HAKHOKHMA Post Post New Entry

SHABBAT HAGADOL

Posted by Shavei Mizoram on March 30, 2020 at 9:00 AM

SHABBAT HAGADOL

-: Harel Kingbol

 

Pesakh thlen hma chiah Shabbat hi “Shabbat HaGadol ” ti a koh a ni a. Engvangin nge he hming “Shabbat HaGadol” tih hian koh/sawi anih kher na chhan hi chiang taka han sawi fak theih/tan chhan tur Tanakh(Bible) leh Talmud lamah pawh tarlan a ni lo. Mahse, Middle ages hunlai a Torah mifingte chuan enge a chhan leh vang tiin theihtawp a an zawn hnuin a awmzia (Shabbat HaGadol) an hrilhfiah.

 

Shabbat HaGadol tih chungchang nena inkungkaih theih tur chu Haftorah (abik a chhiar) ah kan hmu a. Chu Haftorah ah chuan hun/ni lo la thleng tur ropui (Gadol) zia chungchang tarlan a ni. “Ngai teh u, L-lpa ni ropui leh râpthlâk tak a lo thlen hmâin Zâwlnei Eliyahu chu ka rawn tir ang.”(Malakhi 3:23/mizo bible ah 4:5).

 

Nakin/hun a lo awm tur tlanna/chhandamna chungchang zawlnei chuan a rawn sawi a. Pesakh tih ri kan bengah a luh rual chuan hun/kum engemaw zat liam ta a tlanna/chhandamna kan rilruah alo lang nghal a. Chu tlanna/chhandamna thleng tawh chu nakin hun lo la thleng tur a tlanna/chhandamna lo thleng tur hmahruaitu chu a ni. Chuvang tak chuan Talmud lamah chuan ti hian kan hmu a, “Rabbi Yehoshua’n ti hian a sawi a… ‘Nissan thla ah khawvel hi siam a ni… chu chu kan pi leh pu/minthlah tute Mitzraim ram atanga an chhuah/chhandam an nihna thla (month), chutiang ang bawk chuan tlanna famkim lo thlen hun tur chu Nissan thla ah bawk a ni ang.”(Rosh Hashana 11a).

Vawiin ni thleng pawh a kan tihdan phungah chuan Zawlnei Malkhi’n ni ropui lo thleng tur ti a a sawi, Mashiakh hun alo thlen dawn a, Eliyahu mawhphurhna chungchang/ni ropui lo thleng tur chu Shabbat HaGadol ah chuan kan lo chhiar ta thin a ni.

 

Shabbat HaGadol hming phuah/pek chungchangah commentaries thenkhatte chuan hun engemaw zat chu chhui letin engvangin nge Shabbat HaGadol ti a koh anih kher an hrilhfiah dan lo en leh ila: Talmud (Shabbat 87b) ah kan hmuh angin Israel mipuite chuan 15th Nissan-ah Mitzraim ram an chhuahsan a, chu mi ni Mitzraim an chhuahsan ni chu Yom Khamishi a ni. 15th Nissan chu Yom Khamishi anih chuan 10th Nissan chu Shabbat tihna.

Yom Rishon chu Nisan ni 4 (li) ni a ni a, Yom Shabbath chu Nissan ni 10 (sawmna) niin Shabbath HaGadol ti a hming a lo put chhuahna a ni tiin, Yom Revii chu Nisan ni 14 (sawmpali) na 14 (Mitzrim fa tir/fa tir mipa tihhlum zan), a ni 15 (sawmpangana) Mitzrim ram an chhuahsan ni/Pesakh hman hmasak berna zan…

Torah in 10th Nissan a sawi dan lo en lawk ila – “Israel-ho pung khâwm zawng zawngte hnênah hian, 'Tûn thla ni sawm nî takah hian mi tinin an chhûngkaw khawsa ang zêlin an chhûngkua atân berâm no pakhat la theuh rawh se” (Shemot 12:3).

 

Tosfot (Tosafot) chuan beram no lak chungchangah hian ti hian a rawn sawifiah a, “Beramno an lak (Pesakh inthawina/ ei tur atan) avang chuan Israel hote chuan hlawkna an dawn/neih phah a ni. Eng hlawkna nge an dawn, Mitraim mite, anmahni inkarah buaina a chhuah phah a ni.” Fapa piang hmasa ber ho chu Faro hnenahchuan kalin Israel fate hi I chhuah tir loh chuan keini fapa piang hmasa ber hote hi kan thi dawn si a, chuvangin Israel fate hi kan ram atang hian chhuah tir mai rawh tiin an va ngen a, mahse Faro chuan an ngenna chu engamah alo ngai si lo a, chuvang chuan Mitzraun fapa pianghmasa ber ho chuan helna siamin, anmahni inkarah chuan indona/inbeihna alo chhuak ta a ni. Chutianga anmahni leh anmahni inkara inbeihna/buaina lo thlenna ni anih avang chuan chumi ni chu ni ropui tak (Shabbat Hagadol hmasa ber) tih alo ni ta a ni.

 

Beram talh tur ti a Moshe hnenah P-thianin a hrilh/biak lai khan Moshe chuan ti hian L-LPA P-thian chu a chhang a, “Aw L-lpa, engkim chunga roreltu engtin nge I thusawi hi ka hlen/tih theih teh lul ang, Beram chu Mitzrim ho pathian a ni bawk si a, min tihlum mai dawn a sin”….. ziak a kan hmuh angin, “Tin, Moshe chuan, "…. Mitzraim mite mithmuhah hian thiang lo an tihte chuan kan inthawi dâwn em ni ang? Lungin min dêng mai dâwn lâwm ni?” (Shemot 8:22. Mizo bible ah 8:26). P-thian chuan ti hian Moshe chu a chhang ve leh a, “Mitzrim mite mithmuh ngeiah an pathian (beram)chu in tih hlum loh chuan Mitzraim atang hian in chhuak hauh lo vang, an pathian hi engmah anih loh zia nangmahni (Israel fate) kal tlangin zirtirna ka pek theih nan he thil hi n tih ngei angai”(Midrash Rabbah Shemot 10:3)

 

P-thianin Moshe hnenah a sawi a: “Israel fate’n aigupta hote P-thian an biak chhung chuan (Israel fate’n sualna/thianghlim lohna 49- an thlen hman kha) Israel fate hi ka chhanchhuak lo vang” kal la va hrilh rawh, “kawng thalo an zawh hi bansan sela, milem hmaah kun tawh suh se”… kan hmuh angin I kut la chhuak la, beram chu la rawh…. Hrilhfiahna, “I kut chu milem biakna ata la sawnla, Mizrim ho pathian chu la la, talh la; kalhlen kut hmang turin inbuatsaih rawh”. Chutiang chauh chuan a ni P-thian chuan Israel fate chu a hruai chhuah theih dawn ni. A awmzia chu kei P-thian hi min ring tawp la, thlanuamgn takin awm la, chhandam I ni mai ang. (Midrash Rabbah – Shemot 16:2).

 

Zawhna. Israel fate khan Beram an thlun beh ni (Shabbat HaGadol hmasa ber tiin sawi mai ang) kha Shabbat (10th Nissan) a ni si a, mahse a hnu leh zel/vawiin ni thleng pawhin 10th Nissan chu Shabbat ni nen a inrual kher tawh si lo. Engatinge 10th Nissan zawk chu lawm loin, Pesakh thlen hma chiah Shabbat chu kan lawm zawk na chhhan ni ta ang. Eng thuruk nge nge inphumru ni ta ang?

(Judaismah zawhna tamtak awm thin, Rav te hian an duh dan danin thil hi an siam/thutlukna an siam a ni mai lo maw tih zawhna a awm thin).

 

A chunga zawhna khi hrethiam thei tur chuan Shabbat leh kut kan neih hote hi enge a in an lohna/danglamna lo en phawt ila. Shabbat leh Kut hote hi chuan zirtir/ awmzia hrang daih an nei a. Shabbat ni chuan engkim Siamtu (ni ruk chhungin) chu P-thian ngei a ni tih a tarlang/min zirtir a, kut ni hote erawh chuan hun liam tawh a P-thianin Israel fate min lo tanpui tawh thin zia/history atanga rinnaah chakna kan neih belh chhah leh zelna tur min zirtir vethung. P-thianin khawvel a siam/khawvel siam leh Shabbat chuan inkungkaihna a neih avangin Shabbat chu ruat lawk sa/tih danglam theih loh a ni. Israel te’n hun bi ruat chungchangah thuneihna kan neih zia chungchang chu Pesakh nen inkaihhnawihin P-thian thupek ngei ti hian kan hmu a, “Tin, L-LPA’N Moshe leh Aharon chu Mitzrim ramah chuan a bia a: "Tûn thla hi in tân thla chhiar tanna a ni ang a: in tan kum khat chhûnga thla chhiar tanna a ni ang. Israel-ho pung khâwm zawng zawngte hnênah hian, 'Tûn thla ni sawm nî takah hian mi tinin an chhûngkaw khawsa ang zêlin an chhûngkua atân berâm no pakhat la theuh rawh se” (Shemot12:1-3).

 

Israelte chuan hun bi ruat/hun tih thianghlim chungchangah mawhphurhna kan nei a. Court(Sanhedrin) chuan engtik nge thla(month) thar hun turah thutlukna an siam a, chu thla thar an siam dungzui chuan kut nite chu an lo ruat thei ta a ni. Ti pawh hian a sawi theih ang, Shabbat chu chunglam atanga lo thleng/chunglam ruat a ni a, kut ni erawh chu hnuai lam atangin (Sfat Emet Shabbat HAGadol 5637).

 

P-thian ngeiin a siam leh hna zawng zawng lak atanga a chawlhna ni anih avangin Shabbat chu a thianghlim bik a ni. “ni ruk chhungin LALPAN lei leh vân te, tuifinriat leh a chhunga awm zawng zawngte chu a siam a, tin, a ni sarih nî chuan a lo chawl ta si a: chuvângin L-LPA’N chawlhni chu mal a sâwm a, a ti thianghlim ta a ni.” (Shemot 20:11)

 

Rabbi Yokhanan chuan ti hian a sawi a: “P-thian hmaah an awmkhawm laiin Vantirhkohte chuan ti hian zawhna an zawt a – ‘Engtik nge Rosh Hashana leh Yom kippur’. P-thian chuan ti hian a chhang a- ‘Engvangin nge kei min zawh! Ka hoin lei rorelna (Sanhedrin ah kalin kan zuk zawt ang u.” (Midrash Rabba Devarim 2:14)

 

Lei leh van siam anih hunlai atang tawhin Shabbat chu alo awm tawh a, chumi anih avang chuan P-thian chauh chu Shabbat nen chuan inthlunzawm anni; chute anih chuan Shabbat leh mihring inkarah chuan inkungkaihna a awm vak lo em ni tih pawh in ngaihdan a awm thei ang!

 

A chunga kan sawi lei leh van siam leh Shabbat inkungkaihna (Shemot 20:11 ami khi) inziak ang khian Torah dawn vawihnihna a lungphek/thusawm pekah khan Shabbat serh na chhan tur inziah dan a dang ta daih mai, “Nang pawh Mitzrim ramah khan bawi i ni tawh a, L-LPA i P-thianin chuta ta chu kut chak tak leh ban phara a hruai chhuah che i ni tih hre reng rawh; chuvang chuan a ni, L-LPA i P-thianin chawlhni serh tur thu a pêk che ni.” (Devarim 5:15). Lungphek pakhatna leh Pahnihnaah Shabbat serh tur a thupek kan dawnna chhan khi uluk taka kan en chuan a inang lo a ni. Khi mi atang khi chuan Shabbat leh history lam thil pawhin inkungkaihna a nei ve ta a ni tih kan hmu thei ta a. P-thian chuan a thlsiam a chawlhsan/a zawh avang ringawt nilo/ei leh van siamtu P-thian a ni tih hriatreng na tur avang ringawt ni loin history a thil lo thleng tawh, sal nihna ata zalenna/tlanna kan lo chan takna thil pawh chu chu Shabbat chuan min hriattir in kan ngaihtuah tel alo ngai ve ta a ni.

 

Sfat Emet chuan Shabbat HaGadol tih awmzia ti hian a hrilhfiah a – Shabbat chuan awmzia/nihna thar a neih tel ta. Mitzraim atanga tlan/lak chhuah kan nih avang chauhin Shabbat chuan nihna/tarlan tur thil dang a neih phah a ni. (Lei leh van siam.. P-thian ni 7 ni ah a chawlh nen kal kawptho siin). Sfat Emet hrilhfiahna angin chu thil avang chuan Shabbat chu a ropui leh zual ta a ni.

 

Chu Shabbat, Mitzraim a, an Shabbat hman hnuhnung ber chu a hma a Shabbat an lo hman tawh nen chuan a danglam bik a ni. P-thian chawlhna ni-ah chuan mihring chuan P-thian chu a zawm ve (Joined) thei ta. A hma zawnga an lo chawlh thin dan leh chu Shabbat hnuhnung ber a an chawlh dan chu a inang tawh lo a ni.

 

Israel fate’n beram an lak chiah khan Mitzrim ramah khan Shabbat an serh chiah a ni tiin Sfat Emet chuan a sawi. Kha Shabbat kha mipui anga Shabbat an vawikhat hmanna, hnam ang a Shabbat boruak an temna; mahni a mawhphurhna la a mipui tling an lo nihna intanna chiah a ni. Kan sawi tawh angin Shabbat ni in min zirtir/a message bul thut ber chu P-thianin ni 6- chhungin engkim a siam a ni tih a ni. Israel faten beram an lak chiah milem pathian chu hnawlin P-thian chu an pawm ta a. Khang thilte kha 10th Nissan (Shabbat) a thil thleng satliah a ni ringawt lo a. Kha mi ni a thil thleng kha Judate History thlak danglam hlawktu, bung thar kan kaina a ni.

 

Talmud in min zirtir angin miin Shabbat a bawhchhia anih chuan milem bia ang a ni, a chhan chu P-thian hna thawhte a ngai nep tihna a ni. Chumi letling chiah chuan milem pathian hnawltu chu Shabbat zawmtu/pawmtu tihna a ni. Tichuan P-thian thupek anga beram an lak chiah chuan Shabbat ni chu an zawm tihna a ni. Chu thil pahnih kal dun chuan Shabbat ni chu a ti ropui zual ta a ni.

 

Khazal te’n min zirtir angin Israel mipuite’n Shabbat vawihnih tha taka a serh chuan Mashiakh alo kal nghal ang, an ti hial a ni. Rabbi Yokhanan chuan Rabbi Shimon bar Yokhai hmingin a sawi a – “Israel mipui zawng zawngte’n a nih dan tur ang taka Shabbat an zawm/serh anih chuan tlanna a rawn thleng nghal ang.”(Shabbat 118b).

 

Sifrei Hapardes ah Rav Yeshiel Epstein chuan ti hian a ziak a – chu Shabbat vawihhnih tih chu Shabbat HaGadol eh Shabbat Shuva a ni tiin. Chu Shabbat pahnih chuan ropuina thuruk an neih avangin. Shabbat Shuva chu Roash Hashana leh Yom Kippur inkarah a tla a, chu Shabbat chuan engtin nge P-thian lamah kan kir le hang tih min zirtir a. Pakhat leh chu Mitzrim rama Shabbat an hman hmasak ber Shabbat HaGadol chu a ni. Chung Shabbat te chuan tlanna awm theihna tura thurk ropui tak an pai avangin.


Categories: Khagim, Kut ni te, Judaism, Torah

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments