Oops! This site has expired. If you are the site owner, please renew your premium subscription or contact support.

HAKHOKHMA Post Post New Entry

Parshat Ki Tetse

Posted by Moshe Ilan on September 8, 2011 at 5:10 PM

פרשת כי תצא  Parshat 'Ki Tetse'  (Deuteronomy 21;10 - 25;19 )


   "Ki Tetse lamilkhma al oiveikha, untano Hashem Elokeikha Beyadkha" (I hmelmate do tura i chhuah hun a, Lalpa i P' in i kuta a pek che a...)  tiin, kan Parasha chu a inṭan a, he thu hi chik taka kan thlir chuan Juda mitin te hnena a hrilh a ni tih kan hmu thei a, achhanchu, hetah hian mi pakhat hnena a hrilh angin, "i" tih ṭawngkam a rawn hmang a, chuti alo nih chuan, Juda mi zawng zawng te chu kan hmelma te kan do hunin kan pawimawh vek tihna alo nita a, hmelma ten Juda te min rawn do reng reng chuan kan thinlung chu kan tithuhmunin kan inpumkhat tir ṭhin tur ani a, Israel Lalte hunlai pawhin Akhav-a hunlai chuan, Israel mite chuan Lalpa dan dodalin milem an bia a, amaherawhchu, tuman Lal duhdan chu an hnial sak lova, an vaiin an inlungrual em em a, chu an inlungrualna avang chuan indona an hmachhawn reng rengin tuman an hneh thei lo a nih kha.

 

    Chuvangin, kan Khakhamim (Rabi fing) te chuan, "Tuman tunge ka nih a, enge ka nih? inti bik lovin, kan hmelma te chu a hring a hran emaw, hmuh theihloh hmelma 'thlemtu' (Yetser hara) te chu kan do dawn reng rengin kan thinlung kan insiamṭha hmasa ṭhin tur ani a, huai taka awm a, kan thinlung kan intihpumkhat phawt chuan, chu aia ralthuam duhawm leh ṭangkai hmantlak dang kan nei lo ani." an ti a ni.

   

   Tin, Rabi Menakhem Mendel mikotsek chuan , "I hmelma te do tura i chhuah hunin.." tih anih ang hian, kan hmelma te chu do turin phur tak leh huai taka awmin, min rawn do dawn tih kan hriat chuan, kut min rawn thlak hmasak phawt kan nghak tur a ni lova, chuvangin, kan hmelma te chu kan do chhuak hmasa tur a ni a, chutianga kan do ngamna kan lantir phawt chuan, "Lalpa i P' in i kutah a pe e.." tih ang khian, kan hmelma te chu kan hneh ṭhin dawn a ni. Hetiang ang chiah hian min thlemtu 'Yetser Hara' pawh chu, kan huang chhung dai thlen tir phak khawpin min rawn thlem dawn hunah kan rial tur a ni lova, chuvangin, kan hnen arawn thlen hma chuan kan lo do chhuak hmasa tur a ni a, chutiang chauh chuan min thlemtu Setana pawh chu kan hneh thei dawn  a ni. Chuti lova, min rawn khawih hun kan nghak phawt anih vaih chuan, hneh thei tur dinhmuna chan nan P' khawngaihna nasa tak kan dawn angai dawn a ni.

 

   (21;18) Fapa sual awmtha duh lo 'Ben Sorer Umore' (fapa, kawng ngil ata inla chhuak a, sualna kawng lama kal tlat mi leh, chutianga kal ve tura midang zirtirtu) chu a nu leh a pa ten Beit Din ah hruaiin a chungchang thu chu an thlen tur a ni a, he thuah hian anu leh apa te hian kawng dik, Torah dan hmanga enkawl an tum ngial hnuah chauh hetiang hian thu an thlen thei a, tin, anu emaw apa emaw zawk zawk hian he thu chungchangah hian duh lovin, an fapa sualna chu thi tura rel turin Beit Din ah chuan kal duh talo se, a pakhat zawk chauh , anu emaw apa emaw chauh thu hmang chuan naupang chungchang hi rel thiang a ni lova, amaherawhchu, a nu leh pa te chuan an fapa chu an hmangaih tak tak a nih chuan, chutiang anga sual kawng zawh duh tlat mi ani tih an hriat chuan Beit Din ah chuan Lunga denhlum turin an hruai ngei tur a ni

.

    He thu chungchangah hian hriatthiam har angin a lang a, amaherawhchu, naupang chuan a hun lo kal zel tura thil sual lian tham atih hmaa tuna "Zakai" (Olam Haba a chanvo nei tur)a a thih chu atan leh Israel te tan a tha zawk a, chuti lo chuan, tunah hian anu leh pa te hian lo khawngaihin lo hruai duh lo ta ang se, nakin hun lola kal zel turah Israel mi tam tak te sual kawng a zirtir theiin, Israel te zingah sualna tipungtu ah a chang thei a, tin Tual hial ala that thei a, chutiang anih vaih chuan, chu naupang chu "Khaiav" (Olam Haba a chanvo neilo) turin ala thih phah zawk dawn a, chuvangin, tuna thianghlim chunga mi dangte kut tuara a thih chu atan leh Israel te tan thil tha zawk a ni.


    Tin, kan Parasha a kan hmuh bawk, 'Mitsvat Shiluakh Haken' (Sava no awp lai apui hnawh bo thupek) ah hian, mi tam tak ten kan hriat sual fo chu, a no emaw atui lak hrim hrim tur emaw kan ti ṭhin a, hei hi a ni lova, a Mitsvah zawk tak chu, Ngilneihna lantirna chungchang a ni a, chumi awmzia chu, kha sava no kha kan la duh a nih chuan, apui hmuh laia kan lak sak chu a thianglo va, apui chuan kan la lai a hmuh chuan ala tu mihring chu a no chhuhlet turin a rawn tawng ngam dawn si lova, rilru na takin a no an laksak chu a en dawn a, chuvangin, Lalpa P' chuan afa Israel te tih atana mawi lo, chutianga nungcha te chunga rawng taka kan awm chu a phal lo a ni.


    He Mitsvah hi kan ti duh hrim hrim a nih chuan, a pui chu hnawh bova, chutah, a note emaw a tui emaw chu vawi khat chawikana dah let leh mai khan, khatia a pui hmuh loh laia kan tih khan Mitsvah hote anga lang si ropui tak lawmman ṭha tak damreina keng tel kan hlen tihna a ni.


   He Mitsvah ang lawmman keng tel (damreina) dang a awm leh a, chu chu, a ropuina tu'n min hrilh hma pawha Mihringte ngaiha Mitsvah ropui tak niawma lang , Thupek sawm zing hiala tel phak 'Mitsvat Kibud Av vaEm' (Pa leh nu te chawimawi leh zahna thupek) a awm leh a, amaherawhchu, Mitsvah zawng zinga ho ber anga lang, tuna kan zirlai mek 'Sava pui hnawh bo' thupek nen a lawmman a inang tih kan hmuh tur kherin 'Mitsvot' thupek dangte anglo takin a inziak lang a, hei hian, min zirtir a tum chu, Torah a kan hmuh 'Mitsvot' thupek hote hi an lawmman tur ken tel kan hre lova, chuvangin, eng anga Mitsvah tenau anga lang pawh nise, Mitsvah ropui tak anga kan ngaih ang thova zawm tur ani tih min zirtir a ni. 

 


Categories: None

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments