HAKHOKHMA Post Post New Entry

Yom Kippur - Tlanna ni ropui

Posted by Moshe Ilan on October 6, 2011 at 8:05 PM

יום כיפור

    Yom kipur chu Juda te kut zinga thianghlim  ber ani a, amaherawhchu, hemi ni bawhchhiat hi Shabat bawhchhiat aiin a nep zawk erawh a, he ni hi 'Tishrei' thla ni 10 ni a tla a ni , (Leveticus 16;29) "Tin , hei hi in kumkhaw dantur ani ang, thla sarihna , a ni 10 ni chuan in rilrute in tihrehawm ang a, .... hemi ni hian, Lalpa hmaah in sualna zawng zawng lak ata in thianghlim ang". Tih ziak angin.


   Erev Yom Kipur (Yom Kipur dawn ni) chuan 'Takhanun' te, 'Avinu Malkeinu' te sawi anih loh mai bak ah, 'Slikhot' pawh tawi tak sawi a ni a, Rorelna ni ropui leh rapthlak hmuak tur kan nie tih mai piah lamah he ni hi Kut ni hlimawm lo thleng tur ang maia lo inpuahchah ni ani thung a ni. Achhanchu, he ni lo thleng tur Yom Kipur hi kan sualna te ngaihdamna ni ropui anih vang a ni.


   He Yom Kipur dawn ni hian chaw puar taka hei hi Mitsvah (Thupek) a ni a, kan Khakhamim (Mifing) te chuan he Yom Kipur dawn ni (Tishrei ni 9) a chaw puar taka ei hi a ni 9na leh a ni 10 (Yom Kipur) ni a chaw nghei ang nihna ani an lo ti hial a ni. "Veinitem et nafshoteikhem ... betisha lakhodesh baerev" (in thlarau chu he thla ni kua ni tlai hian in tihrehawm tur a ni) tih ziak anih angin. A ni 10 niah ani lawm ni chaw chu nghei tur? Ni e, a ni 10 ni chawnghei thei tura a ni 9 nia chaw puar taka inpuahchah nana lo ei chu he chawnghei ni hian a phuar tel ta a ni.


   Yom Kipur ni chuan kawr var hak thin a ni a, hei hi Zawlnei lo sawi angin, "In sualna te chu Rose angin sen tawh mahse, vur angin a var leh ang, pangang hmul angin sen tawh mahse, lapua angin a var leh ang" tih a lo sawi ang khan.


   Yom Kipur dawn ni zingah chuan Rosh Hashana dawn ni a la ti ve lo te tan 'Hatarat Nedarim (Thutiam sutna) chu tih thin a ni .


   'Kapara' (Tlanna) tur atan Erev Yom Kipur ah emaw, ani hmain emaw mipa in Arpa, hmeichhia in Arnu , tin raipuar in Arpa leh Arnu hmanga 'Kapara' hi tih thin a ni a, tin, Ar hi avar anih theih chuan Sual tlanna rawng entir nan atha a, mahse, a awm miau loh chuan a rawng dang pawhin pawina a awm chuang lo a ni. Tin, Ar a awm loh chuan ran ei thiang dan Sangha ang te pawhin a tih theih thova, amaherawhchu, Beit Hamikdash (Temple) a an hman thin ang sa ang chuan tih loh tur a ni. Tin, pawisa pawhin a tih theih a, tichuan, chu 'Kapara' nana pawisa hman chu 'Tsedaka' (Rethei te tanpuina) atan pek tur a ni. Chutiangin, Sa a ti te pawhin an tihzawha talh a nih hnuah mi rethei te hnena pek thin a ni. He 'Kapara' hi Yom Kipur tawngtaina bu 'Makhzor' ah a awm a ni.


   He 'Kapara' Minhag (tih thin dan) hi kan Khakhamim te zingah dodal an awm a, chung zingah chuan Ramban pawh ani a, amaherawhchu, hei hi Israel te 'Minhag' hlui anih avangin, sut a ni lem lo a ni.


   'Minkha' (Chawhnu tawngtaina) chu hma taka neih thin a ni a, hei hi tlaia puar taka 'Seuda Hamafseket' engmah inbawhbuai tir lohva kan ei theih natur atan a tih a ni.  Minkha hi ni pangaia tawngtai thin ang ani a, mahse, 'Amidah' ah chuan 'Vidui' (sual puanna) chu sawi tel ani thung a ni.


    Minkha zawh hian 'Mikveh' (inchiah thinghlimna tui) ah inchiah thin a ni a, tichuan, kawr var hain 'Seuda Hamafseket' chu ei thin a ni a, hetah hian chaw pai nuam lam chu ei thin a ni.  'Seuda Hamafseket' hi ni tlak hma darkar chanve vel thlenga ei kham hman tur a ni a, tichuan, Beit Kneset ah ni tlak hmaa tawngtaina 'Tefilat Zakha' leh 'Kol Nidrei' chu ti hman tura kal tur a ni a, tin, Beit Kneset a kal hma hian Pa ber chuan a fate lu chunga amal mala a kut dinglam chu nghatin fate malsawmna 'Yevarekhekha...' chu a sawi tur a ni.


     Yom Kipur ni hian tih thianglo bik thenkhat a awm a, chungtechu; Ei leh in, insil leh inbual, hriak lam inhnawih, savun pheikhawk bun, nupatna hman te an ni.  Yom Kipur hian Rannung chunga nunrawnna lantir sualna lak ata kan him theih nan hemi ni hian Savun pheikhawk chu bun thiang lo a ni.


    Yom Kipur inkhawmna ahte hian mipa chuan Talit an sin vek a ni. Yom Kipur ah hian inkhawmna chi hrang hrang a awm a, chungte chu; Tefilat Zakha, Kol Nidrei, Arvit, Shakharit, Musaf, Minkha, Neila  te an ni. 

 

Categories: Taaniot, Chawnghei, Khagim, Kut ni te, Judaism

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments