HAKHOKHMA Post Post New Entry

Isua kha Mashiakh alo ni chiah em?

Posted by Emuna on July 11, 2011 at 8:05 AM

       Kristian Scholar ten min zawt thin a, "Isua Krista hi Messiah a ni tih engatinge Judate hian in rin loh reng mai le, nangni pawhin in rin zawlnei diktak ten a chungchang an lo sawi te lah a chiang tawk hle si a?" tiin.


        A ni maw, hei hi ka chhanna a ni : Ani kha Messiah a nihzia engtinnge kan rin ve theih ngawt ang a? A hrilhlawkna zawng zawngah Messiah a nihna thil chiang (proof) dik tak inziak kan hmu ve lo tlat a ni. Gospel (chanchintha) ziaktu ten zawlneite thu atanga an lakchhawn thin Nazarene mi Isua kha Messiah a lo ni tiin an hrilhfiah fova mahse, amah kha engmahah an chanchhuah lo a ni, chumi chungchang chu part dangah tarlan a ni dawn a, chungah chuan Gospel thu ziaka thil dik hlel fe fe a indawt zelin kan thur chhuak dawn a. Chu lo lehah chuan Isua chu Messiah engtizawng pawhin a nih lohna kan hriat tlat (conviction) na puitu hnial rual loh proof-na tam tak kan hmu zel dawn a ni. Heng inhnialna thu a point tlemte hi han la chhuak phawt ila.

 

            Messiah a nih lohna a chiang :

 

            Pakhatna : pian leh murna (pedigree) atangin

 

            Pahnihna : a thil tih (act) atangin

 

            Pathumna : a taksa putlai (period) leh,


 

            Palina : a dam lai (Bethlehem leh Kalvari inkar) zawngah khan Messiah beiseiawm tak lo thlen huna hriat chian ni tawh turah thutiam tihfamkimin a awm lo tih thu dik atangin, Messiah a nihna (identity) min rintir thei chauhtu chu thil dinhmun a taka hlenchhuah tur a ni miau si a.


 

            Pakhatna  : Isua pian leh murna lam lah chu Davida thlah a mi a ni lo phawt a, Gospelin a sawi danin Josefa kaltlangin Davida thlaha telh tir (affiliated ) satliah a ni. Matthaia, bung 1-ah chuan Mari chu nula thianghlim (virgin) a nih laiin a lakah a lo piang a, tin Isua a pian hma loh chu Josefa chuan ani chu a pawl lo va ni tih ziak a ni. He chanchin (statement) ziak ang ngei hian Josefa thlahah Isua a lo chhuah theihna a awm lo a ni, chutih rualin Mari pawh Gospel ziaktute hian a thlahtu an hre lo bawk. Tin, Josefa leh Davida te thlahkhat an nihna leh an inlaichinna pawh a proof-na tlakchham  a ni tlat, Isua thlahtute chhuina kawngah Matthaia leh Luka chhui dan a inmil lo leh bawk, a lan chianna bungte Matthaia bung 1 leh Luka chhui dan a inmil lo leh bawk, a lan chianna bung te Matthaia bung 1 leh Luka bung 3 tawp lamah khan. Hetah hian an nemnghehna inkalh tlat kan hmu a ni; a bung leh changte hi chhiar ngei zel ni sela a khawimaw zawk zawk pawh hi rin theih chi a ni tawh lo. Kan zawlnei te'n min hrilhlawk danin khawvel nghahfak Messiah chu Davida thlah a mi lo chu an awm dawn lo a ni.


 

            Pahnihna : Isuan a hna a thawhnaah hian ama chungthu a sawina kan hmu a, Matthaia 10:34, "Leiah hian remna siam tura lo kal emaw min ti suh u; rem lentir tura lo kal ka ni lova, ngunhnam lentir tura lo kal ka ni zawk, tin mipain a pa dona chi hrang hrang a nei ang a, tin, fanuin a nu a do vang a, tin, movin a pi," tiin. Kawng dang lehah chuan, Messiah dik tak, kan beisei, Isua thiltih ang lo zawnga hna thawk tur chung chang sawina ziak thianghlimah kan hmu a ni. Isua chuan ama nihna a sawi chiang tawh a leiah hian remna siam tura lo kal a nih loh thu leh, P-thian thu bu in Messiah dik tak Zakaria 9-10 a lo sawi, a awm tlat a ni, hetiangin, "Ringlo khawvel mite hnenah remna thu a rawn sawi ang." etc tiin. Isuan heti hian a sawi ve thung a, "Leiah hian khandaih/ngunhnam lentir tura lo kal ka ni zawk," tiin. P-thian Thu buin (Isaia 3- 4) ah tihian a sawi a, "An khandaihte chu an lek tawh lovang a, indona pawh an zir ngai tawh lovang," tiin. Isua chuan heti hian a sawi thung; Pa leh fapa rilru inmil lohtir tura lokal angin, mahse Malakhi chuan a lehkhabu tawp lamah heti hian a sawi thung a, "Mesia dik tak a lokal hmain zawlnei Elijah a lo lang ang a, pate thinlung fate lamah a thle ang a; tin, fate thinlung pate lamah a thle ang," tiin a lo inziak leh a ni. Chutiangin Daniela 7 : 27, pawhin ti hian a lo sawi a, "Tin, roreltu zawng zawngin a rawng an bawl sak anga tin a thu an awi ang," tiin.


 

            Pathumna  : Ama hunlai, (a damlai) kha, han chhut ila zawlneite'n an lo hrilhlawk thin hun nen a in chawbe lo tih a chiang a, an hrilhlawk dan chu Messiah lo lan hun chu hun hnuhnung lamah daih a lo thleng dawn a ni si a Isaia 2:2 en la, "Tin, ni hnuhnungahte chuan he thil hi a lo thleng ang, Lalpa in awmna tlang chu tlang te chungah chuan dinnghehin awm ang," etc tih a ni. Tin, Lal Messiah chungchang chang 4-na kan chhiar leh chuan, "Tin, hnamte zingah ro a rel ang a, mi tam tak zingah thu lai a vua ang (ro a rel ang) a, tin a khandaihte chu lei lehna hal zumah an chher ang a, an fei te chu thei kung hlawina chemah an chher tawh ang," etc. tih thu kan hmu a ni. Chutiang chuan a ni Gog leh Magog indona thuah P-thian thuin a lo record-a chung thilte chu Messiah huna lo thleng tura min hrilh thlap dan zawk chu a ni. Tin, Ezekiela 28:8, chuan tihian min hrilh a, "Ni tam tak hnuah chuan tlawhin i awm ang a, kum hnuhnungahte chuan khandaih laka chhan chhuah, hnam tam takte lak ata lawr khawmte awmna ramah chuan i lo kal ang a." tiin. Hei hi a hunah la hrilhfiah atan dah ila. Hoshea 3:5, atang bawkin hetiang thu hi a proof-na a awm leh a ni "Chumi hnuah chuan Israela thlahte chu an kir leh ang a, LALPA an P-thian leh, an lal Davida chu an zawng ang a, tin LALPA leh a thatna ni hnuhnungahte chuan an tih tawh ang." tiin. Tin, Daniela 3:28, ah pawh "Tin, P-thian chuan, LAL Nebukadnezara chu tun hnua thil lo awm turte chu a hriattir a." tih thu kan hmu a, hei hian nakin lam hrilhlawkna ibid. chang 44, hi a rawn refer nghe nghe a. "Tin, chung lalte niah chuan van P-thianin ram a rawn din ang a, chu chu a chhe ngai tawh lovang a; a lalnate pawh  midangte tan hnutchhiah a ni hek lovang." etc. tiin. Ni, heta tang hian Messiah dik tak zawk lo kalna tur chu hun hmalam ni lovin, hun hnuhnung/ni hnuhnung lam daih a nih thu zawlneite thupuanah fiah takin kan hmu thei a ni.


 

            Palina  : Zawlneite thusawia thutiam, Isua hun laia la thleng kim hman lo, Messiah dik tak, kan nghah fak lo thlen hun chu nakin (future) ah hriat chianin a la awm dawn a ni tihte hi kan ngaihtuah a tul a ni. Chungte chu a hnuaia mi ang hian then diat diat theih a ni.


 

            a)         Lal Messiah hunah chuan lal ram pakhat chauh leh lal pakhat chauh awm tur a ni a, chu chu, Lal Messiah dik tak a ni. Nimahsela, lal awp ram dang dangte leh an roreltute chu Daniela 2:44, a kan chhiar angin chung hunah chuan an tawp vek tawh ang. "Tin, chung lalte niah chuan van P-thianin lal ram tihchhiat ngai tawh loh tur chu a rawn din ang a; tin lalram chu midang hnenah hnutchhiahin a awm ngai lovang, mahse heng ram zawng zawng hi an keh darh anga ei zawh vekin an awm ang a, chu lalram erawh chu kumkhuain a ding reng ang,". Chutih laiin ram tam tak, an dante leh an sukthlek dan inang lo hote chu an la ding reng rih a, chung ram (empire) tam takah chuan lal hrang te'n ro an la rel mek a, chungte leh heng ho hnu lamah pawh hian Messiah chu a lo la kal lo cheu a ni tih pawh tunah hian kan hmu chiang hle a nih hi.


 

            b)         Lal Messiah hun puiah chuan, khawvelah hian thurin (emaw) rinna hmun khat leh sakhaw pakhat chauh, chu chu Israelte sakhua a ni dawn a chu chauh chu a ding chhuak dawn a ni, Isaian a lo finfiah tawh angin (3:1), "Aw, Zion harh la, harh la, i chakna inbel rawh, i silhfen mawi takte kha inbel rawh, Aw Jerusalem, khawpui thianghlim; tuna chinah chuan i chhungah serh tan loh leh mi bawlhhlawhte chu an lut tawh ngai lovang," tih ziak ang khan. Tin, chu bakah (bung 66:17) ah chuan "Mahni intithianghlima intifaite thu chang fiah lo ruai anga lang te hi a ngial a ngana lehlin hi keini chuan kan thlan a ni (Authorised Version lehlinna phei chu a chiang lo leh zual a) huanahte an kal a, an zinga awm a lai taka mi hnunga awm thliah thluah, vawksa ei te leh thil tenawm, leh sazu sa eite chu a rualin an boral za ang LALPAN a ti." Tin, (chang 23) "heti hi a  ni ang a, thla thar atanga thla thar dang thlengin, Sabbath atanga Sabbath dang thlengin, tisa zawng zawng ka hmaah, chibai mi buk turin an lo kal zut zut ang, LALPAN a ti." Chu bakah, Zakaria 16:16-ah, "Tin, heti hi a lo ni anga, hnam zawng zawng Jerusalem rawn dotu hnutchhiah a la awm te chu kum tin Bawkte kut hmang tur leh Lalber chibai buk turin an chho thin ang," He mi buah vek hian (bung 8:23)kan chhiar leh a, "Sipaihote Lalpa chuan heti hian a ti a ni: chung niah te chuan heti hi a la ni ang, mi sawm, hnam tin tawng chi hrang hrang hmangte atangin an lo kal ang a Juda mi pakhat fenfualah vuanin an chelh tlat ang a, ‘I hnenah P-thian a awm tih kan hriat avangin I hnenah kan kal ve dawn e,' an ti ang," a ti a, tiin. He mi buah tho hian chang tamtakah he mi tlukpui hi a awm a ni.


 

            c)         Messiah hunah chuan, milem biak-uirena leh an hriat rengna nen, zawlnei derte leh zawl rawng bawlhhlawh ang chi reng reng chu lei lung ata tihbo vek tur a ni a, Zakaria 13:2-a kan hmuh angin, "Tin, heti hi a ni ang, chung niah te chuan, sipaihote Lalpan a ti, milemte hming chu leilung ata hi ka tibo vek ang a, hriat rengin an awm tawh ngai lovang, zawlnei derte leh thlarau bawlhhlawh (a ngial nganin thianghlim lohna thlarau) chu leilung ata hi ka chhuah bo tir ang," tiin.


 

            Tin, Isaia 2:8-ah pawh heti hian a inziak a, "Tin, milem Pathian/Pathian lemte chu a tiboral daih ang,"  tiin. Chutiang bawkin Zephaniah 2:11 chuan a sawi ve a, "An tan LALPA chu tihbaiawm tak a ni ang a, lei pathian te chu a hrubo vek ang a, mite chuan Amah chu chibai an buk ang, mitinin mahni hmun theuh vah, ringlo mite thliarkar zawng zawng thlengin.


 

            d)         Messiah hunah chuan, sualna leh diklohna sualte hi he khawvelah hian a awm tawh dawn lo va, a bik takin Israel hnam zingah a awm dawn lo tawp a ni. Chutiang chu dan bu (Deuteronomy 30: 6) ah kan hmu a, "LALPA,  i P-thian chu, i thinlung zawng zawng leh i rilru zawng zawngin (i lo nun theih nan) hmangaih turin LALPA i P-thianin i thinlung leh i chithlahte thinlung serh chu a tan sak ang che," tiin. Tin, Zephania 3:13-ah bawk. "Israel a bang la awm te chuan sualna an khawih tawh lovang a, dawt sawi tawh lovin, an kaah bumna thu reng hmuhin a awm tawh hek lovang," tiin. Tin, Jeremia pawhin Jer.3:13-ah a lo sawi a. "Chutih hunah chuan Jerusalem chu LALPA thutphah an ti ang, tin hnam zawng zawng a lamah LALPA hming awmna lamah chuan an la pungkhawm ang, Jerusalemah chuan, an thinlung sual suangtuahna angin an kal tawh lovang," tiin. Tin, Ezekiela 46:25-ah chuan ti hian a lo sawi a, "Tin, in chungah tuifim ka theh ang a, in bawlhhlawhna zawng zawng leh in milimte lak ata ka tlengfai ang che u. Tin, thinlung thar ka pe ang che u a, in chhungah thlarau thar ka dah ang; in tisa ata thinlung, lung anga sak chu ka la bo ang a, thinlung tisa anga nem ka pe zawk ang che u. Tin, in chhungah thlarau thar ka dah ang a, ka dan siamah ka lentir ang che u a, ka thupekte chu in vawng ang a, in zawm ang," tiin. Chubakah Ezekiel 37:23 en la "An milimte, an thil tenawm te, an bawhchhiatna tein an intibawlhhlawh ngai tawh hek lovang: an tluka an sual thinna zawng zawng ata ka chhan chhuak ang a, ka tleng fai ang, tichuan ka mite an ni ang a, tin kei an P-thian ka ni ang. Ka rawngbawltu Davida chu an chunga lal a ni ang a, an zaa chungah berampu pakhat a awm ang; ka thupekte an awi ang a, ka dan siamte an zawm ang a, an hmang ang,"tiin.


 

            e)         Lal Messiah hunah leh Gog leh Magog indopui (Armagedon - Kristian lam dan) zawhah chuan remna leh muanna chuan khawvel pum a luah ang a, mite chuan indo hriamhrei reng reng an mamawh tawh lo ang. Tichuan, Isaia 2:4 ah heti hian kan chhiar leh a, "Tin, an khandaihte chu leilehna hmawr zumah an chher ang a, an thal te chu theikung  ahchhumna chemkawmah te an hmang tawh ang a, hnam dangin hnam dang chungah khandaih a lek tawh lo ang a, indo dan pawh an zir tawh ngai lovang," tiin. Ezekiela 19: 9 pawh hi chhiar teh. "Tin, Israel khawpuia chengte chuan meituahah an hmang ang a, a kang ang; phaw lian leh phaw te thal leh a ngulte, fei leh a ngulte, fei leh tiang zumte chu kum sarih chhung an tuah ang. Tichuan, ram thing an phur lovang a, ngaw thingte an kit hek lovang, hriamhreite chu thingtuah nan an hmang dawn si a," tiin Hoshe 2:20 thu hian kan chhiar lai hi a rawn mil leh zel bawk. Hebrai Bible bung then dan dungzuiin (English Version-ah chuan bung 2, chang 18 a ni) "... tin, thal ngul, khandaihte, indonate hi lei ata ka tiboral ang a, him takin ka awm ho tir ang," tiin. Zakaria pawhin a lo sawi ve chiah a  9:10, "Indona thal ngul chu tihtliah a ni ang a, tin ringlo mi hnenah remna thu a sawi ang," tiin.


 

            f)          Lal Messiah hun/term-ah chuan Ram Thianghlim (Holy Land) ah khan ramsa kawlh chi leh khawingam rante inkarah remna a leng tawh ang a, tichuan a tu mah mah an intina tawh lovang, tin, mihring lam boruakah phei chuan an intihnat tawh loh tur zia chu a la nasa zawk ang. Isaia 11:6-in a lo sawi ang hian, "Tin, chinghnia chu beram no nen an awm dun tawh ang a, keite chu kelno nen an bawk dun ang a, bawngno leh sakeibaknei vanglai leh ran chawmthaute chu, an awm ho tawh ang a, naupang tein a hruai duah duah ang,"tiin. (Chang 7) "Tin, bawng leh savawm an tla dun ang a, an notete chu an bawk za dial dial tawh ang; tin, sakeibaknei chuan bawngpa angin buhpawl a ei tawh ang." tiin. (Chang 8 )"Tin, nau hnute hne lai chu rul rial kaw kovah a tualchai ang a, nau hnute hnek bang tawh chuan rulmuk tawmkuk kotlangah a kut a nghat ang,"tih a ni a.  (Chang 9) "Ka tlang thianghlim zawng zawngah chuan intihnat a awm tawh lovang a, intihchhiat a awm tawh hek lovang, LALPAN a ti,"tiin. (Ezekiela 34:25 en bawk rawh) "Tin, anmahni nena remna thuthlung ka siam ang a, sakawlhte chu ram ata ka hnawt bo vang; tin, thlalerah te him takin an cheng ang a, thing hnuaiah te an riak ang," tih a ni. (Chang 28 ) "Ringlo mite saseh leh suasam mai mai an ni tawh lovang a, ram sakawlhte eiral mai mai an ni tawh hek lovang," tiin.


 

            g)         Messiah hunah chuan buainate, lungkham nate, ngaihthatlohnate hi Israel ngaiawh leh te zingah a awm tawh dawn lo va, anni chu nun tihseina leh nun hlimnaa malsawm saka awmte an ni ang, a hnuaia Isaia thukhawchang (65:16) in a lo sawi lawk ang hian "Chutichuan leiah hian mahni mal insawm chawptu chu thu tak Pathianah chuan mal a insawm ang a, leiah hian chhechhamtu chuan thu tak Pathian chhalin chhia a chham ang; a chhan chu tun hmaa mangannate kha theihnghilha a awm tak avangin, leh ka mit laka thupa a awm tak avangin." (Chang 19) ah "Tin, Jerusalem chungah ka hlim ang a, ka mite chungah pawh ka lawm ang; a chhungah pawh tap thawm hriat a ni tawh lo vang a, chiau thawm pawh hriat a ni tawh hek lo vang."(Chang 20) "Chuta chhuak chu nausen ni rei lote dam an awm lo vang a, putar a dam chhung nite hmang tlingtla lo an awm hek lovang, naupang chu kum zaa upain a thi ang a, misual kum za chauh dam erawh chu anchhe dawng a ni ang." (Chang 21) "Tin, inte an sa ang a, chungah chuan an awm reng bawk ang, Grep huante an siam ang a, a rah an ei ang," tih a ni bawk a. (Chang 22) "Midang awmna turin in an sa tawh lo vang a, mi dang ei turin Grep huan an siam tawh lovang a, thing dam chhung nite ang hian, ka mite dam chhung nite chu a awm tawh dawn si a, ka mi thlante chu rei tak an thawhchhuah chungah chuan an lawm dawn a ni."


 

            h)         Messiah lal ramah chuan Shekhinah (Pathian awmpuina leh chenchilhna tak tak) kha hmanlai ang khan Israelte chungah a lo kir leh dawn a ni, tin Israel mite chu a hnuaia zawlnei (Ezekiela 37:26) hrilhlawkna ang hian hrilhlawkna te, finnate leh hriatnatein Pathianin a la vur dawn a ni. "Chubakah anmahni lakah remna thuthlung ka siam ang: tin ka dinin anmahni chu ka tipung ang a, an lai takah ka hmun thianghlim (Kodesh Kodashim) ka din nghet ang kumkhua atan." (Chang 27 ) "Ka awmna (residence) pawh an zingah a ni tawh ang. A ni, an Pathian ka ni ang a, tin anni chu ka mite an ni ang." (Chang 28 ) "Tin, ring lo, ram dang mite chuan hei hi an la hria ang: an zinga ka hmun thianghlim a innghah hunah kei LALPA hian Israel chu ka tithianghlim a ni tih hi.". (Ibid. 39:29) " ‘An lakah ka hmai ka thup tawh lo vang, Israel chhungkaw chungah ka thlarau ka leih dawn si a,' LALPA Pathianin a ti." (Ibid. 48 : 35 ) "Tin, chumi ni atang chuan khawpui hming pawh heti hian koh a ni tawh ang, ‘LALPA chu sawtah sawn, a awm'" tiin. (Ibid. 43 : 7) "Tin, ka hnenah heti hian a sawi a, ‘mihring fapa, ka thutphah inhunna hmun Israel fate zinga kumkhuaa ka chenna tur hmuna ka kephah nghahna hmun,' tiin. (Joela 2:27) "Tin, Israelte zingah ka awm a, tichuan, kei hi LALPA i Pathian ka ni, a dang reng a awm lo; tin, ka mite chu tihzahin an awm ngai tawh lo vang tih hi in la hria ang." (Ibid. 3:17) "Ka tlang thianghlim Ziona cheng LALPA i Pathian chu ka ni tih hi in la hria ang, tin, chutah chuan ram dang mi tumah an kaltlang thei tawh lo vang." (Ibid. 3:21) "An thisen phuba ka la lak loh chu ka la dawn a ni, LALPA chu Zionah a cheng si a." (Zak 2:14; Eng. version-ah 2:10) "Hlimin zai rawh, O Zion fanu, ngai teh, ka lo kal e, i chhungah ka cheng dawn si a, LALPAN a ti."  (Isaia 9 : 9) "Tuiin tuifinriat a khuh vek ang hian, lei hi LALPA hriatnain a khat vek dawn si a." (Jer. 31:34) " ‘LALPA chu hre rawh, tiin miin a thenawm a zirtirin, miin a unau a zirtir ngai tawh dawn si lo va, a hniam ber atanga sang ber thlengin min hre vek tawh dawn si a,' LALPAN a ti; an sualnaahte ka ngaidamin, an diklohnate chu ka hre reng dawn tawh si lova," tiin. Khang zawlneite'n Messiah dik tak ziarang hmaih thelh hauh loh chi kawhhmuhna point zozaite kha Nazarene mi Isuaah khan tihfamkim (fulfilled) in a awm ta si lo va, zawlneite hrilhlawka hmingvuah sa tawh khawpa chiang hi tun thleng hian kan la hmu pha bawk hek lo a ni. Tichuan, tunah chuan thu tawp dik tak kan thleng ta a, Messiah dik tak leh nghahfak em em chu a lo la kal lo deuh a ni e.


*Source;  http://www.kashrut.fav.co.il/index.php?dir=app_sites&page=content&id=180798  

* Judaism Vrs Kristianity - click here

 


 

Categories: Article, Khinukh, Education, Emuna, Rinna lam

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

1 Comment

Reply Mami
10:27 AM on July 29, 2011 
Tha lutuk, hetiang khomer hi lom ka mamoh em em!!