HAKHOKHMA Post Post New Entry

Parashat Vaetkhanan- Parashat Nashim

Posted by Shavei Mizoram on July 28, 2020 at 5:05 PM

Va’etkhanan

- Harel Kingbol

“Tunge ni Juda chu?” tih chungchangah hian inhnialna tamtak a awm thei awm e. Khawvel hmun hrang hrang atangin Israel ramah rawn pem lut zelin, chu chuan thil thar tamtak a rawn pian tir zel a, chumi avang chuan inneih pawlhna te alo piang chhuak ve zel bawk a. Mahse lehlam a vethung erawh chuan thlah tute atang tawha Juda lo ni tawhte lah chuan an duh tawkin Juda mi nihna chu an nei ve leh tho bawk si nen.

Mi zawng zawngte chu an thlah tute Juda an nih avang ngawtin Juda an ni kherlo a, Halakha danah chuan chu Juda anga lopiang chu anu chu gentile anih chuan (apa chu Juda dik tak pawh nise) Juda anga ngaih ani chuang lo a ni.

Tunge Juda chu tih chungchang kan Parasha-ah kan hmu a: “nupui pasalah in nei tur ani hek lo, in fanute chu an fapate in neihtir tur a ni lo va, an fanute chu in fapate in neihtir tur a ni hek lo. In fapate, mi zui lai hi pathian dangte biakna lamah an hruai kawi mai ang a; Tin, “L-LPA thin pawh chu in chungah a thawk ang a, a tiboral thuai mai ang che u,” (Devarim7:3-4) ti a ziak kan hmuh angina inneih pawlhna hi kawng hnih a awm thei a:

- Gentile mi pasal atana neih

- Gentile mi nupui atana neih.

Mahse hemi atang ringawt hi chuan tu zawk hian nge (mipa/hmeichhia gentile kawppui atana nei) pathian dangte iakna lamah hruai kawi zawk ang tih chu chiang taka hriat leh sawi theih ani lo. A chung a, a chang awmte kan chhiar chuan chu inneih pawlhna vanga thiltha lo tak lo thleng thei avang chuan inneih pawlh phal anih lohna chhan kawng hnih han sawi leh ila “A pasal (gentile) chuan I fanu (Juda fanu) chu ka (P-thian) kawng dik atangin a hruai bo ang e?” “A nupui (gentile) chuan I fapa (Juda fapa) chu ka(P-thian) kawng dik atangin a hruai bo ang e?”

Mahse, hemi pahnih avang ringawt pawh hian kan buaina chu chinfel theih ala ni ta chuang lo, a pathumna lo en leh chhin ila: “Ani chuan I(n) fapate, mi zui lai hi pathian dangte biakna lamah an hruai kawi mai ang a/ For he will turn away your son from following Me”.

Rashi chuan ti hian a hrilhfiah a: Ani/Amah/He tih chuan gentile mi pasal atana neih tihna ani a (Juda hmeichhia gentile pasal nei). Chu gentile pasal atana a neih chuan I(n) fapate milem pathian biakna lamah ah a hruai ang tih laia I(n) fapate a tih chu an tute(grandson) a ni. (see Rashi, Bereshit 20:12)

Rashi hrilhfiahna chu chiang zawkin dah leh ta ila:- I(n) fapa tih chu tute(grandson) tihna a ni a, I fanu fate tih chu I fanu in gentile pasal a neih avanga I tute (grandson) dinhmun hlauhawm (milem pathin biakna a lut mai thei dinhmun a awm reng) taka awm rengte sawina a ni.

Hemi hian min zirtir chu juda nu chuan gentile pasal lo nei ta pawh nise an fa lo piang chu i fapa tih atan chhiar theih a ni a, mahse hmeichhia juda ni lo in juda mipa lakah fa nei ta se chu nau lo piang chu I fapa tih atana chiar theih ani lo.

Chuvang tak chuan a chunga kan hmuh ang in a, “an fanute chu in fapate in neihtir tur a ni hek lo” tih thu zawh hnuah chuan pathian dangte biakna lamah an hruai kawi mai ang tih belh ani ve lo a ni, a chhan chu pathian dangte biakna lamah hruai kawi pawh ngai loin anu (naute nu) chu gentile mi a ni tawh sa reng avang in.

Hemi Rashi hrilhfiahna angina Halakha a awm a, chu chu Talmud pawhin pawmpuiin ti hian ziah a ni bawk, “Juda hmeichhia atanga nau lo piang chu I fapa a ni a, mahse gentile hmeichhia atanga lo piang erawh chu I fapa a ni lo.” (Kiddushin 68b)

Hemi tan chhan hian Rambam pawhin gentile hmeichhe (a pasal juda pawh nise) fa chu Juda ah chhiar a ni lo tiin Rambam chuan a sawi ve bawk. (Mishneh Torah, Prohibited Relationship 12:7)

Anih chuan hmeichhia atangin an fate Juda a chhiar leh chhiar loh anih chungchang chu engtin nge hrilhfiah theih ni ta ang? Hmeichhia (nu) chuan a fate nihna turah chuan eng thiltih theihna nge an neih bik tak ni ang le?

Rabbeinu Bakhaya chuan nute hian an fate-ah an mahni nihna ang chu an tuh/dah ani tiin a hrilhfiah. (Bereshit 29:25) Chuvang chuan ani min thlahtu kan nute pawh an fate’n an mahni (an nute) zia ang an neih zel na chhan chu. Rakhel fate pawh mi ngawichawi tak anni a. Yakova’n Rakhel tan thilpek a thawn chu apa Lavan chuan Leah hnenah a pe a, mahse Rakhel chuan engmah sawi loin a ngawi san mai a. Chuvang chuan a fate ho zawng zawng pawh mi tawng tlem (a tha zawngin) an lo nih phah a. Benyamin, Rakhel fapa chuan Yosef chu hralh ngei ani tih a hria a, mahse engmah sawi loin a ngawi mai a. Lalnu Ester (Binyamin hnam) pawhin a nihna (Juda) chu a sawi lang kher lo a. (Megillah 13b) Leah erawh lawmthu sawi reng leh fakna thu sawi reng thin a ni a. Chuvangin a fate pawh lawmthu sawina lamah an tha leh em em a, ziak a kan hmuh angin: “Juda, nang zawng i unauten an fak ang che.” (Bereshit49:8) Lal David, Leah thlah kal zel pawhin ti hian a sawi a, “Aw, L-LPA hnenah lawm thu hril rawh u.” (Tehillim136:1)

Imrei Shefer chuan chhul (womb) leh Mikveh a tehkhin a (Juda a in convert dawn chuan kan tih ngei ngei chu mikveh a inchiah). A chhan chu (Juda)hmeichhe chhul chhungah chuan Juda lo la ni tur la piang silo naute tamtak an awm avangin. Hmeichhiate’n zahngaihna leh khawngaihna nasa tak an nei ang hian P-thian pawhin he khawvel tan thiltha tamtak a ti ang a, keini pawhin thiltha tamtak kan tih theihna turin bawkin he khawvel a siam tantirh atang rengin zahngaihna leh khawngaihna nen chu thiltih theihna chu min hnutchhiah bawk a. Yain pawh no a kan thlit chhuah hnu a kan in zawhg tawh hnuah pawh noah chuan yain chu ala chambang thin ang chiah hian P-thian pawhin he khawvel tan hian zahngaina nasa tak a dah reng ang in a, Hmeichhia pawhin nau an pai a, nau an hrin hnu thlengin khawngaihna leh hmangaihna tawp chin nei lo vin an fate an hmangaih takin an enkawl reng thin a, chung anih avang chuan an mahni mizia leh nihna chu naupangah chuan tamtak a bet reng thin a ni, chuvangin Juda inthlah chhawn zelna turah chuan Juda hmeichhe hrin ngei fa chu alo pawimawh ta em em a ni.

Source : Shavei israel Bulletin

https://www.facebook.com/TorahKhawvel


 

Categories: Parshat Nashim, Khinukh, Education, Torah

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments