HAKHOKHMA Post Post New Entry

Parashat Nashim Naso

Posted by Shavei Mizoram on May 26, 2020 at 5:00 PM

Parashat Nashim Naso

- Harel Kingbol


Parashat Naso-ah chuan thu lungngaih thlak tak mai Sotah (pasalin a nupui mipa dang nenaa rinhlelhna) chungchang kan hmu a. Engatinge a pasal chuan a nupui chu a rinhlelh mai. Hmeichhia chu a pasal rinhlelh ang ngei chuan alo awm tak tak em? Engmah thil chiang tak a awm theih loh avangin Torah chuan chu thil chu thil tak tak ani em tih lan theihdan tur a sawi chhuak a ni.

A pasalin a nupui a rinhlehna chu a tak a ni ngei em?

Tih chian theihna tur chuan hetiang a tih a lo ngai ta a ni. Torah chuan chutianga rinhlelhna a awm anih chuan mipa chuan a nupui chu Kohen hnenah a hruai ang a, barli a keng tel bawk tur a ni. Kohen chuan Mishkan ami tui thianghlim chu laiin Mishkan chhuat a vaivut chu tuiah chuan a phul ang. Tichuan chumi keng chuan hmeichhia chuan mipa dang nen an awm dun leh awm dun loh chungchang thuah chuan chhia a chham ang a, ti chuan chu tui chu a in ang.

Chumi hnuah chuan hmeichhia chuan mipa dang alo chetsual pui tak tak anih chuan chu tui a in avang chuan hmeichhia pum chu a tivung ang a, a malpui a tirawp bawk ang. Amaherawh chu a pasal rinhlehna chu a diklo anih erawh chuan chu tui anchhia chu a chungah chuan a awmlo ang a, naupai zel thei turin malsawmna a dawng zawk ang. “Tin, Kohen chuan chung anchhe thute chu lehkhabuah a ziak ang a, tuikhaah chuan a chiah tur a ni.” (Bamidbar 5:23)

Talmud (Sotah18a) a kan hmuh angin hmeichhiain thu tiam a chhiar Kohen in a ziah chhuahah chuan P-thian hming ziah a ni. (Bamidbar 5:19-22) Tichuan chu thil inziak (Lehkha zial ami chu) Kohen in a chhiar zawh hnuah chuan Sotah (hmeichhia) chuan “Amen” tiin a chhang anga, chu lehkha zial chu tui ah chuan chiahin a ziahna tui(ink) lehkha zial chu tui ah chuan alo inchiah zawp (kal ral) ang.

“Nupa inkarah shalom a awm hi P-thian ropuina a ni a, nupa inkarah shalom a awm theihna tur chuan P-thian hming pawh nuai bo theih a ni.” (Khulin 141a)

Hemi chungchang a Rabbi Meir chunga thil thleng lo en lawk ila: Zan khat chu nu pakhat hi Rabbi Meir zirtirna a ngaithla zo Inah a haw chu a pasal chuan “tun thleng thlengin khawiah nge I kal” tiin a lo zawt a, ani chuan “Rabbi Meir zirtirna ka ngaithla” tiin a chhang a. A pasal chuan thikna avang chuan kawngka chu hawn duh lo vin, “Rabbi Meir hmaiah chil I chhak hma loh chuan in chhungah hian ka luh tir lo ang che.” tiin a nupui hnenah chuan a sawi bawk a. Eliyahu HaNavi chu Rabbi Meir hnenah chuan lo inlar in thil thleng engkim chu alo hrilh vek a. Chumi hnuah chuan Rabbi Meir chu beit K’neset lian ber maiah chuan a kal ta nghal a. Chu hmeichhia chu tawngtai tura alo luh velah chuan Rabbi Meir chu mitna ang tak alo awm in, chu hmeichhia hnenah chuan, “ka mitah hian chil vawi sarih lo chhak la, ka mitna hi a dam thei mai ang,” tiin a hrilh ta bawk a. Chutia hmeichhia in Rabbi Meir mitah chil vawi sarih a chhak hnuah chuan Rabbi Meir chuan hmeichhia hnenah chuan, “tunah chuan va haw tawh la, I pasal hnenah chuan vawikhat chauh pawh nilo vawi sarih lai Rabbi Meir hmaiah chil ka chhak tiin va sawi tawh rawh,”a ti a.

Chung thil thleng te chu Rabbi Meir zirlaite chuan an lo hriat chuan mi nupa inkarah shalom a awm theihna tur a Rabbi Meir in phahhniam dan chu mak an tiin an lungawi lo hle nghe nghe a. Engvangin nge Rabbi Meir chuan chu pa (hmeichhe pasal) chu hremna a pek zawk lo tiin an zawt a. Rabbi Meir chuan a zirlai naupangte hnenah chuan ti hian a sawi a, “Nupa inkarah inremna a awm theihna turin P-thian chuan a hming thianghlim nuaireh pawh a phal anih chuan nupa inkarah shalom a awm theihna tur chuan kei pawhin ka zahawmna leh ka nihna te chu ka tibo ve ngam tur ani lo em ni,” tiin a chhang.

Shalom awm theihna chu thil ropui tak a ni a, malsawmna Israel fate chunga P-thianin a dah ho zawng zawng pawh a tawp kharna chu Shalom tih zelin a ni. (Vayikra Rabbah9:9) Kan hmuh angin Torah chu shalom nen tehkhin a ni bawk a, “A kawngte chu nunkhaw nawmna kawng ani a, A kawng zawng zawng chu thlamuanna a ni.” (Mishlei 3:17) Rabbi Shimon Ben Khalafta chuan ti hian a sawi a: Shalom hi thil ropui tak a ni a, Malsawmna dawnna atan chuan Shalom tluka hlu leh tha hi a awm lo, sawi anih angin: “L-LPA chuan a mite chu thlamuannain mal a sawm ang.” (Tehillim 29:11)

Kohanim malsawmna pawh a tawp kharnaah chuan Shalom tho a ni, “L-LPAN in lam lo hawi sela, thlamuanna pe che u rawh se.” (Bamidbar 6:26) Heng zawng zawng hian min zirtir chu Shalom tel malsawmna/duhsakna chu engmah tak tak a ni lo tih hi a ni.

Nupa inkara innghir nghona hian Israel mipui zing atangin Sh'khina a hnawt kiang a. Nupa inngeih taka awmna apiangah Sh'khina in a awmpui thin. (Hanhagat Tzadikim, seder Alef Beit) Chuvangin Shalom chu P-thian hming pakhat a ni tih min hriattir thei bawk. Chuvangin Bathroom-ah chu thumal (Shalom) chu sawi phal a ni lo. (Mishnah Berurah 85:12) Tichuan engvangin nge nupa inkarah shalom a awm theihna tur atana P-thian hming chu nuai reh theih anihna chhan chu kan hre thei tawh awm e, chu P-thian hming nuai rehna avang chuan nupa inkarah chuan Shalom alo awm ta a, chu Shalom lo awm chu P-thian hming pakhat te zinga mi tho anih avangin. (Maharal, Netivot Olam, Netiv HaShalom 1)

Ohr Ha'Khayim chuan he leilung siamna thuruk leh Shalom hian inkungkaihna thuk tak a nei tiin a sawi a. P-thianin chunglam leh hnuai lamah tui a then hran dawn lai khan chunglam a awm tur ho zawn gchu P-thian ropuina thutphah awmna lamah chuan an chho ta dual a, hnuai lama awm tur tui hote chu an kalna lam tur hnuai lamah an kal dawn lain an tap ta a, chu velah chuan P-thian chuan lei khawvelah chuan (ka) P-thian chenna hmun tur siamr in alawm in awm dawn tiin a hnem ta a. (Ohr HaKhayim, Bamidbar 5:15)

Hmeichhe rinhlelh avang chuan inchhungkhur atangin shalom bayit chu hnawh kian a awm phahin he khawvelah P-thian chenna tur chu a awm ta lo a. Chu thil avang chuan he lei a tui(a tira tui then anih laia lei lama awm zawkte) te chuan nasa takin P-thian chu a aia ring zawkin an au ta a. Chuvang in sotah hremna pawh chu tui kal tlangin, chu mi tui pawh chu hmun thianghlim Mishkan ami ngei hman thin a ni, a chhan chu chunglam leh hnuai lamah shalom hmanga thlunzawmna siamtu tur a nih avangin. Chu bakah barli pawh chuan min hriat chhuah tir chu Kaina inthawina hlan, chumi avanga thikna leh itsiakna thinlung a neihna kha a ni leh bawk. Sotah atanga kan zir theih pawimawh em em mai chu kan inchhungkhur-ah kan theih dan leh phak ang theuh va shalom nasa taka awm tir chu a ni. Chutiang ang taka kan nitin nunah shalom chu ka dah pawimawh anih chuan chu chuan khawvel pumpuiah P-thian chenchilhna lo awm tirn chunglam leh hnuai lam chu inzawm takin kanlo awm tir thei dawn a ni.

Source: Bulletin Shavei Israel

 

Categories: Parshat Nashim, Khumash, Shabat

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments