HAKHOKHMA Post Post New Entry

Khawl (Technology) thil hmasawn na

Posted by Shavei Mizoram on May 21, 2019 at 4:45 PM

Khawl (Technology) thil hmasawn na


Khawtin a cheng Bnei Menashe unau ten malsawmna dawng ula.


L-LPA P-thian in mihring te hnenah finna  min pe a, chu finna hmang chuan thil thar hrang hrang kan siamchhuak a, he khawvela  kan khawsak nawm zawk leh awlsam zawk na tur in a ni. Chung thil thar siam zing a pakhat chu kum 20 liamta khan a ni a, he Technology hmasawn chho mek hi a ni.


Chu Technology hmasawn mek chuan awlsam taka thil tih zung zung na kawngah nasa takin min tanpui a, tun hma a hun rei tak tak kan khawhral na thin ah khan hun reilo te, second engemaw zat chhung lek in kan duh zawng zawng kan hmet chhuak zung zung thei tawh bawk a. Entirnan: Hman lai chuan lei lai turin Sabengtung emaw bawng te kan hmang a, anih loh pawn hmanrua nen kutin, kar/hun engemaw zat kan seng thin a, tunah erawh chuan technology thang chho zel zarah khawl hmang in nikhat ah pawh hna tamtak kan zo fel thei der tawh.


Tun hma chuan Electric Current te pawh a awm lova, khua a lo thim chuan engmah a tih theih tawh loh thin, tunah chuan Current eng kan nei a, chu mi hmang chuan In chhung tih lumna leh tih vawhna kan nei bawk a, insuk na tur khawl te nen lam kan lo nei ta. Heng khawl changkang tak tak te avang hiann kan nitin  nunleh kan khawsakna a awlsam in kan hahdam tawh hle bawk a ni.


Heng hmasawn na kawnga pawimawh em em te zinga ami Pele-phone chungchang han sawi ta ila, Pelephone hmang in kan chhung te leh kan thian khawilai hmunah awm pawh kan be thei deuh vek in sms (message) pawh kan thawn thei deuh vek tawh a ni.  Smartphone nei te chuan a chhung a program leh Application hmang in thil hrang hrang an en in a infiam thei bawk a ni.


Hengbakah hian tu te pawh in kan hriat tel chu heng khawlthil hmasawn na hi  kawngtam takah a that viau lai hian kan nunah nasa takin chhiatna tam tak min thlen tel mek bawk a ni. Indo na hmanrua, Rocket hrang hrang, silai, autumn bomb etc siam chhuah te chuan awlsam te in kan nunna min laksak thei a. Chutiang bawkin mi tam tak heng thil, current khawih palh vang a, current in a man te, khawl thil avanga hliam na tak tuar tam tak an awm a, tin mi tam takin nunna an lo chan tawh bawk a, chuvang chuan heng khawl thil kaihhnawih reng reng lakah kan fimkhur hle bawk thin a ni.


Pelephone/Smartphone kan hman te pawh hi inbiak pawh theih na tur a siam a ni a. Amaherawh chu kan thian thaberah kan hmang letling  ta zawk hlauh thin hi thil pawi tak a lo ni ta a ni. Heng Application siam Group hrang hrang, Mail/facebook/Instagram/youtube/google/telegram/whatsApp bakah movie en nan te leh Games khelh nan te kan hmang uar ta hle mai a, thenkhat chuan ni leng zankhua maiin kan hun tam zawkah kan khawih tawh mai thin a ni. He khawl thang chho mek vang hian kan hun hlu tak tak te chu engmah lovah kan hmang ral a, hna tul leh pawimawh hmachhawp  ngei ngei pawh kan tlansan phah ta thin a ni.


Heng te bakah thil pawi leh zual zawk chu Internet khawvel kan pelephone atanga kan fankual na kawngah hian thlalak hrang hrang, movies thalo tak tak te leh  pornographic hrang hrang en thin tu chuan a thlarau nun nasa takin a khawih pawi a, tin  anunah buaina hrang hrang khunglut in, a chhungkua leh a zirna bakah a hnathawh na thleng in nghawng thalo tak tak a neih phah ta thin a ni. Heng website hrang hrang, rukrukna, insualna, indon film, tualthahna, inhremna leh film thalo leh bawraw pui pui, puitling tan pawh a en nuam tawh lo, phalloh ni bawk si chu naupang te te ten phone vawikhat hmeh-ah emaw Computer atang in awlsam te in an  hmu thei ta der mai bawk si hi  a pawi tak meuh a ni.


Engtinnge nu leh pa ten an fa an rohlu ber te chu tun hun an hman mek lai, leh hun lo kal leh zel tur a tan a pawimawh em em, Zirtirna thatak dawn an mamawh ngawih ngawih lai ni bawk siah hian heng movies mipat hmeichhiatna  leh tualthahna hrang hrang kan Torah pawh in sualna zawng zinga nasa ber awlsam tak maia an luhchilh theihna hmanrua hi an pek phal  tak mai ni le?


Engtinnge nu leh pa te chuan an fa te chuan heng phone man to tak shekel 1000 atanga 3000 hial sen na khawl pakhat ve mai chu an leisak theih a? chu khawl chuan a hnu ah kawng tha aiin kawngtha lo a zawh dawn tih hrereng chung bawk siin? Miin a fa Pelephone emaw Computer Filter awm silova a leisak chuan a fa chu a hmangaih lo mai ni lovin, a hua in sual kawng zawh turin a buatsaih mek   tih  na mai zawk a ni. Kan fate mei sa tak bula  an infiam kan hmuh chuan an kan palh mai kan hlauh thawn ang hian, phone kan pek hunah pawh heng website thalo hrang hrang an hnaih hi kan phal chuang tur a ni lo.


Kan fa te kawngdik kan zawh tir duh a nih chuan, kei ni pawn nungchang dik entawn theih tur kan neih a ngai a. Phone kan ken lai te pawh kan filter a kan fate pawn an phone an filter na turin, tin phone addict ang maiin hun awl hlek leh tihtur nei chung pawh a, hna tih thulh a kan khawih reng hi kan sim a ngai bawk a ni.


Chutiangin kei mah ngei pawhin Smart phone leh computer khawih nasat lutuk avanga nupa inthen hial te pawh ka hria a, chu tih rualin puitling leh naupang pawh heng avanga nungchang dik lo tak tak put phah mek te pawh ka hria a ni. Chuvang chuan, kan Torah leh Halakha in zirtirna min pe a, mi tu pawh in Smartphone emaw Computer Filter  lovin a nei tur a ni lo, tiin. Filter tih hunah heng Website thalo hlauhawm tak tak leh Asur ho zawng zawng hi ngaihthlak emaw en theih miah lo tur a siam tur a ni.


Yehudi tu pawh in amah leh a chhungkua te chuan an phone  leh computer te chu an filter ngei na turin theihtawp a chhuah tur a ni. Smartphone neisi Filter ti duh lo chu misual ang a ngaih a ni hial a, Torah in hriatpuitu (Edut) a tih a tan an tlak lo a ni!


Mi tu pawh in amah leh a chhungte chu a ngaihtuah a, Torah leh Mitzvot kawng a kalpui chu a tih makmawh a ni a, “Sual kalsan la” thil thalo hrang hrang lak atang a, tlan chhiat a, chumi hnuah “thil tak tih”  tur a ni a, ti chuan Mitzvot te a zawm theih tawh dawn a ni.


L-LPA P-thian chuan finna min pe theuh se a rawngbawl tu dik leh thianghlim kan nih chu a duh zawng lo ni rawh se.


Malsawmna nen

HaRav Yehuda Kok  

Categories: Torah, Judaism, Khinukh, Education

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments