HAKHOKHMA Post Post New Entry

BELHCHIAN THAM ISRAEL RAM LEH A CHHUNGA CHENG ZOFATE

Posted by Moshe Ilan on October 23, 2019 at 12:15 PM

- Sangzela Tlau


Mizote thinlungah hian Israel ram hi engtik lai pawhin a lian reng a, kan tan a, kan ngaihven reng thin. Hei hi kan Kristianna nena inzawmna thuk tak a neih vang pawh a ni mahna. Israel rama Mizo engemawzat tla thla te chanchin erawh kan hre chiang lo hle a, kan hriat dan pawh a tha lam a ni tehchiam lo. Nasa taka hna thawk, Ral hmatawng sipaia awm, ramri hlauhawm lai luah tir ang deuha sawi an ni tlangpui. Israel rama Mizote chanchin chhui chiang tur leh an Sorkar kalphung te leh an Agriculture/Farming Technology zu thlithlai turin tunhnaiah kar 3 zet chamin Israelah ka kal a, ka thil tumah pawh hlawhtling thawkhat hlein ka in hria. A ram ropuina leh History thuk/ngaihnawm tak a neih avanga ram nuam danglam tak a nihzia te pawh sawi tur tam hle mahse a tawi thei ang bera ziah kan tum ang.


Mizote dinhmun tlangpui: Mizote chu Israel/Manashe thlah ni-a inchhalin B’nei Manashe an inti a, chu chu a ramin a pawm dan pawh a ni. Kum 2005, March ni 30 khan sakhaw lam hotu lu ber Chief Rabbi Shlomo Amar chuan Zofate chu Bnei Menashe (Israel) fate an ni tih an pawm thu official takin a lo puang tawh a ni. Chutiang chu a nih avangin Mizoram mi leh Manipur lama kan Zohnahthlak engemawzat Israela pem lut te chu Israel khua leh tui dik tak (Citizen) angin an awm ve tawh a. Tunah hian an vai chuan 4,500- 4,700 bawr vel awm anga ngaih an ni. Mizoram atanga lut te hi a tlangpui thuin heng khua – Upper Nazareth, Afula, Megan Sha’ul, Ofra, Beit El, Kiryat Arba, Nitzan ah te an awm a, an vaiin 2,000 chuang mah ni tawhin an in ngai. Israel citizen an nih angin a leilungfa Isreali dang ang bawkin an duhna hmunah an chengin, an duh leh an phak ang ang eng hna pawh an dil theiin an thawk a. A tam ber chu Apartment type ah awm mahse, tam tak chuan In lian leh tha pui pui an nei a ni. Mizo In ka tlawh tam hle a, chung zingah chuan zim chhia leh luah hrehawm tur em em ka hmu lo a, an sitting room mai nilo, an Bedroomah AC (room tih vawhna) an fit thei deuh vek a ni. A tam zawk In chu han en mai chuan Sapram Inchhung ang mai an ni a, an changkang tlang viau mai. Israel hi Khawizu leh hnute tui luanna ram tih ang deuh tak tak kha a lo ni a, buh leh bal an thar chhuak hnem em em a, thlai leh theirah chi hrang hrang quality sang, tharlam tak tak tlawm ang reng takin lei tur a awm reng a, sawhthing erawh an thar loh avangin Kg khat Rs. 500-800 vel a ni. Bawnghnute, Artui, Butter, cheese, khawizu, wine leh ei-in tur chi hrang hrang an ngah hle a, a to hran lo. Chutiang chu a nih avangin Mizote pawhin chung Bazara ei-in tur tha chitin reng chu an lei pha ve vek a, ei leh in an hnianghnar hle a ni. Tin, Mizote hi ka hmuh dan chuan inren der dera awm an nilo, an pawk tlangpuiin rethei zia hmuh tur a awm lo. Entirnan, AC te pawh room tinah an On reng thei tlat. Tin, sawi lan loh theih loh pakhat chu Israel hnamte hian hnam dang enhranna leh hmusitna tawngkam emaw mitmei an tilang ngai reng reng lo a, chuvangin khawtlangah leh hnathawhna lamah pawh Mizote hian rual an pawl a, Isreali ho dinhmun tha pangngai tak kha an pha ve tlangpui a ni.


Enge an thawh ber : Hna chi hrang hrang an thawk a, Mizoram atangin upat lamah thiam nei lem lovin tam tak chu an pem lut a, lehkha zir sang lo, Hebrai tawng thiam meuh lo tam tak an awm a, chung te chu Hospital, school, company leh sorkar office ah te Cleaning job (tihfai) ang chi te, Green House farm ah te an thawk tlangpui. Mipa sipaia tang zo tawh te Office hrang hrangah Security hna an thawk a, Bus driver pawh engemawzat an awm. Lekha thiam ho private company leh sorkar Office hrang hrangah an thawk nual a, Insak (Building construction) leh khawl lam khawih chi te pawh an awm bawk. Tin, Thalai thenkhat te phei chu Air force ah thawkin Indo Thlawhna (F-16) enkawltu/Check tu te pawh an ni hlawm a, sipai ah engemawzat an awm mek bawk. Chutiang chuan Mizote hian hna tha pangngai tak tak, Israeli dang thawh theih ang chu an thawk ve thei vek a, Mizote hi kan lo inzir mi hle tih pawh a hmuh theih. Tin, an hnathawhna a tam thei ang ber ka tlawh a, an hotu (Boss/Manager) te pawh interview ka nei deuh zel bawk. Chuta ka hmuhchhuah chu Mizote hi hnam taima tak leh hnathawktu tha tak an lo ni tih an Puten min hrilh zel a ni. Company pakhat manager phei chuan “ Bnei Manashe (Mizo) ho hi hnathawktu tha tak an nih mai bakah an lak atang hian zir tur kan nei a ni, hna mamawh chu lo kal sela kan lo la zel ang” a ti hial mai. Israelah hian tupawhin hna an la runthlakin an thawk nasa khawp mai a, eng hna pawh zing dar 7 ah an tan deuh vek a, tlai dar 4 velah an bang tlangpui. Tuna sorkar dan/kalphungah tupawhin eng hna pawh thawk sela, a tlem berah Shekel 29 darkar khatah an hlawh ngei ngei tur a nih avangin tumahin an hlawh tlem thei em em lo(Shekel khat hi Rs. 20 chuang hu a ni). An hlawh a tha a, Tax an pe sang fu bawk. A hnuaiah hian Mizote hnathawh tlem leh darkar khata an hlawh/rate tlangpui te chu tarlan a ni.


1. Cleaning job : NIS (Shekel) 35-45

2. Bus Driver : NIS 38-43(Darkar an thawh tam avangin NIS 12,000-13,000 per month an hlawh thei)

3. Green house/farm : NIS 30

4. Building construction – unskilled /Skilled : NIS 40-50

5. Office work : NIS 35-40

6. Industry : NIS 30-45

7. Security(Armed) : NIS 35-40


Ral/Hmelma nawkah an dah em? : Israel sorkar/ram danah chuan tupawh kum 18 a tlin tawh chuan sipai ah (mipa kum 2 leh thla 8, hmeichhia kum 2 chhung) a tang tur a ni. Hrisel lohna avang emaw, National service an duh zawk vang emaw-in case thenkhatah ngaihhnathiamna a awm chauh a ni. Chutiang anih avang chuan Mizote pawh sipaiah an tang ve vek a, kum 3 an tan zawh chuan an bang thei a, a duh leh a fit te chu an tang zui mai thin. Isreal sipai (Air force + IDF) te hi khawvel sipai azawnga sipai huai leh fit ber te zinga ngaih an ni a, an duhtui hle. An mahni an fit tawk hle loh chuan sipaia tanzui tir an ni lemlo a, ral hmatawngah phei chuan sipai tha mi – Commando/Fighter an tih te lo chu an dah ngai lo hrim hrim a, chuvangin Mizo ho Ral hmatawnga dah bik theih a ni lo a, Mizo tlangval commando-a tling pha chu tlem te an ni. Mizote Israela an luh tan tirh lam 1993 vel khan chhungkaw engemawzat chu Gaza (Palestinian territory) chhungah an awm a, khatih hunlai kha Palestiniante nena an in beih fo lai kha a ni a, kum 2005 khan Mizote chu Gaza atangin sawn chhuah vek an ni tawh a ni. Mizote awmna emaw Isreal hrim hrim hi a ralmuang em tih ka chik ru a, ka zawt zel bawk. Anni chuan ralmuang an ti khawp mai. A ralmuan lohna tur awm ka hmu lova, In kalh lova kalsan an chin dan te, zanlai thleng thlenga hmeichhia teihawi an tam dan te enin a ralmuang a nih hmel khawp mai. Hmelma/Palestinian lakah an ralkhel/ralti em tih pawh ka zawt thin a, anni chuan hlauthawng emaw ralmuang lovin an awm hauh lo tih thu min hrilh. Hetih rual hian West Bank (Palestinian ram) chhunga cheng Mizopate chuan an chhuahna ah Pistol an pai deuh vek thung. Tin, In tinin Bomb tlak nikhua-a tlan luhna tur Bomb shelter room pakhat a bik taka siam an nei deuh zel ani.


Israel Sorkar atanga hamthatna : Israel sorkar chak zia, belhchian dawl zia leh a khua leh tuite tana a that zia hi min barakhaihtu a tling a, an Social security/Welfare policy hi sawi tham fe nimahse a chipchiar erawh kan sawi hman lo ang. Israel khu political science tawngkam takin Welfare state an tih ang kha a ni a, an ngaihpawimawh ber chu a khua leh tuite hlimna, dawmkanna leh an sa himna a ni. Sorkarin a khua leh tuite hamthatna a pek, Mizote pawhin an chen thenkhat lo sawi ta ila. Upa lam hnathawk lo ho chuan Pension thlatin Shekel 5,000 te an dawng tlangpui a, hamthatna dang dawn tam tak an la nei bawk. Mizoram atanga Israel an luh hlim khan tam tak chu kum 60 pel tawh te an ni a, khang te khan hnathawh loh hlawh (Pension) an dawng nghal. Chhungkaw member 3-5 vel te chuan thlakhatah shekel 2,000-2,500 chu an kham niin an sawi. Tin, Pem thar te chu Inluah man subsidy an pe a, shekel 1000 chuang man tur te kha shekel 300 lek lek ten an luah tir a, an in tunnunna tur mamawh tawk sum thla 6 chhung an pe bawk. Hnathawk theilo (Raipuar, hrisellohna nei, mi ang zan lo, ramtui leilo etc.) te chhawmdawlna pawh awihawm lo khawpin a tha a ni. Hmeithai te hlei hlei hi an vannei emaw tih mai tur a ni a, hmeithai chhawmdawlna (an chhungkaw dinhmun azirin) pawisa thlatin shekel 3,000 bawr vel te an dawng thei. Tin, Loan pukin In lo lei ve ta se, a pasal a sun chuan an Loan ba zawng zawng kha sorkarin a pek tlak sak vek bawk a ni. Zirna lam pawh Pawl 12 thleng hi chu a thlawn deuh thawin an zir thei. Health care system hi a tha em em a, a mawl zawnga sawi chuan an hriselna/damlo enkawlna lam hi (insurance kaltlangin) chawi a awm lo a ni. Isrealah chuan sorkarin naupiang apiang kum 18 an tlin thlengin enkawlna sum a pe vek a. Child benefit thlatin shekel 200 a pe a, Pu Rema Afula khua ami chuan fa 11 a hring a, a sum dawn pawh a tam tham khawp mai. Kum 18 an lo tlin chiahin sorkarin lawmman shekel 3,000 pawisa fai a pe leh bawk. Chutiang chuan ei leh in lam te, Inluah tur te, hnathawh hlawh te leh sorkar chhawmdawlna an dawn te hi a tha em em vek mai a, Israel sokarin a khua leh tuite tana a tih mek hi ram hausa ber leh changkang bera kan ngaih USA pawhin a tih theih loh a ni. Mizoram atanga lut thingtlangpa rethei ve tete ho khan tunah chuan “vanram tlafual” an chen a ni ringawt, an lawmpuiawm khawp mai. “Isreal mi tumah rethei tak an awm tur a ni lo” tih hi an sorkar thil tum ber a niin an sawi.


An sakhuana : Mizote belchiang turin kar 3 zet khaw hrang hrang leh chhungkaw hrang hrang ka chenchilh ve a, a tlangpui thuin an sakhuana-ah an tuiin an rinawm hle. In design nalh/danglam bikna nei tehchiam lo Beit Knesset an tih ah an inkhawm a, hei hi hmanlaia Synagogue ang kha ani mai a, mipa leh hmeichhia room hranah an inkhawm a ni. An inkhawm tam berah chuan zai leh thuhril/sermon a awm lo a, thawhlawm khawn pawh a awm lo. Torah(an Bible) an chhiar mur mur a, an tawgtai a, a chang leh an ding a, tam tak chuan kun bu lawp lawp chungin Torah an chhiar a. Torah lehkhabu zial chu an zah em em a, mipui zingah pakhatin a bawm chawpin a rawn pawm kual a, an kut hmawrin an lo dek a, chu chu an fawp leh thin. Shabbat an la urhsun em em a, An thupui ber a ni hial awm e. Zirtawp ni-ah mi tam berin hna an thawk tawh lova, a thawk te pawhin chhun dar 12 thleng vel bak an thawk lo a, nitlak hmain In tihfai, inbual, insuk leh a tul apiang an ti a, a tuk Shabbat ni-a ei tur zing leh tlai chaw zawng zawng an chhum lawk vek a ni. AC te leh an chaw chhum sa te, an Electric light zawng zawng a in On/Off dan tur programmer hmangin an set sa vek a, an On/Off hman loh chuan nitlak hnuah an khawih thiang tawh lo. Shabbat niah Car an khawih che lova, an phone an Off vek bawk a, electronics – TV/Radio etc. te pawh an khawih thiang lo. Shabbat ni chu a hlimawm leh hahdam thei ang berin an hmang thin a, chuvangin an nghakhlel em em thin. Zirtawp tlai nitlak hnuah chuan Shabbat Dinner a tui thei ang bera buatsaih chu chhungkuain an kil ho a, Shabbat lawmluhna ‘Kiddush’ an hmang thin a ni. Pa berin Chhang(lian tak) a la a, Malsawmna dilin a tawngtai a, chutah a phel sawm a, tawng miah lovin an ei theuh a, chumi zawhah, Wine (wai-in ruihtheih) a la leh a, a bika siam No-ah chuan a liam parhin a thli a, malsawmna a sawi hnu-ah amah chuan a han in a, chumi zawh ah a nupui fanaute a thlit leh diat diat a, ngawi rengin an in a, chumi hnu-ah chuan a fate a mal mala an lu chunga kut nghatin mal a sawm leh thin. Chumi hnu-ah chuan hlim takin chaw ei an tan ta thin a ni. Shabbat ni-ah chuan Biakinah zing, chhun leh tlai inkhawmna a awm a, tlai ni tlakah Shabbat thlahna urhsun tak chhungkuain an nei leh bawk.


Wine leh Juda culture : Juda ho culture ah chuan Wine hi Pathian malsawmna entirtu-ah ngaih a ni. An serh leh sang urhsun apiangah Wine a inrawlh deuh zel. Kan sawi lan tawh ang khan Shabbat lawmluhna leh thlahna ah te, Inneihna ah te, an Kut program hrang hrangah te Wine tellovin engmah a tih theih loh a ni ber. Awle, Wine kan han tih hian Mizoram Pastor ten Isua Krista’n Kana khua-a Tui wine-a a chantir kha ruihtheih loh (Non-alcoholic) angah an sawi fo thin a, Isua pawhin wine ruihtheih chi a in ngai lovah an sawi thin. Hei tak hi chian turin Kana khua ah kalin Isua Kristan tui Wine-a a chantirna hmun takah khan Dawr neitu 2 ka va interview a, chubakah Mizo zinga Pathianthu zir ril ber ber pahnih leh an journalist lar tak lehkhabu ziaktu (Halkin) te ka interview bawk a. An sawi dan in ang vek chu hmanlai ata tawh Juda hnam zingah ‘Wine’ or ‘yayin’ ti-a sawi emaw ziah a nih reng reng chuan ruih theih(Alcoholic) wine sawina a ni an ti. Ruih theih loh(Non alcoholic) Grape tui sawr a nih chuan Wine ti-a sawi a ni ngai lo a, Mitz Anavim an ti zawk a ni. Wine hi hmanlai ata Juda culture ah a bet nghet hle a, wine in hi sual anga ngaih a ni ngai lova, hlimna petu leh Pathian malsawmna lanchhuahna ah an ngai. Chutih rual chuan rui khawpa wine in chiam chu tha an ti lo a, an ching lo tlangpui bawk.


Mizote an in hawng : Pu L. Keivoma leh mi thenkhatin Israel Zofate chungchang an lo sawi danah an rilru a na deuh nachungin Mizoram lakah rilru tha tak an la pu fan. Holyland Tour anga Mizo kal tam tak awm tawh mahse Mizote an tlawhpawh ngai loh thu leh an inhmuh ngai meuh loh thu an sawi. “Mizoram atanga lo kal te chu kan lo welcome reng a, tupawhin min rawn bel rawh se kan lo mikhual zel ang” an ti. Mizote hian keipawh min lo mikhualin duhsakna chitin reng min lo hlui a ni. Tin, Mizote hian an chhungte leh thenrual thate awmna a nih vang leh an pian leh murna a nih avangin Mizoram chu an rilru-ah a awm reng thin tih an sawi.


(An sorkar chak zia leh kalphung that zia te, Chenna atana a itawm zia te, an Agri-Horti Technology san zia te, Thlaler ramrova thlai leh theirah namenlo an tharchhuah dan te leh Bible/History hmun pawimawh ka fan chanchin te chu TV lamah kan la ti chhuak ang.)


Categories: Article, Kehila, Community

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments