HAKHOKHMA Post Post New Entry

Ṭhian chhan thih ngam mi tlawmngai Menashe hnam pasaltha te

Posted by hakhokhma on August 2, 2020 at 9:05 PM

India hmarchhak kilkhawra awm Zofa te inchhuan pui fona leh hnam dang tawng pawha leh chhuah fak a harsa kan tih thin, thu mawi leh hlu tak "Tlawmngaihna" kan tih chu a thu mai ni lo atak ngeia kan pi leh pu Menashe hnam ten an ram luah tur Kanaan ram an sah laia an lo changchawi dim diam tawh dan chungchang thu tun tumah chuan chhui kan tum dawn a ni.


Tlawmngaihna hi eng tihna nge tiin in zawt ta ila, kan chhan dan a hran nual maithei a ni, a thenin ei tur kan inpek ten kan duh reng pawh duh lo ang taka langa a ngai lo e, tia tan der ang te, a thenin, thlan laih nikhua a a lai tam tu, a thleng hmasa tu, emaw, chhiat ni that ni a, lang tam emaw, khawi lo vah chhuah nia Bus chuanna ah te tar leh upa, hmeichhia te seat ken ching te hi mi tlawmngai chu an ni e, an ti maithei a ni. Mahse, chung chu kan hmuh phak, kan tawn hriat te anih maitheih vang ani a, tin a bik takin thangthar zingah phei chuan Thian chhan thih ngam te hi mi tlawmngai te chu an ni pawh ti se, chung chu tunlaiah ataka hmuh tur zen zen a awm tak meuh loh avangin an tan chuan a awmzia hriatthiam pawh ahar lu deuh maithei a, mahse an mawh hran lo ve.


Torah (Bible) ah Number bung 32 na kan chhiar chuan Reubena leh Gada thlah hnam hnih te chuan Puithiam lal Elazara te, pungkhawm ho puipa te hmaah an hruaitu Moshe hnenah Ran rual an ngah chu chhuanlamin Kanaan ram chu lut lova Jordan ral ran vulh nana hmun tha tak chu an ram chanpual tur atan dilin Jordan ral chu kai lo mai turin an va dil thu kan hmu a, Chu an dilna thu zet chuan an hruaitu Moshea lung a ti awi lo tak zet a, ani chuan, "In unau te indonaah an kal ang a, nangni chu hetah hian in lo awm mai ang maw?" tiin, a zawt let ta khauh mai a.


Chu veleh an ni chuan inthiam lov takin chutiang ani love, kan unau ten an ram chanpual tur an neih kim hma chuan kan mipa ralkal chin zawng zawng te chu inralthuam vekin an hma kan hruai sak zawk ang, tiin an sawi ta a, Chutianga an sawi ang chuan Moshe chuan Puithiam Elazara leh Yehoshua hnenah chuan ram in va thlen hunah chuan Heng hnam hnih Reubena leh Gada thlah te hian in hma hruai sakin an inralthuam loh chuan an dil ang Jordan ral ram hi in pe tur ani lo tiin thu a pe ta a ni.


Chutiang ang chuan heng hnam hnih te hian Jordan ral ram an dawn theihna tur hian kum 7 chhung zet an mipa ralkai chin zawng zawng te chuan an unau Israel hnam dang hote ral an dopui hmasa dawn ta tihna a ni.


Amaherawhchu, thil mak deuh chu hemi bungah tho hian bung 32 na chang 33 na ah hian hetilai Jordan ral ram pawh dil ve lem lo tu Menashe hnam zatve te tana Moshea hian ram a pek ve thu kan hmu tel tlat a ni.


Heti lai Number bung 32 na bung tluan kan chhiar chhuah pawhin Joshua bung 17na chang 1na a kan hmuh angin Menashe hnam te chu indo mi ni mah sela, heti lai ram an neih tel ve na tur hian Reuben leh Gad hnam mipa te angin heti lai Jordan rala ram pek Menashe hnam zatve mipa te hi indona a tel tura phut an ni ve miah lo a ni.


Amaherawhchu, kan pu te Menashe hnam pasaltha te chuan chutianga an unaute ral dova kum 7 ngawt ram mua an thangbo hlana mahni in lum tapchhak lai zawla nupuite bai chhuan kianga thingpui sen no dawm chunga in lama lo thangchhuah ve ringawt chu an tum bik awzawng lo mai.


Joshua bung 22 na kan chhiar chuan, an ral do te an zawh fel hnu chuan Reuben hnam pasaltha te, Gad hnam pasaltha te leh Menashe hnam zatve pasaltha te hnenah an intiam ang takin an hlenchhuah tak avangin an ram lam Jordan rala an nupui fanau te hnena kir leh tawh turin thu a pe a ni. Hetah hian Menashe hnam zatve pasaltha te an tel ve ta chiang a, chumi awmzia chu indona a telve tura intiamkam leh phut an ni ve lo nachungin lu chhum ban chhum huama Israel hnam pasaltha te ral hmatawng atan an mahni Pasaltha tlawmngaihna liau liau avanga an tel ve thu ka hrethiam thei ta a ni.


Tin, chumai ani lo, he bung hi kan chhiar chhunzawm zel chuan a chang 7 na chhovah chuan Joshua chuan Reuben leh Gad hnam tel lova a hranpaa abiak thu leh mal tha bik a sawm thu kan hmu tel bawk a ni.


Amaherawhchu, he a malsawmna kharna ah hian thu mak deuh mai a zep tel a, chu chu, "In hmelmate laka in rallak te kha in unaute nen insem tlang rawh u" tiin a sawi tel kher a, hei hi a mak khawp mai, in unaute a tih hi tute nge ni ta ang le? Menashe hnam zatve dang ram chhunga ram nei te kha em ni ang le? Mahse , an ni te chu an ram sah kuak na turin indona ah an tel ve tho si a, an nite kha ni ta ang se chuan rallak chu chan hnih an dawng bik dawn tihna ani a, chuvangin an ni kha chu an nih a rinawm loh a ni.


Ni e, Deuteronomy bung 3na chang 18 na a kan hmuh angin, Jordan rala ram nei ho hnam hnih leh a chanve te zingah a hnam hnih Reuben leh Gad ho te chuan an lo intiamkam tawh leh phut an nih angin an mihuaisen zawng zawng ralkai chinte chu indona ah hian an tel ve vek a, chuvangin an ram lama an in leh lo ran rual te, an nupui fanau te venghim tur pawhin an pasaltha te tumah an inhnut chhiah thiang ta lo a ni. Chuavangin, heti lai rama ram nei ve Menashe hnam pasaltha te ho chu Menashe hnam zinga a zatve chauh pawh ni mahse, intiamkam leh phut an nih ve miau loh avangin an ral do dan turah an mahni tlawmngaihna liau liau hmangin a zatve te chu lu chhum ban chhum huama ral do hmatawng tura feh chhuakin, a zatve dang leh te chuan heti lai Jordan rala hnam hnih leh a chanve te ram venhim hna chu an lo thawk ve thung a ni.


Tichuan, chung Menashe hnam pasaltha zatve zahve lehte chuan venhim lam hna in lamah an thawk ta a, ral dova chhuak an nih ve miau loh avangin rallak engmah khawm tur an nei ve ta lo va, chuvangin Joshua chuan an unau ral ram Kanaan rama cham mek haw mai tur te hnenah chuan in lam an thlen huna an unau venhim hna thawk tu Pasaltha te hnenah chuan lungrual taka an rallak te sem ve turin a ti ta tihna a ni.


 

Tin, Zawlnei Shmuela bu 1na bung 30 na ah pawh , heng hnu daih Israel ten Lal an neih hmasak ber Lal Shaula leh afapa te ruang chu Beit Shean kulh bangah an hmelma Philistia ho ten mualpho takin an khai thu an hriat ve leh, Yavesh Gilad hmuna cheng an pi leh pu te chen atanga thian chhan thih ngam Menashe hnam pasaltha te chuan a zan a zanin an awmna hmun hla tak atang chuan zu la in, an unau an mi leh sa te ruang chu ral ram hmun hlauhawm leh an nunna hial tana hlauhthawn awm ah pawh ni se, riah lovin an zuk senghawi thu kan hmu bawk a ni.


Hetiang taka thian chhan nana thih ngam mi tlawmngai hnam pasaltha te thlah kan lo nih vang hi nge, keini Menashe hnama inchhui zofa te hian kan pi leh pu te chen atanga kan lo inchhuan pui em em thin "Thian chhan thih ngam mi huaisen tlawmngai" tih thu te hi kan lo vawn ve khauh mai le.

 

Categories: Judaism, History, Article

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments