HAKHOKHMA Post Post New Entry

Parashat Korakh

Posted by Shavei Mizoram on June 18, 2020 at 7:50 AM

Parashat Korakh

 

- Itzkhak Kawlni

 

“…….Levia thlahte hi a ni in ti chungnung bik ta chu.” (Bamidbar 16:7)

 

Korakh a chanchin hi hriat thiam a har sa hle mai. He pa hi a chungah enge thleng? Mi thil hrethei tak leh Torah mi thiam ropui tak a ni thin bawk si a. Engvanga Moshe Rabeinu chu hnial kalh nge a nih le? Chung a thil tih rapthlak tak te avang chuan a tawpah lei in a lem ta a nih kha.

 

Miin Ropuina (Kavod) a zawn lutuk chuan a tawpah eng thil nge rawn thleng ta zawk thin tih zir nan he thawnthu hmang hian hrilhfiah kan tum dawn a ni:

 

Mi pakhat hian, sava pa khat hnim dangdai deuh mai pan a thlawk a hmu a, chu sava chuan hnim zing a hnim chi khat chu a va pet a, chumi hnu chuan sava dang pakhat thi bulah chuan a va dah a, mak tak mai chuan sava chu lo nung leh in a thlawk ta mai a. Chupa chuan a thil hmuh chu mak a ti hle mai a, chu hnim chu thliak ve in an khaw lamah a haw pui ta a. Mipui ho zingah chuan mi a ti dam thei tiin a sawi pung ta a, thil mak tak tak te chu a ti ta zel a. Chupa vek chuan a ai a nasa in thilmak tih chhunzawm a duh ta zel a ni.

 

Tum khat chu a zin kawngah sakeibaknei thi hi kawngah a hmu hlauh mai a, a nung leh mahna tiin a hnim dangdai tak mai chu a bulah chuan a han dah a, a rawn dam leh a thut mai a, ti chuan chu sakeibak nei chuan a sehhlum ta hlauh mai a ni.

 

Hetiang hian “Madregat Ha'adam” chuan hrilhfiana a pe a. Khazal te chuan hetiang hian an sawi. Korakh chu thlarau din hmun sang tak nei niin, a thlah atang in zawlnei Shmuel a rawn chhuak dawn a ni tih a hre lawk a ni, tiin.

Engtin nge hetiang mi ropui tak leh la chungnung e mem tur hian, Moshe Rabenu mi ropui a hnial kalh tak tlat tho mai ni le?

 

L-LPA P-thian chuan mi tin hnenah thluak finna a pe vek a, chu thluak chuan duh am na te leh nungchang diklo atang te a, suangtuahna fim a neih theih na tur a ni. Mahse miin chu lawmman a dawn chu a tisa chakna lamah a hman tangkai zawk hlauh chuan, mi hnim dangdai tak neiin a diklo zawng a, a hmang mai ang khan, a tawpah chuan he khawvel ata, lakchhuah an lo ni ta zawk thin a ni.

 

Korakh chuan a thiamna leh finna te chu a letling in a hmang ta zawk a, amah chu pawimawh hleah a in dah a, Elitzafan ben Uziel in dinhmun pawimawh tak a chelh chu a itsik ta zawk a ni. Chutiang chuan a tawpah Moshe nen an ngaihdan a rawn inkalh ta a ni. Amah atanga mi ropui zawlnei Shmuel a rawn chhuak tur vang chuan a in chhuang em em a, ropui na te dawng turin a in ngai a ni. Korakh an Torah thiam na leh ropuina sang tak a dawn chu midang te chhandam nan nilo, itsikna leh inhnial nan zawk a, a hman avang chuan a tawpah chuan engmah lovah a chhuak ta a ni.

 

He kan thil zir hi engtiklai pawh a kan hriat chhuah reng a ngai a ni. Hashem chuan Malsawmna tam tak min pe thin a. Chung Matana kan dawn te chu ropui chung chuang tak te pawh an ni thei. Mahse chu thil chu Hashem rawngbawlna ti belhchhah zawk tu an ni tur a ni. Ropuina leh zahawmna zawng a tlan tur a ni lova, engthilah pawh nise ropuina lam zawk thil te chu kan um zawk tur a ni lo. Hetiang ni lova Hashem chu kan hriatreng zawk a, Torah Thianghlim in min zirtir ang zawk a kan nun zawk chuan, engtik hunah pawh Ropuina dik zawk kan hlawhchhuak ang a, Hashem leh kan mihring pui te mit kan tlung zawk zel dawn a ni.


Source: Bulletin Shavei Israel

 

Categories: Parshat Yeladim, Shabat, Khumash

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments