HAKHOKHMA Post Post New Entry

Judate calender hi engtik atranga hman tan nge an nih?

Posted by hakhokhma on January 16, 2012 at 1:00 PM

Vanlalmuankima Tlau: Judate calender hi engtik a tranga, hman tran nge an niha, engtik a tranga ni leh thla hi chhuttran nge an ni? zawhna nen tran phawt mai ang.


ANS- Hemi chungchang hi zir tham fe a tling a, mahse, i zawhna ang point tak khian tawite a chhan i han tum ang aw... Judate calendar hi engtik atanga hman tan nge? tih zawhna chu,, "Torah (Mosia lehkhabu 5) an dawn khan, Aigupta atanga an chhuah khan P-thian in 'in tan he thla hi thla chhiar tanna a ni ang' tiin a hrilh a, chu chu NISAN thla a ni. (Hei hi khami hun atanga a hnu zel te tana Thla chhiar tanna tur atan maia a hrilhna ani a,  mahse, hemi hma pawh hian Adama hnenah P-thian chuan Torah lo pe tawh in a hrilhfiahna nen engkim a lo pe tawh a, chu chu Bible a kan hmuh a tir lama inthlahchhawng zel te hming inziak ho hian an chhawmnung chho zel a, Nova hnuah a fa Shema leh a tupa Ever an an chhawm chho leh a, chumite hnen atang chuan Avrahama te Itskhak-a te Yakov-a te thleng pawhin an zir hman a, tichuan, chung an zir te chu Yakov-a chuan afate hnenah a zirtir chhawng leh a, Aigupta sala an tan lai pawh khan Levi-a thlahte ho chuan an zir chhunzawm zel avangin Salah pawh an tang ve lova, chuvangin Mosia leh Aharona pawh an duh duh hunah Lal inah an leng kual thei anih kha, tichuan, chu Adama atanga an inhlan chhawn zel hmang chuan Ni leh Thla chhiar dan te an hre thei taa, mahse, kha Adama Torah kha Shema leh Evera hnen atang khan tuman a hring a hrana a ziaka kha an dawn chhawn loh avangin, Thlalerah P-thian chuan mihringte hritthiam tur hawrawp leh ziak hmangin a Pe thar leh ta a ni , tin, he thla hi khawvel siam tirh thla a ni lo). tichuan, Torah kha ziakin an dawng a, hei hi 'Torah Shebikhtav' (Torah ziak) a ni, khatia Mosian Torah ziak a a dawn khan P-thian in a hrilhfiahna tawngka in a pe tel a, chu chu 'Torah Shebeal pe' (Ka a inhlanchhawn) tih a ni. Tichuan, Aigupta atanga an chhuah khan mumal takin he 'Torah shebeal pe' hmang hian ni leh thla hunbi engkim an chhiar a.


    Mahse,... hun alo kal zel a, Juda te chu an rama an awm laiin hnam dangte tihduhdahna an tuar nasa em em a, tichuan, hnam dang ten hetia tihduhdahna an tawrhtir hian, Torah te chu zir an khap sak bur mai a, tin, a chhunga thupek hrang hrangte chu zawm an khap sak bawk a,... tichuan, Rabbi hote chuan,,, hetiang anih chuan,,,,, hun alo kal zel anga, 'Torah Shebeal pe' hi kan inhlanchhawnga kan inzirtir zel theih loh chuan,,, theihnghilhin a awm vek mai ang.. tiin an lo hlauthawng ta a, tichuan,, Rabbi Yehuda Hanasi chuan , chung 'Torah Shebeal pe' zawng zawng chu fel taka daha zir zel anih theih nan abuin a lo siam khawm ta a, chu chu "MISHNA" tih ani,, he a siam kum hi Khawvel siamtirh atanga chhuta kum 3981 ah a ni.


  Tichuan, chu MISHNA lehkhabu ah chuan,, a thuphung angin (Tunlaia kan calendar inziah ang ni lo hian) hun leh kum ni leh tha chhut dan zawng zawng poh chu ziakin a awm a... mahse,, Hilel Hazaken chuan tunlaia kan Calendar inrem ang hian chu Mishna bu atang chuan a rawn siam chhuak ve leh ta a, hei hi Khawvel siam tirh atanga chhuta kum 4100 na a ni, hei hi Kristian te kum chhiara kum 359  ani bawk.


    A zawhna 2 na - ENgtik atangin nge ni hi chhut a nih ? tih zawhna chu- 'A hmasa berah chuan, khawvel siamtirh ni 6 chhung a Lalpa P-thian in ni a siam dawn reng reng khan "Tlai lam a awm a, zing lam a awm a" tiin, a sawi avangin, Tlai lam hi a hmasa tih a ni a, tichuan, chu chu a afiah lehzual nan, Lev 23;32 "chumi ni thla ni 9 ni tlai lam, chumi tlai lam atanga tlai lam leh thleng (ni 10 na tlai) chu chawlhniah in hmang tur ani" tia kan hmuh ang hian tlai lam chu a hmasa tih a chiang ta em em a ani. Tlai lam kan tih awmzia hi ni tlak fel chiah atanga a tuk ni tlak leh thleng hi, a chumi ni 1 sawina chu a ni.


    Tin, Engtik atanga thla hi chhut tan nge ? tih zawhna chu, Juda te hian thla kan chhiar dan hi Thla hmang tak takin a ni a, chumi awmzia chu, Thla det zan atangin thla thar kan chhiar thin a, a ral leh thleng chu thla 1 alo nita a ni.


     kan hriat theuh angin, thla khat chhung hian Thla hian kan lei hi vawi khat a hel chhuak a, mahse, hei hi a hun bi dik tak angin, ni khat ni hnih tiin a sawi theih chiah lova, a chhanchu, Thla hian kan lei hi ni 29.5305888531 chhungin vawi khat a hel chhuak a, chumi awmzia chu, tunlai kan sana hmanga chhut chuan ni 29 leh darkar 12 leh minute 44 leh second 2.9 chiah in thla hian kan Lei hi vawi khat a hel chhuak a ni.


    Chuvangin, Thla khatah hian ni 30 a awm kan ti thawr thiang lo tihna a lo ni ta a, chuvangin, Juda Calendar ah hian thla khata ni 29 awm chang leh ni 30 awm chang a lo awm ta a, amaherawhchu, kum khat chhunga kan leiin ni a hel kual na kawng a zir vangin kum khat chhunga 'ONOT' sik leh sa fur leh thal ho te hi Ni chuan a lo siam danglam avangin, Ni hmang anga Calendar hman tel pawh chu a lo ngai ta a, a chhanchu, Kalhlen kut hi 'Aviv' hunlai a tlak tir a ngaih miau si avangin, (Torah thupek angin). Tichuan, kum hnih leh kum thum danah zuan kum 'Shana Meuberet' tia koh chu neih a lo ngai ta a , hemi kum ah hian NISAN thla atanga chhiar a a thla tawp berna ADAR thla chu vawi hnih awmtir a lo ni ta a ni.


    Hei hian a tum chu kum khat chhunga Ni Calendar hmanga chhuta ni awm zat ni 365.242189 chu huap tir angaih avangin a lo nita a ni. Tichuan, hetia Zuan kum kan lo belh zel thin hian kum khat chhunga ONOT (Sik leh sa fur leh thal) ho chu a hun dik chiah ah a lo tla zat zat thei ta a ni.


    Tin, Kan leiin ni a hel kual tan tir atanga kum khat chiah ah hian a kum hma lama kan lei awmna chiah ah khan a thleng dik chiah thei lova, a chhanchu, Ni hmanga kan chhut hian ni 365 chiah ah hel chhuak lovin, ni 365.242189 ah a hel chhuah chiah avang hian a ni a, tichuan, kum 19 na chiah zel ah a hel chhuak a ni. (chumi awmzia chu, vawiin a kan awmna khawvel hi nakum tun ang hun/ni chiah ah hian ni awmna atanga chhutin kan thleng pha lo hret a, mahse, vawiina kan awmna hi vawiin atanga chhut a a kum 19 na ah hian vawiina kan awmna hmun ah chiah hian kan awm dawn tihna a nih chu.)


   Tin, hriat tel ve mai mai ah, Juda te hian hunthar kan chuankai hian P-thian fakin kan chawimawi thin a, chutiang ang chuan Thla thar ni 'Rosh Khodesh' pawh hian tawngtaina ah belh thin a awm a, tin, Thlathar lawmna 'Kidush Levana' pawh hi Thla a det chian hunah Thla thar ni atanga ani 3 na atangin kan hmang thin bawk. Tin, P-thian in Thlathar ni ruata titlu tur hian a fa Israel te hnen ah thu neihna a pe a, chutiangin, hmanlai chuan ziaka Calendar ala awm hma chuan thlathar ni an hriat theih nan mi 2 thu hretu (Thla de hmu tu) an awm angai a, chumi te chuan Rorelna in 'Beit Din' ah an hrilh ang a, tichuan, Roreltu Rabbi te chuan zawhna hrang hrang zawtin an lo fiah ang a, thu hretu te chu an dik anih chuan 'Rosh Khodesh' Thla thar ni chu an puang ang a, tichuan, Jerusalem Olive tlang atangin meichher detin an vei anga, chumi lo hmutu te chuan tlang sangah an lawn anga, an lo vei chhawng ve zel anga, tichuan, Babulon (Bavel - tunlaia Baghdat) thlengin an vei chhawng thin.  Hetianga Rorel tu ten thu hretu te an lo zawhna ah hian tum khat chu tisual hman tepin Thlathar niah an puang hman tep a, mahse, Rabbi Shmuel chuan ka pa leh ka pu te chen atanga kan lo inhlan chhawn danin zanin hi thla thar ani lo tiin, a lo hnial thla tawh a, ani Rabbi Shmuel-a hi Van a arsi zawng zawngte ka awmna khuaa hmun tin ka hriat ang hian ka hre vek ti khawpa Arsi chanchin hria leh Astrology ropui a ni.

     Israel te hnena ni leh hun chhiar chungchanga thu neihna pek anih ang hian Joshua pawh khan ni a chelh ding tawh bawk a nih kha.


Hei hi Khawvel siam tirh atanga Kum chhut dan, Bible leh Lehkhabu hrang hrang 'Seder Dorot' bu te rawn chunga a Chart ka siam ani a, inmil tlapin tunkum kum 2011 leh 12 hi Bible atanga chhutin kum 5772 a chhuak chiah . Click fb - here

Categories: Judaism, Halakhot, Juda dan, Musagim, Awmzia

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments