HAKHOKHMA Post Post New Entry

Pessakh, Ya'kov leh Lavan

Posted by icolney2 on March 30, 2020 at 8:55 AM

Pessakh, Ya'kov leh Lavan

Harel Kingbol

Pesakh Hagada-ah chuan sal nihna atanga zalenna kan lo neih theih dan kan chhiar a. Chumi kan chhiar zinga a thupui ber chu Mitzraim atanga chhuah chungchang chhiiar/sawi a ni. “Arami Oved avi vayared Mitzraima – Arami chuan ka pa a ti chhe vek, tichuan Mitzrim ramah a chhuk thla a.” Commentaries hote chuan helai a Arami tih hi Lavan tiin an sawi a. Engvang a Hagada-ah chuan Lavan leh Ya'kov chungchang chu sawi lan ve kher anih tiin zawhna an zawt a. A chhanna ni thei turah chuan Mitzrim ramah a chhuk thla a tih inziak vang hi a ni. Mahse Torah bu hmun hrang hrangah Mitzraim a chhuk thlak chungchang chu a awm tho alawm, tiin thenkhat chuan an sawi bawk. Lavan leh Mitzrim ram atanga chhuah chungchang chuan enge inkungkaihna a neih ang?

Engvangin nge Torah-ah hian kan pate chanchin hi ziah/dah tel ve kher anih?

A chhan chu an awmdan leh khawsak dan atang chuan nungchang mawi leh dik kan zir theih avangin. Khazalte’n an sawi angin Derekh Eretz Kadma la'Torah. Chuvangin kan pate/thlah tute chanchin chuan Torah chu a intan a ni.

Kawng dangin lo en leh ila – “Ma’asei Avot siman lebanim – thlah tute thitih chu an thlahte awmdan tur sawi lawkna a ni.” (Midrash Tankhuma, Ramban in Bereshit 12:6). Min thlah tute hminga thiltih tarlan ang zel chu an thlahte-ah pawh a thleng ve zel thin.

Entirna tlem lo en ila – Dina-i chungchang a thil thleng avanga Shimon leh Levi te chetdan ang chiah in a hnu kum engemaw zat hnuah Khanukah-ah chutiang thil ang chu kan hmu leh a (Ohr Gedalyahu, Vayishlakh). Engtin nge anih theih?

• Anmahni leh Israel (Ya'kov chungkuate) te inkarah danglamna a awm lohna turin Sh'khem mipuite chuan serh tan chu an remti. Chutiang bawkin Judate leh anmahni nkarah danglamna a awm lohna atan Greek hote chuan serh tan an khap. He thil thleng pahnih-ah han heng hnam hote hian an tum ber Judate leh anmahni inkarah engmah danglamna awm lo va, inneih pawlh-ah Judate rinna tih chhiatsak chu a ni.

• Dina-i pawngsual anih avangin Shimon leh Levi te leh Sh'khem ho inkarah chuan indona a thleng a, chutiang bawkin Khashmonaim hote leh Greek ho inkara indona lo chhuah tanna chu Cohen Gadol fanu Yehudit pawngsual/mutpui an tum avangin.

• Shimon leh Levi te chuan an pahnih chauhin Sh'khem ho chu an hneh a, chutiang ang bawkin Khashmonaim ho chuan Greek sipai ropui leh chak tak chu an hneh.

• Dina-i chungchang kan chhiar zawh hnuah chuan Ya'kov chuan a chhungkuate chu milem pathian lam chi reng reng lak ata inthiar fihlim tura hrilhin, Bet-el-ah kalin Mizbeakh an sa. Greek ho lakah hnehna an chan hnu chuan Khashmonaim hote chuan Beit Hamikdash chu thianfai in an tuaithar leh.

 

A chunga kan sawi beh chhan khian Vilna Gaon chuan Ya'kov leh Lavan thawnthu leh Mitzraim atanga chhuah inkungkaih dan a hrilhfiah a. Lavan in a Ya'kov khawsa/cheng kha Aigupta ram a Israel fate sal tanna ten au ang a ni. Lavan in atangin Ya'kov a kal chhuak angin Israel fate pawh Mitzrim ram atangin an kal chhuak.

• Lavan ranrual vengin rim takin chhun leh zan in Ya'kov chuan hna a thawk – “Hetiangin ka awm thîn; chhûna ni sâ leh zâna khaw vâwtin mi tihreawm êm êm thîn a; mut pawh ka hmu ngai thîn lo va.” (Bereshit 31:40) Nunrawng taka Faro-a rorelna hnuaiah chuan Israel fate chuan Mitzrim ramah chuan rim takin hna an thawk.

• Lavan chuan Ya'kov hlawh tur vawi engemaw zat a tih danglam sak, ti hian a nupui te hnenah a sawi, “Nimahsela in pa chuan mi bum a, ka hlawh hi vawi sâwm lai mi tihdanglamsak tawh a.” (Bereshit 31:7) Mitzrim ramah pawh Israel fate hnenah hlawh pek intiam siin engmah hlawh pe loin Faro-a chuan Israel fate hna a thawh tir.

• Lavan in atanga hausa taka Ya'kov a kal chhuak angin Israel fate pawhin hausa takin Mitzraim an chhuah san.

• Lavan in atanga a kal chhuah hnuin Lavan chuan Ya'kov chu a um zui a, Israel fate Mitzraim atanga an chhuah hnuah Mitzrim te chuan an um zui.

 

Pesakh Hagada a inziak “kal Lavana’n Ya'kov chunga a thiltih tum chu zir chiang rawh” tih hrilhfiahna chu a chunga mi khi a ni tiin Vilna Gaon chuan a sawi. Aigupta ram atanga kal chhuahna hrechiang thei tur chuan “Ma’asei Avot Simanim lebanim” tih awmzia, Lavan in a Ya'kov khawsak dank ha hriatchian phawt angai a ni.

Khida chuan Alshikh hmingin Lavan chungchang leh Mitzraim atanga kal chhuahna chungchang inkungkaih dan ti hian a sawi ve a. Lavan thiltih avang khan Israel fate Mitzrim ramah tihduhdah/salah kan awm phah a ni. Rakhel-i aiah Leah chu Ya'kov hnenah chuan a pe a. A fapa upa ber Reuven (Leah fa) aiin a nupui hmangaih zawk Rakhel laka a fa Yosef chu a hmangaihin duhsakna a lantir nasa zawk a. Chumi avang chuan inthikna lo piangin Yosef chu Mitzraim-ah chuan hralhin a awm ta a….. tichuan hun lo kal zelah Israel fate (Ya'kov leh a chhungkua) chu Mitzraimah an lo chhuk thla ve ta a ni. (Khida Geulat Olam, Alshikh Torat Moshe on Devarim 26:5)

Vilna Gaon leh Khida chhanna kan en kawp chuan Hagada shel Pesack intanna chu Lavan leh Ya'kov inkar thawnthu atanga intan tur reng a ni tih kan lo hre thei ta a ni.



 

 

Categories: Khagim, Kut ni te, Judaism, Torah

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments