HAKHOKHMA Post Post New Entry

Hadarat Nashim

Posted by hakhokhma on January 4, 2012 at 7:20 PM

    Tun kar hnih kar thum chhung khan Israel ram hmun hrang hrangah hmeichhia te endawngna leh an hnuaihnun zawkna ni awm tak lantirna thu a thang nasa hle a, Israel ramah hian 'Kharedim' kan tih mai a dum suita inthuam ho te hi hmun hrang hrangah hian a hlanga an chen khawm na khaw hrang hrang a awm a, heng dum suit ho hi Sakhua na la vung leh fir taka kalpui tute an ni a, heng 'Kharedim' ho te hi an inthuam dan inang vek hlawm mahse, pawl hrang hrang an awm a, Israel in state a neih hmaa ram pawna an awm laia an awm bitna hmun deuh deuh ah chuan pawl angin an awm zel a, hetiangin, 'Khasidut Khabad', 'Khasidut Belz', 'Khasidut Toldot Aharon', 'Khasidut Sikrikim', 'Khasidut Breslav' etc'.. heng pawl hote hian hruaitu Rabbi neiin chu chu 'Admor' tiin an kova, chu an Admor thu ang chu Juda dan kalphung ah emaw, a sawi apiang ang chu thih ngamin an kalpui thin a ni.


    Heng 'Khasidut' (Ngilneihna) pawl hrang hrang te hi a then te chu nem deuh te awmin, a then chu firfiak tak tak leh an duh dan anga an bul amite an kal loh chuan chil pawh chhak thak ngam khawpa huaisen leh Torah dan leh an pu Admor sawi dan anih chuan Israel state dan pawh engmah ngaipawimawh lo an awm bawk, chutiangin, heng pawl hrang hrang zingah hian Israel state hi pawm lo bur leh an kianga Israel flag keng te pawh lunga vawm zui duh pawl leh Israel mi huat ber Iran President va hmua va chibai hial pawl te pawh an awm a ni. Amaherawhchu, a firfiakte piah lamah ve thungah hi chuan Israel ten ram an neihna tura hma la hmasa tute chu heng Kharedim kan tih hi an ni lawi bawk a, tin, Israel ram hruai tute pawhin a thu lova ro an rel thluk ngam loh khawpa ropui leh hlauhawm te pawh awm bawkin, ram hruai tuten a duh loh zawng anga thil an kalpui vaih chuan Israel rorel khawl tichhe vek leh Sorkhar tiphel thei khawpa ram hruaitute zinga nghawng nei khawp te pawh an awm bawk.


    Heng Kharedim pawl thenkhat te hian 'Beit Kneset' (Synagogue) chhunga mipa leh hmeichhia kan thut pawlh ngailoh ang bawk hian pui punna hmun angah pawh mipa leh hmeichhia an inthutpawlh tur a ni lo tiin, an bitna khuaa Bus service thenkhat te chu Bus company te nena inbe remin 'Mehadrin Line' tia kovin a hma lamah mipa an thu ang a, a hnung lamah hmeichhia an thu ang tiin inbiakremna an nei a, tichuan, kum tam tak chutiang ang chuan an awmna khuaah te chuan Bus a service thin a ni.


    Amaherawhchu, tunhnai ah Sipai (IDF) officer training na a Sakhawmi sipai tang te chuan Juda dana 'Mipui hmaa hmeichhe zai ri ngaihthlak thiang lo' tih a awm avangin, Sipai Ceremony naah mipui hmaah Sipai nula a zai avangin, chumi duhloh entir nan chuan Sipai Sakhawmi rual te chuan chu Ceremony chu an chhuahsan a, chu thu chuan sipai lam hotute a ti thinur zet mai a, heng sipai sakhawmi hote hi 'Kharedim' (dum suit) ho chu an ni lem hran lova, heng sipai te hi 'Mizrakhnikim' (Sakhawmi dum suit a inthuam kher lo ho) an ni a, tichuan, he thu hi Radio ah te leh Tv lamah te an tlangzarh nasa em em in, khang sipai chhuak hote kha an court martial vek hlawm a, tichuan, an Officer Course atang pawhin an hnawtchhuak hlawm bawk a ni.


    Tin, Kharedim te hi a tlangpuiin Sipai ah an kal lova, hei hi Ben Gurion-a hunlai tawh atanga, 'miin a eizawnna tur atana Torah a zir chuan Sipai ah a tan kher a ngai lo' tia dan awm tawh a ni a, mahse, Kharedim zingah hian Torah zir lem lova awm an tama, heng te hi Sipaia an kal ve theihna tura Sipai chhungah a bik taka enkawl leh an duh dan anga, Sakhuana lama zalen taka an awm theih na tur Unit din sak an ni a, he Project hi Israel Air force ah a ni a, tunah hian mi 2000 vel he Unit ah hian an awm mek a, he Unit din tu hi Israel Air Force Rabbi ani a, tunlai thu vel den chhen hian a aia thu nei tuten he Unit chhungah hian hmeichhia te pawh thun luh ve tur an tih chu duh lovin IAF Rabbi hi ni 4/1/12 khan a nihna atang  hian banna a thehlut bawk a, hei hian Sipai lam thu neitute a ti thinur tak zet a ni.



    He thu avang hian Israel rama Rabbi lian deuh deuh te chuan Juda dan chu hmathehin Sipai lam hotute thil tih dan chu a dik loh zia an au chhuah pui nasa em em a, tichuan, Chief Rabbi te meuh ruaiin, khang sipai chhuak te khan thil dik an ti a ni, tia an au chhuah pui avang chuan , Israel ram 'Khilonim' (Sakhawmi lo) ho chuan phuba lakna atan tiin kum tam tak ri chhuak ngai lo 'Kharedim' khuaa Bus service te chu Media lamah puang zar tan tain, camera nena inthuamin heng Bus ah te hian hmeichhe sakhawmi lo hote chu chuang luiin buaina an va chawk chhuak tan ta a, tichuan, Bus chhunga 'Kharedim' (dum suit) hote chuan a hnung lama chuang tura an hrilh te chu a hluar thei ang berin Media lama puangzar zelin Police an kova, tichuan, khatianga a hnung lama thu tura hmeichhia hrilh tute kha 'Pawngsual tum Case' anga thubuai siam sak zel a ni a, heng thu a taka hmu lemlo Media lam atang chauhva hre tute chuan 'Kharedim' te hi an vai huat taa, hmun tam takah 'Kharedim' naupang school kal tur te, an 'Yeshiva' (P-thian thu zirna) kal turte chu lo sawisain damdawiin ah pawh luh phah an tam em em a, tin, Kharedim ho inah te chuan an huat tur zawng takin "Happy Krismas" tih te , SEX tih te an zan mutthilh laiin an in bangah te chuan lian tak takin an ziah sak bawk a ni.


    Tin, 'Kharedim' pawl hova fir leh firfiak ber mai 'Khasidut Sikrikim' ho awm khawmna khua Beit Shemesh ah chuan P-thian thu zirna leh 'Beit Kneset' (synagogue) awmna kawtthler ah te chuan hmeichhia te a kiang hnaia kal phal lovin, hmeichhe kalna tur bik te siamin , 'He kawtthler ah hian hmeichhe inthuam phui tha lo chu kal thiang a ni lo' tih te an tar keu kuau mai a, tin, heng 'Sikrikim' hote hian a khaw hmuna cheng hmeichhe naupang kum 8 mi chu an zinga mipakhat chuan chil a lo chhak bawk a, hei vang hian he naupang nu hian ankhuaah chuan kawng zawhna a huaihawt a, tichuan, mi engemaw zatin an tawiawm a ni.



    Heng thu vel hian tunlai Israel News a luah nasa em em a, Kneset a 'Kharedim' ho thlantlin Minister hrang hrang te ho chuan hetianga a firfiaka che te hi 'Kharedim' ho zawng zawng an nih loh thu leh, mi 200 bawr vel chauh anih thu an puang chamchi a, chutiangin, hetianga hmeichhia te a pawng ataka huaa ten ang zawnga an lan tir hi thil dik lo a nih leh kan Torah (P-thian thu) dan kalh anih zia Rabbi hrang hrang te pawhin an au chhuah pui lawm lawm a, Khawvela Rabbi ropui ber Harav Ovadia Yosef שליט"א pawhin hetianga a pawng ataka hmeichhia te endawng leh ten tute hian P-thian hming an tichhiain Tlanna ni 'Yom Kippur' pawhin an sual a tlan zo lo ani tiin, 'Yeted Neeman' chanchinbu ah a puang ve bawk.


    Engle khaw le, he thu hi 'Kharedim' te zinga mi tlem te firfiak pawl te chetna ani a, chuvangin, a pawng ataka 'Kharedim' te huatna leh ngei na tur atana 'Khilonim' (sakhaw mi lo) ten Media lama Israel hnam chhunga phelna leh inhuatna chawhchhuah an tum hi thil dik a ni lova, 'Kharedim' te hi kulmut taka P-thian thu zir tute an ni a, an tawngtaina leh P-thian dan fir taka zawm tute an nih avang hian Israel ramah pawh hian muanna awm ani zawk a, Torah ah pawh Israel fa ten indo an hmachhawn dawn reng reng khan 'Elef lamate, elef lamate' (Camp Sangkhat Sangkhat a inthenhrangin) tih anih angin, indona a chhuak te zat khan camp lamah P-thian thu an lo zir thin a nih kha, chuvangin, mi tute emaw thil ti thei ten Israel hnam huam chhunga inhuatna thlen tir an tum dan hi hriatthiam a tha.

Categories: Judaism, Halakhot, Juda dan, Khinukh, Education

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments