Oops! This site has expired. If you are the site owner, please renew your premium subscription or contact support.

Forum

Post Reply
Forum Home > Mipuite zawhna hrang hrang > Judasim leh Islam danglamna min lo sawifiah sak!

muantea
Limited Member
Posts: 1


January 20, 2012 at 8:12 AM Flag Quote & Reply

hakhokhma
Site Owner
Posts: 40

Sakhaw hran an ni a, Judaism chu - Avrahama fapa Itskhak-a, chumi fapa Yakov-a thlah kal zel te Sakhua a ni a, chumite chuan Aigupta ata an chhuah khan Sinai tlangah Torah an dawng a, chu an dawn Torah hmang leh chumi zul zui chuan an Sakhuana chu an serh a ni.

TIn, Islam sakhua chu Avrahama nupui Sarah-i bawihnu Hagari fapa Ishmaela thlah kal zel te zingah kum zabi 7 na lai khan Muhamad-a a awm a, chu pa chuan Zawlnei tawpna tur ka ni tiin Sakhuana thar a lo din chhuak a, chu chu Islam chu a ni. Islam sakhua hi 'Kuran' bu zul zuia serh a ni.

--
June 7, 2012 at 8:28 PM Flag Quote & Reply

Leon Fanai
Member
Posts: 1

History kaihtawi hmangin ka'n tarlang ve ange, in chhiar peih meuh emaw :

 

   Roman Empire kha Jewish pasal tha hovin nasa taka an dodal avangin Jewish mipui tam takte chu Rom sorkarin a awp loh ram, Arabia-ah tlanchhiain khuate an din a, chutiang zinga khaw lar tak pakhat chu Yathrib ti a hriat a ni a, Medina ti a hriat zui a ni. Medina khua hi Mecca tih lohvah chuan Islam khawpui thianghlim pahnihna a ni nghe nghe.


   Rom khawpuia Jewish ho an chen lai khan, an nunphung tawma zawm ve duh tam takte chuan sa-an-phun a, chutiang bawk chuan Arab ho zingah pawh a hnam pum puma Judaism a inlet te pawh an awm a ni. “Arabia mi zawng zawng Judaism a an inlet lohna chu samzai tia vel lek a ni”, tiin French mithiam leh Bible critics - Ernest Renan chuan an sawi nghe nghe a ni.


   Arabia rama Jewish mipuiin P-thian pakhat an biakna (monotheism) leh chu P-thian tana an inpekna ngaisang zual em em tu mi pakhat a awm a, chumi chu sumdawnga vak vel thin Mohammed ibn Abdallah tih a ni. Sumdawnga a vah velnaah Christianity chanchin a hriat thin chuan a rilru hneh hle mahse an doctrine a ‘Trinity’ kalphung erawh chu a pawmzam thei hlawl lo a ni. Heti hian a sawi chhuak nghe nghe a : “Allah chu Messia a ni a, ani chu Mari fapa a ni... tih te, ‘Allah chu pathum zinga pakhat a ni ti tute chu ringlo mite an ni a, P-thian chu pakhat chauh a ni si a. Heti anga sawi thin ho, rinna neilote chu na taka hrem tur an ni" tiin (Koran, Sura 5:71-73). Mohammed an harhtharna a chan lai vel hian Judaism kalphungin amah hi a chiahhneh hle tih a chiang takin a sawi theih a ni (Jews and Arab by S.D. Goiten enla).


   Mohammed-a hian Torah a hre ve nual a, a zirtirna remkhawm leh Islam sakhaw lehkhabu thianghlima an hman tak, Koran-ah pawh Moshia hming hi vawi za chuang tarlanin a awm a, zawlnei 25 a tarlang zinga 19-te chu Israel zawlneite an ni nghe nghe. Tin, Koran-ah hian Jewish serh leh sang bakah dan leh hrai tam tak a senglut bawk a, entirnan : serhtan te, vawksa ei thianglo tih angrengte thlengin a senglut a ni.


    Mohammed-a hian Arab ho hi Aigupta mi, Hagari laka Abrahama fapa Ishmaela thlah kalzel niin a ring a, P-thian pakhat chungchang zirtirna pawh khuarei avangin an theihnghilh mai mai niin a ngai bawk a, chu an thil theihnghilh tawh zui leh tura midang hruaikir chu a rawngbawlna-ah a ngai tlat bawk a ni. Chuvangin, Mohammed-a pian leh murna Arab khawvel chu a tluchhe nasa hle a, siamthat a ngai hle a ni tih heta tang hian a hriat theih awm e. A hunlaia Mecca chu milem biakna hmunpui a ni a, Arab mite chuan pathian tam tak an be thin a, chutiang zingah chuan Ni pathian nu (Al-Lat te, Planet Venus nena inzawmna nei pathian nu (Al-Uzza) te, heng pathian nu an biakte hi an pathian lu ber, Al-llah (Allah) fanute an ni nghe nghe.


   Mohammed-a hun hma daih tawhin Mecca chu Arab ho pathian biakna hmun (Kaaba) a ni a, chutah chuan arsi tla (black meteorite) a awm a, he hmun hi hmanlai atang tawha an milem biakna maicham a ni. An pathian tam takte hnena thisen an hlan thinna hmun a ni. Mohammed-a lan hma kha chuan Arab ho chu mimawl leh koham (Barbaric) tia sawi thin an ni (The Religions of Man by Huston Smith).


    Mohammed-a hian a chheh vela mite khawsak dan chu a kham hle a, kum 610 khan kum 40 mi niin thlaler puk pakhatah a inkhung hrang a, he pukah hian inlarna hrang hrang a dawng a, chutiang zingah chuan Angel Gabriel-a te pawh an tel niawmin Muslim ho chuan an sawi. Tichuan, a bihrukna puk atang hian thlarau thuamna thar changin a chhevela milem biakna tidanglam turin mawhphurhna neia inngaiin rawng a bawl tan ta a ni. Nun hurherhna leh pawrhcehna titawp a, remna leh muanna leh roelna dik a awm theihna tur te, sal, fahrah, mirethei leh hmeichhiate’n dinhmun alo that zawk theihna turin tan a la nasa a, tin, milem biakna pawh chu Pathian pakhat biakna (monotheistic) ah zawi zawiin a tidanglam hret hret a, tichuan a hmalakna chu “Pathian a inpe” (Islam) tiin a phuah ta nghe nghe a ni.


   Mohammed-a hrilhfiah dan chuan Islam hian banpui panga a nei a : i) Pathian pakhat rinna (Allah lo chu pathian dang a awm lo) ii) Tawngtaina (nikhatah vawi nga) iii) Thilthlawnpek ( sum lakluh atanga 2.5 %) iv) Haj - Mecca a biakzin (damchhunga vawikhat tal) v) Chawnghei Ramadan thla chhung khaw en atanga khaw thim thleng).


    Tin, Islam thurin innghahna pakhat chu Jihad tih a ni a, theihtawp chhuah emaw châi (struggle) tihna a ni. Mi tam zawk chuan he thumal hi indona thianghlim niin an ngai thin a, hrilhfiahna chihnih a awm thei a, mihring thinlunga tha leh thalo in beihna leh pawnlam inbeihna (Muslim khawvel - dhar al Islam leh Muslim nilo - dhar al Hare inbeihna). Kum zabi 7-na lai vela Islamic law codes (Sharia) in Jihad an hrilhfiah dan chuan Islamic pawnlam khawvel laka theihtawp chhuahna, tiin.


    Mecca rama sumdawng mi Mohammed-a hian a tir chuan zuitu tlemte chauh a nei a, kum thum a vei hnuah pawh mi 40 vel chauh a sakhaw tharah chuan an lalut thei hram a, mi ropui tam tak ang bawkin a thiltumah chuan a beidawng duh hauh lova, tichuan hun a kalzel a, mi rinawm tak tak a chherchhuak chho ta zel a. Zuitu a nghah poh leh milem be ho hnen atangin dodalna a nasa a, hetiang avang hian a thi phah thelh nghe nghe a ni. Mecca hmuna sakhaw thar (Islam) zuitute’n tihduhdahna an tawrh mek lai hian, Yithrab khawpuiah buaina leh harsatna namen loh a chhuak a, chu khaw aiawhtute chuan Mecca a sakhaw thar tlangau puitu chu an khawpui harsatna sukiang thei tura an rin tlat avangin an sawm a, mahse Mohammed an Allah chauh be tawh tura a kar tlat avangin an inbe rem thei meuh lova, a tawpah chuan Mohammed-a thil phut chu an pawmpui ta a, tichuan chu khawpui-ah Mohammed-a pawh chu a pem ta nghe nghe a. Kum 622-ah Mohammed-a hian Yithrab khawpui a pan a, hemi kum hi Islamic calendar chhiar tanna leh an kum 1-na “Hegira” ti a hriat zui alo ni ta a ni. Yithrab khawpui hi tunlaia Medina ti a kan hriat tak hi a ni a, “zawlnei khawpui” tihna a ni.


   Mohammed-a chuan Medina chu a buzawlah a hmang a, sipai pawh 10,000 lai a nei a, tichuan kum 630 alo inherchhuah chuan Arab ho milem biakna khawpui, Mecca run tur leh an hmunserh(Kaaba) chu Pathian pakhat, Allah biakna hmuna chantir a tum ta a, Mohammed-a hlawhtlinna hi ropui tak a ni, kum hnih lek chhungin Arabia zawng zawng chu Muslim thuneihna hnuaia a dah vek thei a ni.


    Mohammed an a sakhaw thar vawrhdarhna a harsatna a tawh ber chu Judate an ni tlat mai. Judate chuan Islam pian hma a Christian thurin anlo hnawl tawh ang bawkin chu sakhaw thar pawh chu an hnawl thova. Mahse, christian ho laka harsatna an tawh ai chuan Islam lakah chuan a nep hle thung a ni. A chhanchu christianity chuan milem biakna ziarang tam tak a chhawm a, Torah dante hnawlin Isua rinna-ah a burbun vek a. Islam erawh chuan Pathian pakhat biakna a kalpui bakah Mohammed-a chu pathian emaw pathian fapa anga chhal a ni lova, tin, Pathian chu thil pathum inchawlhpawlh angin an chhal lo bawk a, Jewish dan leh hrai tam tak a chhawm tlat vang a ni.


   Judaism leh Islam inremna pawimawh tak pakhat chu Abrahama thlah ve ve an pawm dunna chu a ni a, nimahsela a mutan lian tak pakhat chu Mohammed-a chu Pathian zawlnei hnuhnung ber leh a thupuan chu thutawp a nih leh nih loh chungchang thuah a ni. A chhanchu, Jewish mirilte chuan hmân hmânah zawlneihna chu a tawp tawh an ti a, chu bakah Torah thute chu engmahin a luahlan theilo a ni. Mohammed-a Islam chu Judate’n an hnawl tlat avangin a tuar na hle a, hei vang hian Judaism chu a do zui ta a, Judaism thurin a behchhan thin atang chuan inlakhran a tum ta a, chawlhkar khata ni thianghlim ber chu zirtawp-ah a thlak a, Jerusalem hawia tawngtai tawh lovin Mecca lam an hawi ta a; Jewish ei leh in dante pawh tam tak an hnawl a, ‘marawhchu ran talh dan te, vawksa ei loh te leh thisen ei khapna te chu a chhawm zui zel tho a ni.


   Tin, Abrahama’n Moriah tlanga a fapa Isaka hlan a tum chanchin kha thu diklo a ti a, Abrahama chuan a fapa upa zawk Ishmaela chu Mecca-ah hruaiin Kaaba lung dum chungah hlan a tum zawk a ni, tiin Mohammed-a chuan a her danglam ta a. Mohammed an zawlnei anga a inchhalna leh a thu herdanglam te chu phuahchawp mai a nihzia hretute chu a haw zual sauh mai a, “An (Judate) hnenah chuan zahna leh chhiatna tihlanin a awm a, Pathian thinurna in a hrut mek an ni” (Sura 2:61) tih te, “Dikhlel taka sumdawng ho leh kawng dik atanga peng ho.....an rin loh avangin Pathian anchhia chu an chhunga a tla ta” (Sura 4:48-49) ti te in Koran-ah Judate elsenna a chuang hial a, tin, Sura bung 59-naah phei chuan Mecca cheh vela Juda khawsa te an suat dante a chuang nasa hle nghe nghe a ni.


    Mohammed-a chu kum 632 khan a thi a, a hnungzuitu thenkhat chuan a chunga thute hi lakawiin Jewish khawvel nuairal tura phalna niah an ngai a, mahse Muslim dangte erawh chuan Mohammed Judate chu an unau an nih thu anlo tlangau pui thin avangin Judate chunga that an chhuah thung a. Mohammed-a thih hnu hian Arabia chuan ‘Jihad’ boruak chu nasa taka chhemalhin pawnlam indona thianghlim chu thar thawhin, khawvel chu Allah hnena hruailuh an tum ta a, tichuan reiloteah Byzantine leh Persian lalram te chu a tudai thei ta mai a. Heti anga Muslim lalram chak tak hi Judate tan tangkaina leh sawtna a nei ve tlat.

 

   Jewish ziak mite tarlan dan chuan, Byzantine lalram a, christian te kha Muslim hovin tudai lo sela chuan khalai bial vela Judate chu an chimit vek ang, an ti hial a ni. Islam sakhua lo piang Asia minor leh Mediterranean hrul vela an inzar pharh hi Israel tan chuan chunglam thilthlawnpek leh malsawmna hlu tak a ni, a chhanchu Muslim rallian hian Judate chu “ahl al-dhimma” an tih mai “humhalh turte” tiin an kalpui tlat mai a, Islam-ah an inlehluih tir lova, zalen takin Islamic ramah te an khawsa thei a, amaherawhchu muslim mi naran aiin an dinhmun a sang chuang lo, entirnan : Judate biak In chu Muslim biak In aiin a sang tur a nilo tih te, Court-ah Muslim a khing thiang lo tih te, Muslim te chu kawng an kian tur a ni, tih te, nimahsela, hmun hrang hranga Judate an endan hi a inang vek lova, hmun thenkhatah elsen leh tihduhdah an nih laiin hmun thenkhatah chuan zalen takin an khawsa thung.

 

August 6, 2012 at 9:53 AM Flag Quote & Reply

[email protected]
Member
Posts: 5

Ngaihnawm hle mai @Leon

August 23, 2012 at 1:01 PM Flag Quote & Reply

You must login to post.