HAKHOKHMA Post Post New Entry

Parashat Ki Tetze

Posted by Shavei Mizoram on August 28, 2020 at 6:25 AM

 

Ki Tetze

- Harel Kingbol

Sava tui emaw sava no emaw lak hmaa a pui thlawh chhuahtir hmasak phawt Mitzvah hian Nu nihna dinhmun ropui tak min zirtir a. lbn Ezra chuan nu (sava pui) chu a hnuk/pawimawh hmasaber anih avangin chung ramvak hote pawh chuan zahna pein an thlawh chhuah tir hmasa phawt tur ani tiin a hrilhfiah. “Kal kawnga thingah emaw, leiah emaw, sava bu a puiin a no emaw, a tui emaw awm, a awp lai in inhmuh chuan a no chu a pui chawpin in la tur ani lo va, a pui chu chhuah ngei ngei tur ani a, a no erawh chu in la thei ang: chutichuan in tan a tha ang a, in dam rei dawn nia.” (Devarim22:6-7).

Sava pui thlawh chhuah tir hian awmze thuk tak leh ril tak aneih avangin he Mitzvah hian lawman ropui leh hlu em em mai a nei ani tiin Ramban chuan a sawi a. Kli Yakar chuan he Mitzvah lawmman leh nu leh pa chawimawi Thupek hlen avanga lawmman dawn tur chu a intluk tlang reng ani tiin a sawi bawk.

He Mitzvot pahnih hian min zirtir chu nu chuan nau hring talo se he khawvelah hian nunna a awm chhunzawm zel thei lo ani tih min zirtir a ni. Chu nu ber atanga nau lopiang chhuak a inthlahchhawnna kal zel chuan P-thian- engkim lo chhuahna bulpui chu min chui thlentir a, Amah (P-thian) chu khawvel tan nunna pe tu a ni. Siamtu (P-thian) chu awmlo tase, he khawvel hi a awm reng thei ang em?

Chutiang chu lo ni tase nu leh pa chawimawi pawh chu thiltih ngailo ani mai dawn a ni. Chu nunna pe chhuak hmasa ber tu chuan a zahawmna leh anihna ang chu nu ho zawng zawng hnenah chuan a hlan chhawng a. Chuvangin kan nu leh pa chu zah a chawimawiin sava pui pawh chu kan thlawh chhuah tir thin a ni. Chung Mitzvot pahnih chuan he khawvel hi P-thian siam ngei ani tih min hriat chian tir leh zualin, chumi avanga lawman chu he khawvelah damrei ani reng bawk a ni. Chu chu rinna innghahna pawh chu ani, ziak a kan hmuh angin: “..Mifel erawh chu a rinna in a nung ang.” (Habakuk 2:4). Chu kan rinna avang chuan engkim nunna pe tuah chuan beiin, inzawmna min siamsak a, chuvangin a lawmanah chuan damreina chu ani ta a ni.

Sava pui thlawh chhuahtir chungchang kan chhiar zawh velah chuan inthar sak chungchang sawina thuin a chhunzawm leh nghal a. Kan Torah Mithiamte chuan ti hian an sawifiah a: Miin savapui thlawh chhuah tir Mitzvah hi a hlen anih phawt chuan inthar sak theihna lawman a dawng ang, achhan chu he Mitzvah hian P-thian chu engkim Siamtu leh he khawvel Siamtu a nihzia rinna min pek avangin. (Rashi Devarim22:8)

Rabbi Eliyahu Kitov chuan, engvangin nge Torah hian savapui chu a tui emaw a note te rual chuan lak ve mai a phal loh, mihring mamawhna a zirin savate chu tihhlum thiang ani tho bawk si a. Chumai bakah Torah chuan engvangin nge savapui lakah chauh chuan zahngaihna a neih a, chung a tui emaw a note te emaw chu lak a phal leh tho si tiin zawhna a zawt a? Ti hian a hrilhfiah a, chung sava note emaw a tui emaw te chu mihring ta anni a, achhan chu thilsiam dang zawng zawngte chungah mihring chu roreltu tur a siam kan nih avangin. Amaherawh chu engtin nge sava tui awp lai emaw sava no chawm lai chungah chuan thilsiam dangte chunga rorelna kan neihna chu kan hman chhuah tak ang? Chu savapui no chawm lai emaw a tui awp lai emaw chu a nihdan phung hrim hrimah chuan chung a thil awp emaw a chawm laite emaw chu thlawh bosan lo a enkawl chu a tih tur ani a. Chung a enkawl hote tan chuan amah zawk pawh chu tihhlum emaw lakbo zawk pawh nise pawi chu a ti bik hauh lo vang.

Chuvangin nunrawng taka chutiang thil va tih ringawt pawh chu thil awm tak ani reng em ni? Chuvangin chu savapui pawh chuan a fate enkawl puitling tur chuan theihtawp chu a chhuah a, chu theihtawp chhuah a enkawl puitlin a tumna chu he khawvel siam thatna tura thil pawimawh tak pawh ani, chuvangin sava chu a pui chauh chu thlawh chhuah tir ang, chutia ava thlawh bonaah chuan a chenna tur buk (nest) dangte ava siam leh ang a, ti chuan Siamtu (P-thian) duhdan he khawvel siam thatna tur hna chu a vat i leh thei dawn a ni.

Mihringte chu thilsiam dangte chungah chuan roreltu chu ni tho mah ila, P-thian'in a thilsiam dangte-ah chuan anmahni nihna/pianken zia a dah ve theuh chu zah lo takin kan tih bawrh bang thei chuang lo va. Nu in a fanaute enkawl puitlin ngei a tumna chu P-thianin a thlarau thianghlima he khawvel a awp reng nen chuan tehkhin theih pawh ani bawk ang.

Ramban chuan Rabbi Rechmai lehkhabu Sefer HaBahir bu tan chhanin ti hian Torah hian pa dinhmun aiin nu dinhmun a sawi uar/fak zawk ani tiin a sawi ve bawk a. Achhan chu hmeichhiate chu thil hriatthiam mai theihna (Bina) nen tehkhin annih avangin, chu chu ziak a kan hmuh angin: “Hmeichhia/nu chu finna ti a koh ani a/כִּי אִם לַבִּינָה תִקְרָא”(Mishlei 2:3). [He lai thu hi a tawng tluang pangngai a kan hmuh ang khi chuan אִם tih ani mai a, a lehlinna kan en phei chuan nu tih hming reng reng a lang hauh lo.. mahse a en peih tan heng ho hi en ta ila, Berachot 67a, Bamidbar Raba, Parashat Naso 4, Midrash Mishlei 23 ah chuan אִם (Im)tih khi אמ (Em/Mother) sawina ani tihin hrilhfiahna hmuh tur a awm]. Nu in fanau hring thei turin chakna an nei angin P-thian finna chuan he khawvel hi ni sarihniah chuan a siam pumhlum ta. Chu ni, ni sarihna ni chuan P-thian leh a thlarau thianghlimin min awmpui reng thin ani tih min zirtir a. Chutia savapui kan thlawh chhuah tir chiah chuan chu sava pawh chu Amah Siamtu nen chuan inzawmna nei thar ve lehin a thlahte/a fate chu min hnutchhiah ta a; chu rinna leh thiltha tihna chuan he khawvel hi kan fate (thlarau) tan ani tih leh tha taka kan enkawl chu nu leh pa mawhphurhna a nihzia hriatthiamna chu min pe a ni.

Source:

Bulletin Shavei Israel

https://www.facebook.com/TorahKhawvel

 

 

Categories: Parshat Nashim, Khumash, Khinukh, Education

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments