HAKHOKHMA Post Post New Entry

Parshat Pinkhas

Posted by Moshe Ilan on May 17, 2011 at 10:20 AM

פרשת פנחס  (Number 25;10 - 29;40)

    Parasha hmasa lam a kan chhiar tak Parshat Balak leh tun tuma kan Parasha, Parshat Pinkhas te hi Torah a mihring hminga Parasha koh 5 te zinga 2 te an ni a, kan Khakhamimte chuan he Parshiot pahnihte inzawn nei tute atang hian thil chi hnih inlet hlauh zirchhuah an lo nei a, Balak-a Moav Lal kha chuan ahmaa a hnam tana thil hlauhthawnawm inchhawp chu amahin a sukiang ngam lova, Midian ho leh Bilaam-a a pun anih kha.


   Amaherawh chu, Pinkhas-a vethung chuan Israel hnam pum chhiat theihna thil ahmaa a hmuh veleh tumah rawn buai lovin hnam pum chhan nan a nunna pawh thap ngamin a ngaihdana tha atih chu a suttlang pui anih kha, hei hi ani Hilel Hazaken chuan Pirkei Avot-ah 'Mi an awm lohnaah chuan Mi nih tum rawh ' ti a Israel fate alo zirtir chu ni.


   Tin, Parshat Pinkhas hi kum tina 'Bein Hametsarim' (Tsom Tamuz atanga Tisha Beav thleng) lai kara chhiar thin ani a, hei hi kan Khakhamimte chuan 'engvangin nge Kut hlimawm lam thu hi he Lungngaih lai kar kher a chhiar anih thin?' tiin an lo zawt a, Ha'admor Rabi Israel Mirujin chuan , 'Lehkhabu thianghlim atanga kan hmuh angin, Chhandamna ni lo thlen hunah chuan Tamuz ni 17 hi Kut ni 1 naah achang anga, Av ni 9 chu kut tawp niah ala chang dawnin, an inkar nite chu 'Khol Hamoed' anla ni dawn ani, Jeremia (31;12) bu a kan hmuh angin, 'An Lusunna chu lawmnaah ka chantirin ka thlamuan ang,' tih ziak kan hmuh angin a ti a ni.


    Parasha hmasa lamah khan, a Parasha hming changtu Balaka chuan ama indona hmachhawn tur chu ama chunga mawhphurhna la duh lovin, Midian ho leh Bilaam-a a ruai anih kha, amaherawhchu, tuntum Parashaa a hming changtu Pinkhas-a ve thung chuan P' dodala chetna a hmuh rualin tumah rawn buai lovin mipuite zing ata, nihna leh pawimawhna nei mihring pawh ni lem lovin , rawn ding chhuakin a rawn che chhuak ta anih kha, he mite pahnih thil tih atang hian zirtur pawimawh tak kan nei a, chu chu; "Vawiina tihtur naktuka tih atan khek suh", tih leh, "Nangma chunga tihtur innghat chu midangte tih atan khek suh", tih hi a ni.  


    Kum dang angah chuan Parshat Pinkhas hi 'Bein Hametsarim' hun laiin atla thin a, hetih hun lai hi Jerusalem khawpui chhiat hun lai te, Beit Hamikdash chhiat hun laite leh, Israel hnam ten harsatna hrang hrang kan tawrh hunlai thin ani a, chuvangin, hetih hunlai hian Israel mipuite a tih hnualsuat loh nan he kan Parasha ah hian Judate Kut pui hlimawm tak tak chu chhiar alo ni bawk ani.


     Kan Parasha hawnnaah chuan 'Aharon-a fapa Elazar-a, chumi fapa Pinkhas-a chuan' tiin, a intana, hei hi engvangin nge a pu hming te nen lama a inziah duah kher ni? Kan tih chuan, hetia Zimria'n Kozvi (Midianit, Jentel nula) chu mipuite hmuh laiin Moshe Rabeinu hmaah "Moshe, hei Jentel nula hi nupuiah ka nei dawn e, enge i ngaih dan? Nang pawn Jentel nula tho ani lawm ni nupuiah i neih" tiin chaltlai takin a rawn zawta, chumai bakah a mutpui nghe nghe bawk a, (Moshe Rabeinu hian a nupui Tsipora a neih hma hian a Giur hmasa phawt ani), chu veleh Moshe Rabeinu rilru naa ding ngawi reng chu, engmah zawt khaw buai set set lovin, Pinkhas-a chuan a chemfei chu lain Zimri-a leh Kozvi mudun lai chu an zahmawh zawnah chhuntlangin puan in ata chu lek kangin an thisen far khat pawh far lovin a rawn lek chhuak ta a ani.


    Hetah tak hian, hetianga puithiam pawh nilo, Levi hnam mi naran mai main hetianga Shimon hnam hotupa ber Zimri-a, a khandaih hmanga engmah Israel puipa te emaw, Moshe leh Elazara te emaw pawhin Zimri-a chungthu an rel hmaa, a chunga Khandaih hmanga thihna hial thlentir tu Pinkhas-a chu Israel hnam puipa hote chuan an dem hle maia, "A ni, Putiela (Itro) Milem hmaa bawng no te hlan thin tu fapa Pinkhas-a an tih hian a chapo zia lantirin, rorelna pawh nghak duh lovin, Jentel thuthlung 'I khandaih hmangin i nung ang' tih ang khan Israel hnam puipa, ama khandaih ngeiin a thah tak hi," tiin, an elsen a, hetianga an sawi theih nachhan hi Pinkhas-a pa Elazara (Cohen Gadol) hian Tsipora-i unau nu (Itro-a fanu) chu Giur'in nupuiah a neih vang ani.


    He thu chhanna atan hian, Lalpa P' chuan 'Pinkhas-a chu Mi chapo mi ni lovin    khawvela mi inngaitlawm ber Aharon-a, Israel te zinga chanvo sang ber nei Ahrona Puithiam lal tupa leh Elazara Puithiam lal fapa anih hi, chuvangin, tuna a thil tih hi, mi dik anihna tilangin, ka thik thu min tawmpuina puang chhuakin mipuite hmaah P' hming a chawimawi zawk a, chuvangin, a pu Aharona'n Puithiam nihna a dawn hmaa piang niin, puithiam (Cohen) nihna pek ni ve lo mahse, tuna a huaisenna thiltha tih avang zawk hian tun atanga chhuan tawp thlengin amah leh a thlah te chu Puithiam nihna ah ka tinghet e", tiin, a puang ta zawk a ni.


     He thu anga hnam dang te leh Israel te inkara P' thik thu tihlanna hi Shkhem khuaah pawh khan hmuh alo ni tawh bawk a, khatah khan Zimri-a pu Shimon-a leh Pinkhas-a pu Levi-a te khan zan khatah Shkhem khaw mipa zawng zawng an that vek anih kha, khata an thikthu kha thik thu dik anih leh nih loh chu tuna an tute ah hian lo lang chhuak tain, Levi-a thikna kha P' hminga thikna dik ani a, tin, Shimon-a thikna vethung kha erawh chu, a chak zia lantirnan P' hming chhal awm tak sia tiin, a tute ah lo lang chhuak tain, Chhiarpui hmasa (Number 1;23) ah khan, Shimon hnam te kha mipa kum 20 atanga kum 60 inkar kha mi 59,300 lai an ni a, tun tuma an inchhiarna ah hian mi 22,200 chuah an nita mai a, heta tang hian tun Parasha a Midian hmeichhe laka thilsual an tihna avanga P' in hri a lentira Israel mi 24,000 lai an thina ah khan Shimon hnam amite an tam ber a ni tih a lang thei a ni.


    Tin, kan Parasha ah hian Tslofkhad-a fanu te Makhla, Noa, Khogla, Milka leh Tirtsa te chuan an pa'in fapa a rochuntu tur aneih loh avangin ram chanvo min pe ve rawh tiin, Moshe Rabeinu hnenah chuan an dil a, hetia an dil hian, "Kan pa chu nangmah leh Ahron-a thu awih em em tu niin, Korakha'n a dodal lai che pawh khan an zingah a tel ve lova, ama thil  tihsual avangin a thi zawk ani" tiin, an sawi tel kher a.


    Hetah hian Moshe Rabeinu hian ama ziah ngei hetianga Rochun chhawn dan tur chu, eng vangin nge, chawp leh chilha chhanga a hrilh mai loh? Engatinge, "P' ka han rawn phawt ange," atih tak mai kan tih chuan, hetah hian Moshe Rabeinu chu hrem niin, alak atangin Rochun chhawn dan tur (Halakha) chu theihnghilh tir a ni a, hei hi  (Deut 1;17) naa  'Rorelnaah chuan theihbik leh duhsak bik in nei tur ani lo, thu khirh lutuk chu ka hnen in rawn thlen thin ang,' tih anih avang hian, tun tuma Tslofkhad-a fanu ten 'kan pa chu nangmah leh i u Aharon-a thu awih em em tu ani' ti a an sawi avang hian an chunga rorel tur atan a tlak ta lova, chutilovin, tuna P' sawi ang chiah tho hian chawp leh chilhin lo chhang ta se chuan, a duhsak avanga a tha zawnga rel nih theihna dinhmun a chang dawn avangin, a lak atang chuan he Halakha hi lak bo sak nitain P' in an ro chu a rel sak ta zawk a ni.


   An pa Tslofkhad-a hian ama suah sualna avanga Shabat ni bawhchhia a thing fawm ani lova, tumna (kavana) tha neiin, Shabat bawhchhia te hrem anih dan tur chhuan lo awm zelte'na, Shabat bawhchhiat hlauhawm zia an hriat theihna turin P' hming ropui nan tiin, Shabat hi a bawhchhia a, tichuan, Shabat bawhchhia te hremna chu lunga denhlum tur a ni a, tichuan ani pawh chuan alo thihpui ta a ni.  

 

Categories: Judaism

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments