HAKHOKHMA Post Post New Entry

ELUL THLA MEZUZAH ENDIK THLA

Posted by hakhokhma on August 29, 2013 at 8:45 AM

"Ukhtavtam al mezuzot beitekha uvishaareikha"


Shulkhan Arukh (יו"ד רצא, א ) ah chuan tihian a inziak a, 'Mezuzah mal chu kum 7 danah vawi hnih endik thin a ni a, Vantlang ta erawh chu Yovel chhungin vawi hnih endik thin a ni', tiin.


Mezuzah tarna hmun derthawng, ni sa in a em theihna hmun ami emaw, ruah leh dai in a tih hnawn theihna hmun ami ang chu kum 2 dan zel ah en dik tur a ni, tichuan, dah luh leh hunah kha tiang sik leh sa ang thilin a thih chhiat loh na turin uluk leh tha taka tuam phui thin tur a ni.


Endik dan tha ber chu, a thiam bik te hnena endik tir tura pek ani a, amaherawhchu, mahni pawhin kan endik ve thei tho va, a si se thiam kher lo mah ila, a tlangpui chu kan thiam hlawmin a rin awm, hetiangin, a ziak te chu a reh lai a awm em? a zialna nen alo inchar palh em? tin, tui hu leh daiin a lo tipherh em? tih te, a thuziak te chu an lo kim chiah em? tih te chu kan en dik ve thei a ni, chumi atan chuan Sidur bu emaw, Tanakh bu emaw lain Mezuzah chang awmna lai chu keuvin kan endik ve thei a ni.


Mezuzah endik na tur hian Elul thla hi a tha ber a, chutiangin, hemi thla hian an endik thin a ni a, tin Rosh Hashana hnai lutuk ah emaw, endik chu a tih chi vak lem lova, Yamim Noraim ro relna ni te chu ngampa sarh a kan hmachhawn a, kan luh theih nan kan Mezuzah te chu a hma lamin kan lo en dik tawh tur a ni.


Kan Mezuzah tar hi Sgula thil ani lo va, vanneihna thlen tu atana kan tar a ni lo va, Mitsvah (Thupek) anih avanga tar zawk kan ni a ni. Amaherawhchu, Mezuzah kan tar hian Mitsvah kan tih avangin, malsawmna tam tak kan dawn phah thei thung a, a tar dan dik loh avang te, a kosher lo, pasul tawh kan tar avang te erawh chuan, malsawm lohna hrang hrangin kan chungah a tlak buak phah thei thung a, hei hi Mezuzah dik lo kan tar avanga hremna lam ni lovin, kan Mezuzah tar chu a dik tawh loh vanga endik emaw, thlak angai tia min rawn hrilh thawina lam thil vang zawk a ni.


Mezuzah tar dan hi a bik a awm a, chutiangin a zial dan zawng te, a dah dan zawng te, a hawi lam tur zawng te a awm bawk a, chuvangin, mahni emawa kan tar dawn a nih chuan heng zawng zawng hi hriat hmasak a tha hle a ni.


A zial dan tur chu zial anih hnua kan keu hawn leh huna chhiar theih nghal mai tur ang chiin a ni tur ani. A thuziak awmna lam chu a chhung lamah kan dah tur a ni a, tin, te lutuka kan zial chuan a ziak hnung lama Sh-dai tih inziak chu kan hliah tir palh theih dawn avangin Sh-dai tih lang chiah thei tur awm tawk vela tea zial tur a ni.


Tin, tar anih hunah Sh-dai tih chuan kawngka a lut te min ep tur a ni a, Sh-dai tih chu chhiar awl zawngin a dikin a awm tur a ni.


Mezuzah chu thil thianghlim anih avangin, kan tar hunah hian vawi hnih kan khuh tur a ni a, chutiang ang chu tunlaia kan tih dan thin, a savun lehkha zial chu sahara tuama, a bawm chhunga kan dah anih chuan chu chu vawi hnih tuam anga ngaih niin, chu chu a tawk a ni.


A bawm chhungah chuan a savun lehkha zial chu sahar a tuam si lovin kan thun ringawt anih chuan, vawikhat chuahva khuh kan ni tihna a ni a, chutiang ang in tarna in chhung ah chuan harsatna hrang hrang a awm dawn tihna a ni, hetiangin; mutthilh a thiang lo ang a, nau zun ek thiar a thiang lo ang a, nupatna hman a thiang lo ang a, thu ho sawi te athiang lo ang a, Sefer Torah inhawng bula thil thiang lo ang zawng zawng chu athiang lo a ni.


Torah chuan "In in khawngka biang ah te, in gate ah te in ziak tur a ni a, hei hi nang mahni te leh in fate dam hun chhung ni te chu he ram, in pa te hnena chhechhama P-thian in alo tiam ramah hian lo sei theih nan ani ang," tiin, a in ziah avangin, hei hi hrisel na leh dam reina te kan lo chan theih nan he Mitsvah hi a pawimawh em em a ni.


Tin, Gmara (Kidushin) chuan lo sawi in, he chang atang hian he Mitsvah hi hmeichhia te pawhin an tiin an zawm ve ngei tur a ni, hmeithai te leh, mahni chauhva awm hmeichhia te pawhin Mezuzah Mitsvah hi an zawm ve tur niin, a vuah hunah pawh an mahni in an vuahin a brakha pawh an sawi thei a ni, a ti.


Mezuzah kan tar lai chu endik turin kan la thla anih chuan, a vawiin ni la la a kan vuah kir leh hman anih chuan a tarna Brakha chu sawi kher a ngai lo va, amaherawhchu, a tuk lam hnuah emaw, kan tar kir chauh anih chuan Brakha chu kan sawi ngei tur a ni, tin, kan lak thlak a chu a tharin emaw, a danga kan thlak anih chuan, a vawiin ni la la pawh chuan a Brakha chu kan sawi tur a ni.


A Brakha kan sawi hi kan uluk tur a ni a, mi thenkhat chuan "Al Kviat Mezuzah" tiin an sawi palh thin a, hei hi a dik lo a ni. a Brakha dik tak chu "Likvoa Mezuza" tih hi a ni. 'Kviat Mezuzah' tih chuan awmze hran a nei a, chu chu Mezuza a nihna tura nem nghet tihna anih avangin, tih sual palh loh tur a ni.


A tar dan ah hian Sefardim ho chuan a ngil in an tar thin a, tin, Ashkenazim ho chuan a lu lam in chhung lam hnaih a tlu awn deuhvin an tar thin a ni. Tin, a lut lam te dinglam ah tar tur a ni.


Kawngka pui ah te, mutna pindan kawngka ah te, gate ah te, tar tur a ni a, inthiarna kawngka ah chuan tar a ngai lo a, tin, washing machine room kawngka ah pawh tar a ngai lo a ni. Tin, Elevator ah te pawh tar a ngai lo a, chutiangin, motor hnuh chi Caravan ang chi ah te, thlawhna, rel , motor, sukah ang ah pawh tar a ngai lo a ni. Amaherawhchu, Caravan pangai ang chi ah chuan brakha tela tar tur a ni a, mahse, khai sawn anih lai hun ah chuan lak thlak tur a ni.


Kudam (Makhsan) ah hian tawng 4 bial china lian ah chuan brakha tel lova Mezuza tar tur a ni a, tin, varanda leh tual (Khatser) ah pawh chuan chung nei lo mahse, gate emaw kawngkhar emaw a awm chuan Mezuza chu tar tur a ni.


Mezuzah chu alo a luak chhuak a uar uchuak tur a ni lo va, hetiangin; Khazon Ish dan in – kan varanda chu lei zawl ah awmin pawn/khawlai lam atang pawhin in chhung kal hmasa lem lo pawhin varanda ah chuan kal theih nise, in chhung luhna kawngka ah chuan a lut lam te ding lamah chuan tar tur a ni a, amaherawhchu, kan varanda chu chhawng chung lama awm anih chuan, in chhung atanga chhuak te ding lamah vuah thung tur a ni.


Ben Ish Khai chuan a lut tur te leh a chhuak tur te chuan Mezuzah chu khawih chungin hei hi an sawi thin ang a, "Hahsem ishmor tseti uvoi lekhaim tovim uleshalom meata vead olam, Kel-Sh-dai yevarekh oti ve-iten li rakhamim" tiin, tichuan, sawi zawh ah kan khawihna kut chu kan fawp thin tur a ni, ti in.


Kawngka a kan luh chhuah apiangin kan fawp thin tur ani a, hei hi a tarna Mitsvah kan tih mai piah lamah "Eng tik lai pawhin Lalpa P-thian chu i hmangaih tur a ni" tih Mitsvah kan zawm theih na tura, amah kan hriatchhuah fo thin theihna tur atana tih a ni.


Categories: Judaism, Halakhot, Juda dan, Khagim, Kut ni te

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments