HAKHOKHMA Post Post New Entry

Shiva

Posted by hakhokhma on August 17, 2011 at 10:15 AM

Shiva (Lusun ni 7 chhung)  שבעה


     Hreawm tawrh hun leh tahna kar ni 7 chhung niin Chhungkua amite an boral huna serh thin ani, kan pu Avrahama'n anupui Sarah-i a sun ang khan . ('vehafakhti khageikhem leavel' tih ziak anih angin, khag atih chu enge kan tih chuan,kar khat awh Khag hun chhung leh mo tharte inneih ni 7 chhung hlimna hun a sawina anih avangin ni 7 chhung chu serh alo nita a ni, tin mitthi thlaraute hi ni 7 chhung chu P-thian awmna 'Shkhina' hmaah anla kal thiang lova, chuvangin an thlarau chu an thlan atangin an in lamah , an in lam atangin an thlan lamah an kal tawn chhen thin a, chuvangin he ni 7 chhung hi serh thin ani bawk).


1-  Moshe Rabeinu chuan he dan hi lo siam chhuakin ,'Vayas leaviv evel shivat yamim', a tih ang te, tin Moshe Rabeinu chunchang thu ang bawka kan hmuh angin 'Vayavku benei israel et Moshe bearvot Moav shloshim yom', tih kan hmuh ang te hian a ni 30 chhung pawh Judate chuan kan lo serh ta a, he ni 30 chhung hi chu a ni 7 chhung ai hian tlemin a zam deuhva, tin Rabi Yehuda Hanasi thu atanga kan zir chhuah angin a kum1 chhung pawh Judate chuan Lusun kum1 chhung kan lo serh ta a ni. (mihring chu P-thian an pui 'tselem' a siam anih avangin amah a an pui na dik tak tluantlinna chu nei lova a thih avangin Sun thin ani).


2-  Mitthi chu phum zawh veleh atangin Shiva chu alo intan ta a. Lusunte chuan an pheikhawkte chu an phelh anga, chhuatah emaw thuthleng hniamah te chuan an thu tur ani.(chhuata thut hi Sefer Yov a kan hmuh angin 'veyashvu ito laarets' tiin, 'al haarets' ti lova ziak anih angin leh, thihna thu avanga in dah hniamna leh engmah kan nih loh zia, chapona tur reng kan nei lovin vaivuta kir leh mai mai tur tluantling kan nih loh zia lantir nan hmun hniamah kan thu thin a, 30cm aia sang lova thut tur ani.).


Seudat Havraa - Mitthi phum zawh veleh hian Shiva thutna tur in ah chuan  Lusun te chuan chaw an ei tur a ni a, he chaw ei hmasak ber hi 'Seudat Havraa' tia koh a ni a, hetah hian an mahni ta an ei tur a ni lova, a thenawm khawveng te chuan Mitsvah tiin, Lusun te ei tur hi an siamsak tur a ni.

    He Seuda ah hian Chhang , Artui chhum hmin leh, Dailuah te an ei thin a, heng ei tur te hi a bial/mum ani a, hei hian tuna thihna hi thil mum lir angin tawpna ani lo tih a entir a, tin, heng eitur te hian ka an nei lova, chuchuan Lusun te a entir bawk ani.

    Hemi ni leng hian Lusun chuan ama ta a ei thei lova, (he Seuda ah chauh hian ti an awm bawk), tin, hemi ni hian chaw a nghei chuan a zanah chuan ama ta a ei thei tawh ang. chuti anih avangin, abul hnaia ngaihsak tu tur an awm loh chuan hetiang hian ati anga, a zanah chauh chuan thil a ei tan ang. amaherawhchu, chaw a nghei theih loh chuan, ngaihsak tu tur an awm loh bawk chuan ama ta chu a ei thei tho ang.

   Mitthi chu zana phum anih chuan, a zan ah chuan Lusun chuan ama ta a ei thei lo a, tin, azan ah chuan chaw a ei duh lo a nih chuan, a tuk ah pawh chuan ama ta a ei thei lo a ni, a chhanchu, zan chu a tuk ni hmahruai anih vang a ni.

   Mitthi chu Erev Shabat ah (darkar 9na hnuah - ni chhuah atanga ni tlak thleng chu darkar 12 a  thenin) phum anih chuan Seudat Havraa chu a ei tur ani lova, Shabat chaw ei thleng chuan chaw a nghei tur a ni.

    Mitthi chu Kut ni a phum a nih chuan Seudat Havraa chu a ei angai lovin, a tuk ah pawh a ei angai lo ani.

   Mitthi chu Khol Hamoed laia phum a nih chuan, Seudat Havraa chu a ei tur ani a, mahse, thuthleng ah thuin dawhkanah a ei tur ani, achhanchu, Khol Hamoed ah Avelut (Lusunna) a awm loh avangin.

    Talmid Khakham thih ni chuan chaw nghei thin a ni.


3-  Ni tlak hnu Arsi lan hma (Bein Hashmashot) laia phum anih chuan ni 1 anga ngaih ani a, ni 6 dang a chhiar leh tur a ni.


4-  Hmun hla a awm , a phum laia lo kal ve thei lo chuan a thih thu hriattir anih atangin Shiva chu a chhiar tan tur ani.


5-  A ruang chhar emaw, thi a hmuhchhuah anih chuan Rav-te zawh chian hnuah chauh engtiang a awm tur nge tih chu a intan chauh ang.


6-  Shiva hi a thih ni atang ni lovin, a phum ni atanga chhiar tan tur ani.


7-  Shiva chhung chuan chhuatah emaw thuthleng hniam leh pher phah ah emaw chuah a thu tur ani a, zanah pawh khumah amu tur ani lova, chhuatah chauh amu ang, tin a ding thei a, amaherawh chu amah hnem tur mi an lo kal lai chuan a thu tur ani.


8-  Shiva lai hian Lusun chhungte hnem turin mi an lo kal khawm thin a, chung mi lo kal te chuan a Lusun chhung ten an chhung thite chanchin an sawi chhuah hma chuan a chanchin an sawi khalh ngai lo a ni, tin Lusun hnem tura lo kal chuan 'Tenukhamu min Hashamaim' tiin emaw, 'Hamakom inakhem etkhem.......' tih chang hmangin an hnem thin a, an ni Lusunte chuan 'Toda, Amen' tiin an lo chhang thin bawk. Tin ni 7 chhunga hnem hman lo chuan ni 30 chhung hian ni 7 chhung ang khan an la hnem thei a, ni 30 zawh atangin kum 1 chhung hian 'Titnakhem' tih thumal hmang hian an la hnem thin bawk ani.


9-  A Shiva thut ni khat na hian Lusun chuan Tefilin a zem kher angai lova, a zem duh anih chuan Bracha tel lovin a zem tur ani. (Ezekiela ziaka kan hmuh angin, 'Peerkha khavush al roshkha' tih ziak anih angin , 'peer' chuan Tefilin a entir a, chuvangin he Shiva ni 1 na hian Tefilin chu a zem kher angai lo a ni.)


10-  Shiva chhung hian 'i dam em?' tih te , hna leh inchhung sekrek khawihte, inbual leh hriak lam inhnawihte , Savun pheikhawk bunte, nupatna hmante, Torah zirte, puan suk leh nawh marte, sam meh leh hmul mehte, Rimawi tum leh ngaihthlak te, a Shiva thutna in chhuah sante chu a ti tur ani lo. Ashkenazim ho te zingah sa lam ei ngai lo an awm bawk.

   Minhag Yerushalaim ah chuan a phum ni chu a thih ni a nih kher loh chuan a Shiva ni khatna ah pawh hian Brakha tel lovn Tefilin chu a zem tur ani.


11-  A Shiva thut ni 3 chhung hian mi chu 'i dam em?' tihte a zawt tur ani lova, tin miin 'i dam em?' ti a an zawh pawhin 'Hei Lu ka sun a,' tiin a chhang tur ani, ani 4 na atang chuan a chhang thiang tawh ang.


12-  A Shiva zawh atang hian ani 30 thleng chuan mi dangte chu i dam em? ati thiang a, amaherawh chu mi dangte chuan i dam em? tih an zawt tur ani lo, amaherawh chu i chibaina thil dang 'Boker tov' tih ang thil dang chu thiang ani.


13-  Shiva chhung hian Shabat niah 'Shabat Shalom' tiin mi dangte chu a ti theiin a chhan pawh a chhang


14-  Shiva chhung hian hna reng reng a thawk tur ani lova, a hmasa ni 3 chhung lek phei chuan a awl der tur ani a, a ni 4 na atang erawh chuan, engemaw loh theih lo thil ang hna a neih chuan a ti thei ani. tin engemaw sum tam tham hloh theihna thil ang hna laklawh aneih chuan Rav a zawt tur ani.


15-  Shiva chhung chuan a taksa pum chu a bualin a sil thiang lova, amaherawh chu a hmaite, a kutte, a kete, a kekawrte leh a khuh lai velte chu tui vawtin a sil thei ang, engemaw harsatna dang tak a awm chuan a inbual theih dan tur Rav a zawt ang. Tin Shiva chhung hian ha pawh a nawt thiang ani.


16-  A insil theih dana a insil reng rengte chu a nawmsak nan ni lovin a fai nan chauh ani tur ani a, tin hmeichhiate chuan an taksa leh hmai hnawih ang chi reng rengte chu an hnawih thiang lo ani.


17-  Hmeichhia 'Nidah' chuan Shiva chhung hian Mikveh ah a inchiah tur a ni lova, Shiva zawh hunah a inbual phawt anga tichuan Mikvehah a inchiah thei ang.


18-  Hmeichhia chuan hmeichhe mawina thil tlereuh ang chi reng reng a inbel lovang.


19-  Monu chuan a mo thar tirh atanga a ni 30 chhung a Lu a sun chuan Shiva chhung hian tlereuh a inbel thei ang.


20-  Hmeichhe puitling chu a inneih hma loka Lu alo sun chuan Shiva chhung hian tlereuh a inbel theiin inbual pawh a inbual thiang a ni, nula pangai pasal nei dawn hnai lo chuan engmah ati thiang chuang lo.


21-  Nu nau nei hlim, kena , dam lo leh khaw vawtin a tih dam loh theih tur mi chauh chuan Savun pheikhawk a bun thiang a, chutiang mi nilo chuan Savun pheikhawk a bun thiang lo.


22-  Nupa chuan nupatna lam leh a kaihhnawih ang reng reng in fawhte inkuahte intur in thlit sakte eitur in chhawp sakte, inthut sikte chu a pasal emaw a nupui emaw Lusun te tan thian lo ani a, chhungkhat erawh chu inchhungkhatna lam thil hmingin inkuah leh infawh , inchibaite chu thiang ani.


23-  Shiva lai hian Lusun te chuan Torah , Zawlneite ziak, Ziak thianghlim (Sam angte) , Mishna, Gmara, Halakhot leh Agadot te chu a chhiar thiang lo ani.


24-  Joba ziak leh Jeremia tah hla leh Hilkhot Avelut te chu a zirin a chhiar thiang ani.

 


25-  Lusun (Avel) chu Shiva na a Tawngtai hunin 'Shaliakh Tsibur' (khazan) ah an tang ngai lova , midang an awm loh erawh chuan a tang thei tho va, anu emaw apa emaw a sun chuan a duh chuan a tang thei tho bawk ang.

 


26- Shiva na hmunah chuan Rosh Khodesh leh Khanuka laiin 'HALEL' an sawi tur ani lova, mipui te chuan inkhawm zawhah pawnah an sawi thei a, tin, a sawi hun lai pawh chuan Lusun chu pawna chhuah hrih tirin mipuite chuan an sawi thei bawk ang.

 


27-  Minhag (tih thin dan ah) ah Shiva lai chuan Lusun chuan Wine a in tur ani lova, tin, Zu lam reng reng pawh a in tur a ni lo, achhanchu, zu leh wine chu hlimna entirna anih vang leh (Tehilim 104;15), zu lam chuan mihring lu a tihai a, hohna leh rilruah thil dang min ngaihtuah tir theih vang a ni. Amaherawhchu, sa ei thin pumpui chak vak lo tan an chaw ei laiin an chaw ei te paitawih a tih awlsam nan wine chu tlem a in thiang bawk, amaherawhchu, hei hi thil dang vang ni lovin, a pum nuamlo tur tih dam na tur a tan chauh ani tur a ni. Tin, wine hi a in a nih chuan a brakha a sawi a ngai bawk. (Gansfried סימן רה א )


28-  Shiva lai chuan insuk leh innawh thiang lo a ni a, chutiangin thawmhnaw thar leh faite chu a ha tur ani lo bawk.


29-  Thawmhnaw fai hak tih hi kan nawmsak pui loh nan tihna ani a, amaherawh chu kan thawmhnaw hak lai chu a lo bal emaw thil kan lo tibaw palh anih chuan a faia thlak thiang ani.


30-  Thawmhnaw thar la hak loh chu mi dangin darkar chanve vel tal hak tir phawta chumi zawhah chauh ha thin an awm bawk.


31-  Lusun chuan ni 30 chhungin a hmul amet thiang lova, a lu pawh a met thiang hek lo.


32-  A pa emaw a nu emaw sun chuan ni 31 na atang chauhvin a thian ten an sawisel sak chuan a met thei a, mi dang sun chuan a ni 30 ni atangin an met tan thei ani.


33-  A Shiva zawh dawn ni a ni 6 na tlaiah chuan mitthi thlarau tan Torah zirna buatsaih thin a ni a, hetah hian Shiur hrang hrangte buatsaih thin niin, Mitsvah ruai mitthi thlarau tan buatsaih thin ani bawk.


34-  A ni 7 ni chuan zingah mite chuan an hnem anga, a thlanah an kal anga, engemaw thuthianghlim zirnate an nei anga, Kadish an sawi bawk anga, ruaite thehin Bati an chhi bawk thin ani.


35-  A thlan a kal hian Eitur Mezonot lam (Cake emaw) ei thin a ni a, amaherawh chu a thlan bul ni lo, thlanmual pawna ei thin niin Bracha sawi tur niin, Le'ilui Nishmat .... ti a ei tur ani.


36-  A thlan atanga chhuah hian kut sil thin a ni a, mahse hru hul lovin, tin Lusun te kut chu sil sak tur ani a, tin sil sak hnu hian a silna no chu paih thin an awm bawk.


37-  A thlan atanga haw hnu hian Lusunte chu an inbual thin a, tin Mikveh a kal thin an awm bawk, chumi hnuah an thawmhnaw hak laite chu an thlak thin a ni.


38-  A thlan hi a ni 30 na a peih fel turin a Shiva zawh veleh hian an buaipui thin bawk a, a kum khat na a peihfel thin an awm bawk, tin a ni 7 na thlan kal ni a, zahawm taka thlan chu a lan theih nan , a Shiva chhung khan a thlan chu Cement in an khuh tir thin bawk.


39-  Engemaw vanga Lusun ngai siin Shiva a lo thut loh chuan a ni 30 chhung ngei hian Shiva a thu ve leh thei ang.


40-  Dam lohna avanga Lu a sun theih loh chuan a dam that veleh Shiva leh Ni 30 chu a ti ve leh thei bawk.


41-  Shiva chhung hian a thi chhungte chu a thlanah an kal ngai lo a ni.


42- Chhungkua ami an boral huna Lusun duh lo tu chu "Akhzari"(nun rawng) tih ani a, amah chu a chungthu ah a inngaihtuah tur ani.


43-  Kut dawn hnaiha boral chungchang thu ah Rav zawh vat tur.


44-  Yom Shishi (Erev Shabat) chuan Shabat luh hma dar kar 2 hnuah a Shiva thutna ata a tho anga, thuthleng pangaiah a thu anga, Shabat thawmhnaw a inbel tur ani.


45-  Erev Shabat hian Lusun chu ainbual duh chuan a Tsanua thei ang ber leh tui lum lovin a inbual tur ani.


46-  Shabat ni chuan Torah chu Rashi hrilhfiahna nen a zir tur ani lova, amaherawh chu Parasha te chu vawihnih leh a lehlinna chu a chhiar thiang ani.


47-  Shabat ni chuan Beit Knesetah a kal thei a, tin Beit Kneset a a thutna thin lovah chuan thut tir thin ani bawk. Beit Kneset chhunga a thutna tura an lo kawhhmuhah bulah chuan mi tlemte in an thut pui ve thin a hei hi Lusun chhungte hnemna chikhat ani. Kabalat Shabat a 'Lekha Dodi' sak laiin a chang tawp ber 'Boi Beshalom' tih hmain an ko lut thin a ni.


48-  Lusun chu Torah chhiar tur in a lawn tur ani lova, an hriat loh vanga an lo koh chuan a lawn tho tur ani.


49-  Kohen Lusun chu Kohen dang an awm loh chuan Kohen malsawmna hlan turin a kal thei ang.


50-  Shabat Minkha thleng chuan Lusunte inah chuan Tehilimte Brachotte sawi tura kal thin a nia, heng Brachot sawi nana tha chu Thei lam kung rah chite lei lam rah chite , Mezonotte ani.


51- Shiur te buatsaih thin a ni a, hemi zawh hian 'Kadish' sawi thin a niin, 'Hashkava' pawh sawi thin a ani.


52-  Motsaei Shabatah Lusunte inah chuan Arvit hman thin a ni a, Arvit zawh veleh Havdala hman pui tur ani a, an mahni Lusunte chuan wine chu an in tur a ni lova, tin chumi hnuah Lusunte chuan an kawr pawhthler a kha an ha leh anga tichuan, Shiva ah thut tir leh thin an ni.


53-  Shiva laia 'Kidush Levana' hun a lo ral chuan Lusunte chuan Shiva zawhah a Bracha nen an sawi ve leh anga, an mahni in, 'Shalom Aleikhem' an sawi lovang.

 

 * Hilkhot Avelut page a kir lehna - click here

Categories: None

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments