HAKHOKHMA Post Post New Entry

Parashat Nashim: Shelakh

Posted by Shavei Mizoram on June 11, 2020 at 3:25 PM

Parashat Nashim: Shelakh

- Harel Kingbol

 

“Israela thlahte bia la, an hnenah, 'Heti hi ani ang a, ka hruaina tur che u ram in va thlen a, chu mi ram chhang in ei hun chuan L-LPA hnenah then thilhlan in hlan tur a ni. In chhang hmeh hmasak ber zinga mi hlawm khat chu then thilhlanah in hlan tur a ni. (רֵאשִׁית֙ עֲרִסֹ֣תֵכֶ֔ם חַלָּ֖ה תָּרִ֣ימוּ תְרוּמָ֑ה כִּתְרוּמַ֣ת גֹּ֔רֶן כֵּ֖ן תָּרִ֥ימוּ אֹתָֽהּ) hruiha mi then thilhlanah in then angin in then tur a ni. In thlahte thlengin in chhang hmeh hmasak ber chu L-LPA hnena then thilhlan atan in hlan zel tur a ni”. (Bamidbar15:18-21)

 

Chhungkaw nu berin Shabbat atan a hran pa a chhang a siam a, Challah a lakhran thin hi a chunga kan sawi In chhang hmeh hmasak ber zinga mi hlawm khat chu then thilhlanah in hlan tur a ni. (רֵאשִׁית֙ עֲרִסֹ֣תֵכֶ֔ם חַלָּ֖ה תָּרִ֣ימוּ תְרוּמָ֑ה כִּתְרוּמַ֣ת גֹּ֔רֶן כֵּ֖ן תָּרִ֥ימוּ אֹתָֽהּ) nen khian a in ang reng a ni a, a chhan chu nu chuan in a chhang hmeh atang chuan challah chu a lakhran ve tho avangin. Beit Hillel ngaihdanah chuan hmeichhia pasal la neilo te pawhin he challah lak hran na hi an ti ve thei tho a ni tiin. (Yore Deah 328)

 

Tunlai hunah Temple kan neih tawh loh avangin he challah lak hranna hi a nihdan tur ang taka kan tih theih tawh loh avangin kan chhang hmeh atang chuan a them te reuhte la in hriatrengna angin kan lo ti ta zawk a, chu chhang them kan lak chu kan hal emaw polythene/lehkha ten tuam in chumi hnuah kan hal emaw thin ta a ni. Chazon Ish ngaihdanah chuan chhang phut kan hmeh tur chu 1.200kg a rit chin anih chuan beracha sawi loin Challah chu lak tur a ni a, 2.250kg chinah chuan challah lak dawnin beracha sawi a ngai.

Challah lak chu hmeichhiate’n Mitzvot an neih pathum te zinga pakhat ani a, mahse chumi hrereng chung tho si chuan tunlai hunah chuan mi tam zawkte chuan readymade an lei mai thin. An chunga mawhphurhna leh an mahni pual liau liau bik Mitzvah awlsam taka hlen theih a ni reng laiin engati nge chung readymade chu an lei tak zel na chhan?

 

In chhungkhur a malsawmna leh challah lak hran Mitzvah hian in zulna deuh mai an nei a. Sforno chuan ti hian a sawi a, Israel fate ram enthlakna chungchang avanga sual naah an tluk hnuah chuan chhungkaw tinte chuan an inchhungkhurah malsawmna an dawn leh theihna turin he challah inthawina hi an hlan alo ngai ta a.. “Rah hmasa te zinga a tha ber apiang te, in thil hlan tinrenga a tha ber, in thil hlan zawng zawng a mi chu puithiamte ta tur a ni, an inah malsawmna a cham hlen theihna turin chhangphut hmehhlawm tha ber chu puithiam hnenah in pe tur a ni”. (Yechezkel44:30)

 

Zawlnei Elija pawhin engtin nge a tih… “Tin, Elijan a hnenah, "Hlau suh; i sawi ang chuan va ti ta che: amaherawhchu chu mi chuan chhang te tak te mi han siam phawt la, chu chu mi rawn lak la, chu mi zawhah chuan i tan leh i fapa atan i la siam dawn nia. L-LPA, Israelte P-thianin heti hian a ti a ni, 'L-LPAN lei chungah hian ruah a rawn surtir hma loh chuan chhangphut bel chu a ruak chuang lo ang…”(1Melachim17:13-14).

 

Sarah puaninah Rivka a luh tak avangin malsawmna pathumte chu puaninah chuan alo kir leh ta a. Englai Shabbat dawna bati/eng alh chu a kar leh Shabbat dawn thlengin a alh reng thin a, zahngaihna chhum chuan englai pawhin puanin chu a hual reng bawk a, chhang malsawmna a awm reng bawk a. (Rashi, Bereshit 24:67) Maharal chuan heng malsawmna pathumte hi hmeichhia te’n anmahni pual bik Mitzvot an hlenna atang chauh a neih leh dawn theih a ni, tiin a sawi. Shabbat dawna bati/eng alh chuan a entir chu nu hoten Shabbath dawna bati an chhit thin a ni a, (Hadlakat Nerot) zahngaihna chhum chuan a entir ve leh thung chu Niddah dan tha taka zawmna niin, chhang malsawmna chu challah lakhran chu a ni. (Gur Aryeh, Bereshit 24:67) Tichuan he Mitzvot pathum te hming theuh atang hian Channah/חנה (Challah, Niddah, Hadlakat Nerot) chu alo chhuak ve chiah bawk.

 

Enge Challah Mitzvah chu a ropui viauna leh inchhungkhurah malsawmna thlentu anih theihna dan, chumi tur chuan a chhungril lo en ho ila. Kan Torah mithiamte chuan (Yerushalmi, Shabbath 20a) ti hian an sawifiah a. Chava chuan hriatna thei P-thianin ei lo tur a tih chu a ei avang chuan khawvelah thihna alo awm ta a, hmeichhiate’n tha taka an Mitzvot pathum te an hlen anih chuan chu sualna chu an siam tha thei a ni tiin, chuvangin hmeichhiate hnenah chuan he khawvel tana damna thlen thei Mitzvot ropui tak challah, Hadlakat Nerot leh Niddah dante chu pek an lo ni ta a ni.

 

Mihringte chuan kan ngilneihna chu chhang (eitur nei lote hnenah eitur pek), eng (bati/mite tana thiltha tih) leh thisen (midangte tihnat loh) hmangin. Zahngaihna khawvel tan chhang (khawvel nunna)ang a ni a - P-thianin mihring min siam dan pawh hi kan en chuan chhangphut kan hmet a, chhang kan siam ang hian P-thian pawhin vaivut atangin min siam a ni a, “Tin, L-LPA P-thianin leia vaivutin mihring a siam a”. (Bereshit2:7) Zahngaihna chu khawvel tan eng ani a: “Mihring rilru chu L-LPA khawnvar a ni a,” (Mishlei 20:27) “Tupawh mihring thisen chhuahtu….”(Bereshit 9:6).

 

Challah lak hran chuan taksa tan a tharin chakna a pe a, Shabbat bati chhitna chuan thlarau a ti famkim a, Niddah dan tha taka zawmna chuan a chunga mi pahnihte chu a suihkhawm ta a ni. Chu thisen thianghlimna (Niddah dan zawmna) chuan inchhungkhurah, taksa leh leh thlarau zawng pawhin thianghlimna a thlen a. Chuvangin heng Mitzvot pathum an neihte hi he khawvel tan thawk lakna leh nunna pe tu ani tih hrereng in tha tak leh uluk takin an zawm angai a. Challah Mitzvah chuan he khawvel tan nunna a siam a ni kan ti a, chumi nunna chu kan nitin khawsakah malsawmna in a rawn zui ve leh bawk.

 

“…..amaherawhchu lei atangin chhum a lo chhuak a.” (Bereshit Rabbah14:1 quoting Bereshit 2:6) Maharal chuan Challah Mitzvah chu khawvel siam famkimna hmanrua a ni ti hialin a sawi a, achhan chu chhang/challah chu tui leh chhangphut atangin siam a ni a, chutiang chiah chuan lei atanga chhum lo chhuak chuan lei/vaivut chu a tihnawng ve thin bawk a. Nu chuan chu a chhang hmeh atang chuan thil thianghlim (challah) chu ala hrang ang chiahin thilsiam zawng zawngah chungnung ber leh thianghlim ber chu mihring te kan ni. Chu chhang siam dawnah chuan tihdan thinah chuan chhang chu a kawhkalh/phiar kikawi thin a ni a, chu chuan a entir chu thei ei thianglo ei avanga keimahni chhunga tha leh sual inbeihna lo awm ta chu a ni.

 

Kha hriatna thei kha Wheat ngei a ni tiin Rabbi Yehuda chuan a sawi bawk. (Sanhedrin70b) Chu thei (wheat) ei na hcuan a hrin chhuah tak a chu a chi (a hum) te chu hmun hrang hrangah lo awm darh phah ta a ni. Tichuan chhang chu kan han hmeh zawh hnuah chuan kan han phiar kikawi ta a, chu chuan nghet takin chu sual a tlakna atang chuan nghet takin P-thian hnenah chuan kan bei duh a ni tih a lantir a. Kan chheh velah indona, buaina leh politics chi hrang hrangte awm reng mahse chhang/challah pawh nghet takin kan thui/phiar khawm angin chung kan chheh vela buaina te chuan min phel darh lo se.. phel darh a hnekin famkimna chu kan chunga lo thleng zawk se la. Chuvangin chung famkimna leh pumkhatna thlen theitu Mitzvah ropui tak, Challah Mitzvah chu hmeichhe te hnenah kher pek a ni.

Source: Bulletin Shavei israel

 

Categories: Parshat Nashim, Shabat, Torah

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments