Forum

Post Reply
Forum Home > Mipuite zawhna hrang hrang > Enga ti nge Yehudim tia kan inkoh?

hakhokhma
Site Owner
Posts: 40

Zawhna: Eng vangin nge tunlai hian Yehudim tia kan inkoh nachhan? Israel kan ni zawk lo maw? Yehudim hi a sakhuana sawina emaw, Yehuda thlah sawina chauh emaw ani mai lo maw?


HK Chhanna: Lal Shlomo-a fapa Rekhovam-a lal laiin Israel ram chu Lalram hnih ah a inthen a, Juda Lalram leh Israel Lalram ah, tichuan, Israel Lalram amite chu Israel ho tia koh niin, Juda Lalram ami te chu Yehudim tia koh an ni.


    Tichuan, Israel Lalram amite chuan milem pathian te biain Jentel te nen an lo inneih pawlh (mitbolelim) ta a, tichuan, Ashur Lal chuan Israel mi tlemte tih chauh loh chu an vaiin Israel laram amite chu rampawnah a hruaichhuak (Galut) ta a, tichuan, chutih laia Israel mi tlemte hruai chhuah ve loh te chu Juda lalram ah chuan lutin, Yehudim tia koh te zingah an lo tel ve tan ta a ni.


    Hetia Israel te Galut a an chhuah tak hnu hian an lo kir leh ang em? tih thuah hian Gmara ah pawh Khakhamim te an lo inhnial nasa tawh a, Gmara atanga kan hmuh danin heng Israel hnam ho Galut a chhuak te hi kir leh thei dinhmuna an awm laia an lo kir duh loh avang leh an kalna hmunah chuan Jentel te anga an awm zui tak avang leh hnam dang te nen an inneih pawlh tak zel avang chuan Jentel a puan leh Olam Habaa chanvo nei lo tur hiala puan an lo ni taa, tichuan, heng Israel hnam bo te zing a mite lo kir leh duh ho an awm chuan, chung te chu rinhlelhna zawng zawng (hnam dang te nena inthlah pawlhna lak ata te, 'Mamzerut' lak ata tihchian nan te) lak ata an lo fihlim theih nan 'Gerei Tsedek' hmang chauhvin an lo kir leh ang tiin thu an lo tithlu ta a, amaherawhchu, hetia Giur an paltlang avang hian an hnam nihna (Dan, Nafthali, Menashe etc') chu a chhiat phah tihna a ni lo, hemi thu, tu thlah nge, eng hnam nge an nih tih chu Mashiakh lo kal hunah Zawlnei Eliahu chuan a rawn sawi chiang dawn chauh a ni.


    Tin, Tsidkiahu Lal laiin Bavel ho te chuan Juda Lalram pawh chu Galut ah an hruai chhuak ve thova, mahse, an ni te hi chu an kalna ramah chuan an P-thian biak dan leh Torah chu an phatsan lova, chuti mai bakah, Bavel atang hian Talmud Bavli (Gmara) te kan neih phah zawk a, tichuan, Bavel saltan na ata an rawn kir leh pawh hian Beit Hamikdash (Temple) te chu an rawn dinthar lehta zawk hial a ni.


    Tichuan, hetiang lai hun atang hian Yehudim tiin kan inko tan tawh a, achhan pakhat pawh, Israel ten milem pathian an biak avang khan, mipuite rilru ah Israel mi tih sawina a awmin milem pathian biakna a lo lan tel thin avang leh Yehudi intih khan milem pathian hmaa kun duhlo nih symbol a lanchhuah tir avang leh, Yehuda Lalram chhunga mite sawina a lo ni bawk a, tin, tunlai a Israel rama mi tam berte hi Shevet Yehuda an nih vang ani pakhat bawk a, tin, khang hunlaia Sakhuana chhuak pakhat, Juda te an rinna lak ata pawh peng tum pawl ten, Israel te chu an lo sual tak avangin, Israel te chhandam tu tur Lal thar a lo piang a, chu chu Juda ten an that a, tichuan, nakin ah a lo nung leh ang a, chutih hunah chuan amah ringtu apiang te chu Israel thar a rawn siam ang a, a rawn chhandam dawn an tih avangin, tunlaiah chuan Torah ringtu tan chuan a hnam level (Leum) leh a Sakhuana Level a kan insawi dawnin Yehudim tiin kan inko ta thin a ni.


     Hei mai bak ah hian Harebi Miliobavits chuan heti hian alo sawi tawh bawk a, "milem pathian hmaa kun duh lo te chu Yehudi tia koh an ni" tiin, tin, Gmara Masekhet Megila ah chuan 'Eng vangin nge Mordechai-a kha Shevet Binyamin nisi kha Mordechai hayehudi tia koh anih?' tiin thu an lo khel tawh a, achhanchu, mihring (Hamana) leh milem hmaa a kun duh lohna avangin Yehudi tia koh ani, tiin, an lo sawi tawh bawk a ni.


    Tin, 'Dvar Khevron, Khelek alef' lehkhuabua kan hmuh angin, kan pu Harav Elyiahu Avichail-an kan chungchang thua Source hrang hrang hmanga Harav Dov Lior hnena zawhna a lo zawh, a chhanna atanga kan hmuh ang pawhin, "Benei Menashe te hi hnam sawm dang te ang thovin thil engkim ah Jentel an ni a, chuvangin, Yehudim a an inleh theihna tur chuan Giur na kimchang an paltlang tur a ni" tiin, a lo sawi tawh bawk a ni.


*He zawhna chhanna hi Kipa website a Rav te an zawhna atanga lak khawm leh, Lehkhabu dang te atanga rawn phuah khawm a ni.

June 4, 2012 at 11:48 AM Flag Quote & Reply

You must login to post.