HAKHOKHMA Post Post New Entry

Parshat Matot

Posted by Moshe Ilan on May 17, 2011 at 10:25 AM

פרשת מטות  ( Number- 30-32;42)

    Kan Torah ziaktu Moshe Rabeinu chu Zawlnei te pa tih hial ani a, Zawlnei te buah Zawlnei ten an zawlneihna thu an puanchhuah dawn reng reng chuan 'Ko Amar Hashem, Heti hian Lalpa'n a sawi' tih hi an hmang thin a, he thu hi ngunthluk deuhva kan chhui chian chuan, alo dawngsawng tu tur chuan a awih nan rinna nasa tak a hman a ngai a.


     Amaherawh chu, Moshe Rabeinu ve thung chuan a zawlneihna thu a puanchhuah dawnin Israel hnam puipa te ho chu a ko khawm te te a, 'Ze Hadavar Asher Tsiva Hashem, Hei hi zawm tura Lalpa thupek chu a ni,' tiin khauh takin alo dawngsawng tute pawhin an rinna hmanga an pawm leh pawm loh thu thlu lovin, an duh emaw duh lo emaw, P-thian thupek ani tiin a sawi ve thung ani, heta an thu puanchhuah dan phung atang pawh hian Zawlnei te pa tih hial anihna chu a hriatthiam theih awm e.


     Kan Parasha'ah chuan NEDER=Intiamkamna thu chungchang kan hmu a, miin 'Ka intiam e' tiin thil sawi kher lo mahse, 'ka ti ang/lovang' ti emawin, hun lola kal tur thil a sawi hrim hrim chuan chu chu NEDER ani a, a hlen ngei ngei angai a ni. A hlen leh si loh vaih chuan Juda te dan a bawhchhia tihna ani a, a hremna a pumpelh mawlh dawn lo ani. Amaherawh chu, he NEDER sut theih dan hi a awm a, chu chu 'Hatarat Nedarim' tih ani a, he dan zul zui hian Sefardi tawngtaina dana tawngtai thinin Ashkenazi tawngtaina danin ka tawngtai tawh dawn atih chuan 'Hatarat Nedarim' hi a tih angai a, chutiangin, Ashkenaz Halakha hmang thinin Sefardi Halakha ka hmang tawh ang atih chuan 'Hatarat Nedarim' hi atih a ngai bawk ani. He Hatarat Nedarim ti si lova a duh dan dana awm kual vel chuan Juda dan a bawhchhia tihna ani.   


   Parshat 'Matot' ah chuan Thu intiamkamna chungchang thuin a intan a, he thu ah hian Moshe Rabeinu chuan mipuite hnena P' atanga thupek a hlanchhawn thin ang lo takin, 'Rashei Hamatot livnei Israel' (Israel fate zinga pawl Hruaitu lu hote) hnenah a hrilh chhawng kher a, hmun dangah chuan 'hnam puipa' (Nesiei Hashvatim)  hote hnen angah te a hlan chhawng thin a ni.


     Hei hian zirtir min neih chu, Israel hnam sawm leh pahnihah te pawh chuan, hnam khat chhung rau rauvah pawh, pawl hrang hrang te a awm teuh thei a, dan naran angin chutianga pawl hote hruaitu te chuan an mipui te hmaah thu an tiam chawk thin a, amaherawhchu, an mahni chu mipuite chuan an thlir ber ani a, chuvangin, Moshe Rabeinu chuan chung hruaitu te chu, an mahni leh an mahni chu entirna (dugma ishit) an mipuite hmaa pe turin a duh a ni. Chuvangin, chung hruaitu te chuan an mipuite mit hmuha an thutiam anga an awm an hmuh chuan, chu chu hnampum siam thatna leh chhe lova awmtir reng thei tu hnam chahbi an nih avangin, an mahni 'Rashei Hamatot' (Pawl hruaitu lu) hote hnenah kher chuan a hrilh ani.


   Ka intiam e, ti kher lo pawh a, nakin hun lola kal tur thila kan tihtur emaw, tih loh tur emaw kan sawi chhuah reng reng chu chawp leh chilhin 'Neder' (intiamkamna) ani tawh a, chuvangin, he thupek dan pawh hi, khauh taka pek ani bik a, "Ze hadavar asher tsiva Hashem" (Hei hi P' thupek ani) tiin, kan duh emaw duh lo emaw, kan ring emaw ring lo emaw, kan pawm emaw pawm lo emaw, engle khaw le chutiang anga hun lola kal tur thila kan tum loh deuh pawha kan lo phuhchhuak palh anih chuan, intiamkam tawh angin a kal tho tho ani.


   He dan hi thil awl ai lo tak niin, 'Tanakh' (Bible) ah ngei pawh, kan pi Rivka-i te pawhin he intiamkamna thu hi lo phuhchhuak sual palhin (Gen- 27;45) "Ni khatah in pahnihin ka chan ang che u" tiin, a fapa Yakov-a hnenah a sawi avangin, a fapa Yakov-a leh Esav-a te chu phum rual an lo nih phah ta a, chutiangin, chutiangin, amah Yakov-a ngei pawh chuan 'Maaser' (sawma pakhat) pek a intiamna a hlen leh si loh avangin a dam chhung nite chu kum 30 chuang ngawta pawh tawi sak aniin, Rorel tu Iftakh-a pawhin indonaa a chak avanga Lalpa hnena lawmthu sawi nan, "min lawm tura lo chhuak hmasa apiang chu P' hnenah ka hlan ang" tia a sawi chu, a tum loh deuhvin, a fanu a hlan angaih phah ta anih kha, chutiangin, Zawlnei Yona  pawh chuan a intiamkamna a hlen leh duh loh avangin hrem niin Nghapuiin a dawlh bawk anih kha.


        Hetiang teh taka fimkhur ngai hi a nih avangin, kan ngaih ang ngawta ho anga kan ngaih mai theih ang, entirnan; naupang hnenah pawh an tap thlem nan emaw, nakinah chumi khami chu ka pe ang che kan lo sawi palh anih chuan,   chutiang ang pawh chu intiamkamna anih avangin, kan hlenchhuah ngei angai tlat ani, kan hlenchhuah loh vaih chuan nakina min la deng let thei tu an ni vek tih hriat a tha hle ang.


    Kan ka atanga kan phuhchhuah thumal hi 'Mila' (מילה ) tih ani a, hei hi a hawrawp tinte hian sawichhuah neiin chu chu 'Mi Yaale Lanu Hashamaima" (מי יעלה לנו השמימה ) 'tunge vanah min thlen chhoh sak ang' tih ani a, he Sentence a thumal hawrawp tawp tinte lakkhawm hian P' hming a lamchhuak leh bawk a, hetiangin; י-ה-ו-ה (Yod kei vav kei), chuti alo nih chuan, kan ka atanga kan phuhchhuah thumal te hi a thianghlimin kan tum loh deuhvin P' hming kan tih hliau theihna leh vanram min thlen tir thei tu chu kan phuhchhuah thumal te hian an siam chhuak thei tih hriata fimkhur hle tur a ni.


   Tin, kan Parasha bung (Num-32) ah chuan Ruven hnam leh Gad hnam te chuan Moshe Rabeinu hnenah Jordan lui khawchhak ram chu an awmna tura an dil thu kan hmu a, amaherawhchu, (Num-32;33) ah chuan heng hnam hnih te mai bakah Menashe hnam chanve (chhungkaw 8 zinga chhungkaw 2) te chu an dil ve thu hmuh nisi lovin, an kianga awm ve turin ram a pek ve thu kan hmu a, hei hi Ruven leh Gad hnam hnih te chu hetianga ram pawna an an awm bik anih hian nakin hun lola kal zel turah intihhranna emaw an mahni en hranna ala awm palh ang tih hlauhna avangin, an mahni te leh Israel ram chhunga chengte nena tlang taka an inpawh theihna turin   Menashe hnam chanve te chuan an u leh nau te an inkan pawh thinna tur chuan 'Kesher' (inzawmna) a siam theihna turin Menashe hnam chanve te chu ram pek ve an ni ta a, tin, chumai bakah, kan pu Yakov-a malsawmna atanga kan zirchhuah angin, Menashe-a chu ram pawna piang ni mahse a rinna leh a felna avangin a Judaism na (yehadut) engmah a chingpen loh avangin, hetia Ruven hnam leh Gad hnamte chu ram pawna an awm avang hian an sakhuana leh rinna lamah an tlakchhiat emaw tur thu venthawnna  atan Experience lo nei tawh sa Menashe fate chu a hnam chanve awmtir ve an lo nita a ni.  

 

Reuven hnam leh Gad hnam leh Menashe hnam chanve te rampawna awm chhan:

 

He thu hi nie hrilhfiahna hrang hrang a awm a, amaherawhchu, Thlalera kum 40 ngawt ramthianghlim thleng tura an vahvaih pui an beisei ram chu an thlen tak dawn a ruai a ram chhung ah ram kan duh lo ve, Jordan rala ram hi min pe rawh khai tiin an dil ta hlauh ani a, ngaihtuah neuh neuh chuan a mak ang reng hle a ni.

 

Hei hi a chhung ril hi Torah thuruk (Sod) hmang lo chuan hrilhfiah leh hriatthiam a har reng a ni. Ari Hakadosh chuan hetiang hian Kabala hmangin a hrilhfiah a...

 

Kan pu Yakov-a chuan a hmangaih tak Rakhel-i chu nupui a nei turin Khupa a buatsaih a, amaheerawhchu, Rakheli pa chuan thim tham hnuai ah an inneihna Khupa chu a buatsaih ta a, Yakova chuan "Hei eng ti zia a, thim tham a Khupa buatsaih kan nih mai?" tiin a zawt a, Rakheli pa Lavana chuan "Kan ram dan anih hi" tiin a chhang a, tichuan, kan hriat theuh angin, Lavana chuan Yakova chu Rakheli aiah Yakova hriat lohvin Lea-i a neih tir ta a nih kha. Tichuan, zing an han tho chu Yakova chuan Lea-i zawk ani tih a hmu chhuak ta a, Leai hnenah chuan "Bum hmang fanu Bumhmangi i lo nih hi" tiin a an khum a, Leai chuan "i hnen atanga ka zir a nih hi, nang pawhin i pa i bum ang khan" tiin a chhang a, tichuan, Yakova chu a dang ta a ni.

 

Hemi zan hian Lea-i chu Reuvena paiin alo rai tan ta a ni. Hetiang tehhrep inbumna kara Reuvena chu piang anih avang chuan amahah famkim tawk lohna a awm ta a, chuvang chuan Reuvena lakah chuan Ramthianghlim a Nakhala (chanvo ram) nei lo tura chunglam rel thluk sak alo ni ta a ni.

 

Tin, Rakheli chu Yakova chuan a nei leh ta tho va, amaherawhchu, nau a nei thei ta hauh lo tih ainhriat avangin Rakheli chuan a bawihnu Bilha-i chu a pasal Yakova nena Khupa (Inneihna) tih tirin a lak atanga fa a hrin theih nan nau apai tir ta a, tichuan, Lea-i chuan a pasal Yakova chuan a unau nu Rakheli bawihnu Bilha-i lakah fa a pai ta tih a hriat chuan ama (Lea-i) mutna ah chuan a bawihnu Zilpa-i chu a mut tir ta a, tichuan, Yakov-a chuan Lea-i emaw tiin (Khupa pawh ti hmasa lo chuan) a lo mutpui ta a, tichuan, chu ta tang chuan Lea-i bawih nu Zilpa-i chu lo rai tain Gad-a a lo piang ta a ni.

 

Gad-a pawh chu chu tiang teh hrep 'Kidushin' (inneihna) pawh hmang hmasa lova piang anih avang chuan chunglam rorelna chuan Ramthianghlima hmun nei lo turin a chungthu an lo rel sak ta a ni.

 

A nih leh Menashe hnam chanve chu eng vang nge? ni ta ang le?

 

Yakova te chhungkua Kanan ram an rawn luh khan Yakova fanu Dina-i chu Khamor-a fapa Shkhem an man in alo mutpui anih kha, khatah khan Dina-i chu lo rai tain fanu Osnat-i a hring a, tichuan, chu chu Mitsraim ah Yosefa nupui alo nita a ni.

 

Tichuan, Yosefa leh Osnati te chuan fa pahnih an nei a, an fa tir zawk chu Menashe-a ani a, tichuan, Osnati chu Juda nu Dina-i leh Jentel pa Shkhem-a te fanu ani a, chuti chuan, a chunglama kan sawi tak (Reuvena leh Gada te fatir an nih) ang khian Mum (famkimlohna) chu an fatir Menashe-a chungah chuan alo awm ta a ni. Amaherawhchu, Menashe-a chanve (Dina-i lam) chu an thiang a, marawhchu, amah a a chanve dang (Shkhem-a lam) erawhchu famkim loh bawlhhlawhna chu kai ta in, Reuven hnam leh Gad hnam te dil anga dil ve miah si lovin, ram pawna Menashe hnam chanve te chu awm tura chunglam rorelna an lo dawng ve ta a ni.

 

Anih leh eng vangin nge rampawna awm tura an mahni (Reuven leh Gad) dil ani si a, kan ti ani maithei. Nie, an unau dang te laka zahna an hmuh lohna tur leh anmahni pawh an inhnual suat lohna turin an mahni ngei pawhin a chhan an hriat loh vin Lalpa P-thian chuan a zahngaihna leh ngilneihna chu an chungah lan tirin an mahni ngeiin a tahin an in tahawh chhuah tir ta zawk a ni.

        

 

 * Parshat Masei

Categories: Judaism

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments