HAKHOKHMA Post Post New Entry

Birkat Hamazon

Posted by Moshe Ilan on August 18, 2011 at 10:10 PM

הלכות מים אחרונים ו"ברכת המזון"  Maim Akhronim leh Birkat Hamazon (Chaw ei kham lawmthu sawina) chungchang dan.   קשע"הסימן מד atanga zir chhuah.


1. Mitam tak ten he dan (Maim Akhronim) hi an la zam hle a, mahse, P' tih tu chuan a ti ngei tur a ni, tin, Rambam te, Hagra te, Zohar hakadosh leh Arizalte chuan he danah hian lakzam tur a awm lovin, tih ngei tur ani an ti a, abikin Israel ramah phei chuan tih ngei ngei tur a ni. Tin, miin chaw a ei khama a kut a sil thin phei chuan 'Maim Akhronim' chu a ti ngei tur ani tih a chiang hle bawk a ni.


2.Maim Akhronim tih nan hian kut zungtang hmawr chu a chang hnihna thlenga tuia leih huh tur a ni a.


3.Mihring kal thinna chhuat chungah a kut chu a leih huh tur ani lova, achhanchu  he tui hian 'Ruakh raa' (boruak/thlarau thalo) a ken tel vang a ni. Engemawno chhungah emaw dawhkan hnuai ah emaw a leih huh thei ang. Tichuan, a kut chu a hru fai anga, Birkat Hamazon (chaw eikham lawmthu sawina) chu a sawi ang.

   Hetia Maim Akhronim atih leh Birkat Hamazon a sawi inkarah hian engmah tawng chhuah thiang lo ani.


4.Dawhkan khuhna leh a chunga chhang ei bang chu Birkat Hamazon sawi lai hian lak kian tur a ni lova, hei hian a entir chu, P' atanga eitur kan dawn chu a hnianghnar in a chuang bang thlengin a awm a ni tih ani. Hei hi zawlnei Elisha hnen atanga zir chhuah ani. Tin, kan Brakha (Malsawmna) sawi chu thil ruak mai chunga sawi kan nih loh nan ani bawk a ni.

     Tin,Elisha chuan Ovadia nupui hnenah chuan "Inah enge i neih ?" tiin, azawt a, chu chu hnianghnar taka malsawmna a dawn na tur hnar anih angin, kan chaw ei zinga ropui ber Chhang chu hnianghnar taka kan malsawmna dawnna hnar anih theihna tur a entir bawk a ni.


5.Birkat Hamazon hi 'Khameshet Minei Dagan' (buh lam chi chi 5) atanga siam (chhangphut + tui + Shmarim) chhangthawp chu 'Kezait' (26gr) ei tlin chuan sawi tur a ni.


6.Birkat Hamazon sawi hma hian dawhkan atang chuan chemte chu lak bo emaw, khuh bo hmasak tur a ni, hei hi dawhkan chu 'Mizbeakh' (maicham) nena tehkhin anih vang a ni.

   "Lo tanif aleihem Barzel" (A chungah chuan thir i vei tur ani lo) tih ziak anih angin, Thir chuan nunna a pawt tawi a, 'Mizbeakh' chuan nunna a pawt sei thung ani, chuvangin, Dan ah chuan 'Nunna tisei tu chunga nunna ti tawi tu chu vei loh tur a ni'.   Chutiang ang chuan dawhkan pawh chuan mikhual thlena chaw ei pui anih in, kan sualna te chu ngaihdam sak niin kan nunna a pawh sei avangin 'Mizbeakh' nena tehkhin a lo nita a ni.


7.Birkat Hamazon chu thu chung chauhva sawi tur a ni a, a chhang ei lai chuan ama in chhung ah te chuan kal kual velin emaw, thu awn vel mahse, Birkat Hamazon chu tha taka thu chungin a sawi tur a ni. A sawi lai hian a taksa chunglam khuh kawr a ha ngei tur a niin, Kipah emaw, lukhum emawin a lu chu P' tihna entir nan a khum bawk tur a ni. Tichuan, P' tih leh hlau tak chungin a sawi anga, hetia a sawi lai hian thil dang engmah ati tur a ni lova, a Birkat Hamazon sawi lai bak chu engmah a sawi bawk tur a ni lo.


8.Chhang ei hnu atanga darkar khat leh a 'Khomesh' (1/5) thleng chuan Birkat Hamazon chu sawi hman tur a ni a, chu chu 70 minute thleng tihna ani, hemi hnu hi chuan, a sawi thiang tawh lo a ni.


9.A chhang eina hmun atang chuan Birkat Hamazon sawi lova  kalsan a ngaih chuan, a thlenna hmunah chuan Brakha sawi nawn lovin chhang dang ava ei leh anga, chutah chuan Birkat Hamazon chu a sawi thei ang. Chutah chuan chhang a hmuh loh chuan a ei na hmun ah khan Birkat Hamazon sawi tura a kir leh a ngai ani. Mahse, a kir leh hun chhung chuan a hun (70 minute) a ral hman dawn chuan, a awmna hmunah chuan a sawi mai tur a ni.


10.Shabat niah chuan 'Retse' chu a sawi tel tur a ni a, tin, Shabat chu Rosh Khodesh emaw, 'Khol Hamoed' anih bawk chuan, 'Retse' zawh ah hian 'Yale Veyavo' chu a sawi bawk tur a ni. Shabat hi a lal zawk avangin 'Retse'chu sawi hmasak tur a ni.


11.Mipa chuan 'Birkat Hamazon' chu a sawi tawh leh la sawi loh thu ah hre chiang lovin, lo hriat pawlh ta ang se, Torah atanga thupek anih avangin a sawi nawn leh tur a ni, mahse, hmeichhia chuan a sawi nawn leh kher tur a ni lo.

   Tin, a sawi lai chuan lo muthlu ta ang se, a sawi tawpna chin ahriat loh chuan a bul atangin a tan tha leh tur a ni.


12.Khanuka ah leh Purim ah chuan 'Yale Veyavo' chu a sawi tel tur a ni a, tin, Shakharit (zingtawngtai) na ah Musaf a sawi tel ni chuan 'Magdil' ai ah 'Migdol' tiin a sawi tur a ni.

    Tin, Birkat Hamazon kan sawi lai chuan kan zingah chuan Jentel mi an lo awm ve a nih chuan, "Otanu benei brit kulanu yakhad'' tiin a sawi tel tur a ni.


  

 

Categories: Halakhot, Juda dan, Kashrut, Judaism

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments