HAKHOKHMA Post Post New Entry

Khanuka

Posted by Moshe Ilan on December 15, 2011 at 5:25 PM

       Beit Hamikdash (Temple) pahnihna tawp lam hun laiin Israel ram chu Greek (Yavan) hovin an awp a, Juda te chu an tiduhdah em em a, Torah zir leh P' thupek (Mitsvot) zawm te chu an khap sak bur mai a, tin, chu chang ni lovin, Juda mi innei tur reng reng monu te chu Greek Sipai lal chuan an inneih zanin a mutpui phawt zel tur ani tiin dan te an chungah an zam a.


     Tichuan, Modiin khuaa cheng Puithiam lal (KohenGadol) chhungkua Yokhanan-a fapa Matitiahu-a fanu Yehudit-i pawh chu a pasal neih hun a lo thleng dawn hnai ta a, amaherawhchu, ani chuan Juda monu laka dan an zam chu paltlang a tum hauh lova, tichuan, Greek Sipai lal hnena a kal hun a lo thlen chuan Cheese leh Wine hmangin a hrai rui a, chutia a ruih lai tak chuan a lu a tan sak ta a, hetia Sipai lal hnena a kal hma hian a pa Matitiahu-a leh a unau pa panga te Yonathan, Shimon, Yehuda, Elazar, leh Yokhanan-a ten hlim taka an inneihna ruai an kilna hmaah chuan saruakin ava lut a, "Tunah hian ka unaupa panga ten in unau nu Jentel mi hnena a riak tur chu hre reng chungin hlim takin ruai in kil thei a, amaherawhchu, ka pu Shimon-a leh Levi-a te chuan an pahnih maiin an unau nu Dina-i Jentel miin a mutpui chu an palzam phal lo thung a ni kha, chuvangin, ka unau pa te ho hian engmah tih in tum loh chuan, keiman thil ka ti ngei ang.." tiin, thu a hrilh a ni.


    Heta a thu hrilh hian a cho phurin Sipai lal lu atan hnu leh lek phei hi chuan Greek ho do tura pen chhuah chu a ṭul nain a awrthlu hrim tawh a, tichuan, a pa Matitiahu-a ho chuan sipai 'Khashmonaim' leh 'Makabim' dinin 'Mila Hashem Elai' (P' lama ṭang chuan min rawn zawm ve rawh se) tiin, thu puang zarin indo chu an lo hmachhawn ta rup rup mai a, engmah inzirlawkna pawh awm lovin, ṭum riat lai indo hi an hmachhawn a, tichuan, Kislev thla ni 25 naah chuan hnehna famkim chang tain, Israel ram chhung ata Greek ho chu an um chhuak ta a, Beit Hamikdash (Temple) pahnihna pawh chu Juda te kutah a lo awm lehta a ni.


    Hetia Beit Hamikdash an lak let leh hian hman tlaka hawn thar leh alo ngai ta a, tichuan a chhunga Greek Pathian milim an dah te leh Jentel thil chi hrang hrang te chu paih chhuakin an thian thianghlim leh ta a, amaherawhchu, engtik lai pawha alh tur khawnvar chhitna turin Olive (Zait) hriak thianghlim Puithiam Seal chuang chu an hmu zo ta lova, amaherawhchu, eng ti tih tihin emaw, hriak thianghlim chu bel khat ni khat chhit daih lek hi an hmuchhuak ta a, eng le khaw le, an chhi ta thova, amaherawhchu, P' thil tihtheihna mak lo thleng tain, a thar an siam peih leh thleng ni 8 chhung chu, chu hriak chu mit lovin a alh ta reng a ni.


     He indo an hnehna ni leh Beit Hamikdash an luah thar lehna ni hi kum tina kut nia hmang turin dan an lo siam ta a, chu chu 'Khanuka' tih a ni, tin, Khawnvar chuan ni 8 chhung a awh avangin, he Khanuka kut hi ni 8 chhung kumtin Kislev thla ni 25 na aṭang chuan Juda te chuan kanlo hmang ṭhin ta a, he Khanuka indona ah hian thil mak thleng chi hnih a awm a, chung te chu, Israel Sipai siam chawp tlem tein Greek Sipai ṭha a nuaih a nuaih tel an hneh chu ani a, hei hi 'Nes Nistar' (Thilmak inthup) tih a ni a, tin, Khawnvar ni 8 chhung alh chu alo ni leh bawk a, hei hi 'NesGalui' (Thilmak lang chhuak) tih a ni bawk.



    He Khanukah lai hian chaw nghei thiang ani lova, tin, Mitthi te uina thu sawi thiang a ni lo bawk.


    Khanuka zantir arsi lan 'Arvit' ṭawngṭai zawh veleh zantin zan riat chhung hian Khawnvar/Bati chhit ṭhin a ni a, 'Beit Hilel' dan hmangin zan khatna ah bati pakhat, zan hnihna ah bati pahniha chhit chhoh zel tur a ni a, bati hi kan kut dinglam zawn aṭanga chhit tan tur a ni a, tichuan, a zan hnihna ah a nimina kan chhit kiang veilam ah a thar dah belh lehin a thar zel hi chhit hmasak ber ṭhin tur a ni, tichuan, a 'Shamash' bati dang kan chhi tel bawk ṭhin tur a ni a, he 'Shamash' hi 'Brakha' (malsawmna) sawi hmain emaw, chhit zawh vek hnuah a hnuhnung berah chauh chhit tur a ni a, Brakha kan sawi zawh chiaha kan chhit chuan kan Brakha sawi leh kan 'Mitsvah' tih inkar ah chuan 'Hefsek' (daidanna) kan siam tihna ani a, chuvangin fimkhur hle tur a ni.


    Bati hi chhit hnu ah chuan chawi sawn leh a eng te chu hman thiang a ni lova, mi hmuh theihna tur hmun ualau a dah tur a ni, a chhitna hmun hi lei aṭanga sum 3 leh tawng 20 inkara dah tur a ni a, a ṭha ber ah chuan kawngka pawn lam vei lam, 'Mezuzah' awm lohna lam ah kawngka biang aṭanga sum1 a hlaa dah tur a ni a, amaherawhchu, chu hmun chu ualau anih loh chuan Gate pawn lamah vantlang hmuh theih tura hun tur a ni. Tin, a chhit turah hian Olive hriak ngei hman chu a ṭha ber a, tin, chhungkaw member tin te chuan mahni puala chhit ve ṭheuh chu a ṭha ber 'Hidur' tih a ni a, hetiang hian Ashkenazim dana kal te chuan an chhi ṭhin a ni, tin, Sfaradim dana kal te erawh chuan chhungkaw pa berin a in chhung atan a chhi ṭhin a, chhungkaw pa ber hi a inah a awm dawn loh chuan a inchhung ami midangin an chhi tur a ni, a chhit hun tak hi arsi lan hnu 'Arvit' zawh veleh ani tur a ni a, amaherawhchu, eng emaw ro khawlna avanga a huna a chhi thei lo a nih chuan zing 'Alot Hashakhar' (ni lan hma minute 70) thlengin a chhi thiang bawk.


    Khanukah lai hian 'Shakharit' (zing ṭawngṭaina) ah 'Halel' chhiar ṭhin a ni a, tin, 'Birkat Hamazon' ah leh 'Amida' ah 'Al hanisim' chhiar tel ṭhin bawk a ni.


         Khag Sameakh vek ule…  





Categories: Judaism, Khagim, Kut ni te, Khinukh, Education

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments