Oops! This site has expired. If you are the site owner, please renew your premium subscription or contact support.

HAKHOKHMA Post Post New Entry

Parshat Bekhukotai

Posted by Moshe Ilan on May 19, 2011 at 7:15 PM

פרשת בחוקותי  (Lev - 26;3-27;34)

     Parshat 'Bekhukotai' chu Torah bu thumna 'Vaikra' a Parasha tawp berna ani a, he Parasha ah hian P' chuan a dan leh thupek te kan zawm a a lawmman turte leh, kan zawm loh avanga a hremna kan tawrh tur te chu a sawi a ni.

 

     He Parasha hi Im (אם) tih thumal in a intan a, hei hi 'Rashei teivot' (lam tawi) ang ani a, chu chuan P' dan leh thupek zawng zawngte chu kan zawm chuan chhandam kan nih theihna tur ataka min entirna ani, engtin maw? A hmasa berah chuan Mitsraim ah khan Israel fate chuan Moshe leh Aharon-a te thu an zawm avangin chhandam an ni a, he thumal אם hian an hming bul ve ve a lam a ni. Hetiangin מ=משה, א=אהרון, tin, Purim laiin Israel fate chuan Mordechaia leh Lalnu Estheri te thupek an zawm avangin chhandam an ni a, he thumal hian an hming a lam chhuak ve ve leh bawk a, hetiangin, א=אסתר, מ=מרדכי.

 

    Tin, chhandamna ni ropui lo thlen hunah pawh Israel fate chuan Zawlnei Elyiahu leh Mashiakh te thu an zawm vek dawn avangin chhandam kan la ni dawn a, chutiangin he thumal hian an hming bul a lam ve ve bawk, hetiangin, מ=משיח, א=אליהו.


     Tin, he Parasha a a bung hmasa ber, Lalpa P' dan leh thupek te kan zawma kan lawmman dawn tur a sawina bung hi hawrawp hmasa ber 'Alef' א in a intan a, tin, he bung kharna ah hian hawrawp tawp ber 'Tav'ת a hmang leh a, hei hian a entir chu, Lalpa P' chuan a dan leh thupek zawng zawng kan zawm tura a sawite chu a zavai tak meuh a, a tir atanga a tawp ber thlenga kan zawm chu a duh ani tih 'Remez' (hrilhthawina) hmanga min hriattirna ani.

 

    Mi thenkhat chuan he Parasha chhiar lai hian P' in a dan leh thupek te zawm duh lova hai der tute leh an hremna chungchanga a zilhhauna thu chhiar lai hian ngaithla duh lovin Beit Kneset pawnah te an chhuak thin a, heng mite hian an ngaihdanin Lalpa P' chuan Israel te chu a fate a tih si chuan heng ang em em hian a hrem lovang tiin an ngaithla serh thin a, hei hi mi a ber thawmhnaw a ni a, Lal Shlomo-a chuan Thufing bung 3;11 ah ziakin "Ka fapa, Lalpa thununna che chu ngai nep suh la, a zilhhauna che chu ning hek suh. Lalpa chuan a hmangaihte chu a zilhhau thin ani." Tiin, a lo sawi ang hian, Lalpa dan leh thupek a Mitsvot te chu a pawimawh zia hriatna tur leh min hmangaih vang zawk leh kan tana a nihlawhthlak zia hriatna turin kan ngaithla ngei zawk tur a ni.


    He Parasha hi chiang deuhva kan chhiar chuan, Lalpa P' dan ngai pawimawh lova kan duh ang anga kan awm chuan, P' chuan harsatna kan tawh tur thil chi hrang hrang a lo sawi a, heng thil chi hrang hrang a sawi te hi keimahni inhmuhchhuahna tura min hrilhthawina ani a, heng a sawi angte hi kan lo tawng palh anih chuan a siamthatna tur kan ngaihven vat a tul hle a ni, chuti lova, he khawvela mihringte tawn ve reng tur thil anga kan ngaih vaih chuan P' thinrimna tawngkhawng kan tawn thlak hun alo thleng anga, heng anga kan harsatna tawn ang let sarih te chuan min hrem dawn ani, chumi hnuah pawh insiamthat duhna thinlung kan la put loh cheuva kan rilru kan la tihsak luih tlat chuan , thil chi hrang hrang he Parasha a a lo sawite ang hi kan tawng chho zel anga, chumi hnuah pawh kan la khauh tlat chuan kan harsatna tawn mek let sarih dang bawkin min hrem leh dawn a ni, chutiang zelin hetianga a dan leh thupek te zawm duh lo tute tana a hremna tur a sawi hi a let sarih zelin tum li ngawt a sawi a, hei hi a Mathematics taka kan chhut chuan 7x7x7x7=2,401 hremna kan hmaah hian a chhawp ani tih kan hriat hi a pawimawh em em a ni, hetiang ang zat hremna tuar dawl zo kan awm hmel mang si lova, chuvangin, chuti lo chuan a hun laia Lalpa P' aia kan rin thin Doctor te, Ukil te, kan hotu te kan chunga an beidawn hnuah amah Lalpa P' ah bawk kan vuivaina thlen leh kan tum awm tho si a, amah Lalpa P' ngei chuan he Parasha ah bawk , Vaikra 26;31 'in rimtuite chu ka hnim lo vang.' Tiin , a hun laia ama duh zawngte kan tih lohva, a tawpa a hnena vuivaina kan thlen chuan kan tawngtaina te chu a lo ngaithla duh tawh dawn lo ani.

Categories: Judaism

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments