HAKHOKHMA Post Post New Entry

Zu leh benei menashe

Posted by icolney2 on July 1, 2019 at 4:05 PM

Bnei Menashe te hian Zu in heh em? tih zawhna hi kan dawng fo thin a nga. Hetiang zawhna min zawt tu te hi, Zirna kawng hrang hrang leh khawtlang enkawlna lama hnathawk te leh kan hnam ngaihsak tu te pawh an ni fo thin.


Kan hnam zingah Zu vanga buaina thleng sawi tur a awm ta nual a, thih na hial a thlen pawh in, a sirah ZU hming hi zawite a lam rik a leh zeuh thin. Kan Rabanim neih chhun te pawhin, Zu ngaihnat luat a hlauhawm zia, leh a nghawng pawi thui zia te Shiur naah  sawi chamchi thin mahse an thusawite chuan awmzia a nei mawh hle. Zu a duh ve hle mai ti a koh hi tuman an duh ngai lova, tin, zu ngawlvei ti a koh an nih lek phei chuan an haw hle thin bawk. Chutih rualin kan Zu rui zingah hian in ti thei tak leh chapo tak kan hmu fo thin. Engpawh nise, kan hnam zingah hian Zu chungchanga ngaihdan leh hmalak dan tur sawiho hi a pawimawh em em a, chutih laiin, mimal taka mi pawisawi na anih theih avangin hian, kan fimkhur in ngawih bo mai kan chuh thin a ni.


“Bnei Menashe te hian  zu kan heh lova, thil kan ei tlem a, kan taksa hian zu tlem te pawh a zo lo a ni.” ti ten ka zawh na dawn hi ka chhang mai thin a, achhan chu kan hnam zu ngawlvei tam tak hi chu an ei in that thin loh avangin an taksa a nghawng chhe hle thin tih ka hmuh tlat avang in.


Thenkhat chuan, “Zu bur reng reng, a chhunga zu awm zat kan hmu thei lo,in zawh ngei ngei kan tum zel thin.” an ti bawk. Achhan ni awm ber a lang a, miin zu a lei a, tlem te ka in ang a, tlai tin tlem te te ka in ang ti chungin, a in belh zel a, a lo phur zual zel a, tlai tin tlemte te a in a tum kha zawi zawi in Zu hnathawh chuan theihnghilh tirin, pawisak loh na leh insumna a bo zova, Zu bur chhunga zu awm zawng zawng chu a in zo ta a. A Zu bur a zu awm a in zawh tawh a duh tawk mai an awm laiin thenkhat erawh chuan, chu Zu hnathawh phur na nasa tak avang chuan in belh tur zawngin a vak chhuak leh hram thin bawk a ni.


Ramthianghlim thleng hmasa thenkhat te zingah “Bnei Menashe te chuan, a tirah zu kan heh a, kan awm rei hnu, kan lo fin tak deuh hnuah chuan, in dan kan thiam tawh lutuk.” ti a sawi an awm a. Tun hma deuh phei chuan inneihna leh puipun na a zuruih hnuaa insual buai kan ching hle thin a, tin nupa karah pawh Zu vang in buaina a thleng fo thin bawk a. Mahse, kan tun khawvel hmachhawn mek hi intlansiakna khawvel a ni a, Zu in ngai lo emaw, zu buaipui vak lo chhungkua chuan hma an sawn zung zung a, chhungkaw pa ber emaw nu ber emaw zu vanga a buai ching te erawh chuan thian te hma sawn na ban pha lovin an hnufual zel a, an dinhmun bih chianga in siam tha a, ngai  awh leh an awm laiin, hnufual zual zel pawh an awm bawk a ni.


“Mizoram a zu in ngailo ,Ramthianghlima in ta an awm ta fo mai, a mak ka ti khawp mai, hmeichhia te Zu duh kerh kerh sawi tur an tam ta” he tawngkam hi  hrilhfiah dan tam tak a awm thei a, Mizoram lama zu khap lai leh khap loh lai a lo kal zia pawh tlem a dang deuh mah na. Tin, Mizoram lama zu in thin heta inzawm tho chunga chhungkaw khawsakna ngaihtuah a, in tlem deuh leh Israel rama Zu man a lo tlawm tak deuh vang leh a lei a lo awlsam tak avanga  in zual ta sauh pawh an awm thei bawk a, in dan pawh a in anglo. Ren chem taka  zu in leh ui nei lova in dan pawh a dang zel a. Engpawh nise, Israel ramah chuan Zu man a tlawm in, chawhmeh leina hmunah pawh duh tawk lei tura  awm a, Shabbath leh Kutah te pawh Wine ten nihna pawimawh an lo chelh zel avang te pawn, chu mi phen a Zu tak kan tih deuh bik whisky, Arakh, Vodka etc  te belh chhah thin a ni hian Zu hnawl a ti harsa hle bawk ang. Thil tih khawm nikhua ah pawh Zu tel lo chuan hlimna tak tak a awm tawh lo ti ila, kan sawi sual lo mai thei.


“Mahni a zu in kerh kerh ching hi chu an in nasa hle tawh, ngawlvei tawh, chutih rualin ruih vanga khawlai vak a, buaina la siam thin te hi chu, an la in hnem lo.” ti a sawi an awm bawk a. Ni e, an thusawi hi a dikna chen a awm ang, buaina siam thin ho te hi chu, an nupui te emaw thenawm khawveng te atangin Police ten lo hria in tihluihna in Treatment te an pe a, Addict Center te an kal ta thin bawk a, chung avang te chuan an nghei phah ve thin, nghei hlen an awm nual bawk a, chhanchhuah an awl letling zawk. Chutih laiin, mahni a in kerh kerh thin te erawh chu mi tha tak buaina siam ngailo, an nih phei chuan zu ngawlvei dik tak an ni duh hle a. A rukin natna khirh tak te pawh an lo tuar ru reng thin. Thenkhat in chhungkuaah eng harsatna mah an thlen loh laiin, nupui fanau te tan a kawlkhirh tak leh harsa tak heng ho thawm nei lova in kerh kerh zingah hian an awm chawk bawk thin.


         ‘Bnei Menashe te Zu heh hnam, buaina siam ching’ ti a, kan thenawm khawveng hnamdang te leh khawtlang a sawi kan hlawh hian, a hnam ang zawng in a thinrim thlak in, a mualpho thlak hle thin a. Mahse, an thusawi thenkhat te hi thu dik a nih theih na lai a awm tlat si a, tih ngaihna dang a awm chuang der si lo. Mizoram khaw hrang hrang, mi ze hrang hrang, seilenna in ang lo, Zirna lamah pawh in thlau em em te, khawsakna lamah pawh inchen lo kal khawm, a tamzawk phei chum mawl ve tak tak, ram rethei tak leh khawsakna harsa leh hniam ve tak tak atanga ram changkang tak (3rd world atanga 1st world) bawh kan duai kan nih avang hian, kan in adjust thiam lova, L-lLPA Hashem malsawmna kan dawn lam chhut chiang lova, tuna kan khawsakna leh dinhmun te chapo nan leh ruih nan a hmang hi pem khawm te zingah a thleng thin a, tin rilru nat leh in sit lutuk vanga zu in vak mai pawh thil thleng fo a ni bawk thin, tih hi mithiam ten an lo zir chiang daih tawh a ni.


A khawikhawm nan chuan, Engvanga  Zu in nge ka nih ?enge ka in chhan? Engvanga nghei thei lo nge ka nih? Engvanga mi zinga zu in chak tlat nge kan nih? Engvangin nge hun remchang ka neih a piang a zu ka in chak tlat thin? etc  tih zawhna hrang hrang te hi mah ni leh mahni in zawt a,  in en fiah fo thin hi a va tha teh lul em!!!.


I mimal nun ah Zu vanga harsat na i nei a ni emaw, In chhungkua ah Zu vanga  tanpui mamawh an awm chuan min rawn call dawn nia, I harsatna tanpui turin mi thiam zawkte rawnin I hun kal zel tur hmachhawp her rem dan tur kan ngaihtuah tlang dawn nia aw.


Itzkhak Kawlni

Source : Shavei Bulletin Korakh 161/2019


Categories: Hitmakrut, Article, Kehila, Community

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments