HAKHOKHMA Post Post New Entry

Parshat Balak

Posted by Moshe Ilan on May 17, 2011 at 10:10 AM

  פרשת בלק   (Number 22 - 25;9)

   Torah a Parasha (kar tina Torah bung chhiar thin) ho 54 zingah hian mimal hminga koh Parasha 5 an awm a, chung zinga he kan Parasha hi Moav Lal Jentel mi 'Balak-a' hminga koh ani a, he Jentel mi hian eng thil nge atih a, eng tin nge Torah a Parasha hial a hminga koh a phu nachhan? kan tih chuan, Israel mifing hote chuan 'Masekhet Sota' ah heti hian an lo sawi a, 'Korban'(thil hlan) vawi 42 lai alo hlan avangin, he Moav Lal Balak-a atang hian Ruthi alo piang a, chu mi atang chuan Israel Lal pahnih, David-a leh Shlomo-a an lo pian phahin an thlah atang hian kan nghah Lal Mashiakh hial pawh alo la pian dawn avangin Torah a Parasha khat chu ahminga koh alo phu ta ani tiin.


    Tin, Bilaam-a Jentel te zawlnei ropui ber chuan Israel hnamte chu a Anchhia hmanga tihhlum alo tum chu a Sabengtung chuan thil awmzia hrilhfiahin, Bilaama'n 'Khandaih lo keng phei ila chuan ka that nghal ang che,' tiin a sabengtung a vauva, a sabengtung chuan 'nang teh chei, khandaih tel lova kei ransa mai min that thei lo tu khan Israel hnam pum i ka hmanga tihhlum i tum maw? i hlawhtling lo pit ang,' ati a, Kan pu Itskhaka'n 'Aw chu Yakov-a aw, Kut chu Esav-a kut' ti a alo sawi ang khan Judate chakna chu kan AW, kan tawngtaina hi ani a, chu chu hnam dang ten min do nan an hmang thiang ve lovin, kei ni'n kan chakna, hnam dangte kan hneh theihna chu kan aw, kan tawngtaina hi ani tih hriat a thain, ralthuam leh khandaih ani ve lo ani. Hetiang ang chiah hian, Bilaam-a Jentel pa chuan kan chakna hmanrua ang a KA hmang chuan Juda te beih a tum veia, Jentel te hmaraw ralthuam ban tha chakna hmangin ani pawh Khandaih hmanga tihhlum zawk anih tak kha, hei hi a lawm 'Mida keneged Mida' (mahni thil tih angin min deng let thin) kan tih thin kha.


     'Israel te zingah Moshe Rabeinu ang zawlnei ropui a piang leh tawh lovang' tih ani a, mahse, tuna kan Parasha a kan hmuh ang hian Jentel te zingah erawh chuan, Moshe Rabeinu anga ropui zawlnei, a duh hun huna P' be thei tu Bilaam-a a awm thu kan hmu a, hei hi nakinah Jentel ten, P' hnenah Moshe-a ang Zawlnei ropui min lo pe ve la chuan i thu angin kan awm ang chu.. tia an la rawn chhuahchhal huna an neih ve zia tihlanna tur ani.


      Tin, chumai bakah, Jentel ten P' in Israel fate Mitsvot (thupek) a pek ang hi min lo pe ve se chuan, kei ni pawhin Olam Haba (khawvel lola awm tur) ah pawh lawmman tam tak kan dawng ve ngei ang, tia an chhuahchhal thinna chungchanga, Jentel te fiahna chu, Sukah (Bawkte) a ni sarih awm tirna thupek chu tih tir chhin an nia, mahse, ni khat pawh an awm peih lova, a chhuih in an chhuih zui thin, kan tih ang khan, tun kan Parasha a Bilaama'n Israel fate anchhe lawh tura a kal lai pawh hi, Shalosh Regalim Juda te Kut pui pathum zinga pakhat Sukot hun lai ani a, khatia, Balak-a mi tirh te khan  Bilaam-a  an va   koh khan,    Bilaama'n  P' a han rawn khan, P' chuan "Anchhia i lawh tur a ni lo, mal ka sawm tawh te an ni a", tiin, a lo hrilh a nih kha, tichuan, a tukah, Balak-a mi tirhte hnenah chuan Bilaam-a chuan "Malsawm hnam te an ni a, anchhia ka lawh thei lovang," tia hrilhin, a haw tir lehta hlawm anih kha.


     Amaherawhchu, Balak-a chuan, Jentel mizia a hriat chian avangin, Bilaam-a lo kal duh loh nachhan chu, a lakah zah derna leh hlawh tur ka tih nep vang a ni mahna, tiin, a hmaa a mi tirhte aia mi ropui zawkte leh, rohlu tam tak pek anih tur hrilh turin mi dang a tir leh a, tichuan, Bilaam-a chuan, P' chu a han rawn nawn leh ta a nih kha.


     Heta a thu ngaia P' a rawn nawn leh kher hian Jentel te P' biak dan, an ngaihdana P' nihphung a ti hril chiang em em a ni, a chhanchu, P' , a thu sut tawh ngai lova chu, engtin emaw tih lungawi dan zawnga a thu suttir theih emaw ati a ni. Keini Juda te nen kan danglamna chu, Juda te chuan P' in Mitsvot (thupek) min pe a, chumi hmanga tha taka kan nun chuan P' mit kan tlungin, kan chungah P' in tha atih angin ro a rel thin a, mahse, Jentel te ve thung chuan, an ngaihdanin P' in an chunga ro a rel dan tur chu an mahni duh dan ang leh, an dil ang tea an chunga ro rel thin turin an duh a, chutiang ang chiah chuan, Bilaam-a pawh hian, a hmaa P' in a hrilh tawh sa chu ama duh dana P' chuan thlentir turin a rawn nawn leh ta a ni.


    Hetah hian Bilaam-a hian P' a biak naa a hlawhtlin theih ngei nan, tha atih deuh chhuanlam a siam a, chu chu, Israel (Jakob-a) fate chu malsawm hnam an nih chuan, i zawlnei ka ni bawk a, an mahni thlak turin ka thlahte chu i hnam thlan atan i nei  mai dawn  nia ,  tichuan, anchhia min lawh hlum tir rawh khai tiin, a dil ani.  


    Tichuan, 'mi chu a duhna lamah kal  tir thin ani', tih angin, Bilaam-a pawh chu P' chuan "I duhna lamah chuan va kal ta poh che, mahse, i hlawhtlin tur thu chu i kutah a awm lovang," tiin, a thlah ta a.

 

   Tichuan, Bilaam-a chu phur takin, a Sabengtung nu chunga chuangin a kal ta a, a kal kawngah chuan, P' in "khawi nge Israel te nihna ang, malsawm hnam thlan ni tur chuan, an tih ang Mitsvot (thupek) te i ti ve thei chei emaw chu…" tiin, a fiah ta a, tum thum lai a Sabengtung hmuh turin a kalna  dal chuan Vantirhkoh a din tir ta a, hei hian entir kum sawmriat zet zir tham tur a nei a, chung zinga a thenkhat chu, hei hian Shalosh Regalim (Hmun thianghlim tlawh Kut 3 te) a entir a, chung zingah chuan, he a kalna hunlai hi sawi tawh angin Sukot (Bawkte kut) kut lai ani kan tih tawh kha, hetia Vantirhkoh a tawhna hmun hi Grape huan bul pal leh pal inkar ani a, P' in a fiah vawi thumna ah phei hi chuan, ding lam leh vei lama penna awm tawh lo hmun chep lai tak, a kal zelna tur lamah Vantirhkoh a dintir a, a sir leh sir chu Grape zamna pal ni bawkin, a hnung lamah Sabengtung chu thuttir bawkin, a chung lama Grape zamna zar leh a hnah te chuan Sukah (Bawkte) Kasher dik tak chu Bilaam-a luh mai theih tura buatsaih sakin, Mitsvat Sukah (Bawkte a awm thupek) chu tihtir chhin tumin an beih ngial hnuah pawh Bilaam-a chuan a Bawkte bang a Sabengtung chu petin a vaw zui anih kha.


    Hei hi a lawm, Jentel ten  P' in Israel fate angin dan leh thupek zawm tur 613 lai min lo pe ve se chuan, a duh ang takin kan awm ve theiin, lawmman pawh khawvel lola awm turah pek kan ni ve ngei ang an tih chu, an Zawlnei lian ber Bilaam-a, P' ngei pawh tawngkaa be thei tu meuh pawhin Juda te tih thin ang Mitsvah (thupek) pakhat lek pawh a zawm theih loh chuan, a Jentel mipuia sa kechek tan chuan, a engmah an tih theih loh zia he thu atang hian chiang takin kan zir thei a ni.

 

    Tin, heta Vantirhkoh hi hmun thum khera a lo din nachhan hian awmze hrang hrang entirna anei leh bawk a, hetiangin; kan pu te 3 Avraham-a, Itskhak-a leh Yakov-a te a entir a, chu chu, Vantirhkoh lo dinna hmasa ber kha kawnglai niin dinglam leh veilam a penna awm ani a, chu chuan Avrahama a en tir a, hetiangin; Avrahama chuan fa Ishmaela leh Sara-i thih hnua Keturi fate ho kha a ni a, tichuan a laia Vantirhkoh ding chu Itskhak-a entirna niin, tin, a hnu leha a lo din lehna kha hmun chep lai, sir khat chauhva kal tlang theihna awm ani a, chu chuan Itskhak-a a entir leh a, hetiangin; Itskhaka chuan fa 2 Yakov-a leh Esav-a te an nia, tichuan, alaia Vantirhkoh ding chuan Yakov-a chu a entir leh a tichuan, Esav-a lamah chuan ala kal tlawng theih a, amaherawh chu, a lo din vawi 3 naah kha chuan hmun chep lai tak ding lam leh vei lama pena awm lohna laia ani a, chuchuan Yakov-a a entir leh ta a, chumi awmzia chu, Yokov-a chuan fa dang Jentel mite a hring ve tawh lova, chuvangin, kal penna dang a awm tawh lo a ni, hei hian a entir tum tak a chu, Indopui (Gog Umagog War) hi vawi thum a awm dawn a, chumi ah chuan a tum khatna ah chuan, Jentel ten hnehna an chang anga, chutiangin, a tum hnihnaah pawh, amaherawh chu, a tum thumna ah ve thung chuan, Mashiakh Lal ram lo intan na tur ni tawh dawnin, chu indona ah chuan Jentel ten an tum ang ngawtin hnehna an paltlang thei tawh dawn lova, Juda ten hnehna ropui chu changin Mashiakh Lal ram a lo intan tawh dawn a ni.

Categories: Judaism

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments