HAKHOKHMA Post Post New Entry

Rosh Hashana mei chhit dan

Posted by Moshe Ilan on September 25, 2011 at 6:10 PM

איך מדליקים נרות חג ראש השנה

    Rosh Hashana chu kut ni anih avangin kut dang ang thovin mei chhit tur ani , amaherawhchu, Rosh Hashana chuan mei awmsa hmangin a lakkai theih thung a, chu chuan rawngte pawh a bawl theih a, tin, mei zu thin tan pawh an zuk duh chuan chuta tang chuan tankai tur a ni. Tin, he mei awmsa tih hi kut chhung zawng daih tur a nih avangin, 'Ner Neshama' bati lian chu thliin a chhem hlum lohna hmunah Erev Khag (kut dawn tlai) ni tlak hmain lo chhit lawk tur a ni a, tin, Shabat te leh kut mei chhit hi nuam taka inchhung tihenna tur leh chaw eina hmun en tu tur atana tih a nih angin, he mei hi chaweina dawhkan hnaia chhit tur a ni , tin, Shabat niah chuan mei chhit a thian loh avangin, a dawn tlai ni tlak hmain chhit thin a ni a, mahse, Rosh Hashana ah chuan mei awmsa atanga chhitkai chu thiang anih avangin ni tlak hma khera chhit a ngai lova, chuvangin, Kidush hma deuhin chhit tur a ni.


    Tin, Rosh Hashana chu Yom Khamishi (Ninga ni) a a intan chuan , Rosh Hashana chuan ni hnih awhin, Shabat ni nen ainzawm dawn a, chuvangin, kut ni atanga Shabat ni atan thil tih lawk thiang lo anih avangin (eitur rawngbawl tih chauh lo chu) Rosh Hashana luh hma Yom Revii (Nilai ni) tlaiah Shabat ni mei tur hi lo buatsaih lawk sa tur a ni.  (Nilai ni hian Shabat ni a hman tur Plata chu Rosh Hashana chhunga rawng bawlna tihbuai lohna hmun ah lo vuah lawk sa diam tur a ni).


   Mei hi chhungkaw nu berin a chhi tur a ni a, tin, chhungkaw zinga hmeichhe awm zawng zawngin chhi thin an awm bawk, tin, a chhit hma hian 'Brakha' (malsawmna) "Barukh ata....... ner shel yom tov" chu a sawi ang a, chumi hnuah thil thar neih 'Brakha' "Barukh ata..... Shehekheyanu vekimanu vehigianu lazman haze" chu a sawi bawk tur a ni. 'Shehekheyanu' hi atlangpuiin Sefardim ten an sawi ngai lova, achhanchu, 'Kidush' naah Pa berin a sawi tho avangin a ni.


   Tin, Rosh Hashana zan hnihnaah chuan he 'Brakha' "Shehekheyanu" hi mei chhi tu chuan a sawi tho tur a ni a, amaherawhchu, hetah hian ngaihdan inanlohna a awm a, chu chu, Rosh Hashana chu ni hnih hman ani naa, kut pakhat anih avangin sawi angai tawh lo tia hnialna a awm avang a ni. Engpawh nise, Halakha chuan sawi tho tur a ti a, chutiangin, Kidush hmangtu leh Shofar (Beram pa ki) ham tu pawhin an sawi tho tur a ni, mahse, a theih hram chuan "Shehekheyanu" an sawina chu 'Brakha levatala' (a loh thlawna Brakha sawi) anih loh nan kawr thar emaw an ha tur tih ani a, kawr thar nei lo pawhin, thei thar (thla khat chhunga ala ei ngai loh) a chhawp tel tur a ni tih a ni. Tin, kawr thar emaw, thei thar emaw a neih loh pawhin a sawi tho tur a ni.


   Tin, a chunga kan sawi Shabat mei (Yom Revii a kan lo buatsaih tawh ) khi Shabat luh hma, chu chu Yom Shishi (zirtawp ni) tlai ni tlak hma minute 20 velah mei awmsa (Ner neshama) atang khan a chhi tur a ni, 'Shehekheyanu' sawi tel tawh lovin.


   Tin, Rosh Hashana mei hi Ashkenazim tan Shabat nia an chhit dan ang lovin, 'Brakha' sawi hnua chhit chuah tur a ni. Shabat niah chuan chhit hnuah sawi tur.



Categories: Judaism, Halakhot, Juda dan

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments