Rabi Ishmael-a chuan Ngaihdamna chi li (Arbaat khilukei kapara) a awm ati a, chungte chu; Torah a 'Tihtur thupek' (Mitsvot Ase) kan bawhchhiat palhin, ngaihdam dila kan inlamlet chuan, rorelna hmaah sawichhuah sak miah lovin ngaihdam kan ni a, mahse, 'Tihloh tur thupek' (Mitsvot lo taase) kan bawhchhiat erawh a, ngaihdam kan dil a, kan inlamlet chuan, 'Yom Kipur' hmangin min ngaihdam sak thei a.

    Tin, 'Mitsvot Khiuv Karet' (Van atanga thihna dawn tirna) emaw, 'Mitot Beit Din' (Beit Din 'Rabite'n thi tura a chungthu an rel ang chi sualna)  emaw kan bawhchhiat a, ngaihdam kan dila, kan inlamlet chuan, 'Yom Kipur' vawi engemaw zat leh, Tawrhna kan paltlang phawt a ngai a.

    Tin, chung zawng ai pawha la khirh zawk chu, 'Khilul Hashem' (P' hming tihhliauna, eg; mi 10 hmuh emaw hriat emawa Shabat bawhchhiat ang te etc..,) kan lo tih palh a, ngaihdam dila kan inlamlet a, kan dinngheh bawk chuan, Yom Kipur vawi engemaw zat leh, Tawrhna leh kan thihna chuahvin a ngaidam zo a ni, ati a.

   Tin, Rabeinu Yona (Ramban-a Rav) chuan, heng zawng zawng sualna lak ata kan inlamlet a, kan dinngheh bawk a, P' thu dik zia kan puanchhuah a, Mitsvot bawhchhe lui tute kalh zawnga kan chet ngam a, P' thute sawichhe tute dodal a, an mahni sawisela, tizak a, kan puanzar chuan, khing a chunga kan sawi te pumpelh vek khian ngaihdamna famkim kan chang thei a ni, ati bawk.

    Tin, Khafets Khaim chuan, Toarah dan leh Mitsvot (Thupek) te kan bawhchhiat a, kan chunga Tawrhna te hreawmna te lo thleng tura rel theihna ang kan bawhchhiat chuan, chung kan sualna lak ata kan inlamlet a, ngaihdam dila kan dinngheh bawk chuan, hreawm ti khawp leh, tlakchhiat phah pui thei khawp leh, kan taksa chuahna leh harsatna tawn thleng khawpa  Torah tana kan nun kan pek a, Mitsvot tam tak te leh, mi dangte tana 'Gmilut Khasadim' (thilṭha tih) te kan tih chuan, hetianga, Torah tana kan tawrhna zawng zawngte chu, kan chunga Tawrhna lo thleng tur aiah chuan kan chantir zawk ta tihna aniin, chutiang dinhmun thleng hiala kan inpum pek chuan, ngaihdam kan ni dawn a ni, ati bawk . Hetianga Torah avanga kan tawrh phah anih chuan, kan tawrhna chuan lawmman a keng tel zawk bawk a ni, a chunga kan sawi tawrhna te erawh khi chuan, engmah lawmman (hlawh) a keng tel lem lo thung.

   Tin, chutiang lo pawhin, Mi chuan thil lo tisualin, a chungthu chu van aṭanga thi tura rel anih chuan, 'Tshuva' siamin a inlamlet vat ang a, tichuan, a ṭawngṭai ang a, P' hnenah chuan "Hakadosh Barukh hu.. khawngaih takin, retheihna min chantir la, ka nunna hi min zuah sak zawk ang che." tiin, a dil thei a, hei hi 'Rethei chu mitthi ang a ni.' tih anih ang in, he leia retheia a awm chuan, thi ang tluk tho ani a, chuvangin, a thihna tur chu he retheihna hian a tlan thei bawk a ni.  Hetianga, lo ti tawh te hi sawitur tam tak an lo awm tawh a ni.

    Tin, mite lak aṭanga hmuhsitna emaw, tihzahna a dawn a, a thungrulh loh bawk chuan, chu chu a tana ngaihdamna ṭha leh chance ṭha ber a ni bawk.

   Tin, 'Kadish' sawi laia, "Amen, Yehe Shme raba..." tih hi, 'Kavana' ṭha tak leh tak tak nena a sawi chuan, a kum 70 sualna zawng zawng te chu ngaihdam sak ani tih a ni bawk.

   Tin, Noakh (Nova) hun laia sualna ang hial sualna a lo neih tawh pawhin, inlamleta 'Tshuva' dik tak a siam chuan, Shabat chu a dan tur ang thlapin a zawm chuan, a kum 70 sualna te chu a zavaia ngaihdam sak ani tih a ni bawk .

Harav Amnon Itskhak שליט"א