HAKHOKHMA Post Post New Entry

Parashat Nashim - Pinkhas

Posted by Shavei Mizoram on July 6, 2020 at 1:50 AM

Parashat Nashim Pinkhas

- Harel Kingbol

“Tin, Yosefa fapa Menashe thlah, Makhir chu mi fa Gilead chu mi fa Khefera fapa Tzelafkhad fanute chu an lo kal a:a fanute hming chu: Makhlah te, Noah te, Khoglah te, Milkah te, Tirtzah te a ni… anni chuan ti hian an sawi a; ‘Fapa a neih loh avang maiin engah nge kan pa hming chu a thlahte zing ata a bo vang? Kan pa unaute zingah chanvo min pe ve rawh u,"tiin. (Bamidbar 27:1-4).

Tzelafkhad fanu panga te’n huaisen taka Israel rama chanpual an dil ve na thu kan chhiar hma chiah chuan Mitzrim ram atanga chhuak mipa te zingah Kalev leh Yehoshua te chiah chu Israel ram lut an nih thu kan hmuh angin: “…..An zingah chuan mipa pakhat mah an awm lo….” (Bamidbar26:64).

Rashi chuan ram enthlakna avanga Israel fate chunga P-thian rorelna/thutlukna khan hmeichhiate chu a huam tel ve lo a ni, anni (hmeichhia) hote chuan ram chu an duh em em reng a ni. Mipa hote’n, “Hotu siamin Mitzraim-ah kir leh ang u” an tih laiin hmeichhia te erawh chuan “Israel ram ngeiah chuan chanpual an lo dil thung a”.

Malbim ngaihdan angin khatih hunlai chhuanah kha chuan mipa te aiin hmeichhiate dinhmun kha a sang zawk a ni. Menakhem Becker chuan P-thian khan Moshe hnenah khan mipa hote kha ram enthla tur khan thupek engmah a pe lo tiin a sawi a. Parashat Sh'lakh a kan hmuh, “ram va enthla turin mite tir rawh khai/שְׁלַח לְךָ֣ i.e. nangman tha I tih angin” tih lai thu hi Rashi chuan ti hian a hrilhfiah a – “Thu ka pe lo che a, mahse nangman I duh anih chuan va tir ta che”. Tichuan a hnu ah kan Torah mithiamte zinga mi thenkhatte chuan Rashi hrilhfiahna chu ti hian an hrilhfiah leh chhawng a: ka thurawnah che chuan ram va enthla tur chuan hmeichhiate chu tir zawk la, anni ho chuan thuduk lo engmah an sawi dawn si lo, mahse nangman mipa I tir duh zawk anih chuan chu chu nangma thu a ni e. (Parparaot l’Torah, Parashat Pinkhas)

“Yosefa fapa Manashe thlah” Tzelafkhad fanute hming sawi dawnah hian engvangin nge Yosef hming hi sawi lan tel kher angai em ni? tiin Malbim chuan zawhna a siam a. Bible a kan hmuh angin anni hote chu Menashe hnam niin Yosef thlah kal zelte anni a. Ti hian a hrilhfiah a; Menashe hnam zatve te chuan Israel ram ngai natna leh chen chakna an neih loh avangin Yerdan lui lehlamah chanpual an nei a. Lehlamah vethung, Tzelafkhad fanute (Yosef thlah kal zelte) erawh chuan anmahni thlahtu Yosef ang chiahin Israel ram ngai natna leh duhna chu an nei thung a ni.

Tzelafkhad fanute’n Israel ram chhungah ngei ram chanpual dilin “Kan pa unaute zingah chanvo min pe ve rawh u” tiin an sawi a ni. An pa unaupa hming chu Khefer niin a ram chanpual chu Israel ram chhungah ngei chuan a awm a ni. Yerdan lui lehlam pangah chuan hnimte ch hring tha zawkin, khawsak chu awlsam zawk dawn angina lang mahse Tzelafkhad fanute chuan chung thil khawsak awlsam zawkna ringawt chuan Israel ram an duhna leh thlak hlelhna chu a ti kiam thei chuang lo a ni.

Kan parasha a kan hmu hero hote chuan awlsam tak leh zangkhai taka khawsak ringawt chu an duh ber ni lo vin, Israel chhungah ngei P-thian in alo tiam tawh ramah chuan hna te thawka he tisa khawvel hmanga P-thian nena inzawm na neia heng khawvel thilte hmanga P-thian fak leh chawimawi chu an duh zawk chu a ni.

Ram chanpual tur insemna chu indona a kal chhuakte chauhin an chang tur a ni tiin dan lo awm ta sela, hmeichhiate tan chuan chu chu thil fair lo tak ani ang, a chhan chu hmeichhiate chu raldo in an kal chhuak ve ngai lo a ni. Tzelafkhad fanute pawh chuanin chiang taka an hriat chu min thlahtu kan Pu Avraham atang tawhin chu P-thianin alo tiam tawh ramah ngei chuan chanpual an nei ve thei a ni ti chu a ni.

Mipate chuan, ti hian an sawi a; “Hotu siamin Mitzrim ramah kir leh ang u” tiin chu chuan thlah tute hnenah P-thian in alo tiam tawh ram chu an ringhlel ani tih tilangin rinna kawngah an chak lohna a rawn tarlang chiang hle a. P-thianin kan Pu Avraham hnena alo tiam tawh le thu a lo thlun tawh Israel ram chu I thlahte’n an la rochun ang tih chu an hrethiam phak lo a ni.(Chatam Sofer, Bereshit 14:4)

Keni mihring chakna atang ringawt chuan hrethiam loin ban phak lo thin mah ila chhel leh rinawm takin P-thian kan rinna chu kan vawng nung reng tur a ni. Chu thil nghet tak mai a P-thian nen inkungkaihna leh inpawh tawnna chu hmeichhiate chuan an eni tlat a ni.

Hmeichhiate’n ram chanpual an neih ve theihna dan chu Moshe hminga ziah anih theihna chhan pawh a bulpui berah chuan Tzelafkhad fanute avang chuan ani a. (Baba Batra 119a, Sanhedrin 8a) Moshe pawhin a thlen phak loh Torah dan zir chhuahna chu engatinge Tzelafkhad fanute chuan an chan theih tiin Rabbi Eliyahu Kitov chuan zawhna a zawt a? Ti hian a chhang a, Israel fate thlalerah an vavaih lai chuan anni ho chuan Israel mipui zawng zawngte hriat lai ngeiin chu lawman hlu tak chu an dawng tlat a ni.

Moshe chuan anni ho chu ti hian a zawt a, “thenkhatin Mitzraima let leh an duh laiin nangni ho erawh chuan Israel rmah chanpual in dil thung si a amaw”? Anni ho chuan ti hian an chhang a, “nakinah chuan Israel ramah hian kan la lutin chanpual kan la nei ve ngei ang” tiin. Chu chu ani Hillel pawhin alo sawi “bungraw ngah hian finna abelhchhah lo a, tuma awm lohna ah chuan mi pakhat ni tum rawh.”(Pirkei Avot 2:5)

Mi zawng zawngte chuan an rinna chu hloh vek tawh mahse, Tzelafkhad fanute hcuan P-thianah rinna an la nghah zia leh Israel mipuite chu an mahni ramah ngei chuan an la let leh dawn a nitih chu an ringin an beisei tlat a ni. Chu chu ani an lawmman dawn ropui tak hmeichhiate’n ram chanpual an neih ve theihna chhan Torah in a sawi chu; “Tzelafkhad fanute chuan an sawi dik a ni.” (Bamidbar27:7) tih lai chang hi Rashi chuan ti hian a sawi a; Moshe mitin a hmuh phak loh chu anni ho chuan an hmu phak a ni.


 

Source: Bulletin Shavei Israel

 

https://www.facebook.com/TorahKhawvel/posts/167475158114571?__tn__=K-R


Torah Khawvel WhatsApp Group tel ve duh tan:

https://chat.whatsapp.com/Ey9DxNE3bpk1sXVrm6qozy

Categories: None

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments