Oops! This site has expired. If you are the site owner, please renew your premium subscription or contact support.

HAKHOKHMA Post Post New Entry

Parshat Vaetkhanan

Posted by Moshe Ilan on August 11, 2011 at 7:40 PM

פרשת ואתחנן  (Dvarim / Deuteronomy 3;23 - 7;11)


       'Vaetkhanan' tih thumal hi a Gimatria (hawrawp tlukpui number zat) chu 515 ani a, heta tang hian Moshe Rabeinu chu ramtiam lut ve turin vawi 515 lai a tawngtai tih kan zirchhuak thei a, 'Vaetkhanan' tih hi 'Khanan' חנן tih thumal atanga lochhuak a ni a, chu chu 'phu lo chunga ngenna leh dilna' tihna ani a, Moshe Rabeinu chuan mihring dinhmuna ropuina sang chan theih tawk ang chu a chang kim tawh tih a inhre nachungin, a ram chhung chauhva zawm theih bik thupek ang te chu tihve a chak em em a, tin, a ram chhunga 'Beit Hamikdash' (Temple = Lebanon) te chu a hmuh ve a chak em avangin, athiamna zawng zawng te chu sawmkhawmin Lalpa P' hnenah 'Kise Hakavod' (a zahawmna lal thuthleng) thleng rawk chuan a dila, a maherawhchu, P' chuan 'Rav lekha' (I tan atam tawh lutuk) tiin a chhang anih kha, heta tang hian, kan tana ruat nilo chu dilin ngen ngen mah ila, pek leh chhanna hmuh theih anih loh zia kan zirchhuak thei a ni.


     Parshat 'Vaetkhanan' chu kum tinin Tisha Beav zawh Shabat hmasa ber ah chhiar ani thin a, he Shabat hi 'Shabat Nakhamu' tia koh ani a, Hamagid Rabi Israel Makoznits chuan a lehkhabu ziah 'Avodat Israel' ah heti hian a sawi a, "Halakha danah chuan Tisha Beav ni hian Torah zir chu thiang lo a ni a, ('Eikha' Jeremia tah hla leh Beit Hamikdash chhiatna thu vel tih chauh lo chu). Achhanchu, Torah zir chuan hlimna a thlen avangin a ni a, Tehilim (Sam) 19;9 'Lalpa thupek chu a dik a, thinlung a tihlim thin', tih ziak kan hmuh angin. Hemi ni Beit Hamikdash (Temple) tihchhiat ni, hnam pum lusun ni hian hlim chu thiang ani lova. Chuti anih avang chuan, he Parasha ah hian Tisha Beav nia hnam pumin Torah kan zir chawlh san a nihna ata a bul atanga tha thara kan zir tan lehna anih angin, kan Parasha chhung thu ah chuan Torah chu Israel hnam te hnena pek anih thu vel kan zir tan leh ta a ni". ati a.


     Chutiang chu kan Parasha awmdan alo nih avang chuan keini Israel hnam te chuan he Parasha chhung thu zul zui hian mitin te chuan mawhphurhna lain Torah chu kan Beit Hamikdash thianghlim tlukchhiat kan sunna avanga kan zir chawlhsan lailawkna chu abul atanga mitin ten kan thinlunga kan pawm a, kan lakluh leh a, kan intuaithar pui leh chu kan tihtur makmawh alo ni ta ani.


   Parshat Vaetkhanan ah hian Dvarim (Deut') 4;2 "Thu ka pek cheu hi in belhchhah tur ani lova, in hnawl then tur ani hek lo." tia Israel te hnena a thupek chu kan hmu a, chuti alo nih chuan Torah a thupek 613 te chu a zat ang chiah hi Israel te chuan kan pawmin kan zawm tur tihna ani a, tin, heng Torah thupek te hi Israel hnampum tana pek an nih avangin, mimalin , mi pakhat chuah tana zawm theih loh tam tak a awm narawh a, hetiangin; 'Nupui then tak neih kir lehna thupek' ang te chu nupui then lo te tana zawm theih ani lova, mahse, Israel hnam te chu pumkhat kan  nih angin, he dan 613 te hi mimal chauh tana pek ni lovin, hnampum tana zawm tura thupek kan ni tih hi kan hriatthiam angai ani.


   Amaherawhchu, Mitsvot (thupek) belhchhah leh tihkiam chungchang thuah hian, engvangin nge Lalpa P' rawng chu tha tak leh uar taka ka zawm theih nan inti firin ka tan thupek emaw dan emaw chu ka siam belh theih loh? engvangin nge 'in tikiam tur ani lo' ti chuahvin a ziah loh le? tiin kan zawt ani mai thei, hetiang hian Harav Yona Metsger שליט"א chuan entirna hmangin a sawifiah a; "Tum khat chu mifing phakar zet mai pakhat hian a thenawm pa hnenah kalin 'Thenawm pa, hei kan nu'n Cake siam  a tuma, a chawh natur fianpui kan lo nei hauh lo maia, chuvangin, in fianpui naran mai mai thinga siam pawh nise hawh turin min rawn tira' ati a, a thenawm pa chuan lo hawh tirin, a tukah chu mifing pa chuan fianpui leh fiante hi a rawn pe kir a, a thenawmpa chuan hei engti zia nge fiante hi le? tiin a lo zawt hu a, ani chuan, 'nizan khan fianpui hian fiante hi a hring a lawm mawle, chuvangin i ta ve ve an nih kha' tiin a chhang a, ani chuan, 'anih chuan le,' tiin ala ta a, ni dang lehah chuan mifing pa chuan a thenawmpa hnenah bawk chuan, 'Thenawmpa, hei Marak (Soup) siam kan tuma, mahse, a siamna tur bel kan lo nei hauh lo maia, khawngaiha in bel hman vak loh, bel naran mai mai min lo hawh tir teh khai' tiin, a dil leh, ani pawh chuan lo pe lehin, atukah mifing pa chuan belte nen hian a rawn pe kir leh ta a, ani chuan 'hei engtizia a belte nena i rawn kir mai le?' ti a lo zawtin, ani chuan 'nizan khan he i bel mi hawh tir hian belte hi a hring leh a lawm mawle, chuvangin i ta tho anih kha' tiin a chhang leh a, ani chuan,'i tih tlat chuan le' tiin , ala ve leh mai a, a hnu ni dang lehah chuan chu mifing pa bawk chu a thenawm pa hnena kal lehin, 'hei, thenawmpa tun Shabat chu khual zahawm kan thleng dawn a, Shabat mei chhit natur Candle stand mawi ve deuh min lo hawh tir leh teh khai, thenawm tha te tanpuina kan ngai anih hi maw', tiin a dil leh a, ani chuan, a rilruin 'ni va hmiang, ani thil hawh tir hi a hlawk awm riau mai, khawnge kan bati chhitna tha ber rangkachaka siam ngat hi hawh tir ila, a naute hrin leh tur pawh a man atam phian ang,' tiin, bati chhitna rangkachaka siam ngat chu a hawhtir leh ta mai a, tichuan, ni tam tak kal hnuah pawh mifing pa chuan a lo pekkir tak loh avangin, va zawt turin a thenawm mifing pa in lam chu ava pan taa,  'hei thenawm pa, eng tizia nge bati chhitna kha mi va pe  kir har ta ve?' tiin, ava zawt a, ani mifing pa chuan, 'a.. nia mawle, khatia kan hman hnu Shabat zawh zan khan kha bati chhitna kha a thi ta mai a lawm mawle' tiin, a lo chhang sam et a, a thenawmpa thinrim chuan, 'chutiang bati chhitna thil nunglo chu engtin nge a thih theih ang? rangkachaka siam ngat lehnghal, mi pe vat rawh' ati a, ani chuan, 'ni love, ahma zawng pawh a, fianpui te, bel te thilnunglo hovin fa an hrin theiha i ngaih chuan bati chhitna pawh chu thil nunglo ni mahse, a thih theih chu i ring ve ngei tur a ni, athi tlat ani.' tia hrilhfiahin, an inthathen ta ani.


     He thawnthu ang deuh hian, kan Torah a thupek te pawh chu, a nih dan tur leh keimahni duh thu vang mai mai a, kan duh lai lai kan ring mai emaw, kan belhchhah mai chuan, engtik hunah emaw chuan, paih then leh tihkiam hun pawh alo la thleng ngei dawn tihna ani a, chuvangin, thu petu Lalpa P' chuan chutiang hun tur chu min hriat sak avangin, "Belhchhah leh Tihkiam loh tur" thupek chu min lo siam sak ta a ni.


   Tin, kan Parasha, Dvarim (Deut') bung 4;27 naah hian Israel hnam te chu hnam tin zinga kan la darh tur zia leh, chu ramah te chuan Thing leh Lung a siam Pathian te kan la biak ve tur zia thu a inziak a, he thu hi a Hebrew chuan 'והפיץ' (Vehefits) tiin a intan a, he thumal atanga hawrawp zat chhiar chhoh hian a hawrawp 50 na chiah zel a hawrawpte lakchhuah remkhawm hian thil mak tak a chhuak a, chu chu 'Vehefits' tih laia ה (Hei) atanga chhiara chumi 50 na hawrawp chu lakchhuaha, chuta tang veka 50 dang chhiar lehin מכה (Mecca) tih alo chhuak ta a, chu chuan Muslim ho Lung rin Saudia Arabia a awm chu a lo sawi ta a, chutiangin, 'Vehefits' tih laia י (Yod) atanga hawrawp 50 na lakchhuah a, chuta tanga 50 dang chhiar chhoh leh chuan ישו (Yeshu/Isua) tih alo chhuak chiah ani, hei hian, a entir chu, kan kalbona ramah te chuan, Thing Kross (Christian) sakhua leh Lung ringtu Muslim sakhua te kan la zawm ve zia tur chu a lo hril tih kan hre thei ang, kan hriat theuh angin, keini Menashe fate pawh kan bona ramah chuan thluak suk sakin tihluihnaa Christian tir te kan nia, chutiangin, Afghanistan vela awm Taliban tuna Muslim sakhuaa awm mek   hote pawh an pi leh pute chu Juda te an ni tih chhuichhuah leh finfiah tawh an nih kha.


     Tin, Bung 4;15 naah chuan 'Pathian siam chawp a nu ang emaw, a pa ang emaw te chu kan tan kan siam thian lohna thupek kan hmu leh a, heta tang hian, kan tawngtai lai te emawin Lalpa P' ni awma kan riruat chu Putar hmuihmul var sei tak nei emaw ang ten kan ngaihtuah thiang lo ani tih kan zirchhuah leh thei a, chutiang anga kan ngaihtuahna thinlunga kan lo ngaihruat vaih chuan, kan tan Pathian pa (zakhar) ang kan insiam chawp tihna alo nih dawn avangin, thianglo a ni.  

 


    Tin, kan Parashaa , Davrim (Deut') bung 4;30 naah hian chutiang teh hrepa Pathian dang hial kan biak hnua thil sual nasa tak kan tih hnuah pawh kan inhmuhchhuah leh a, Lalpa lam kan hawi kir leh chuan Lalpa P' chuan min thlahthlam loh tur zia leh, min lo pawm leh tur zia a inziak bawk a, hei hi 'Tshuva' (Sual sima alama kir lehna) Mitsvah (thupek) chu ani.

 

   Tin, a bung (Dvarim / Deut') 5;23 naah chuan P' thupek leh a thuchhuak te chu a hlauhawmin a khirh zia avanga mipuite thlabarna avanga Israel mipui te ngei chuan an Rabi ropui Moshe-a hnenah chuan P' thu te hi nangman a hnenah zir la, tichuan, nangin kan hnenah hlanchhawngin min hrilh chhawng zawk rawh tiin, an ngen thu kan hmu a, chu chu Lalpa P' remtih zawng tak niin, P' ngei chuan bung 5;26 ah chuan chutiang ang an mahni dil ang ngei 'mipuite chuan an Rabi ten ka thupek an zir ang , mipuite hnena an hlanchhawn leh thin te' chu zawmin awm reng sela chuan, ka thupek Mitsvot te hi an zawm reng anga, an mahni leh an fate tan kumkhaw hmuingilna ni reng tur a le'. tia sawiin, (5;29) heng thupek te hi vei lam emaw, ding lamah emaw pen sana , mahni ngaih dan dana kal san a phal loh zia thupek te thlengin kan hmu thei a ni.

 

   Chutiangin a bung (Dvarim / Deut') 6;9 ah te chuan 'Mezuzah' chu Juda te hnenah kawngka bianga tar turin thupek kan hmu leh a, hei pawh hi Israel te hnena thupek 613 te zinga mi chu a ni , he Mitsvah hi a dan tur ang taka kan zawm ngei na turin amah Lalpa P' chuan min lo vaukhanin a (Dvarim - 6;10) Lalpa kan P' chuan 'kan pu Avrahama te, Itskhaka te, Yakova te hnena chhechhama pek atiam ram Israel ram, kan din ni hauh lo khaw ropui leh mawi tak tak te, kan tihkhah ni hauh lo thil tha tinrenga khat in te kan va luah ve a aram thiltha tinreng kan va tlan ve huna kan tlai hle hunah chuan kan intihtheih luat avanga heng a thupek Rabi ten an zira min lo hrilhchhawn ve leh thin ang te chu kan duh duh dana siksawia, ding lamah emaw vei lamah emaw kan lo kal pen puia, kan duh lai lai te chu belhchhahin Juda ni ve lote hnen thleng thlenga pek chhawn ve mai kan tum chuan, amah Lalpa kan P' ngei chuan (6;12) amah Lalpa P' chu kan la theihnghilh na tur kawng ani tih sawiin, (6;15) chutiang dinhmun a thlen vaih chuan a thikthu chhiatna chu kan chungah a rawn thlen anga, a thin thawk chuan leilung ata hi min tih boral mai a hlauhawm tak zet a ni.   

 

     Chuvangin kan Parasha (Dvarim - 6;25) a sawi angin, a thupek Mitsvot te hi anih dan tur anga a Torah zirtu Rabi te min hrilh anga fimkhur taka kan zawma kan pawm chuan kan tana damna ani ngei dawn a ni.


    Tin, Lalpa P' chuan Juda nilo hnam dangte nen chuan kan inkarah inhriathiamna neih hi a phal lova, kan Parasha a (Dvarim 7;2) kan hmuh angin, an lakah khawngaihna kan nei tur ani lova, chutiangin an ni te nen chuan thu kan thlun pawh chu a phal lohna thupek chu chiang takin kan hmu bawk a ni. Keini chu amah Lalpa P' hnam thlan kan ni a, (Dvarim 7;7) an ni Juda nilo te nen hian engmah inkungkaihna nei lo tura tihhran kan ni a ni, chuvangin, kan Parasha kharnaa a sawi angin, Lalpa P' chuan kan laka a duh zawng chu  a thupek te, a dan te leh a rorel te chu zawma pawm tlat turin ami Israel te chu a duh a ni.  

 


Categories: Judaism

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments