HAKHOKHMA Post Post New Entry

Shoftim (Parashat Nashim)

Posted by Shavei Mizoram on August 20, 2020 at 4:50 PM

Shoftim (Parashat Nashim)

Harel Kingbol

Rabbeinu Bachaya chuan Parashat Shoftim chungchang thu kam keuna atan a, a hmanah chuan “Shalom” chuan Parashat Shoftim zawng zawng a khaikhawm a ni, tiin. He khawvelah Shalom a awm theihna tur atan roreltu ruat turin Torah chuan thu min pe a.

“L-LPA in P-thian'in a pek che u in kulh kawngka zawng zawngah in hnam ang zelin roreltute leh hotute in insiam theuh vang a, mipute ro fel takin an rel sak tur a ni.”(Devarim16:18) Rorelna fel tak awm lo tase mite thil inruksakna leh tualthahna nasa tak awmin chumi avang chuan khawvel hi a awm reng thei dawn lo a ni. P-thian thupek ang taka roreltu tur ruatna avang chuan he khawvel buai a awm mai tur chu tihbo a awmin khawvel chu tha takin a awm reng theih phah a ni. Chu chu tlanna kan beisei thlen tir thuai thei tu a ni bawk. Zawlnei te sawi angin; “Tin, ani chuan hnam tin karah ro a rel ang a, chi tam tak pawh a zilhhau vang: tin, a khandaihte chu leilehna hmawr zumahte an chher ang a, an feite chu theikungah chhumna chem kawmah te an chher ang: hnam dangin hnam dang chungah khandaih an lek tawh lo vang a, indo dan pawh an zir tawh hek lo vang.” (Ishayahu 2:4).

Kan Parasha in thil ropui tak min zirtir chu kan hmelmate nen kan inkarah remna a awm theihna tur atan indona a thlen hmain an in surrender theihna tur atana chance pek Mitzvah niin: “Bei tura khua in va hnaih hun chuan remna thu han sawi phawt ula.” (Devarim20:10).

Rabbeinu Bachaya chuan ti hian a sawifiah a, hmelmate nena inbeih dawn hunah inbeihna a thlen hmaa remna thu sawi phawt tur tih chungchangah chuan eng khua leh ram pawh nise, P-thian thupek anga indona (Milkhemet Miztvah) pawh nise remna thu chu sawi hmasak phawt tur a ni a, mahse Ammon leh Moav hnamte lak ah erawh chuan remna thu sawi loh tur a ni thung, “Anni ho nen chuan remna in zawng tur a ni lo.”(ibid 23:7).

Amaherawh chu anmahni rilru puakchhuak liau liau a inremna thu min lo sawi pui an duh anih chuan (Ammon leh Moav) chu chu kan lo ngaihthlak sak tur a ni. Chuta tanga kan hmuh theih chu chu inremna thiltihtheihna ropui zia chu a ni, P-thian haw em em tute pawh ni mahse anmahni in inremna min lo sawipui duh anih chuan kan lo ngaithla tur a ni. (Midrash Tanchuma, Shoftim 18) Heti lai chang, “Gibeon khuaa awm Hiv-hote tih chauh lo chu Israel-hote nena remna siam khua reng reng an awm lo.” (Yehoshua11:19) atang pawh hian Yehoshua khan inremna siamna turin chance chu a pe vek ani tih kan hre thei a, mahse chu chu an lo hnar mai zawk a ni.

Shalom a awm theihna tur atan Israel mipui zawng zawngte roreltute thuneihna hnuaiah inpumkhat taka an awm chu thil pawimawh em em mai a ni a. “Torah in a zirtir ang che u in, roreltute’n ro an rel chu inpawm anga. Torah dan angaan zirtirna che u chu dinglamah emaw veilamah emaw inpen san tur a ni lo. ” (Devarim 17:11) Rashi chuan ti hian a hrilhfiah a, roreltute thu ang chuan in kal tur a ni a, dinglam chu veilam pawh tise, veilam chu dinglam pawh tise chu chu inzawm tur a ni, tiin. Chu chuan min zirtir chu inremna a awm theihna tur anih chuan ingneih takin kan awm ho mai tur a ni. Hetiang deuh hian kan Torah mithiamte/roreltute chuan thil an lo tisual palh anih pawhin an rorelna/thulukna chu kan pawm mai tur ani tiin.

Sefer HaKhinukh pawhin a sawi bawk. Miin thilsual engemaw alo ti palh a, chumi sawi zui a rel zui vak ai chuan a finna leh a remhriatna te chu zah a hmuh sak tum zawk ila, chute ni lo a mahni ngaihdan ang theuh leh dik ni a kan hriat ang theuh a mimal tinte kan kal chu thil thalo tak a ni. Chuvangin he thu, “thudik/dikna aiin inremna chu a hluin a ropui zawk” tih hi vawng reng ila chu chuan Shalom bayit siamin nupa inkarah pawh inngeihna a thlen zawk a ni. Kan hriat angin P-thian ngei pawhin remna a awm theihna atan Sarah tawngkam chu a tihdang lam kha. (Parashat Vayera)

Maharal chuan thil zawng zawng hlawm khata siamtu chu Shalom ani tiin a sawi. (Netivot Olam, Netiv HaShalom 1) Mi chu midang nen inngeih taka a awm anih chuan engkim chu pumhlum/famkim ani a. Shalom chuan engkim a ti famkim angin kan tawngtaina siddur bu ah pawh nise malsawmna kan sawi ho reng reng chu Shalom chuan a tawp khar vek a ni bawk. He khawvel siamna chu Shabbat ni-ah tih zawh ani a, chu chu Shalom nen chuan a inkungkaih leh a. Chuvangin Shalom bayit awmna turin Shabbat luh hmain bati chhit thin a ni. (Mishna berurah 263:30)

Shalom tih chu tawng dang a kan lehlin dawn chuan Peace tih ani deuh mai a, chu chuan a awmzia/nihna tak tak a phawk chhuak zo lo thin a. Miin “Leave me in peace/thlamuang takin min awm tir teh” ti a a sawi chuan, a awmzia-ah chuan “min tibuai lo la min kalsan teh, keimah a awma thlamuang taka awm ka duh.” tihna lam a kawk a. Chu thlamuanna/shalom miin a duhna avang chuan shalom /peace /inpumkhatna siam lo in thil chu a then hrang zawk tihna a ni. Mahse lehlamah vethung chuan shalom chu famkimna siamtu ani kan ti bawk si, chu famkimna thlentu chuan thil chu engti kawng mahin a then darh thei lo bawk si, chuvangin Shalom kan tih chu tawngdang a kan lehlin dawn chuan a awmzia tak tak a pholang zo lo tihna a ni. Thil engkim siam anihna hian a tum ber chu Shalom a ni a. Chuvangin van/shamayim pawh chu thil inmil lo tak tur mei leh tui hmanga siam ani a. Chu thil pahnih in ep thawk awmdun tir theitu chu Shalom chauh chu a ni. Chumi awmzia chu ziaka kan hmuh angin.. “A hmun sangahte chuan remna a siam a.” (Iyov 25:2)

Torah thupek leh a dan anga kan kal chuan mitinte kawng zawh chu Torah kawng dik nen chuan engkim chu a inzul vek a. Mitinte’n chu Torah kawhhmuhna anga an kal anih chuan keimah leh midangte inkarah chuan inhriatthiam tawnna chu lo awmin, mipa leh hmeichhia inkarah pawh chuan mizia leh rilru in anglo tak pawh ni ma hila inremna chu lo piang chhuakin chu chuan kan thlarau chu dinhmun sang takah vawrh chho vin chumi avang chuan Sh'khina chuan min lo chenchilhin chunglam leh hnuailam inthlunzawmna chu alo piang chhuak thei a ni. Chu chu Rabbi Akiva zirtirna angin, “Mipa leh hmeichhiate thianghlim taka an inneihna avang chuan an inkarah chuan Sh'khina chuan a chenchilh reng thin.”(Sotah 17a)

Source : https://www.facebook.com/TorahKhawvel

 

Categories: Parshat Nashim, Torah, Shabat

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments