HAKHOKHMA Post Post New Entry

Zawlnei te thusawi a thleng kim tawh em?

Posted by Emuna on July 11, 2011 at 10:00 AM

         Kristian mithiam ten heng thilte hi min hnial nan an hmang fo thin bawk, hetiangin, "Zawlneite thu sawi hi kan endik vek a, tuna in awm mekna, Roman hovin sala an dah tak na che u sawina lam thil reng reng hi a sawi that hlena emaw zawlneite hrilhlawkna emaw ah keini chuan kan hmu lo a ni. Zawlnei zawng zawng chuan Medes leh Persian sawrkarin Babulon an hneh a sala an man thu chauh an sawi a, nangni tuna in saltanna leh chumi a chhanchhuah in nih thu emaw Rome Sawrkar tluk chhiatna chungchang thu hi Ziak thianghlim te hian an vawng lo a ni. Tichuan Messiah miruat chu a la lo thleng lo tih thu emaw nakin engtik hunah emaw a lo thleng dawn tih eng kawngin nge hriat theih a nih ang - Zawlneite hnathawh dan ah thutiam zawng zawng record-in a awm a chungte chu Tempul pahnihna hun laia thleng kim tawh a ni bawk si a, chu chu Mathaia 11:12-in a lo sawi thawi chiah hi a ni, heti hian, "Zawlnei zawng zawngte leh Johana (Baptistu) lo awm thleng khan dan hrilhlawknate chu lo awm tawh a ni," tiin.


 

 

            Heti hian chhanna ka pe a :   Tun dinhmunah sal/bawih nihna leh chuta ta chhanchhuahna etc.,chungchang zawlneite thuziakah in hmu lo hi thil maka ngaih tur a ni lo ve, heti hian Sam 147:19,20 ah a inziak asin " A thu chu Jakoba hnenah a puang a, A thu ruatte leh A rorelte chu Israel chungah, hnam dang lakah reng reng a thlunpui ve lo va, an hnenah A rorelna a tilang bawk hek lo," tiin. A hmasain hnawhdarha kan awmna leh ram pawna hnawhdarha kan awmna dinhmun mak tak - tihtiau dinhmun, dangdai chungchang hrilhfiahna langsar pui pui te hi ka han entir teh ang che u, lei killia thehdarh zawh vek tawng ve hnamdang hrim hrim an awm ve emaw chu?


 

 

            A pahnihnaah chuan chatlaklova he bawia kan tanna vawiin leh ni hnuhnung thleng tura vuah ngheh hrilhlawkte leh, bawih ata tlanchhuaha kan awm leh tur chungchang hrilhlawkna te leh ziak thianghlim ziaktute atangin, tlanchhuah kan nih tur thu leh Roman tlukchhiatna chungchang leh thil ti thei dang dang chak pui pui te, Israel hnena Lalram pekkir lehna tura Israelte tana thawhpui tlak tawh loh turte chungchang sawina tam tak ka rawn chhawp chhuak dawn a ni. A hun taka lo thleng mai tur, la thleng famkim si lo hrilhlawkna dang tam tak a awm asin.

 

 

            Sal nihna chungchang te chu tunah tarlang tan ila : hetiang hian : Rome ho avanga sal nihna chu dan bu (Deut. 28:64) ah kan chhiar a, hetiangin : " Tin, Lalpa chuan hnam zawng zawng zingah a hnawt darh ang che u a, lei tawp atanga a tawp lehlam thlengin," tiin, Roman ho laka saltannaah chuan Judate, chu an Temple chawpin (Temple pahnihna) thehdarh leh hnawhdarhin ram hrang hrangah an awm a, tichuan Roman hovin an nei vek a ni. Hnam hrang hrang mipuite an vaikhawm a, Jerusalem chu an hual ta a ni, Juda mihuaisen pui pui te avangin an rawn kal pah mai thei bik lova. Temple hmasa zawk chhiat tum kha chu hetiang hi a ni ve lo, Judate chu an la tlemin an la dawrawm rih em em a, Babulon ho pawhin ram dang ruai lovin Juda te chu an titlem theiin salah an hruai thei a; tichuan Babel-ah hruai luihin an awm ta hram a ni, (Chronicle pahnihna tawp lam 26:20) hi chhiar ila, "Tin, khandaih pumpelhte zawng chu amah leh a fapa te chhiahhlawh atan Persia lalramin a rawn awp thlengin Babulonah a hruai thla ta hlawm a," tiin. Chutiangin Ezra (2:1) ah hetiang hi kan hmu leh a ni, "Tunah chuan Judai rama mi sala hruai, Babulon lal Nebukadnezzaran Babulona a hruai, Jerusalem leh Judai rama kir leh mahni khawlam theuhva haw te chu heng te hi an ni..." tiin. Tin, zawlnei  pangngai bawkin a sawi (1:11) hi chhiar leh ila, " Rangkachak leh Silver bungbel zawng zawng chu 5400 a ni, Salte chu Babulon ata Jerusalema an hruai chhoh lai khan Shebazaran heng zawng zawng hi a keng chho a ni", tiin. Heng Pathian thu atang hian Israelte chu Babulon-ah chauh vahvaihtir leh chuta tang chauh chuan an lo kir leh a ni tih in hmu a ni. Chutichuan Deut. (30:3) kan chhiar hunah chuan Babel Saltannaah kan puh thei lova Rome-ah chauh a ni thung a ni.


 

 

            Hei bakah Ezekielan (22:15) ah ti hian a rawn sawi ve leh a, "Tin, hnam zingah chuan ka tidarh ang chia, ram tinah ka ti taitam ang che, nangmah atangin i bawlhhlawhnate ka tiral vek ang," tiin. He saltanna hnuhnung ber viz., Roman Saltanna lo chu midang lakah reng reng kan bel thei lo a ni. Babulon saltannah chuan an bawlhhlawhna an lakah hlihkian a ni lo a ni.


 

 

            Hei bakah Ezekielan (22:15) ah ti hian a rawn sawi  veleh a. "Tin, hnam zingah chuan ka tidarh ang chia, ram tinah ka ti taitam ang che, nangmah atangin i bawlhhlawhnate ka tiral vek ang." tiin. He saltanna hnuhnung ber - Roman Saltanna lo chu midang lakah reng reng kan bel thei lo a ni. Babulon an rawn chhuahsanna Ram Thianghlim an rawn thlen khan, an zinga mi thenkhatin ringlo mi nupuiah te an hawn a, khangho khan Shabbath-te an bawhchhiat mai bakah sualna thil tam tak an ti zui nghal a, chutianga an sualna tam tak avang chuan saltan khurah bawk an lut leh a ni. Tah Hla (4:22) en rawh," tiin. Amosa (1:6) pawh hi chhiar rawh, "LALPA chuan heti hian a ti "Gaza bawhchhiatna pathum avangin, a ni, pali avangin, a hremna chu ka tireh lovang, a chhan chu saltang chu Edom thlengin sal tanna pumpuiah an hruaibo avangin etc. "Tin, bung thuhmunah bawk (chang 9) ah, "LALPAN heti hian a ti. Tura khaw bawhchhiatna pathum avangin, a ni, pali avangin, a hremna chu ka tireh lovang, Edom ho hneha mi zawng zawng chu an pek a, inunauna thuthlung chu an hriat reng loh avangin," tiin.


 

 

            Heng hrilhlawknate hi hun lo thleng tur :  Temple pahnihna chhiat turte, Roman General Titus-a bawi ata tlanchhuak a, Philistine leh Tyre, Ram Thianghlim thenawmte rama tlanchhiate chu Edom ho kutah manin an awm tho tho va, chung chu Titus-a leh a sipaite tho an nih chu; Nazarin hnam te, leh an lua an hman Roman hote chu Pathian thubuah hian Edom neitu dinhmuna dah vek an ni (emaw) Edom fanu ti tein, chutiang tiatin Islam sakhuaa insaphun pawh Hebraite chuan Ismael ho tiin an ko a ni, a chhan chu Ismaela thlah anga ngaih an nih avangin.


 

 

            Tunah Zawlnei (Amos 1:9) in saltang ho pumpui chungchang a sawi tak awmzia chu, Roman ho nghawngkawl hnuaia kun lova tlanbo leh vakvai dang tumah a bang an awm loh thu leh, chutiang ni lo thung, Babulon saltan tum erawh kha chuan Kaldai ram ropuina leh san berna hnuaia tlawmduh lo a bang la awm tam tak an awm thung a chungte chuan Aigupta an pan ta a ni. Pathian Lehkhabuin (Jeremia 63: 7;43:7) ah a lo hriattir tawh ang khan. Tichuan, Aiguptaah chuan an chhuak ta a, LALPA thu chu an zawm ta si lova." tiin. Amosa pawhin a lo sawi chhuah tawh angin, "Tin, inunauna thu thuthlung chu an hre reng ta lo a ni," tiin. A sawi thawi chu Tyra lal Hiram, leh Lal Solomon, te inkara thuthlung kha a ni; Pathian lehkhabu pawhin a lo sawi reng a, "Thuthlung chu an siam dun a, tichuan, unau ang diakin an inko tawn a," tiin (I Lalte 9:13)

 

 

            Tunah chuan he saltanna daih rei tak kan chhunzawm zel chungchangah Pathian lehkhabu kan rawn chho zel ang a; buaina leh tawrhna ni leh thla leh kum tam tak  kan tawrh liam hnuah ni hnuhnungah chuan LALPAN min khawngaih tha leh dawn a ni tih kan la hre dawn a ni; tin kan chhanchhuahna chu tihkawhtlaiin awm mahse LALPA chuan kan pate laka a thuthlun leh a thutiam leh a chhechhamte chu a theihnghilh mai mai dawn lo a ni tih hi hriatchiantir kan ni dawn a ni. Deut. 4:30,31 hi en teh khai.


 

 

            "Hrehawma in awm a, in chunga chung thil zawng zawng chu a lo thlen hunah, a tawp a tawpah LALPA in Pathian lam in hawi leh ang a, a thu chu in awih tawh ang a. LALPA in Pathian chu zahngai thei tak Pathian a ni si a; a thlahthlam lo vang che u a, a tiboral lo vang che u a, in pi leh pute hnena chhechhama a thuthlun chu a theihnghilh hek lo vang," tih hi. Hoshea 3:4 han keu leh ila, "Israel fate chu lal nei lovin ni tam tak an awm ang a, tin, hotu (milem) leh puithiam awm bel leh milem (Teraphim) emaw nei lovin an awm dawn si a. Chumi hunah chuan Israel thlahte chu an lamlet anga, LALPA leh a thatna chu khur chungin an pan ang," tiin. He hrilhlawkna hian tuna kan vahdarhna (exile) mek hi a tarlan chu a ni, lal kan nei lova, Israelah milian mi lal kan nei lo, Jentailte mitmei venna hnuaiah kan la khawsa a nih hi. Pathian hnenah inthawina kan hlan thei lo va, Israelah milian, mi lal kan nei lo, Jentailte mitmei venna hnuaiah kan la khawsa a nih hi. Pathian hnenah inthawina kan hlan thei lo va Urim leh Thumim hmanga thu hriattirna (Information) kan dawng thei tawh lo va, Teraphim Pathian lem biakrawnna dik lo, milem beho aiaawhtu hun lo thleng tur puang ve thintu pawh a awm tawh hek lo. Israel chu tun thlengin saltannaah a awm si a, zawlnei chuan engnge a sawi, "Chung hnuah chuan Israel chu a kir leh ang" a ti a, hei hian Israel fate chu sima an lo kir leh hun leh an LALPA Pathian leh an lal Davida an zawn tak tak hun, chhandamna lo thlen dawn hun a rawn tihlanna a ni a, an tawngchhuah thut thutnaah pawi an la ti dawn si a. (I Lalte 12:16), "Davida-ah hian engnge chanvo kan neih le? Jessaia fapaah chuan roluah tur kan nei hek lo". Davida lal ram phatsantu chu, LALPA ngei laka hel hmang ang tluka sualnaa ngaih a ni. Amah LALPA chu Davida leh a thlah hnena chatuan lalram petu a ni si a.


 

 

            Chhandamna hunah chuan Jeremia thusawi (Jer. 30:9) "LALPA an Pathian leh an lal Davida, an tana ka tundin tur rawng chu an bawl tawh ang." tih thu hi a takin a lo thleng kim tawh ang. Chubakah dan buah Roman ho sala an tanna (Deut. 30:3 en rawh) ata tlanna chu Zawlneite bung leh chang tam takah sawithawina kan hmu a ni; "LALPA  in  Pathianin in sal nihna a tibo vang a, a khawngaih ang che u a, LALPA in Pathianin hnam tin zinga a tihdarhna che u ata a hruaikhawm leh ang che u," tiin chang linaah, "In zinga mi van tawp thleng a hnawhchhuah an awm chuan kei LALPA in Pathian hian chuta ta chu ka hruai khawm ang che u, chuta ta chu ka la ang che u," (Chang 5-na) "Tin LALPA in Pathianin in pi leh puten an luah ramah khan a hruai lut leh ang che u a, in luah ang a, ani chuan a tihmuingil ang che u, in pi leh pute khumin a tipung ang che u," (Chang 6-ah) "Tin, in nun theihna tura LALPA in Pathian chu in thinlung zawng zawng leh in rilru zawng zawnga in hmangaih theihna turin LALPA in Pathianin in thinlung leh in thlahte thinlung serh a tan sak ang che u." Juda leh Benjamin hnam Babulon ata an lo kir lehna khan heng bung leh changte hi an la thlen dik tir hauh lo a ni. A lo kir lehte tam lam pawh Ezra bung hnihnain a sawi angin mi 42,360 lek an nih kha. A tam zawkte chu Babulon-ah an awm duh zawk a an awm ta zel a ni, Jerusalemah kir leh an duh tawh loh avangin". Chuvangin engtinge ni thutiam chu a lo thleng ta e kan tih mai theih ang ni, heti hian thu chu puan a ni si a, "An zinga mi tupawh van tawp thlenga hnawh chhuah an awm chuan - kei LALPA in Pathian hian chuta ta chu ka hruaikhawm ang che u a, chuta ta chu ka la ang che u," tiin.


 

 

            Tempul pahnihna hun chhung zawngah pawh, Ram thianghlim kan la awm ho lai pawh khan LALPA chuan kan pi leh pute aiin min ti thain min tipung chuang lo va ni - thutiam chu a thleng kim ta tiin engtinnge tan khawh theihna a awm le? Tempul pahnihna a din lai zawng khan manganna leh buaina te'n min chenchilh reng a nih kha. Daniela 9:25 en rawh, "Tin, hapta sawm ruk leh pahnih hnuah chuan kawtthler (Jerusalem) chu sak that leh a ni ang,a bang te nen hun buaithlak tak karah pawh," Isaia hrilhlawkna pawh hi en rawh (Isa. 43:5) "Hlau suh, i hnenah ka awm si a; Khawchhak lam atangin i thlahte chu ka rawn hruai ang a, khawthlang lam atangin ka rawn khawm chho bawk ang."  (chang 6-na) "Hmar lam hnenah chuan chhuah tawh rawh ka ti ang a, tin, chhim lam hnenah chuan hreng reng suh ka ti ang. Ka fanute chu lei tawp atangin rawn hruai rawh u," tiin. Tin, (11:12) ah, "Tin, hnamte tan chhinchhiahna puan zar a tar chhuak ang a, Israel hnawhchhuaha awmte chu a khawm ang a, lei killi ata Judah, hnawdarha awmte chu a fawmkhawm ang," tiin. Ezekiela hrilhlawkna 39:28 hi en rawh, "Nimahsela anmahni chu an ram ngeiah ka hruai khawm ang, an zinga pakhatmah hnutchhiahin an awm tawh lo vang." (a bik deuhvin hmelma ram chhungah).


 

 

                        Babulon Zion saltangte, Jerusalem pana chhuah zalen takna kha khi intiamkamna sawifiah khian a keng tel ve lo a ni, lei killi ah tihdarh vekin Babulon sal tan hnuah pawh an awm chuang lo a nih  kha. Chuvangin, engtinnge "Israel hnawhdarha awm chu a hruaikhawm leh ang a; Judah lei killi a hnawhdarha awmte chu a hruaikhawm leh ang."  tih thutiamte hi a thleng kim ta kan tih theih mai ni?"

 

 

            A hmalama kan tarlan tawh ang khan, Babulon salah khan mi tam tak kir leh duh lo va awm hlen ta kha an awm a ni kan tih tawh kha; hrilhlawknain "An zinga pakhatmah ka hnutchhiah tawh lo vang," tia sawi na na na hengte hi kan tihlamzuih mai dawn em ni? Entir tur dang kan la nei zel a, Tempul pahnihna sak lai khan Isaia 60:10 thu keng tel hrilhlawkna la thleng kim lo a awm a ni, hetiangin, "Ramdang mi fapate chuan i kulh bangte chu an rem chho leh ang a, an lalte pawhin i rawng an bawl tawh ang," tih thu te hi. Khang hunlaite kha chuan ringlo mite khan Judate chu an nuihzabur a hetiang hian an tawng thin, (Nehemia 4:2), "Heng, Juda mi chhia tha ho/awng rawp te te hian eng emaw an tih ve le?" tiin. Tin, Judate kulhbang sak laite chu an tihkhaihlak sak fo thin a ni, chubakah Bible chang chuan, "Tin, lalte chuan i rawng an la bawl ang," tih thu hi, khatih laite kha chuan a la thleng kim lo tih a chiang hle.


 

 

            Ezra 9:9-ah "Bawi kan ni naa, kan Pathian chuan saltannaah pawh min la kalsan lova, Persia lal mithmuhah pawh, kan lakah hian A zahngaihna ban a la phar reng a ni." tih thute hi kan chhiar si a. Nehemia 9:36-ah hetiang thu hi kan hmu leh a, "Ngai teh, tunah chuan mi fa (chhiahhlawh) kan ni ta mai a, ram, a chhunga thil rah leh thil tha kan pi leh pute ei atan i pek lah chu, ngai teh chutah chuan chhiahhlawhte kan ni ta mai a." tiin. (chang 37) ah "Tin, kan sual avangin kan chunga lal atana i ruatte lah chuan an neihnun phah a, kan taksa chungah leh kan rante chungah lam pawh, an duh duhin thu an nei a, kan mangang em em mai a ni." Isaia 60:11 pawh hi chhiar zel ila, "Chutichuan i kawngkharte chu hawnin a awm reng tawh ang, a chhun a zanin an khar lo vang." tihte hi. He hrillawkna hi Tempul pahnihna hunlai khan a lo la thleng kim hauh lo mai le. Nehemia 7:3-ah "Tin an hnenah thu ka sawi a, ni chu a sat lai chhung chuan Jerusalem kawngkharte chu hawn loh tur a ni," tiin kan hmu a ni. etc. Heng atang hian heng thutiamte leh a chhaka tarlan intiamna (assurances) te khi Tempul pahnihna hunlai chuan a taka a la thlen loh zia leh kan sawi tawh anga thil a letling zawnga a la thlen zel ziate i hnialin ngaihdan (emaw) thutlukna i siam thei tawh ang chu maw. Chutichuan heng hrilhlawkna leh thutiamte baka, heta tarlan loh thu dang tam takte chuan tuna kan awmna mek bawi nihna atanga min tlanchhuahna tur hi an sawi vek a ni tih rinnghehna point chu kan thleng ngei tawh tur a ni.


 

 

            Tunah chuan Jentail hnam leh ram la tlukchhiat tur hrilhlawkna chu i chai chho dawn teh ang le : Hei hi kan beisei Messiah hun leh Lalramah a lo thleng dik dawn a ni. A hun (period) thuah chuan Numbers 24:17 kan chhiar ang, heti hian, "Ani chu ka hmu a, tuna lo thleng tur ni rih lovin, ka thlir a, hnaite ami ang ni rih lovin, Jakoba atangin arsi a lo chhuak ang a, Israel atangin lal tiang a lo chhuak ang a, Moab ram kilkhawr a chhun tlang anga, Seth-a fate zawng zawng a nuai sawm ang" tiin. A ropuina leh enna ten van arsite an dungthultir thin Lal Messia varparh arsi chuan he hrilhlawkna dungzui hian Seth-a fate zawng zawng ama power hnuaiah a tuklut vek dawn a ni. Tin, chutiang Ama hun hmalam zawnga la hlen ngai loh huaisenna thiltihin hna a rawn thawk tawh ang.


 

 

            A chhaka Numbers bung leh changin a lo sawi lawk hnehna chu he lalin thiltih ropui tak a rawn neih tur hi refer theih a ni ta, hetiangin, "Edom chu rochun ram a lo ni ta a,Seir chu a hmelmate thilneih a lo ni tawh ang a, Israel chuan mi huaisente thiltih ang a ti tawh ang a; tin Jakoba thlah tuchhuan chuan ro a rel ang; tin, (hmelma) khawpui atanga pumpelh chu a boral ang." Isaia, Obadia, leh zawlnei dang dangte bu-a Edom chungchang hrilhlawkna record-a awm thliahthluah hi kan dan bu chuan ROME hi a thawithama a sawina zel angin, a hrilhfiah a ni, a chhan chu Tempul pahnihna tihchhiat a nih hunlai khan Rome chu Judate leh an sakhua tiduhdahtu kawlhsen ber leh tlawn theih loh hmelma an nihzia lantir a lo ni tawh a ni.


 

 

            Hemi hian hnuhma a siam chu, Isaian a lo sawi a 34:8-ah "Lalpa phuba lak ni a ni tawh si a, Zion hnialna kawng thua thungrulhna kum chu," tiin. Zion dotute sual thiltih reng reng chuan anmahni chu a hu tawk hremnain a la tlawh ve ang a, mi nunrawngte tlakchhiatna chu  mihring dikna zalenna chuan a la thlentir let ve ang. Heng avang hian Isaia chuan heti hian a lo sawi reng a, "Tin, Lalpa tlante chu an kir leh ang a, lawmna nen Zion an lut anga, chatuana lawmna chu an lu chungah a awm tawh ang a, tin, hnehtute lawmna chuan an hnen a thleng ang a, lungngaihna leh buainate chu an lakah hla takah an thlawk bo tawh ang." tiin. Jeremia tah hlaa thlamuanna thutiam Jer 4:22 hi hriatchian a ni tawh ang. "Aw Zion fanu, i khawlohna hremna chu a kim ta e, salah a hreng tawh lovang che; Aw, Edom i sualna chu saruak leh hmuh theihin a rawn siam ang," tiin. Isaia 66:20 dungzuiin Jentail te'n Judate lakah hmangaihna an lantir tawh ang, hetiangin, "Lalpa hnena thil hlan angin Jentail hnam tin reng zing ata in unaute zawng zawng sakawr chungah te... ka tlang thianghlim Jerusalemah chuan an rawn hruai ang." tiin. Joela pawhin heti hian a sawi a, "Aigupta chu tihtiauvin a awm ang a, Edom (Roman) chu thlaler ruak rum vung vung anga siam a ni ang, Juda fate chunga tharum (violence) a thawh avangin, leh an rama pawi sawi ve lote thisen an chhuah avang khan. Nimahsela, Juda chu chhuan khat atanga chhuan dang thlengin a awm ang." tih thute hi a ngial a nganin a la thleng dawn a ni.


 

 

            Thil chu a nihna ang chiahin Edom tih chu Rome tihna a nih thu kan lo sawi ta a, kan hre ta a ni, tichuan thudik tak chu keng kawhin Aigupta (Hebrew; mitzraim) hming awmzia chu Mohammedan chakna nghawng kawl rit tak tihna angin kan ngai ngei ngei tur a ni ta.


 

 

            Ishmael (emaw Muslim) ho chuan an inthlahchhawn dan an chhuiiin Hagari "Mitzrith" emaw Aigupta-mi-bawinu-ah an inchhui lut a ni a, tichuan Zawlneite chuan Mitzraim (Aigupta mi) an lo ti ta a ni.

 

 

 

            Zawlnei hian Israel chhungkaw pumpui aiin Juda fate a sawi bikna hi a chhan fel tak a nei a. Hnam sawmte paih chhuah an lo nih takah chuan hnam thliar bik leh lar zawk angin Juda hnam chu lakluh a ni ta a, chu chuan Israel hnam pumhlum hi an huamtir ta a ni. Chutiang chuan a ni zawlnei hian "Tin, Juda chu chutah chuan a awm reng ang a, Jerusalem chu chhuan khat atanga chhuan dang dang thlengin etc." a lo tih ni. Obadia chuan chiang takin a lo hrilhlawk tawh a ‘Israel zawng zawng (Juda chauh ni lo) in hnehna famkim an chang ang' a lo ti a. Heti hian a ti a ni, "Tin, Jakoba chhungkua chu mei ang an ni ang a Josefa chhungkua chu mei alh ang an ni ang a, Esauva chhungkua chu buhpawl ang an ni ang" etc tiin. Tichuan a hnuaia tawngkam hmang hian a tlang a kawm ta a ni." Chhandamtu chu Zion tlangah a chho vang a, Esauva tlang rorel sak turin, tin ram chu LALPA ta a ni tawh ang." tiin.


 

 

            Tunah, a fiahna a tan, Messiah beiseiawm tak hun laia lo thleng tur, tuna la thleng si lo deuh te chu a tahtawlin i lo thlir nawn teh ang u.


 

            I.          Juda chhungkaw lal pakhat awpna hnuaiah hnam sawm bo ta hruai khawmna leh Judah leh Benjamin hnamte nena insuihkhawm lehna a lo awm ang. (Ezek. 37:16 en rawh ) "Aw mihring fapa, tiang pakhat la la, a chungah chuan, ‘Judah leh Israel tan," tih ziak rawh etc."


 

            2.         Gog leh Magog lo ding chhuak lehin, Israel ram huang chhung an dai luh tur thu ( Ezek. 38 leh 39;Zakaria 14:12 en rawh ) sipai rual rawn thawntu hnam zawng zawng chunga hripui leng tur chu hei hi a ni," etc.


 

            3.         "Olive tlang chu a lo phel ang ( Zak.14:4 en rawh), "Chumi ni chuan Jerusalem rawn chhawntu Olive tlangah chuan A ke a rawn nghat ang a, tichuan, Olive tlang chu a chhak lam leh thlang lam inrina lai takah a lo phel ang, ruam nasa tak zau tak awm theihna turin etc.


 

            4.         Aigupta lui chu a lo inthen darh ang, tin Judah darha awmte hruaikhawm leh hmain an kang chat vek ang (Isaia 11:15, 16 en rawh)


 

            5.         Ezekiel 47, "Tichuan, in pui kawngkhar hnuai atang chuan, chhak lam hawiin tui a lo luang chhuak a, tin lui kamahte chuan sa leh buhchangrum lo chhuah nan thing tinreng an ngir khup ang a, an hnah pawh an uai lovang a an rah pawh chu ei zawh sen an ni lo vang a, a thla kipin rah thar a chhuah zel ang. A chhan chu a chawmtu tuite hi hmun thianghlim atanga lo put chhuak an ni a, chuta a rah chu sa (meat) a ni ang a, tin, a hnah pawh damdawi atan a ni ang." chang 1 leh 12 hi en rawh, Zekaria, 14:8, "Tin, heti hi a ni ang a, chumi ni chuan Jerusalem atangin tui nung a lo chhuak ang a, a chanve a hmasa tui puiah a chanve a hnung lam tuipuiah, nipuiah leh thlasikah pawh chuti chu a ni ang." Joela 3:18, chuan heti hian min hrilh a. "Tin, chumi ni chuan heti hi a ni ang a, tlang liante chuan Uain thar an fartir ang a, tlang te te chuan hnute tui an chhuah ang a, tin, lui zawng zawng (Juda rama mite) chuan tui an chhuahtir tawh ang, tin, LALPA in pui atangin tuikhur a lo luang chhuak ang a, Shittim ruam a fan chhuak ang," tiin.


 

            6.         Jentail Judaism-a insaphunte chuan Zakaria 8:23 en la "Judate hnenah, ‘i hnenah kan kal ve dawn, i hnenah Pathian a awm tih kan hre si a' an la ti dawn a ni."


 

            7.         Hnam tin reng ata a bang la awm, hmun thianghlim kumtin rawn tlawhte chu "Lalber, sipaihote LALPA hmaa kun turte an ni tawh ang," Zak 14:17


 

            8.         Sabbath leh thla thar Pathian mi (Israel) te serh lai hi Jentail zawng zawng te serh leh sang a ni ve tawh ang (Isaia Lehkhabu tawp lam chang 23 en rawh)


 

            9.         Milem biakna tih chereu vekna. Isaia 2:13, en la, "Tin milem/milim te chu a nuai sawm vek ang," tin bung 47:17 ah, "An hawikir ang a, milem ringtute chu zahnain an khat ang, milim hnena pathiante in ni e ti thintute ngei chu!" Sam 97:7 pawh chhiar la.


 

            10.        Pumkhat rinna chuan khawvel pum hi a ngam vek tawh ang. Isaia 48 en rawh, "Keimah ngeiin chhia ka chham hi LALPAN a ti, felna chu ka ka ata a lo chhuak a, thu chu a thlawnin a kir leh lo, chung chu ka hnenah khup tinreng a thlep ang a, ka hmingin lei tinreng chhechhamin a inpuang ang." tih hi Zak. 14:9. "Tin, LALPA chu lei pumpuiah LALBER a ni ang a, chumi ni chuan Lalpa chu pakhat a ni ang a, a hming pawh Pakhat a ni tawh ang."


 

            11.        Israel lalram chu nunna leh khawsakna thilah a pui ber (Principal) a ni ang. Isaia  60:10, en rawh, "Tin, ramdang mite chuan i kulh bangte chu an rem chho leh ang a, an late pawhin i rawng an bawl tawh ang." tiin. Chang dangah pawh : "I rawngbawl duh lo hnam leh ram chu a boral ang, tin mipuite chu tihboral thakin an awm ang." tih a ni. Daniela 7:27, "Tin, vanhnuai lei chhina awm, ram leh awpram leh ram mipuite chu chugnnung bera mithianghlimte hnenah pekin a awm ang a, roreltu zawng zawngin Amah chu an awih tawh ang." tih a ni.


 

            12.        Dodaltu chakna chu tukzal der a nih hnuah remna chuan thla a zar tawh ang. Isaia 2:4 chhiar la, "Tin, an khandaihte chu leilehna hmawr zumah te an chher ang: hnam dangin hnamdang chungah khandaih a lek tawh lo vang a, indo dan pawh an zir tawh hek lo vang". Tin, thalngul leh khandaih leh indo te chu ka tihtlawlh sak ang a, ram ata chu ka tihbo sak ang a, him takin in chawl hle hle tawh ang."


 

            13.        "Lalpa ni ropui leh rapthlak" lo thlen hmain zawlnei Elijah a lo lang dawn a ni (Malakhi tawp lam en la)


 

            14.        Tempul pathumna chu Engkimtitheia buatsaih sa angin sak that leh a ni ang. (Ezekiela 40,45 te chhiar la)


 

            15.        Hmanlaia Ram Thianghlim hnam sawm leh hnam hnihte tana semdarh kha tih thar leh a ni ang. Ezek. 47:13 "LALPA Pathian chuan heti hian a ti a ni : Hei hi Israel hnam sawm leh hnam hnih zinga ram inthen dan tur chu a ni e." tiin.


 

            16.        Chung ni hnuhnungah chuan mitthi thawhlehna a lo awm ang. Deut. 32:39 en rawh, "Ngai teh, Kei, Keimah ngei, a pangngai bawk kha ka ni, Keimah lo chu Pathian dang a awm lo. Thihnaah ka hruai a, Nunnaah ka hruai leh thin; ka tisawm a, tin, ka tidam leh thin", Isaia 26:19 "I mitthi chu a nung leh ang a, ka mitthi nen a rualin a tho leh ang. Nangni vaivuta muhilte u harh ru" etc. Daniela 12:2 en rawh, "Tin vaivuta muhil tawhte chu an tho leh ang, thenkhatte chu chatuan nunnaah thenkhatte chu mualphona leh chatuan tihbainaah".


 

            Heng tawpna chhinchhiahna te hi beiseina phur awm takte an ni a, Lal Messiah huna lo thleng dik turte an ni. Thutiam tawhte chu chelh khawtlai mai mai theih a ni dawn lo, "Pathian chu daw thei mihring a ni ve lo."


 

            Messiah hnehna ropui tak kan rinna tichiangtu chak tak chu Daniela bu bung 2 hian min thawhchhuah sak hle a ni, lalram pangana hrilhfiahna hmangin. Nebukadnezara mumang hmuh milim ruangama tel ve lo lalram pangana kha kumkhuaa awm reng tur ram chu a lo ni dawn a, chu chu hetiang anga sawi a ni, Israel state leh an rinna chuan lalram dang zawng zawng leh an thurin (emaw) sakhuate chu a la luahlan vek dawn a ni. Hei hi Daniela 2:44 thu ah sawi lawk a ni : "Tin, chung lalte ni-ah chuan, van Pathian chuan lalram a rawn din ang a, chu chu tihchhiat tawh loh tur a ni ang a, tin a lalram chu midangte hnena hnutchhiah a ni  tawh lo vang, chu a hnekin chung ram dang ho chu a tikeh sawmin a thiat sawm zawk ang," Israel chu "Chungnungbera mi-thianghlim (hnam thianghlimte) tia vuah an ni tawh zawk ang." Kan Holy Bible-ah hian chutiang hming nihna sawithawina tam tak a awm nghe nghe a ni.


 

            "Hnam thianghlim" tia hming kohna (epithat) hi pek kan ni a, entir nan Deut 7:6-ah "Lalpa Pathian tan hnam thianghlim in ni si a, leilunga hnam zawng zawng ahluana a pual bik ni tura LALPA in Pathianin a thlan che u (Am segulla)  in ni." tiin. Isaia 62-ah en la, "Tichuan, anni chu, mi thianghlim, LALPA tlante an ti ang." tihte hi. Jeremia 2:3 ah pawh, "Israel chu LALPA tana thianghlim (emaw) serh hran a rah pung hmasa a ni," etc.


 

            Daniela 7:18-a chang pawimawh tak mai bawk chu, "Mahse Chungnungbera mi thianghlimte chuan, ram chu an chang ang a, kumkhuain, kum khaw tlaitluanin," tiin. Chutichuan, a  ngaikawi zawnga chhiartu tinrengin, khing ho khi Israel fate an ni tih hi lo hmuin lo hre ngei sela, tin, chutiang bawkin Chatuan khuanu ruat zara din chhoh hnam kan lo nih zia te, thupuan thianghlima malsawm hnam kan nihte, chu thupuan chuan kan hun hnuhnung lam dinhmun ropui tur zia leh hun kal tawh zawng zawnga hlauhawm lo awm leh thin laka zalentir kan nih turte hi chhiartu duh tak lo hre ve tawh ta che.


*Source ; http://www.kashrut.fav.co.il/index.php?dir=app_sites&page=content&id=180798

 

Categories: Emuna, Rinna lam, Judaism, Article

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments