Oops! This site has expired. If you are the site owner, please renew your premium subscription or contact support.

HAKHOKHMA Post Post New Entry

Parshat Noakh

Posted by Moshe Ilan on October 27, 2011 at 4:45 PM

פרשת נח  (Bereshit / Genesis  6;9-11;32)

      Kan Parasha chu achangtupa hminga koh niin 'Parshat Noakh' tih a ni. Kan hriat ṭheuh angin Noakh (Nova) chu P' in lei chunga mihring zawng zawng a tihmih vek duh laia a hunlaia mifel awmchhun a nih avanga mihringte thlah thar, chhuan thar siam tura a mi thlan a ni.

 

      'Mishnat Avot' perek 'ה ah chuan, "Adam-a aṭanga Noakh thleng chhuan sawmte chu sualnain an khat a, tichuan, a chhuan sawmna tawp lamah chuan mihring leh P' inkarah te, mihring leh mihring inkarah te an lo sual zo ta a, tichuan, tuilet (Mabul) hmangin hrem an lo nita a," tiin, a inziak a, kan 'Khakhamim' (Rabi mifing) te chuan tuilet hunlaia mite chu P' laka an sualna avangin an chungah hremna tawpkhawk hrikthlak ani lova, hremna tawpkhawk an chunga thlentir anih nachhan chu, an mihring puite bungraw chunga an kut an chelek tak avang a ni, an lo ti a, Rabi Yokhanan-a chuan 'Masekhet Sanhedrin' (ק"ח, ע"א ) ah heti hian a sawi a, "Tuilet hun laia mite chu sualna tinrengin an sual a, amaherawhchu, chung an thil tih avang chuan hremna na tak an dawng lova, mahse, an mihring puite bungrua leh thil ruk sak an lo chin takah chuan thi vek tura an chungthu relthluk sak tak niin Tuilet hmanga hrem an lo nita a ni," a ti a, hei hi khawi aṭangin nge kan hriat theih kan tih chuan, Bereshit (Gen) 6;13 "Lei hi rukruknain a khat zo ta si a..." tih inziak kan hmuh aṭangin a ni.


      Hetiang chiah hian mihringte chungah hian P' chuan amah nena kan inkara thil sual kan tih chang te, thil sual dang kan tih changte chuan fiahna (hremna) min pe ṭhin mahse, kan mihring puite thil kan ruk sak vaih chuan a thinurna tawpkhawk chu kan zenbuak sak thei ṭhin dawn a lo ni.    


      Torah a a inziah angin, (7;11) 'Mabul' (tuilet) chu thla hnihna, chumi thla ni sawm leh pasarihna ah inṭanin, (8;14) a kumleh thla hnihna, chumi thla ni sawmhnih leh pasarihna ah lo tawp ta in, lei chu a lo ro ta a, hei hi Juda ten thla hmanga ni an chhiar dan hmanga sawina ani a, chuti a lo nih chuan, tuilet chhung chu kum khat leh ni sawm pakhat tihna alo nita a ni, he thu aṭang hian kan 'Khakhamim' te chuan tuilet hun chhung zawngte chu avain ni 365 chiah ani an lo ti a ni.

 

    "Noakh chu a hunlaia (a chhuan) mifel mawlmang  tak (tu pawi mah sawi lo mi) ani a.." tih lai thuah hian Rashi chuan Sanhedrin a an sawi angin, Noakh fakna thu zawngin, Noakh chu a hunlai hian mifel dang awm phei se chuan mifel tak lawrlak ani ngei ang tiin a sawi a, amaherawhchu, hetia sawina pawh hi a awm a, Noakh leh Avrahama chu an hunlai lo inang tase chuan, an hunlai ro rovah Noakh chu Avrahama lakah engmah ani lovang an lo ti bawk a, tin, hetianga Torah meuhvin Noakh chu 'Mifel mawlmang tak' (Ish Tsadik tamim) tia a sawi chuan, tuin nge sawibuai thiang an lo ti bawk a ni.


      Bereshit (Gen 7;2-3) "Sa thiang tinreng ami tuak sarih...." tih thuah hian Sa thiang chu tuak sarih zel lawng chhungah khan Noakh khan a lalut a, tichuan, sa thianglo chu tuak khat zel a lalut a, amaherawhchu, Torah ah chuan Sava lam thu a sawinaah chuan Sava thiang leh thianglo chungchang a sawilang lova, hei hi engvang nge? kan tih chuan, Rabi Meir Simkha chuan heti hian a chhang a, "Ran leh Ram sa chungchangah hian ei thiang leh thianglo te hi an mahni taksa pawnlam aṭangin a hriattheihna chhinchhiahna a lang chhuak a, hetiangin; an tin a kak chhuak a, tin, ṭhialret an ṭhial bawk a, amaherawhchu, sava lam ah erawh chuan, sava thiang an nihna hi an taksa chhunglam ah a chhinchhiahna te a awm hlawm a, hetiangin; an chawkchaweng ah te, an thial kheh theih a nih leh nih lohvah te ani hlawm a, chuvangin, an nun laia hriat a harsat avangin, Sava lam thuah hian Lalpa P' chuan Noakh tana harsatna a awm lohna turin, Sava thiang chu tuak sarih an mahniin Noakh lawng chhungah chuan a luh tir a, tin, a thianglo ho chu tuak khat zelin a luhtir thung a ni," a ti.


     He thu Sa thiang leh thianglo thu aṭang hian kan pi leh pu mi hmasa te khan Sinai tlanga Moshe Rabeinu hnena Torah pek anih hma pawh khan engtin maw tak Torah chu hriatna leh zirna an lo nei tawh tih a chiang em em a ni.


      (6;21) "Veasafta eleikha vehaia lekha velahem leokhla" (Tin chaw eitur... la khawm la, tichuan nang  leh anni (ran ho) tan chaw eitur ani ang) tih inziak kan hmu a, sawi fo tawh ṭhin ang in, Torah ah chuan a thumal inrem dan thlengin awmzia a nei kan ti fo tawh a, he thuah pawh hian, lawng chhunga eitur an chhek luhte chu Noakh leh a chhungte chuan an ei hmasa ber ang a, chumi hnuah a ran te chuan an ei ve ang tihna a ni a, amaherawhchu, 'Shma Israel' a kan sawi ṭhin (Deut' 11;15) ah chuan "In ramah hlobet te ka pe ang cheu a, in rante leh nangni pawhin in ei ang," tih ziak kan hmu a, hetah ve thung hi chuan keimahni mihringte aiin kan rante chuan an ei hmasak tur thu kan hmu si a ni.


     He chang atang hian 'Tsaar Baalei kham' (ransa te tihhrehawmna chungchang thu) Halakha (Juda dan) zirchhuah a ni a, chu chu, chaw kan ei dawn reng rengin kan ran vulh te chu an eitur kan pe hmasa tur tih a ni a, kan ran vulh ten an ei hma chuan a neitu mihringte chuan chaw kan ei thiang lo tih a ni. Achhanchu, kan ineipuar tawh chuan, mahnia chaw zawng theia kan siam loh kan ran vulh te chu an chaw tur puar khawp kan pek peih loh phah palh thei a ni.


      Mahse tun kan Parasha ah nen thung erawh hi chuan a thu hi inkalh dawn angin a lang a, he thu hi ngunthluk deuhva kan zir chuan Noakh chuan kum khat chhunga khawvela eitur awm zawng zawng chu a lawng chhungah chuan ala khawm a, chu chu kham loh palh awm thei a niin siam belh leh mai theih dinhmuna a awm loh hunlai a ni (Pikuakh Nefesh), chuvangin, an mahni dinhmunah hi chuan khawvel siamin awmzia a neih nachhan mihringte chu an pawimawh ber ta a, chuvangin, mihringte chuan an ei hmasa phawt ang a, chumi hnuah an rante chuan an ei ve chauh tur a ni.


      Chuti lovin, tunah pawh hian Torah chuan rante chu lo sawi hmasa tase chuan, Torah zir sang lo chuan mihring aiin ran an pawimawhin an ropui zawk a ni, tiin, ala rawn zir sual dah thei dawn a ni.


ZawhnaClick Here

Categories: None

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments