HAKHOKHMA Vote

Click here to edit subtitle

HAKHOKHMA Post Post New Entry

Metsada chanchin

Posted by Moshe Ilan on August 7, 2018 at 6:05 PM

Metsada hmun hian History thu tam tak nei ni mahse, hun rei tak chhung a awmna hi hriat ani lo a, kum 1838 ah chauh khan hetiang thil hlui chhuitu pakhat Edward Robinson chuan a hmun hi a hmu chhuak ta a ni.


He hmun hi Israel chhak lama awm Dead Sea thlang lam tlang chhip hmun a awm a ni a, he tlang hi Dead sea atanga tehin meter 440 asang a awm a ni. an hunlai History chanchin ziaktu Yosefus (Yosef Ben Matitiahu) chuan hemi hmunah hian Hordus-a chuan a Lal in mawi zet leh ropui zet chu a sa tiin a lo ziak tawh a, amaherawhchu, hemi kum a a hmun an hmuh chhuah atang hian a Lal in chu an zawng tan nghal a, mahse hun rei tak chhung an hmuchhuak mai lo a ni.


He Metsada tlang hi tlang lian lemlo tak ani a, a chhip hi rawt zawl ani a, a dung zawng meter 600 a sei leh a vang zawng meter 200 chauh va lian a ni. Tichuan, hemi hmun te reuh te ah hian chutianga Lal in ropui chu zawn hmuh loh chi rual ani lo tih hre tho mahse, hmuh tur reng a awm lo a ni.


Tichuan, kum 1933 khan "Hanoar Haoved" pawl hotupa Shmaria Gutman chuan hemi hmun hi chhui chian a chhawm nun hna a thawk tan a, tichuan, a zirlai te pawh chu hetah hian hruaiin a hmun cheibawl that hna chu an thawk tan ta a ni.


Kum 1953 khan hetah hian Kibuts Mayan Barukh ami, Mikha Levana leh Zeev Mashal te chu kal vein Metsada hmar lampanga tlang pang awih ah chuan an nun thap tak meuh meuhvin hmun awihpang hlauhawm takah chuan an chhukthla ta a, chutah chuan an ni te hian Hordus-a Lal in sak ngei mai chu step anga chhawng thum ram chhia chu an hmu chhuak ta a ni.


Metsada chu tu lo din nge?

Yosef Ben Matitiahu (Yosefus) sawi danin kum 143 – 161 BC khan Khashmonai chhungkua ami Yonathan-a Kohen Hagadol chuan he hmun Metsada hi a unaupa Yehuda Makabi boral hnuin Greek hote laka helna an beih laiin a lo din ani, a ti a.


Tichuan, kum 42 BC ah Hordus-a chuan he hmun hi ala ve leh a, kum 40 BC ah khan Partim hoten Jerusalem an lak tum khan Khashmonai chhungkua ami Antigonus chu Juda te Lal atan an siam a, tichuan, Hordus chu tlan chhiain he Metsada ah hian a awm a, chutah chuan a chhungkua te leh a mipui te mi 800 lai te nen hetah hian an tlan khawm a, chutah, amah chu Rome ramah kalin a unaupa Yosef-a command na hnuai ah heng a mipui te hi a lo dah rih a, a mipui dang te chu Edom ramah a tlan chhiat tir thung a, chumi hnu ah Rome atanga a lo kir lehin Rome Lal te chuan Hordus chu Juda te Lal atan an siam a, tichuan, he hmun hi a awmna hmun atan siam nghetin kulh bang te siamin a Lal in pawh chu a sa ta a ni.


Hordus-a thih hnuin he hmun hi Rome sipai ten awmhmun khuar nan an hmang ve leh a, tichuan, Mered Hagadol (Rome hote laka Juda te helna) tan tirh kum 66 AD lai khan hetah hian Juda pasaltha Sikarim pawl te chuan heta awm Rome hote chu um chhuakin an awm ve leh tan ta a ni.


Juda pasaltha Sikarim pawl ten an hmun pui ah Metsada an nei

Metsada hmun chu kum 66 AD ah khan Juda hel pawl 'Sikarim' pasaltha ten Rome hote lak atangin an la a, an hotupa Menakhem ben Yehuda chuan hemi hmuna Hordus-a ralthuam dahthatna hmun kudam chu hawngin chung ralthuam te keng chuan Jerusalem a Rome hote do turin heta tang hian a feh chhuak ta a ni. Amaherawhchu, chutah chuan Menakhem-a chu a thi ta hlauh mai a, a tha chhang dawltu Eliezer Ben Yair chuan a pawlte chu hemi hmun ah hian kir puiin chutah chuan an inkulh ta a, he Metsada hmun hi Sikarim pawl te hmunpui atan an hmang zui ta a ni. Tichuan, kum 70 AD ah chuan Jerusalem chu Rome hote lakah a lo tlawm ta a, tichuan, chuta tang chuan kum 3 chhung he hmun Rome ho ten an lak theih hma chhung zawng chu Eiezer ben Yair hona hnuai ah he Metsada hmun hi vawn him ani a ni.


Rome hoten Juda ral tlan te an bei

Kum 72 AD ah Rome sipai hotu Flavius Silva chuan a sipai 10,000 te leh an ram awp chhunga hnam dang sipai 15,000 rual te nen Metsada chu lak an tum ta a, Metsada tlang chu hualin a sir tuak tuak ah te chuan camp 8 lai a din a, chung sipai rual tam tak te chuan Metsada tlang chhip a Juda raltlan puitling, nunau leh naupang te awm mi 967 mai te tukdawl leh man chu an thil tum a ni.


Chutia kum 70 na AD a Jerusalem leh Temple a chhiat hnu ah chuan ala dam chhun Juda pasaltha te chuan an ralthuam te chu paihthla tlawm mai zai rel chu an tum awzawng lo va. Hmun hrang hrang hmun 3 ah inthenin awmhmun an khuar a, Jerusalem chhimlam a awm Herodion ah te, Dead Sea kianga awm Metsada ah te, Jordan rala awm Mikhvar hmunah te chuan an inkulh hlawm a ni.


Chung la dam Juda te um zuia tukdawl tu tur chuan Rome sipai hotu Lukilius Basus chu ruat ani a, hepa hi Juda ram awp tura dah Judea Commisioner a ni. Hun rei lote chhung Herodion hmun chu a hual atangin ni rei lote ah a la thei ta mai a, chumi hnu ah Mikhvar hmun bei leh tur chuan a thawk chhuak nghal a, he hmun hi chuan kaina tur hmun chheng chhe tak a awm anih mai bakah kulh rinawm tak neia sak ani a, he hmun ah hian Jerusalem atanga Juda ral tlan sang tam tak te an lut khawm a ni.


He hmun lakna tura Rome hote chuan lei chhun vum hmanga lei an dawh te chu an hlawhtling hlei thei lo a, a chhanchu, Juda pasal tha te chuan an rawn run thut thut ve reng vang ani a, tichuan, hetia Mikhvar lak an tumna lamah hian Rome sipai te chuan nunna tam tak an hloh bawk a ni.


Tichuan, tum khat chu hemi hmun venghim tura Juda pasaltha te hotu Eliezer-a chu Rome hote chuan an man thei ta hlauh mai a, hei hian a pasaltha te chu a ti zam nasa em em mai a, mi tam takte chu Rome hote hnenah chuan tlawmin an inpek phah hial hlawm a, amaherawhchu, mi tam tak te chuan do zui zai an rel reng ta tho a ni.


Tichuan, Rome hote chuan eng ti tiin emaw he khua hi an la thei ta a, hemi tumah hian Juda pasaltha mi 1700 lai an thi a, tin an mi man hmeichhia te leh naupang te chu ram dangah sal atan an hralh vek bawk a ni. Amaherawhchu, chuti chung pawh chuan Juda mite chu mi tam tak an tlan chhuak thei a, heng tlan chhuak hote hi Jordan rala Gilad tlang ramhnuai velah te chuan tlan lutin an biru hlawm a. Tichuan, chung an bihrukna atang te chuan Rome sipai te hi an la do zui ta cheu a ni. Tichuan, Basus-a chuan chung tlan chhuak te chu a um zui a, hetia a umzuina ah hian henglai ram hnuai leh ngaw a thing to te chu a kit eng vek bawk a ni.


Chuti chuan, Juda tlan chhuak hote chuan an rawn nangching dawn tho tho tih an hriat avangin Rome Legion te chu an vaia thawk chhuakin an hotu pa Yehuda ben Ari ho chuan an bei ta chiam mai a, hemi ni hian darkar rei tak chhung an inbeih hnu chuan Juda mi zawng zawng te chu an thih zo ta vek a ni, hemi ni hian Juda te mi 3000 lai te chuan nunna an chan a ni.


Tichuan, chutianga Juda te tanhmun pahnih an tukdawl theih tak hnu ah chuan ala bak pakhat Metsada hmuna Juda inkulh te chu bei leh turin an thawk chhuak leh ta a , he Metsada hi Dead sea kam thlang lam panga tlang pawng chheng chhe tak, lawn kai harsa taka awm a ni a, hetah hian Juda pawl "Sikarim" hote chu an in khuar a, he mite pawl hi Temple chhiatna tura Rome sipai te do chhuak hmasa ber tute an ni a, he hmun Metsada a in kulh Rome sipai te chu indo tan tirh ah khan an lo um chhuak tawh a ni.


Hemi te pawl hi an ralthuam chu chemte luzum hi ani mai a, chu mi hming changchawi chuan an pawl hming ah pawh hian Sikarim tia koh an nita a ni, Sika (Chemte luzum). He an chemte hi mi pangai anga incheiin an puanhnuai ah an thukru a, chumi hmang chuan Rome hote mai bakah Juda mite pawh nise Rome hote tanrual puitu nia an hriat chu an phil hmiah hmiah mai thin a ni.


Hetianga an chetna firfiak avang hian indo tantirh lamah khan Jerusalem khaw chhung atangin Juda ten hnawt chhuakin an hotupa Menakhem-a chu manin an that a, tichuan, chung an hnawhchhuah te chu Metsada ah hian an hotupa Eliezer ben Yair-a hovin hetah hian an inkulh ta a ni. He tuna an hotupa Eliezera hi an hotu hmasa ber Rome hote lo luh tirha an laka helna lo chawk chhuaktu Yehuda tupa te zinga mi a ni.


Rome hoten Metsada an hual

Kum 72 AD ah chuan Juda rama Rome Commisioner te chu inthlakin Basus-a chu Flavius Silva chuan a rawn thlak a, tichuan, tun tuma Metsada lak pawh chu amah Silva kovah chuan a innghat ta a ni.


Tichuan, Silva chu sipai tam tak te nen thawk chhuakin Metsada tlang hualna tur atan a tuak tuak ah Camp 8 lai a sa a, camp leh camp inkar ah te chuan Juda mite an tlan chhuah theih lohna turin pal a hung chhuak vek bawk a ni. Chutianga pal an hung zawh veleh chuan a tlang chhipa lawn kaina tur leh an kulh bang sut kehna khawl te hlan kai theihna turin tlang thlang lamah chuan lei chhun vum hmangin dawhkai "SOLELA" asiam tan ta a, he dawhkai siam hi thil hautak tak anih avangin Rome sipai hnathawk tam tak te mai bakah sala an lo man tawhsa Juda mi tam takte chuan an siam ta mup mup mai a ni. He hna an thawh chhung zawng hian chung lam atangin Juda pasaltha te chuan meichher alh leh lung tum te hmangin an rawn vawm buai ve reng a, chuvangin hna chu a muan phah em em a, tichuan, kar tam tak an thawh hnu chuan an dawhkai chhun te chu an peihfel thei ta a, chutah chuan an 'MEKHONAT MATSOR" kulh bang sut kehna te chu an hlang tan ta a ni.


Amaherawhchu, tlang chhipa Juda awm te chuan kulh bang dangdai tak mai Rome hote kulh sutkehna in a sut chhiat theih loh tur kulh bang an lo sa chu niin, he an kulh hi a tuak tuaka thinga siam ani a, a karah chuan meter 4 laia chhahin lei an chhungkhat leh a, hei hi an khawl hmanga an han sut vel pawh chuan a ting ulh ulh chauh mai a, a lo sut chhiat theih der loh mai a ni.


Tichuan, Silva chuan a sipai te hnenah thu pein meichher hmanga chu kulhbang thinga siam chu hal turin thu a pe a, tichuan, kulh bang chu a kang tan ta a, tichuan, a tir lamah chuan Juda te lama tang ni awm takin khawchhak thli na takin a rawn tleh hum hum a, chu chuan kulh bang kang chu Rome hote lamah chhem pheiin an khawl te chu a kang kai ta hlauh hluah mai a, Juda te chu lawma hlimin an au dur dur mai a, marawhchu, thawk leh khatah thli chuan tanhmun thlakin khawthlang lam atang chuan khaw chhak hawi zawngin na tak in a rawn tleh let ta thut mai a, chu chuan kulh bang chhunglam thing te pawh chu a rawn hliau kai kang ta dur dur mai a, tichuan, a kara lei an chhunvum te chu a dawl ta lova a chim ta hawk hawk mai a ni, Juda te chuan "Lalpa kan lamah a tang ta lo ve" tiin an ngui takin an tap ta hawm hawm mai a ni.


Tichuan, khua alo thim tan ta bawk a, Rome hote chuan hmanhmawh kher a ngai ta lo, tunah chuan, "Awt chhunga sa an nih tak hi" tiin, a tuk lama tha thar chhuah pui zawk turin an camp lamah an kir san ta rih a ni.


Hemi zan hi Pesakh (Kalhlen kut) zan Nisan ni 15 zan a ni a, chu chu Jerusalem leh Temple chhiat atanga a kum thumna kum AD 73 na a ni. Tichuan, chutia Rome hote an kir leh rih bawk takah chuan chuta Juda awm hote a lu nungin mi 967 te chu Leil Seder Pesakh zan ruai theha hmang turin hmun pakhatah an lut khawm a, tichuan, an hotupa Eliezer-a chuan a mipui te hmaah chuan thusawina a nei a, "Kan in chhanhim nan engmah hmachhuan kan nei ta lova, amaherawhchu, tumah hi kan tlawm mai tur a ni lo, a chhanchu, kan tlawm anih vaih chuan rawngra thei ang bera tihhlum tur tho kan ni dawn si a, chutianga min tihlum lo anih pawhin kan dam chhung atan Sal a man leh hralh kan ni ang a, rawngra leh diriamna tinreng hmachhawn chungin sala tana chhawr hlum tur tho kan ni dawn ani a ni. Rome hote chuan an sal man patling te chu ennawm chhuahna hmuna sakawlh sehhlum tir turin an thawn thin a, tin, hmeichhia te leh naupang te chu an sipai te tan leh an awp ram hmun hrang hranga nawhchi zuar tur atan an hmang thin bawk a ni. Chuvangin, tunah hian kan pi leh pute Aigupta sal atanga zalen fa nitura bawih nihna ata an chhuahna ni ah hian zalen fa angin kan thi tur a ni. Kan nupui te chu an tibawrhbang lai eng tin nge kan thlir theih ang ni? Eng tin nge kan fanau te te te chu hliam nasa tak tuar chunga sala an chhawr lai kan en theih ang ni?" Tiin thinlung na tak chung chuan a sawi a.


Hetia a thusawi zawh hian mipui te chu darkar engemaw zat an tap hawm hawm a, an kawr te an pawt thler a, a tawpah chuan an hotupa rawtna ang zalen fa anga thih mai chu an pawm tlang ta a ni.


Tichuan, Metsada kulh chhunga in zawng zawng chu an hal chhe ta vek a, hetah hian an eitur dahkhawmna in Kudam chauh chu an hal kang lo a ni, hei hi Rome hote chuan an hmuh a, riltam vanga intihlum leh thi an ni lo tih an hriat theihna tur atana an zuah a ni.


Tichuan, mipui te tihlum tur chuan hotu 10 an thlang chhuak a, chung mite chuan tap chungin an nupui fanau te an thlah fel hnu chuan, mipui zawng zawng te chu an mu tlar ta dul mai a, tap chungin Shma Israel (Aw, Israel ngaithla rawh Lalpa chu kan P-thian ani a, amah chu pakhat ani) chham chung chuan hotu 10 te chuan an rawn tihlum ta nghauh nghauh mai a ni. Chutianga an mipui te an thah zawh hnu ah chuan hotu 10 te chuan bel kehthem ah an hming theuh ziaka thum vawrin an zinga pakhat chuan a thian te mi 9 te chu a rawn that leh ta nghauh ngauh va, tichuan, a tawpah amah pawh chu ama chem chuan a in vit hlum ve ta a ni. Tichuan, chumi zan chuan Metsada tlang chhipah chuan chutiang ang chuan thihna vantirhkoh chuan ro relin tlang chhipa pasaltha te inkulhna khua chu nghilh ta dukin a reh ta tlawk tlawk mai a ni.


Tichuan, a tuk zing ah chuan Rome sipai te chu phur takin kulh bang kang hawl huam tawh chu rawn su keh hawngin an rawn lut ta a, amaherawhchu, an mak tih tak maiin eng mah lo dan tumna leh lo do tum hmel reng an tawng lo chu an hrilh a hai hle mai a, tichuan, zawi zawia fimkhur tak chunga hma lam pan zelin khawimaw sir kil atanga an lo chan rukna hmun atanga an rawn tleh chhuak huk tur lak theihna atanga inralring tak chung chuan an veh lut ta them them mai a. Amaherawhchu, khaw lailai lai taka in lianpui ding kawngkhar an han hawn nak chuan, chutianga khaw chhung lo reh tlawk tlawk nachhan chu an hre chiaingin a awmzia an hmu chiang ta hle mai a ni.


Chu in chhungah chuan mipui nunau naupang chenin mi 960 lai an lo thi sawn nulh mai an han hmuh chuan an hamhaih hle mai a ni. Chutiang ang thil tihna chu Rome sipai senior tak tak te pawh chuan tunhma lam te ah pawh an do hnam te lakah hetiang ang reng thil hi an la hmu ngai lo a ni. Tichuan, khuarkhurum chhunga nu 2 leh an fate naupang mi 5 lo biru te chu an rawn chhuak a, chung mite chuan Juda te thil tihdan chu kim chang takin an hrilh ta a ni.


Tun tumah hian Rome hote chuan tum danga an tih angin an hnehna channa ah chuan hlim leh lawmin engmah pawh an ti lova, Juda te an hmelma laka thih aia an mahni leh mahni an lo intihlum te ruang chu zah tak chungin an ralthuam te hlip thlain chibai an buk hial ta zawk a ni.


He Metsada pasaltha te huaisenna thil tih hian, kan pu te tlawm duh loh avanga an huaisenna thil tih, Yodfat khuaa puk chhunga Yosef ben Matitiahu sipai te mi 38 te intihhlumna te, Gamla tlang chhip atanga Juda mipui nunau mi 5000 zet intihlum tura an zuan thlakna te, Migdal khaw mipui 2000 lai te tuipuia an zuan thlakna te, Jerusalem a Temple kang hluah hluah chhunga puithiam te an zuan luhna te, huaisenna chu a zui ve ta a ni. Juda pi leh pute chuan milem bia Rome hote laka an Lalpa P-thian uire san tura phatsan ai chuan tia P-thian hminga an mahni nunna hial hlanna Rome ho ten an awp ram dang mite tih ve ngai loh "Mesirut nefesh" nunna thapna chu hmuh tir tur leh an ram leh hnam, an P-thian tana an rinawmna an lantir na chu ava han zahawm teh lul em.


Kum 7 zet kum 66 na atanga kum 73 na thleng Juda te an ram ngeia an hnam tukdawlna tura Rome ram ropuiin a theihpa tawp chhuaha a sipai tam tak te nena rawn thawk chhuaka an beih hnu ah, kum tam tak Rome ram tluk chhiat hnu leh, an rimra pawh hriat tur a awm tawh loh hnu kum 2000 hnu ah pawh Juda te chuan ral thum mai tum lovin, an mahni ram ngei ah zalenna sual chhuak lehin mahni ram an rawn din thar leh ta a, chutia Israel in independence a hmuh tak hnu ah chuan, kum 1963-1965 ah khan Prof' Igael Yadin hovin Archeologiest rual te chuan he Metsada hmuna Juda pi leh pu mi huaisen te sulhnu chu hai lan a chhui chiang turin beihpui an thlak ta a, hemi tumah hian an thil hmuh chhuah hrang hrang te zinga thil pahnih te chuan lung a kuai hle mai a, chu chu hmun pakhat ah hlum bel keh them 10 an hmu a, chung ah te chuan Juda pasaltha te hming alo inziak hlawm a, hei hi Rome hote kut tuara thih aia an zavaia intihhlum thu an tihtkuknaa mipui te tihlum tur an thlan chhuah hote hming kha a ni a, chung bel keh them zinga pakhat ah chuan chiang tak maiin an hotu pa hming 'Ben Yair' tih chu alo la inziak kalh mai a ni.


Tin, a pakhat leh chu, hemi hmuna an inkhawmna thin, Torah an zir khawmna thin, leh an mipui te thinlung huaisen nei tura an infuihna hmun Beit Kneset hmun chu a ni a, chu Beit Kneset sir ah chuan pindan te reuh te pakhat an hmuchhuak a, hemi hmun hi an Torah savun lehkha bu zial te leh an ziak thianghlim hrang hrang te dahkhawmna pindan a ni. Chu pindan chhuat ah chuan chung an lehkhabu zial kang bang them te chu an hmu chhuak a, chung zingah chuan thuziak chhiar theiha him pial mai pahnih an hmu chhuak bawk a ni. A pakhatna chu Dvarim (Deuteronomy) bung tawplam ami, Moshe Rabeinu chu Nevo tlanga lawna chuta tang chuan ram tiam hmun tin mai a thlirna chungchang thuziak a ni a, (Deut' 34) "Tin, Moshe chu Moav phai atangin Yerikho zawna Nevo tlang, Pisga tlang chhip ah chuan a han chho va, Tin, Lalpan Gilad ram zawng zawng, Dan thlengin a en tir a, Naftlali leh Efraim ram zawng zawng, a thlang lam tuifinriat thleng, chhim ram leh Tum khawpui Yerikho phai ruam, Zoar thlengin. Tin , Lalpan a hnenah, He ram hi a ni, Avrahama te, Itskhaka te, Yakova te hnena, I thlahte ka la pe ang," tia chhe chham meuhva a tiam thu te.. a dang leh ah chuan , Ekhezkel bu a mi ruhro a hmuh thu .. Ezekiela bung 37;12 "Lalpa P-thian chuan heti hian a ti a a ni, Ngai rawh u, in thlan te ka hawng ang a, aw, ka mite u, in thlan ata ka chhuah tir ang che.." tih lai chang kha a ni.


Nangni Metsada pasal tha te u , Jerusalem khawpui thianghlim leh a biakbuk thianghlim chhiatna hmu a, in siamtu P-thian uire san lohna tura mahni nun hial thapa he hmuna lo muhil ta te u, vawiin ni ah hian Zawlneiin a lo sawi tawh angin tun hunah ngei hian a zawlnei ka atanga Lalpa thuchhuak ang ngei chuan a thu dikna tichiang tura he hmuna in sulhnu ah te hian zah tak chung cheuin kan rawn kal a ni.


Prof' Igael Yadin leh a hote chuan an Archeolgy hna an zawh fel hnu chuan Israel sawrkar chuan a hriatrengna leh zahna entir nan Medal a siam a, a pang lehlam ah chuan Juda pasaltha hotupa Eliezer Ben Yair-a thusawi ami "Zalen fa i ni reng ang u" tih leh,,a pang lehlam ah Hla phuah thiam Itskhak Lamdan-a lo sawi "Metdasa chu a thu chhe leh tawh ngai lovang" tih an chhu kai a ni.


Tichuan, kum 1969 ah Prof' Igael Yadin te hovina an hai chhuah Metsada pasaltha te ruhro 28 lai te chu Israel sipai te chuan a thara phum tha lehin ursun tak leh zah tak chungin sipai invui dan kimchang in an vui tha leh a ni.


Metsada hmuna hmuh tur awm te

Kulh bang: kulh bang meter 1400 zeta sei, a san zawng meter 5 a sang, a sir tuak tuaka lung banga rem, a zau zawng meter 4, a awm a, heng kulh bang ah te hian ral ven in sang 37 lai a awm bawk a ni.


Shvil Hanakhash: A chhak lamah hian Metsada tlanga lawn kaina kawng te kual kawi tak tak Shvil Hanakhash (Rul lamtluang) an tih chu a awm a ni.


Hordus-a tui dahthatna: A thlang lam ah Hordus-a Lal in leh Rome hote lawnkaina hmun inkar ah hian Hordus-a chuan tui dahkhawmna hmun 12 ngawt a siam a, heng ah te hian fur laia tui a luan luh theihna tura fing tak hmanga an luankhawm tir dan te chu a hmuh theih a, henga tui fur khata an khawl khawm te hian a khaw chhunga cheng mi 1000 te tan kum 7 chhung hman theih tur khawpa tam tui a khawl thei a ni.


Lal in: Thlanglam hmun ah hian tunhma zawng chuan Hordus-a lal in ni ngeia an hriat In tha zet zet mai a awm a, heng te hi Square meter 4000 zeta zau ani a, heng te hi "Haarmon Hamaaravi" tia koh a ni, mahse, kum 1953 ah khan a hmar lam pang awih ah chuan a Lal in tak zawk chu step anga chhawng 3 an hmu chhuak ta a, tin, an rin danin a chhawng hnuai ber hi Hordus-a nupui Miriami phumna thlan anih rin a ni bawk a ni.


Kudam: He an thil dahthatna hmun ah hian in lian tak tak 15 lai a awm a, heng zawng zawng te hi square meter 5000 bial a ni.


Beit Kneset: Temple 2 na hunlai atanga an lo chin tan tawh Beit kneset chu a awm a, hetah hian tawngtaina atan te, Torah zir khawmna atan te leh luhkhawmna atan an lo hmang thin a ni.


Mikveh: Tui thianghlimna inchiah thianghlimna hmun engemaw zat a awm bawk.


Thum vawrna hmun: an kudam hmun kiang ah chuan Binian Minhala office pakhat zau hel hawl a awm a, hetah hian hmun bel keh them 10 lai an hmu chhuak a, chung zinga pakhat ah chuan "Ben Yair" tih chiang taka ziak la chhiar theih a awm, hei hi an intihhlum dawn zana a tihlum tu turte thum vawrna atana an hman ngei anih rin a ni.


Thil hmuhchhuah dang te: Hlum bel keh them 700 lai ah thuziak hmuh chhuah ani bawk a, heng a thu inziak te hi , Hebrew te, Aramit te, Greek tawng te, Latin tawng te a inziak an ni hlawm.


Tlush – Lei rawhchan a Hebrew a thu inziak ania , hei hi eitur insem dan tur an ziah thu a ni.


Mihring hming: Lei rawhchana mihring hming inziak.


Savun lehkha zial 14 – Bible bung hrang hrang inziahna.


Coin 4000 – Mered Hagadol hunlaia Juda te pawisa thir te pawh a awm.


Categories: History, Archeology, Khinukh, Education

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments