HAKHOKHMA Post Post New Entry

Parashat Nashim Re'e

Posted by Shavei Mizoram on August 9, 2020 at 3:40 PM

Parashat Nashim Re'e

- Harel Kingbol

In kutah chuan nangni nen, in fapa te, in fanu te, in bawihpa te, in bawihnu te, in awmna a, awm Levi-ho te, ram dang mi te, pa nei lo te, hmeithaite nen hlim takin in awm tur a ni. (Devarim16:14) Kan Torah mithiam te chuan remna inthawi hlanna hlimnaah chuan hmeichhia te pawh an tel ve ngei tur a ni, tiin an sawi a. (Mishnah Berurah 529:15)

Sefer HaKhinukh (Mitzvah 488) a kan hmuh angin, chu hlimna tih chuan yain in te, thawmhnaw thar a inchei/inbel te, naupang hnenah thei leh an ei duh zawng te pek a hlim taka zai leh lam chu a ni. Chu Mitzva hlen anih lai chuan mi chuan hlim takin; ei leh in, taksa hahdamna leh thlamuang takin a hlen chu chu Mitzvah in a tum bulpui chu a ni. Chung kan Mitzvah kan tih avanga kan hlimna zawng zawngte ama hminga kan tih chu P-thian duhdan niin, chu ama hminga hlimna kan neih avanga lawmman leh a mit hmuhah lawm tlak kan nih theihna turin. Chuvang tak chuan P-thian chuan thilmak min tihsak te leh kan tana a that zia kan hriat chhuah theihna tur atan chung kut hlimawm tak chu min pe a. Chu hlimna hun/kut alo thlen chuan chung mitzvah te chu kan tisa puar leh tlai tak chungin, kan thil neih that that te hmang chuan P-thian fakin a hmaah chuan hlim taka awmin, amah chauh chu engkim min pe tu a ni, tih chu kan puang chhuak thin a ni.

Chu hlimna kan neih hunlai chuan kan hlimna chu kan tisa nawm chenna ringawt ni lo, P-thian hming fak leh chawimawi nana chu hlimna chu kan hmang anih chuanmi chuan enge tihtur ni a, enge tih atana mawi lo tih chu uluk taka ngaihtuah chungin chu hlimna avang chuan engmah bawhchhiat na nei miahlo in hlim takin a awm thei bawk ang.

Rambam chuan mitinte chuan anmahni nihna ang zelin chu hlimna chu an chen tur a ni tiin a sawi a. Naupangte chuan ei leh in (nepnawi) ah hlimna an nei a, mipa (puitling) te chuan hlimna chu sa leh yain hmangin an nei bawk a; hmeichhia te erawh chuan thawmhnaw leh tle reuh hmangin hlimna chu an nei ve thung bawk. (Mishneh Torah, The law’s of holiday 6:18)

Engvangin nge mipa te chu yain leh sa hmanga hlimna an chan laia hmeichhia te erawh chuan thawmhnaw leh tlereuh anihna chhan han en chhin dawn ila. He tisa/taksa hi kan thlarau/chhungril nihna pho chhuaktu ani tiin sawi ta ila. Chu chu kan hriat tlan angin mipa leh hmeichhiate inkarah chuan danglam tamtak a awm a, chu chu hmeichhia chu mipa chhungril atanga siam chhuah niin, (Bereshit 2:23) Hmeichhia te chu chhunglam nihna lam chu awn tam zawkin, mipa ve thung erawh chu pawnlam nihna. Hlimna tak tak nei tur chuan engkim chu a in balance tawk chiah angai a, chuvangin a tira kan sawi pawn lam/tisa/taksa nihna awn tam zawk, mipa chuan chhungril lam thil atang chuan hlimna chu nei theiin; chhungril nihna neitu hmeichhia te chuan pawn lam thil atang chuan hlimna an lo nei ve leh thei chiah bawk a ni.

“Yain chu a luh ril poh leh, finna a chhuak.”(Eruvin 65b) Mi chu yain a in avanga alo ruih deuh chuan a rilru chhungril tak tak chu a sawi chhuak thin. Mipate chuan an mood fuh vak loh lai chuan engkim chu hnar zel tumin engmah an sawi tha duh loh thin.

John Gray chuan “mipate chu Mars atanga lo kal niin hmeichhiate chu Venus atanga lo kal” tiin a ziak a. Mipate chu an rilru hah lai chuan an rilru leh ngaihtuahnate chu puk chhungah awmin an ngaihtuahna ringawt hmang chuan buaina chinfel an tum thin a, chumi anih avang chuan haihawtna leh an nupa inkar thilte chu a theihnghilh awlsam bik thin. Mahse chutiang ni loin yain tlem an in ruih deuh chuan chu a awmna puk atang chuan lo kal chhuakin a rilru leh ngaihtuahna zawng zawng te chu sawi chhuakin a buaina leh a lungngaihnate pawh chu a theihnghilh phah vek thung thin. Chumi hnuah chuan a nupui nen pawh hlim taka inkawm leh theiin hlina chu alo nei let leh thin a ni.

Hmeichhiate erawh chuan mipate angin an lungawi lohna leh thinrimnate chu ngawih bopui ringawt loin tawngkam leh chezia chuan an rilru leh a ngaihtuahnate chu sawi chhuak thei thung. Hmeichhia tana pawimawh ber chu a pasal lak atanga ngaihsakna leh fakna awka chu a ni, John Gray ziah angin, “hmeichhia chuan a pasal atanga fakna awka a dawn tam poh leh mahni inrintawkna leh a pasal tana a hlutna a hriat tam phah zel thin.” Chuvangin nupui tha leh nupui special tak neih duh chuan mahni nupuite fak fo chu thiltha taka lo ni ta a ni. Chu chu a inchei danah te an lawmna tur tawka han fakte, chu chuan amah/hmeichhia-ah ringawt hlimna a thlen lova, chu a pasal fakna awka a hriat avanga a hlimna chuan a pasal tan tha taka rawngbawl duh zelna leh a pasal tih hlim zel duhna a thlen bawk thin.

Hmeichhiate chuan inchei mawi chu an inhmeh bik a. Mipate’n yain hmangin an rilru leh ngaihtuahna an phawrh chhuak ang bawkin, hmeichhiate chuan thawmhnaw mawi an ngaina in chumi hmang chuan an chhungril mawina/nihna chu an tarlang ve bawk a. Halakha a kan hmuh angin mipa chu a tawngtai lai chuan chunglam leh hnuailam thlai hranna atan kawnghren a hreng tur ani tih a ni. (Shulchan Aruch, Orach Chayim 91:2)

Hmeichhia te rawh chuan an thawmhnaw mawi/zahawm tak an inbel reng thin a, Chu an incheina (zahawm taka an cheina/Tzanua) zahawm tak avang chuan chung lam leh hnuai lam thliar hranna pawh chu an tan chuan angai ve lo a ni. Thawmhnaw mawi tak an inbel avang chuan an hlim em em a, chu an hlim em em na avang chuan an chhungril hlimna chu a lan chhuah reng thin avangin.

Talmud (Pesakhim 109a)ah chuan hmeichhiate chuan eng thawmhnaw chuan in nge an hlimna thlen thin tih chungchang a ziak a, Rabbi Yosef chuan Babulon a awm hmeichhiate chuan thawmhnaw rawng hrang hrang inpawlh an ngaihnat laiin Israel rama awm hmeichhiate erawh chuan thawmhnaw a var lam pang an ngaina thung tiin a sawi a. Ram pawna awm, Babulon hmeichhiate chuan rawng chi hrang hrang inchawhpawlh hmanga inchei chu an duh a. Israel ram chhunga awm vet erawh chuan thawmhnaw rawng var simple pangngai chu an thlang thung a. Helai a an duhdan a inan lohna chhan ni thei awm zel din thu a rilru alo lut mai mai ah chuan ram pawna awmte chuan ram pawna awm anni tih lantirna turin rawng chi hrang inpawlh chu an duh ang a, mahse ram chhung, P-thian in a chenchilhna ram a awm tawhte tan erawh chuan simple mawi hnai taka inchei mai chu a tawk. A chhan chu rawng var chuan eng rawng dang pawh mawi takin a milh thei zel thin si.

Chuvangin Israel rama awm hmeichhiate chuan rawng chi hrang inchawh pawlh chu an mamawh ve tawh lemlo ani ange. Mize inang lo mi hrang hrangte hi pumkhata kan awmna avang chuan P-thian chu rilru hmun khat puin kan fakin kan chawimawi thei dawn a ni.


Source: Shavei Israel Bulletin 

https://www.facebook.com/TorahKhawvel

 

Categories: Parshat Nashim, Emuna, Rinna lam, Khumash

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments