HAKHOKHMA Post Post New Entry

Rav Avichail te nupa hnenah Jerusalem khawpui hminga chawimawina hlan a ni

Posted by Moshe Ilan on June 21, 2012 at 3:35 PM

    Jerusalem day 2012 (Yom Yerushalaim 5772) khan khawchhak kilkhawra keini Menashe fate min rawn zawngchhuaka kan pute rama kir leh theihna tura kailawn min dawh saka min dawmkai tu kan pu Rabbi Elyiahu Avichail שליט"א chu an nupain Jerusalem khawpui hminga chawimawina 'Yakir Yerushalim Prize' hlan an lo ni tawh a.


    He chawimawina hlu leh ropui dawntir theitu hi a hnathawh hlu leh ropui chuan ramthianghlim khawpui Jerusalem chu a tih hmingthat em avanga he dinhmun hi chantir ani kan ti lo thei lo a ni. Chung a hnathawh Jerusalem ti hmingtha tu zinga an sawiah chuan keini Benei Menashe te min rawn zawnchhuaha a hun hlu tam tak senga keini tana a lo sen zo zai chu an ziak tel ve kiau a ni. Amaherawhchu, chu mai piahlamah chuan Jerusalem a 'Hebrew University' a a thawh laia zirtirtu hlawhtling tam tak a lo chherchhuah tawh avang te leh lehkhabu tam tak a lo ziah tawh te an ni hlawm bawk a ni.


    Tin, a thiannu Rabanit Rivka Avichail pawh hi a pasal thiltha tih mai avang nilovin, ama pual liau liauvin he chawimawina 'Yakir Yerushalaim Prize' hi a lo dawng ve bawk a, ani hian French ram atanga 'Alyia' tia Israela lo pemte a lo buaipuiin zirtirna te a lo pe nasa ve thin hle a, tin, chumai bakah an kawmchhak lawka awm 'Holocust Museum' tan leh German Nazi tihduhdahna tuar dam chhuakte chhawmdawl leh enkawl zui na hna chu involunteer in nasa taka a hun hlu tak senga alo thawh hrep tawhna azarin he chawimawina hi hlan a ni ve bawk a, tin, Benei Menashe thalai Yeshiva a awm ten hmanlaiin an inah hian Rav hian Shiur (Lecture) a neihpui thinin Rabanit hian tha taka a pasal hi thlawpin zo em emin kan mi hmasa te chhawmdawlna kawngah hma alo lakpui ve thin a, kan thalai mi hmasa te chu fa ang hialin a lo en thin a ni. Hetianga a ruala nupaa chawimawina Award Israel rama dawng awmchhun an lo ni ta hial mai a ni. Hei hi an phu hlaih hliahin an chanchin hrechiang zual chuan kan hnam hming pawhin chawimawina i hlan ve ang u tiin an duhthu an sam ve reng bawk a ni.


    He Chawimawina hlanna inkhawm ah hian mi pawimawh hrang hrangte tel tura sawm an nih avangin, mipui aduh apiangte tel theih ani lova, chuvangin, Rav te nupa pawh hian mi 9 chiah sawm theihna card an dawng a, heng zingah hian an mahni chhung te sawm tel angaih bawk si avangin Benei Menashe tam tak a tel theih lohva, mahse, heng an card neih zingah hian Benei Menashe te pawh an hmelhriat tha te chu an sawm bawk a ni.


    Hemi ni hian ka hnathawk chu dar 5:00 velah bangin a hmun chhungah lut thei dawn lo mah ila, gate ah tal Rav te nupa chu thla lo lak sak tur leh chibai tum chuan ka kal ve ta vat a, Jerusalem day anih angin, he lawmman semna hmun awmna Old City velah chuan mipui an tam nangiang mai a, chung zingah chuan inhnawh thleng ve theiin, gate bulah ah chuan tan hun hma daih atangin ka lo awm reng tawh a, a ceremony an tan hun tur hi zan dar 8:00 ah ani daih mai si a, ka nghak rei khawp mai a, chutia gate bula ka awm rei em avang chuan gate veng tu ho te pawh chu thiana lo siam hmanin ka titi pui char char a, mahse, hetia ka titi hian thil tum ka nei ran mai a, chu chu a chhunga luh theih ve ngei chu ka tum a ni.



     Tichuan, tan hun chu a lo thleng hnai taa, gate veng te pawh chuan ka luh chu an phal vek tawh nachungin, ka vanneih asiam kan ti dawn nge, Rav sawm zinga mi pakhat chu engemaw ro khawlhna avangin a lo kal thei ta lova, mahse, mi dang hnenah a card dawn pawh chu lo hmang tangkai duh an awm takin tiin a rawn thawn a, chumi hmang bawk chuan ka luh theih phah ve ta a ni.


     Tan hun hma deuh hlek chuan a hmun chhungah chuan kan lut thei taa, hetah hian Rav Avichail-a te nupa pawh kan va hmu a, chutia kan han inchibai lai vel chuan Jerusalem Mayor (Rosh Hair) pawh chu a lo lang hlawl mai a, Rav chuan "Heng te hi Benei Menashe aiawha lo kal te an nih hi," tiin, inhmelhriattirna min han nei nghal a, Mayor Nir Barkat-a chuan ka hnen lam chu rawn pan hmasa berin, "Shalom, ka pu," min rawn ti a, zia lo teh a sin, haha.. tichuan, thla lak hona te kan neih hnuah chuan tan a lo hun ta tak tak a, keini pawh chu kan thutna tur lam hmun panin kan in saseng ta a, hemi tum hian kei tih loh, Benei Menashe pa ho pathum leh nu pahnih te kan hnamatang chuan ka hmu a ni.



     Ceremony chu an han tan taa, Israel zaithiam nu lar tak Yardena Arazi chu an zai tir deuh chhen mai a, hetia a zai lai reng reng hian Rav hian Torah in a phalloh ang anih avangin, hnuailam melh chungin hmeichhe zai ri a ngaihthlak duh loh avang chuan a beng a hup ran zel a, hetia Rav berin beng a hup avang chuan a entu mipui te zinga sakhawmi ho thenkhat te pawh chuan hmeichhe zai chhung zawng hian pawnah an chhuak hlawm a ni. Hetianga an chawimawi pa Rav Avichail-a chuan mi pawimawh hrang hrang leh mipui hmaa huai taka Torah a P-thian thupek kalh zawnga chetna chu a do ngam hi zahawm ka tiin, ka ngaihsanna a zual sawtin, "Kan pa (Aba Shelanu), kan Rav" tia kan sawi fo thinna ah hian inchhuanawm puina tak ka neih belh phahin ka inhria a ni.



      Eng pawh nise, a chanchin hi sawi zawh sen pawh a ni dawn lova, kan la sawi chamchi fo dawn a ni, tun tumah hi chuan duh tawk rih phawt kan tum ang a, "A van chung sanga remna siamtu Lalpa P-thian chuan kan pa Rav Avichail-a te nupa chu hriselna leh chakna lah dam reina pein an dam lai chhung ngei hian Israel te chhandam tu tur Mashiakh chu rawn tir thuai rawh se"..


Categories: Kehila, Community, News, Article

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments