HAKHOKHMA Post Post New Entry

Parshat Vaishlakh

Posted by Moshe Ilan on December 17, 2019 at 4:05 PM

Jakoba te chhungkua Kanaan rama an luh hnu lawk khan a fate hnenah an milem pathian te paih chhuak turin a ti a, chutiangin Joshua pawh khan Kanaan ram an luh hnu lawk khan Israel mite hnenah an milem pathian te hnawl turin a ti ve bawk a, hetilai thu hi ngaihtuah chian chuan a chhumbung ang reng hle mai a, enge a awmzia i han zir dawn teh ang.


 

*Bereshit (Gen) 34;2* "Tichuan, Yakova chhungte leh a hnena awm zawng zawngte hnenah chuan, in zinga mi dang pathian awmte chu dah bo daih ula, intithianghlimin in silhfente thlak rawh u.."


 

He thu hi *Parshat Vaishlakh* ami kha ani a, he thu hi Yakova a chuan a chhungte hnena a zilhauna kam chhuak a ni. Hei hi Shimona leh Levia ten an unaunu Dinai Phuba an lak avanga Shkhem khuan an do hnua a fate ho a zilhauna a ni.


 

*Yehoshua 24;23* "chuti anih chuan in zinga hnam dang pathian awmte chu dah bo daih ula, in thinlungte chu Lalpa Israel te Pthian lamah thlektir rawh u".


 

He thu chang hi Yehoshua bu kharna abung 24 na a dah ni mahse, hei hi Ai khua an hneh hnu lawk a, a bung 8 na zawha Eival leh Grizim tlang awmna hmun Shkhem khua thova Israel mipui te hnena a thusawi a ni.


 

An thuchhuak khi han en vang vang chuan a inang a ni. He thu hi a bua in chhiar phei chuan Jentel mite nena an in chawhpawlh avanga zilhauhna leh hremna thleng thei laka vaukhanna thu ani tih kan hmu thei ang.


 

Chung zawng zawng aia mak sak deuh mai chu, Bereshit ah khian Yakova te chhungkua chu Padan Aram ram atanga an lo kir hnu lawk, Shkhem khaw kianga an inkulh tan tirh vel lai Kanaan ram an rawn luah tan chauh a thil thleng ani a ni. Mahse mak em em chu, chuti lek chhung chuan an pa Yakova chuan afate hnenah chuan milem pathian lak ata intithlinghlim a, an milem pathian te chu paih chhuak tura thu apek thu kan hmu a ni. Yakova fate kha hun rei lo te chhung ah khan milem biakna ah an lo tlu hman tihna em ni ang? Milem pathian biakna te chu Khawi atanga lalut nge an nih tak ang le?


 

 

He zawhna ang chiah tho hian Yehoshua bu ah pawh khian Ai khua an lak hun kha Yerikho khua an lak hnu mai, Kanaan ram an rawn luh atanga rei lo te chhung kha ani a, tichuan, Ai khua kha vawi 2 ngawt an do a, a vawi hnih indo hmain an zinga bawhchhiatna sualna awm kha an thianfai tawh bawk si a, an hneh tak hnu ah khan Shkhem khua ah an han kal ta a, Thu an han thlung a, tah khan Yehoshua khan Israel mipui te hnenah khan in milem pathian kawl te chu paih chhuak rawh u, tiin a hauhna thu a sawi tih kan hmu lehsi a ni.


 

Thlaler ah pawh ni tawh lo, Yehoshua hunlai khan Israel ten, a bik takin ram an luh tan tirh ah phei chuan mi Tsadikim (mifel) tak tak vek Pthian tih tu te vek an ni si a, an zinga mi 1 lekin a lo bawh chhiat pawh khan indona ah an chak loh nghal phah ruak ruak bawk si a, chuti anih si chuan, Yehoshua chuan tu te nge israel mite zingah khan milem pathian lo kawl tu a hauh te kha ni ta ang le?


 

Khing zawhna mai bak ah khian enge he lehkhabu pahnih te hian inlaichinna an neih a, tunlai hun thleng, Mashiakh lo kal hun thleng tura kawngro leh awmze ril a neih a, enge zir theih leh min veng thei tu thil awm le?


 

--------------

 

Aw le, A hma lam khan khing thu mak ang reng tak khi kan han inzawt tawh a, hetiang hian sawifiah i han tum teh ang.


 

Bereshit (Gen) 33;18 "Tin, Yakova chu Padan Aram ram ata a lo kal chu thlamuang takin Shkhem khua, Kanaan rama awm chu a thleng a, daikiangah chuan a puan in a zar a. Tin, a puan in zarna hmun chu, Shkhema pa Khamora fate lakah , tangka (Ksita) zain a lei a. Chutah chuan maicham (Mizbeakh) a siam a,..." tiin ziak kan hmu a ni.


 

Kanaan ram chhungah hian hmanlaiin Tanakh (Bible) ah hian hmun thum laiah hmun an leina thu kan hmu a, Avrahama'n Khevron hmunah Makhpela lo leh a chhunga puk a nupui Sarai phum nana a lei thu te, Lal Davida'n Jerusalem ah Moria tlang Temple sak nan a lei thu te kan hmu bawk a, tun tum ami ve thung hi chu Yakova hian he ram rawn ro chun tura a lo lut anihna angin a bul tan nan Kanaan ram laili lai tak hmun chu rawn leiin chutah chuan Maicham a siam ta nghal bawk a ni. Hei hi kan lova rah hawng hmasa te Fapa piang hmasa te Lalpa tana kan hlan hmasak thin ang deuhin a ngaih theih ang.


 

Tichuan, Israel fate Yehoshua hova Kanaan ram rawn luah tura an rawn luh khan an hruaitu hmasa Moshea thupek angin (Dvarim - Bereshit 27;4) "Tin, Yarden lui in kan zawh chuan heti hi a ni ang a, vawiina thu ka pek che u ang hian Eival tlangah lungte chu in phun ang a, lung charna in hnawih tur a ni. tin, chutah chuan Lalpa in Pthian tan maicham, lung maicham in siam tur a ni..." tih thu kan hmu a, chu chu Yehoshua (8;30) "Tin, Moshea dan lehkhabua ziak tawh angin, Lalpa chhiahhlawh Moshean Israela thlahte thu a lo pek tawh ang khan, Yehoshua'n Eival tlangah Lalpa Israel te Pthian tan maicham, lunga chher loh, tumahin thira an la chher ngai hek loh maicham an siam a..." tih kan hmu leh ta bawk a ni.


 

He hmun Eival tlang hi Shkhem daia awm ani a, he hmun ngei hi a ni, Yakova khan a lo lei tawh hmun Lalpa tana maicham alo siamna hmun kha. Chuvangin, Yakova lo bultan ang khan ram an luah tan tirh dawn pawh hian an pu Yakov an ram a luah tan tirh dawna a tih ang chiahin a hlan thianghlimna an lo nei ve ta a ni.


 

Tichuan, Yakova te chhungkua chungchang ah khan han kir leh ta ila, Bereshit (Gen) 34;25 na ah khan Yakova fapa te pahnih Shimona leh Levia te chuan an unaunu Dinai laka phuba lak nan Shkhem khua chu an han run ta thut a, an khaw mipa ho zawng zawng te chu an thah thu kan hmu a ni.


 

He an indona ah hian Shimona leh Levia chu abul tum tu ni mahse an han hneh takah khan he hmun ram lakna tur finishing ti tur hian an unau dang te pawh chu an tel ve ta vek a, tichuan, a hmaa an lei mai bak Shkhem khawpui te leh a hmun lai ram zawng zawng leh a chhunga rallak ro zawng zawng pawh chu an la ta vek a ni.


 

Gen 35;2 "Tichuan Yakovan a chhungte leh a hnena awm zawng zawng te hnenah chuan, "In zinga mi dang pathian awmte chu dah bo daih ula, intithianghlimin in silhfente thlak rawh u, tho ila, Beit El (Eival tlangah) ah i chho vang u. tichuan, ka mangan laia mi chhang a, ka kalnaa ka hnena awm zel Pthian tan khan maicham ka siam dawn nia," a ti a, tichuan, mi dang pathian an kuta awm zawng zawng leh an benga bengbeh an beh zawng zawng chu Yakova an pe a, tin, Yakova chuan shkhem khaw kianga Sasaw hnuaiah chuan a thukru ta a, tin, an kal a, an vel khuate chuan an lo hlau nasa ta em a, Yakova fapa te chu an um ta lova..." tih kan hmu a ni.


 

He tah hian Yakova fate leh a chhungte leh a hruai mipui hote chuan a hmaa Shkhem khua an do tuma an rallak ro hlu ho zingah khan kanaan ho milem pathian te chu an lo la tel ve a, tin, chung te chu tunlai ang thovin sakhaw dang hoten an symbol ang atan te, an pathian biakna atana an incheina atana an hman thin ang bengbeh te leh thil dang dang thi te pawh ani ngei ang chung ang te chu an lo la tel ve nual ani tih a hriat thiam theih a, chungte chu a hring ahrana milem biakna hmanrua pawh an ni vek lo maithei a ni, amaherawhchu, milem pathian biakna vaivut kai, a siper an nih tlat tho avangin, a thiang chuang lova, an ni pawh kha mihring pangai ve tho an nih avangin zirtirna leh hriat lawkna an neih bik loh avangin dem em em theih an ni bik lova, amaherawhchu, an pa an pu Yakova'n a hrilh hnuah chuan an thlawn thla a, an lak ata hnawlin an paih chhuak ngam ta a ni. Tichuan, hetia an tih veleh hian an chheh leh avela hnamdang Jentel mite chuan an lo hlau ta hle mai tih kan hmuh ang khian, hnam dangte tih ang leh an pathian biakna ang thila inkaihhnawihna thil an kawla kan inbel ve vaih chuan a hma lama Yakova hlauhthawn ang khan an chheh leh avela Jentel ho chuan rawn chimralin an rawn zuam thei a ni. Hethu atang hian tunlai thleng mai bakah Mashiakh lo kal hma thleng chuan hnamdang Jentel te laka kan inlakhran a, an tih ang te leh an pathian biakna thil ang lak ata kan intihhran phawt chuan Jentel te hian min zuam ngai dawn lo a ni tih kan zir thiam thei ang.


 

Tichuan, Yehoshua hunlai ah khan han kir ve leh ta ila, kan inzawhna ang khian Yehoshua hova Kanaan ram lut te kha chu mi Tsadikim (mifel) tak tak an ni tih a hriatthiam theihna pawh kan tarlan tawh khi. An zinga mi pakkhat Akhana'n ral lak sum a lo lak ruk hlek avang pawhin a hnam pum hremna an tawh zia te pawh kan hria a ni. marawh chu, *Yehoshua 24;23* "chuti anih chuan in zinga hnam dang pathian awmte chu dah bo daih ula, in thinlungte chu Lalpa Israel te Pthian lamah thlektir rawh u," tia, Israel fate a zilhauna thu hemi hmun Shkhem khaw kiang a awm Eival tlang ah khan a sawi thu kan hmu si a, chu chu tute ber kha nge Yehoshua hian a tih tih chhan nita ang le.


 

Divrei Hayamin (Chro I 7;14-29) a kan hmuh angin Efraima damlai daih tawh khan Menashea fate ho leh Efraima leh a fate ho chu heng Shkhem bawr velah leh Jordan ral ram vela an khawsak zia thu kan hmu thei a ni.


 

Efraim leh Menashe te hi Aigupta Mitsraim rama piang seilian ni mahse, Efraim bik phei hi chu Kanaan ram chhunga a chettlat zia leh a chen zia a ziak kan chhiar chuan kan hre thiam nghal thei ngei ang a, Eng vanga an ni unau chhung/fate hi hi an unau Israela thlah te ho Aigupta rama bawiha an awmlaia heng lai rama awm thei nge kan ti ani maithei a, an ni te hi an pa Yosefa Aigupta lal fapa te an ni a, tin, khatih hunlai khan heng kanaan ram te hi (Erets Khasut) Aigupta lalram hnuai kun, an lalram huam chhunga mite an ni a, chuvangin, Lal fapate an nih avang khan an lalram huam chhungah chuan an duhna lai laiah khan awmhmun an khuar thei a, tumahin an tibuai ngai lo a ni.


 

Tin, chumai bakah Shkhem hmun kher lai vela an awm nachhan pawh hi an pu Yakova lo lei sa tawh leh an u te hovin an lo hnehlak tawh ram anih tlat avangin inti neitu takin awmhmun an lo khuar tawh a, Yehoshua'n ram a sem lai pawh khan Jordan rala Menashe fate ho lo awmtawhna hmun pawh an ta sa anih avangin a nemnghen nan an awmna hmun te leh ram chhunga an lo awm tawhna sa te chu nemnghet chauhin a pe anih kha, chuvang alawm Jordan ral ah pawh khan Menahsea makpa Yaira khawpui (Yehoshua 13;30) tih hming lo chuang sa te pawh a awm tawh kha.


 

Awle, kan hriat chian duh leh tumah lo lut leh ta ila, tichuan, Israel fate Aigupta rama bawiha kum 210 lai an awm chhung zawng zawng khan heng Shevet Menashe thenkhat te leh Shevet Efraim thenkhat te chu Pthian ruat hruaitu mumal nei lovin Yehoshua hova ram lak anih hma hun chhung zawng khan henglai rama Jentel ho zingah te hian an lo khawsa ve naw naw tawh a, chuvangin, an ni te hian an chheh leh avela Jentel kanaan ho thil tih thi dan te, an pathian biak dan ah te khan an lo inhnamhnawih ve nasa tawh a, Yehoshua hova ram an luh a a lo dal thei khaw hnaivai Yericho leh Ai khua an hneh tak chiah hnu ah khan a bung 8 na ah khan he hmun Shkhem khaw kianga Eival tlang ah hian an hruaitu hmasa Moshea thupek ang khan an inhlan in a hnam pum huap (kanaan rama lo khawsa tawh te nen) angin Pthian hnena thu thlun tharna neiin Lalpa pathian hnam thlan ni nghet turin thu an thlung thar tha leh ta a ni. He thu thlunna hi a bung 8 naa inziak tan ni mahse a hmawr bawkna chu Moshe Rabeinu thih dawna ram an luh hmaa Sefer Torah khar nana a tih ang khan Yehoshua bu hmawr bawk nan a bung tawp bung 24 ah khan ziah chhunzawm ani ta a, tichuan, hetia Yehoshua'n Efraim leh Menashe hnam a zilhau hnu hian an mahni pawh chuan (24;21-22) Lalpa Pthian lam thlanga intiam thar lehin thuhrethu atan Yakova fate milem an phum ang chiah khan hemi hmunah bawk hian an phum ve leh ta a ni.

Categories: Torah

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments