HAKHOKHMA Post Post New Entry

HMING HMAITAWKA

Posted by Itskhak Hmar on December 3, 2011 at 5:50 PM

    Tlangvala pumpa ve lem,belval vala val satliah  an tih ang tak tak hi ka ni tawh a. Ka biang fual purah leh ka dul kiar hiar ah te chuan thahrui a awm mawlh silo. Miten Zu chanchin an sawi apiangin ka hming Hming Hmaitawka tih hi an sawi tel ve ziah thin.


 

   Zu hi atirah chuan ka ngaina nghal a ni bik lova, a ni pawn min ngainat reng ka hre lo. Ka tem a, ka fawp a, ka chawm a, ka hawp bawk avangin tunah chuan ka ngaina a ni satliah lova, ka hmangaih a, a ni pawhin min hmangaih a, tunah chuan ka mamawh tluk zetin a ni pawn min mamawh tawh a ni.


 

     He khawvel eng ka hmuh tirh ni chuan ka chhung te chuan hlimna nasa tak neiin min lawm a, min fawp a,min pawm a ni. Nausen duhawm tak ka nih a vangin. Kum te an liama hun a ral zel a, zing ni thar  duhawm tak mai rawn chhuak leh thin te chuan engtin ka hringnun hi herliam pui leh ang maw? tiin ka ngaihtuah thin. Chung ni thar rawn chhuak leh thin te chuan ka hringnun pawh rawn her danglam zelin tunah chuan sawrkar dana kum puitling a chhiar ka lo ni ve ta a, vawiin atang chuan mahni duh thal a nung a, tla hrang thei ka lo ni ve ta. NUNNA nge ka thlan dawn THIHNA.


 

    A pawi ta ber mai chu ka naupan tet zual lai deuhva zil-hauna tha ka Nu leh Pate hnen atanga ka dawng lo lutuk kha a ni. Min hmangaih luat tuk avang khan ka hmalam hun min thlir pui lova, ka mamawh leh duh tinreng min tih sak a, ka mamawh ber an thinlung chhunga hmangaihna kawng eng leh dik zawh tura thu tha min kawh hmuh tur khan an mit a del tlat si. Hmangaihna hian min lo hruai bo thei hle a lo ni.

 


     Ka nausen tet atanga ka hmuh zin ber mai, ka Pa chuan min duata min hlimpui khawp. Mahse tihsual lian tak a nei, ka hriat leh hmuh lai ngei a ka Nu tawngkam rapthlak tak taka a hauh thin leh kut a thlak thin te, ruih a nei tih hriat tak mai a ansa-patal thinte ka hmuh khan ka thinlungah sualna chuan thla zarin min hneh a, ram ala ta duai duai mai a ni. Chu ka thinlung a sualna rawn lut te chu hneh tumin bei let ve thin mah i la, keimah mai chuan ka hneh zo silo, min chhan thei tu tur ka chhungte lah chuan min hmangaih tlur ringawt a, ka tlakchham an hre lo. An hre mawlh lo a ni.


 

    Tlangval ni ve ta fam chuan thenrual te kan lo kawm a, rawlthar thazat a na a. Vawi khat na reng reng chu tia sual kawng zawh ve chak nain kan khat a, kan thil tawn thar apiang kha nuam kan tiin vawi khatin vawi hnih a hring a, thian te zinga thei lo nih bik, nep Sazu lutuk mintih kan hlau a, tlawmpa eksenah kan la a, rual pawl loh luat ka hlauh a leiah,  hriat loh Karin Zu bawihah Val ka lo tang ta reng mai. Ka chhia leh tha hriatna in thlah duh mahse min thlah duh ve ta mai si lo. Ka in a, min in ve ta. Ka cho a, ka rima, ka rim-thlu ta a ni ber mai.


 

    Tleirawl duh deuh, tawih tih deuh ka nei a, han inhmangaih tir dan ka thiam bawk si lo. Zawltling vawnnat ka tina ve tum hrang si. Min duh ru ve tho ni a ka hriat khan, ka zei loh luat tuk vangin leng dang tang min bei san, ka rilru na lutuk inhnem nan ruihhlo lamah ka tuan a, min hnem tak meuh va, min hnemtu chuan a zunah tun thleng hian min phuar ta a ni.

Categories: Article

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments