HAKHOKHMA Post Post New Entry

Parashat Nashim - Vayeira

Posted by Shavei Mizoram on November 10, 2020 at 10:35 AM

Parashat Nashim - Vayeira

- Harel Kingbol

“Tin, anni chuan a hnenah, ‘I nupui Sari khawiah nge a awm?’ an ti a. Tin, ani chuan, "Saw puan inah sawn," a ti a. Sforno chuan ti hian a sawi a: P-thian'in Avraham hnena a hriattir sa tawh, Sarah naupai tur chungchang chu hrilh an duh avangin Sarah awmna chu an zawt a ni.

Chuvangin an Mission tih hlawhtlinna tur chuan thu lawmawm tak mai chu Sarah hnenah chuan an hrilh a ngai a, achhan chu chu hlimna chuan a fa neihna turah chuan a tha zawngin nghawng tamtak a neih theih tlat avangin. Chu chuan min zirtir chu nu in nau a pai laia a rilru leh a awmdan chuan a naupaiah chuan nasa takin awmzia leh nghawng a nei a ni (tunlai scientist te’n an sawi hma daih hian kan Torah chuan alo sawi daih tawh a ni).

Be’er Mayim Khayim dungzuiin, engvangin nge vantirhkoh hote chuan Sarah awmna chu an zawh kher? Achhan chu mikhual lo lawm luh (Hachnasat orchim)ah chuan hmeichhiate mawhphurhna a san zia hrilhhriatna turin. Mikhual te an lo luh laia hmeichhia/nu berin mikhualte tha taka a lo chiau au na chuan mikhualte chu thlamuanna nasa tak a neih tir a ni.

Chu mikhual lo lawm luh chuan fanau malsawmna a keng tel bawk ti hial a sawi te pawh an awm. Kan inah mikhual lo lut te tha taka kan lo lawm a, kan lo dawnsawnna chu a chhul chhunga mikhual (naupai) pawh chu tha tak leh duat takin a dawng sawng thei dawn a ni. Vantirhkohte chuan Sarah chu hmeichhe fel tak ani tih an hriat avang chuan an inah an va lawi luh pawh chuan anmahni lo lawm turin a hmel chu hmuh ve an in beisei em em a, mahse an beisei ang a, a hmel an hmuh tak si loah chuan mak an ti letling hial zawk a ni.

Mikhual lo lawm luh chu thil tha tak a ni tih hrereng mahse ti hian vantirhkoh hote chu a chhang a, “Lal in chhunga lal fanu chu a ropui vel vek a” [Tehillim45:14 (mizo bible ah 13)]. Chuvang chuan Sarah pawh chu a nungchang mawi em avang chuan puan in chhungah chuan a awm reng zawk a ni.

Rashi hrilhfiahna ah chuan vantirhkoh hote chuan Sarah awmna chu an hresa vek tho si a, a chhan chu P-thian mi tirhte anni miau si a. Hresa reng chunga an zawhna chhan zawk chu ti hian Rashi chuan ti hian a sawi a. Sarah nunchang mawi leh tha tak chu anmahni ngei chuan a pasal Avraham hnenah chuan sawi a, a nungchang mawina avang chuan a pasal chan a duh ngawih ngawih theihna turin. A pahnihna-ah chuan an ei leh in a yain brakha sawinaah chuan Sarah chu lo awm ve tura an duh vang/sawmna a ni bawk, achhan chu chu brakha chuan chunglam malsawmna chu hnuk thlain inchhungkhurah chuan malsawmna a thlen theih avangin. Hemi behchhan hian vawiin ni thlengin Kiddush naah chuan pa berin yain a inzawh hnuah chuan a nupui chu a pe nghal thin a ni.

Kli Yakar chuan ti hian zawhna a zawt a: Avraham chuan Sarah nungchang mawi zia chu a hre tawhsa tho si a, anih chuan vantirhkohte chuan Sarah mawina leh a nungchang that zia te chu an hrilhhriat kher angai em ni? tiin.

Vantirhkhohte chuan a tisa mawina leh thatna avangin khawnge I nupui sarah a awm ti a zawt anni lo a; khawnge a awm ti a an zawhna awmzia zawk chu a tisa thil ni lovin a thlarau dinhmun an zawhna zawk a ni. Avraham chuan ka nupui hi a fel loh vangin a ni fa kan neih theih reng reng loh ti a, Sarah chu a mawhpuh lohna turin vantirhkohte chuan Sarah thlarau dinhmun sanna chu sawi lang an tum vang zawk a ni, achhan chu hmeichhe nungchang mawi chuan lal/mi ropui tak fa an hring thei a ni tih Tamar atanga kan hriat ang in. (Megillah 10b)

Chuvangin, khawnge Sarah a awm? tih chuan a kawh tum zawk chu fa tha leh fel ta nei thei turin eng dinhmunah nge a awm tih chu an zawhna a ni a. Achhanna-ah chuan “puan inchhungah” – chu a nungchang mawi tak leh thlarau dinhmun sang tak avang chuan amah atang chuan mi thianghlim tak takte an lo chhuak thei dawn a ni.

Tichuan Sarah chuan, "Tar ka nih tawh hnu hian lawmna ka nei ang maw, ka lalpa lah a upa tawh bawk si?" tiin a rilruin a nui a. Tin, L-LPA chuan Avraham hnenah, "Engati nge Sarahi’n, 'Kei tar hian fa ka hring em ang maw?" tiin a nuih? (Bereshit18:12 -13).

Rashi chuan he lai thu ah hian P-thian chuan Sarah tawngkam chu a thlak danglam a ni tiin a sawi a, a chhan chu an nupa inkarah chuan inremna a awm theihna turin. Helai atang hian kan zir theih chu mite inkarah remna a awm theihna tur anih chuan tawngkam thlak danglam chu a pawi lo a ni, chu kan tawngkam thlak danglam chuan mi dang tumah a tihnat dawn loh chuan, tiin. (Rashi, Bereshit 18:13)

“Chuti chuan Avraham chu a bawk khup a, a nui a, a rilruin, "Kum za mi hian fa a nei dawn em ni ang? Sarah, kum sawmkaw mi chuan fa a hring dawn em ni ang?" a ti a.” (Bereshit17:17) Or HaKhayim chuan P-thian'in Avraham hnenah Sarahi’n nau a neih tur thu a hrilh lai khan ani pawh chu a nui ve tho a lawm, Sarah leh Avraham te nuih chu enge a in an lohna tiin zawhna a zawt a. Onkelos kan en chuan Avraham-a nui tih chu khedi (Bereshit 17:17) hlim/lawm tiin a letling a – Sarah ve thungah chuan nui tih chu khayekhet (Bereshit 18:12)– nuih sawh tiin a letling thung. Onkelos chuan thumal inang reng nui /יִּצְחָק/צָחֲקָה thu inang lo lutuk chuan a lehlin daih?

Rabbi Mattis Weinberg chuan ti hian a sawi a, Avraham chu tawngkam tluangtlam pangngaiin a tawng mai a “…. Kum 100 mi hian fa a nei dawn em ni ang?” Sarah erawh chuan amah chu a lai takah indah in, "Tar ka nih tawh hnu hian lawmna ka nei ang maw?” Avraham chuan a tawngkamah chuan future tense hmangin, tun hunk al tawhte chu hun lo la awm tur chuan a ti danglam thei a sin tiin. Sarah erawh chuan Past tense hmangin heng zawng zawng ka tawh vek tawh hnuah hian hun lo la awm tur chuan engmah danglamna a thlen tir chuang lo ang, fa a neih theih chu a ring lo a ni.

A enga pawh chu lo nise, Kli Yakar ve thung erawh chuan ti hian a sawi ve thung a, Sarah chu a nui chhuak miah lo a (a rilru in a nui a). Hemi atanga kan zir theih zawk chu Sarah chu dinhmun sang taka awm a nih avangin thilte thalo te reuhte a tih chu a langsar em em a ni, chu mi atanga kan hriat theih chu Sarh dinhmun san zia chu a ni tiin.

“Chutichuan Sarah chuan, "Ka nui lo" tiin a pha a; a hlau si a. Tin ani chuan, "Awih loh loh tur; i nuih ngei kha le," a ti a. (Bereshit18:15) Or Ha'Khayim chuan “a hlau si a” tih atang hian ka zir theih chu “P-thian tih mi chuan tihpalh avang liau liau a thilsual a tihpalh pawhin P-thian hlauhna nasa tak a nei nghal thin” tih hi a ni.

Sefat Emet hrilhfiahna dungzuiin, Sarah chuan a nuih avanga a thilsual tih chu rang takin a a siam tha leh nghal a. Chu sual tih avanga inchhirna chu P-thian hremna hlauhna avang ni lo va, P-thian hmangaihna avang zawk a inchhirna neia an piangthar anih chuan chu chu piantharna famkim kan tih chu a ni. Sarah pawh a tirah chuan P-thian hlauhna avang ringawtin sual a sim a, ziak a kan hmuh angin a hlau si a. Avraham vethung erawh chuan P-thian hlauhna avang ni lo, hmangaihna avang zawka sual sim chu a hlu a ni tih a hria a, chu vangin ti hian a hrilh a “i nuih ngei kha le” – sual simna hi kawng dangin I neih a la ngai a ni a, ti chuan chu I nuihna chuan lawman tha tak a pe zawk ngei ang che. Tichuan hlauhna avang ringawt ni lo, hmangaihna avang chuan a sual tih chu siam tha in piantharna chu alo nei ta a, ti chuan fa lo neiin an fapa hmingah chuan “Itzkhak ala nui ang” tih chu put tir alo ni a, chu velah chuan Sarah chuan hlim takin P-thian chu a faka, “Tin, Sarah chuan, "P-thianin mi tinui ta” (Bereshit21:6).

Hmangaihna famkim a hmangaihna nen P-thian hnenah chuan let lehin chumi avang chuan malsawmna zawng zawng chu alo luang chhuak thei ta a ni. (Sefat Emet, Parashat Vayeira 5652)

Shavei Israel Torah Outreach Programe

Olam haTorah – Torah Khawvel Bnei Menashe Facebook Page

https://www.facebook.com/TorahKhawvel

Torah Khawvel WhatsApp Group a awm duh tan a hnuaia Link ah hian Click tur:

https://chat.whatsapp.com/Ey9DxNE3bpk...

 

Categories: Parshat Nashim, Emuna, Rinna lam, Torah

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments