anih kha, kha mi chungchang ah khan an pa Yakova chu a thin a rim em em a, a chhanchu, Inremsiamna an siam fel hnua a fate Shimona leh Levia te thin thawkin khatia an chet tak buan buan avang khan a ni. Hei hi P-thian thik thu an thik pui vang nge an thinram vang tih chu zawhna lian tak a ni a ni. Amaherawhchu, an chanvo tur chu an mahnia ram nei tur an ni lo va, an unau Israel hnam te zinga in zar pharha cheng ve turin a puang ta a ni.


Heta tang hian a fiah kuar tawh na a, mahse, Levia thlah te ve thung hi le? kan tih chuan, an ni chu Puithiam hnam lo chhuahna hnam an ni a, mahse an zinga chhungkaw pakhat Aharona chhungkua te chuah chu Kohanim (Puithiam) hote chu an ni. Heta tanga a lan dan ah chuan Kohanim ho chauh chu ram nei lo tur P-thian ta, an ram chan chu P-thian kha ani tur ni maiin a lang a ni. Dik pawh a dik tur a ni.


Amaherawhchu, Sinai tlanga Se bawng no lim hmanga Israel mipui te khan an lo bawh chhiat lai khan a bawhchhe tu te zingah khan Shimona hnam te pawh an tel ve a ni, amaherawhchu, Aharona leh a hnampui a lo chhuahna Levi hnam te chauh chuan an bawhchhe ve lova, tichuan, P-thian thinurna hmanga a bawhchhe tute tihlum tur pawhin Levi hnam te an che chhuak ta zawk a ni, hetah chiah hian hmana Shkhem khuaa an unau pahnih chetna kha a chhanna chu a lo lang ta a ni, khatah khan Shimona kha chu a thinramna avanga che chhuak ani a, Levia erawh chu Lalpa P-thian thik tu keng chunga che chhuak zawk ani tih a rawn lang chhuak ta a ni.


Chuvangin, Lalpa P-thian chu Levia chungah chuan a lawmin ram an chan tur aiah amah Lalpa P-thian ngei chu an mahni chanpual tur atan a in pe ta hial zawk a ni.


Tichuan, hun lo kal zel ah ram an va luah tak hun ah chuan, an pa Yakova malsawmna kha a taka lo thleng ta in, Shimona thlah te pawh chuan an mahni puala chanpual ram nei lovin Yehuda ram chhungah an inzar ta mai mai a, tin, chutiangin, Levi hnam te pawh Israel hnam te ram then hrang hrangah Arei Miklat ah an insem darh ta hlawm a ni.

Categories: Torah, Judaism, History

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments