HAKHOKHMA Post Post New Entry

Khol Hamoed Sukot

Posted by Moshe Ilan on October 13, 2011 at 8:25 PM

חול המועד סוכות

   Sukot kut ni zawh zana Havdalah kan hman hun aṭangin 'Khol Hamoed Sukot' chu a inṭan a, Masekhet Avot ah Rabi Eliezer Hamodaii chuan, "Khol Hamoed zah lo tu leh hmang nawmnah tu chu Torah thiam leh thil ṭha tam tak titu pawh nise, Olam Haba (khawvel lola awm tur) ah chanvo a nei lovang", tiin, alo sawi a, heng ni (Khol Hamoed) hi ni pangai anga hnathawh phal ni mahse, chung hnathawh theih chi te chu kut ni atana thil pawimawh chauh te leh sum lama tlakchhiat phah lohna tur hna ang chi chauh te chu thawh thiang a ni a, chuti anih avangin, heng ni te hi kut ni tenau anga hman tur niin, kan thawmhnaw hak ahte, kan chaw ei chungchang ah te, ni pangai ang lovin tlema zahna lanchhuah tir tur a ni. Hei hi "Vesamakhta bekhagekha" tih aṭanga zir chhuah a ni.


    Beit Hamikdash (Temple) awm lai chuan heng ni te hian hmun thianghlim tlawhin hmun tin aṭangin Jerusalem ah an kal khawm ṭhin a, tunlai thleng pawh hian Beit Hamikdash awm tawh rih lo mahse a hriatrengnan hmun tin aṭangin Jerusalem ah kalin 'Kotel' (ṭahna bang)  te chu an tlawh ṭhin a ni.


HAKHEL; Beit Hamikdash awm lai chuan Mitsvah (thupek) pakhat kum sarih chhunga vawi khat neih ṭhin a awm a, chu chu, 'Mitsvat Hakhel' a ni a, mizo ṭawng chuan 'Mipui kohkhawmna thupek' tihna ang a ni. Hetah hian 'Mitsvat Aliyat Haregel' (kea hmunthianghlima lawnna thupek) a hmeichhia te an kal ve ngai loh ang lo takin Israel mipui tinreng , hmeichhia te leh naupang te thlengin an inhawrkhawm ṭhin a, chutah chuan Melekh (Lal) chuan 'Mishne Torah' (Sefer Dvarim - Deuteronomy bu) bu chu mipui pungkhawm te beng hriatah a chhiar chhuak ṭhin a, hei hi 'Shmita' (kum sarihna) kum chhiara a kum khatna ah Sukot kut niin an nei ṭhin a ni.

 

   Tunlai chuan Khol Hamoed lai hian zing tawngtaina ah 'Tefilin' chu zem a ni ngai lova, tin, 'Shmone Esre' leh 'Birkat Hamazon' ah 'Yale veyavo' chu chhiar tel thin a ni a, tin, Shakharit  ah 'Halel' pum chhiar thin a ni a, tin, 'Hoshanot' neih thin ani bawk a, Hoshanot neih lai hian 'Hakafa' tiin Torah chhiarna lai dawhsan chu hel kual thin a ni a, hei hi he kut laia lusun te leh nu leh pa thla 12 sun lai ten an hel ve ngai lova, tin, Shakharit ah chuan 'Tfilat Musaf' Shalosh Regalim ta chu neih thin a ni bawk a ni.


NISUKH HAMAIM; Masekhet Rosh Hashana ah chuan, "He Sukot hunlai hian tunkum lo awm tura ruahtui tam dan tur chungchang thurel chu tihthluk a ni", tiin a inziak a, chuvangin, he Sukot hunlai hian ruahtui ṭhat kum a lo nih theih nan Jerusalem kianga 'Shiluakh' tui chu lain 'Mizbeakh' (Maicham) ah leih ṭhin a ni a, "Lalpa P' chuan a mi Israel te hnenah , in lova thlai te ruahtui hmanga mal ka sawm theih nan kut niah chuan ka hmaah tui leihbaw rawh u," tih ziak ang khan.


   Masekhet Sukah ah chuan he tui an lak dan chungchang kimchang hi a inziak a, eng tiangin nge shiluakh dil aṭanga 'Har Habait' (Temple tlang) hmuna tui an lak luhna Tekes (ceremony) chu an hman dan tih vel, mipui tam takte chuan rimawi nen awiin hlim takin hun an lo hmang ṭhin a, he Tekes hi a hmingah 'Simkhat Beit Hashoeva' an lo ti a, kan Khakhamim (mifing) te chuan "A dam chhunga simkhat Beit Hashoeva hmu lo chu, a dam chhung ni hian hlimna tak ala hmu ve lo a ni", an lo ti hial a ni.


    He Simkhat Beit Hashoeva hriatrengna hi tunlai thleng pawhin la hmang thinin, hmun hrang hrang ah te chuan sukot Khol Hamoed (Bawkte kut ni sarih chhung) lai hian Mesiba (Party) ropui tak tak an la hmang ṭhin a ni.


HOSHANA RABA; Hei hi Khol Hamoed Sukot ni hnuhnung ber ani a, tin, hemi ni hi Sukah chhunga awm tawpna ni leh Arbat Minim vei tawpna ni ani bawk a, Beit Hamikdash hunlai chuan hemi ni hi 'Nisukh Hamaim' (Tui lakna) tawpna ni ani bawk a ni.


    Tin, he ni hi Lalpa P' hnena lehkhathawn hawn ni ani tih ani bawk a, chumi zulzui chuan hemi ni hian Juda leh Juda te chu lehkha te inthawn tawnna an nei ṭhin a, a chhungah chuan thu ṭha engemaw tak inngaihdamna thu emaw te ziakin an inthawn ṭhin bawk, he ni hi Rosh Hashana leh Yom Kipur nia ngaihdam la ni velo te tan ngaihdamna ni a ni bawk a, achhanchu, Avrahama hnenah Lalpa P' chuan "kei hi pakhat ka ni a, nang pawh ka pakhatna ang min tawmpui tu , pakhat i nihna avangin i fate tan an sualna laka ngaihdamna ni khat ka siam sak ang a ti a, chu chu he ni hi a ni a, Avrahama kha khawvel siam tirh aṭanga chhuan 20 naa piang niin, chhuan 21 a Lalpa P' zawng chhuak tu a nih angin, kumthar ni 21 (Tishrei thla ni 21) ah he ni 'Hoshana Raba' hi alo tla chiah ve bawk a, chu chu 'Yamim Noraim' (rorel ni te) mai baka sual ngaihdamna ni 'Yom Kaparat Avonot' atan hman alo nita a ni, hemi ni dawn zan hian tlaivara Torah zirna hun hman ṭhin a ni a, tin, 'Tikun Leil Hoshana raba' te, Dvarim (Deuteronomy) bu te, Tehilim (Sam) bu te chhiar zawh ṭhin ani bawk a ni.

 

   Hemi ni hi ni dangdai deuh hlekin inkhawmna te pawh hman ṭhin a ni a, tin, Hoshanot (Arbat Minim vei kualna) ah pawh Bima (Torah chhiarna hmun) chu vawi 7 hel chhuah ṭhin bawk a ni.

 

Khibut Haarava; Vawi sarih 'Hoshanot' tia hel zawh a nihin Arava (tuipuisuthlah) kuang nga te chu kuta keng khawmin thu chham tur awm chu chham chungin chhuat ah vawi nga vuak ṭhin a ni a, hei hi zawlnei pathum Khagai-a, Zkharia leh Malakhi-a te dan siam chhuah a ni a, Arava hian a entir naah tuina leh rim nei lo mahse, a hnah pianphung ah hmui anna a nei a, chu chu, kan zingah hian Torah leh P' thu zir lova i dan thu te hrelo te pawh an awm a, mahse, tunah hian an Torah zir theihna an ka te chu hrehawm tuar an ngam a ni, chuvangin ngaidamin thiam chantir ang che tih entir nan vawi nga chhuatah an vaw ṭhin a ni.

Categories: None

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

1 Comment

Reply Mamawiteipa
5:30 AM on October 14, 2011 
Hakhokma nge nge thu pawimawh tak tak mipuite hriat tur in rawn ti lang thin hi a lawmawm thin ngei mai.
Sum lam harsa tak tak hlawh kham manglo ;eh hnathawhna ten chawlh an pek loh te tan chuan hnathawh loh hi a har khawp thin a sin.Kut thla hnatawh tlem thla leh sum hman tam thla ani bawk si a.
Olam haze a hreawm bawk Olam haba chanpual nei lo bawk tur kan tam om ve le.