HAKHOKHMA Post Post New Entry

Sa leh Bawnghnute בשר וחלב

Posted by Moshe Ilan on January 27, 2011 at 7:30 PM

Sa leh Bawnghnute

 

1. Torah ah "Kel note chu a pui hnute tuiin i chhum tur ani lo" tih vawi thum lai ziak kan hmu a, chuta tang chuan a thian loh dan chithum kan zir chhuak thei a, chungte chu;

 

(1)Chhum pawlh – Torah chuan Ke pali nei sa chu Bawnghnute lam nen chhum pawlh a phal lova, chutiangin, ke pahnih nei Arsa ang reng reng pawh Derabanan atangin phal loh ani.

(2)Ei pawlh – Sa leh Bawnghnute chhum pawlh reng rengte chu Torah atangin ei thiang lo ani a, tin, chhum kher lova inpawlh te pawh Derabanan atangin thiang lo a ni.

(3)Nawmsak pui nana hman – Sa leh Bawnghnute inchhumpawlh reng rengte chu Torah atangin nawmsak puinan hman thiang lo a ni, nawmsak puina tih hian, Ran eitur atana pek te, zawrh leh hnam dangte hnena pekte a huam a ni.

 

2. Ke pali nei sa chu Bawnghnute nen a lo inchhum pawlh chuan paih bova, tihral tur a ni a, Jentel hnenah emaw ran hnenah pek thiang ani lova, amaherawhchu, a bawnghnute a kha a sa ai khan a let sawmrukin lo tam zawk tase chuan, a sa akha lak chhuahin a bawnghnute chu a in theih a ni.

Ke pahnih nei sa (Arsa ang chi) emaw, ke pali nei sa tuia darkar 24 lo inchiah tawh emaw, chi nena lo inchiah pawlh tawh erawh chu nawmsak pui nan hman athiang a, ran leh Jentel mite kan pe theiin kan hralh thei bawk.

 

3. Khakhamim te chuan Sa leh Bawnghnute hi chhum pawlh kher lovin a vawt pawhin lo inawm pawlh tase, chung ang pawh chu an phal lova, tin, dawhkan pakhat chunga dah ho pawh an phal lova, amaherawhchu, atih theih dan bik hmang erawh chuan a tih theih dan pawh a awm.

 

4. Sangha leh bawnghnute chu chhum pawlh leh ei pawlh chu thiang ani a, amaherawhchu, Sfardim ho chuan an ei pawlh ngai lova, tin, Sangha chu Khema (bawnghnute giu) nen chuan an ei pawlh thin an awm bawk.

 

5. Jentel hnenah chuan sa leh bawnghnute inpawlh chu pek thiang ani lova, chutiangin, sa pawh bawnghnute bela chhum turin pek thiang ani lo bawk.

 

6. Jentel Restaurant a Tabakh (chaw chhumtu) hna thawk inih chuan bawnghnute belah 'Sir ben yomo' (darkar 24 chhunga bel hman hnu) ah ke pali nei sa i chhum thiang lova, chutiangin sa bel 'sir ben yomo' ah pawh bawnghnute i chhum thiang chuang lo. Amaherawhchu, 'Sir eino ben yomo' (darkar 24 chhunga hman loh bel) ah chuan i chhum thei ang. (juda sakhawmi lo an lo eive palh dawn chuan chhum thiang chuang ani lo.)

 

7. Sa leh Bawnghnute khawihna hi a hranga neih tur ani a, heng, tui dehna te, thuk te, thil urna te, choka mamawh thil ang reng rengte chu ahrana neih tur aniin, an hman dan te chu chiang taka hriat tur a ni.

 

8. Rambam chuan a lehkhabu ziah pakhatah hetianga Sa leh Bawnghnute ei pawlh thiang lo chung chang hi Jentel te tihdan thin a ni a, an milem biakna leh an kut ni thenkhatah te an ei pawlh thin a, chuvangin Juda chu P-thian hnam thlan kan ni a, hnam dangte laka min tihhran nan leh an mahni kan an ve loh nan Torah chuan kan ei pawlh ve a phal ta lo a ni ati.

Tin, hetianga Kel note sa chu a pui hnute tuiin i chhum tur ani lo tih kher hian, nunrawnna thila min tihhlatna chikhat ani ti a sawi a awm bawk.

 

                                                   Eitur chung chang

 

1. Sa leh bawnghnute atanga eitur chi siamte hi a tam em em a, a lum chunga ei chi te, a vawt chunga ei chite, a diak, a khal, kuta ei chi leh fian hmanga ei theih chi leh a mawm chite a tam em em a, chuvangin, mitin te chuan kan thil ei tur reng reng chu kan fimkhurin bawnghnute atanga siam nge, sa lam atanga siam ani tih kan ei hmain kan finfiah hmasa thin tur a ni.

 

2. Sa leh bawnghnute atanga thil siam reng rengte chu an vawh lai pawhin dah pawlh chungchangah kan fimkhur hle tur a ni a, hei hi achhanchu, an lo inchar palh anga kan lo eipawlh hlauh dah ang tih hlauhthawn thil thuah a ni a, chuvangin, dawhkan chungah emaw, chhuar ah emaw, Freezer chhungah pawh nise, a ingheng leh a insia dah loh tur a ni a, chuvangin, kan dahna hmun tur chu ahranga ruat ngei tur a ni.

 

3. Hetiang sa leh bawnghnute thil lam kan lei hunin kan fimkhur em em tur a ni a, a nem chi leh a mawm chi ang anih leh lek phei chuan kan lei hunah khan sahar hranah dah ngei tum tur a ni.

 

4. Eitur chi, ei hma a sil fail eh vel ngai chi ang , sa, thlai, sangha etc.. te chu eitura siam hma hian a tuldan a zirin dah pawlh thiang a ni a, amaherawhchu, eitura siam dawn hian fai taka sill eh vel fai phawt tur a ni. Amaherawhchu, eitur chi ei mai theih chi, sweet, chhang leh a ang chi reng reng te chu sa leh bawnghnute te nen hian ka sill eh maiang ti pawhin dah pawlh loh tur ani a, a chhanchu, kan lo theihnghilh palh emaw anga, kan lo ei palh mai loh nan a ni.

 

5. Bawnghnute emaw sa emaw chu sahar emawin fun that hle anih chuan, thil chhung hmun khatah pawh dah pawlh thiang a ni a, amaherawhchu, kan dah pawlh hmain a phui tha em tih chu an chian hmasa phawt tur a ni.

 

            Mi thenkhat chuan Freezer chhungah chuan dah pawlh thiang ti an awm a, amaherawhchu, freezer kha a lo chhiat palhin a lo intifin palh theih avangin fimkhur takin , dahpawlh loh tur a ni.

 

6. Khakhamim te chuan Chhangthawp chu bawnghnute nen ur pawlh thiang lo an lo ti a, chutiangin, chhangthawpah pawh a tih mawi nan emaw, sahriak chulh pawh a thiang lo a, hei hi, miin hre lovin sa nen emaw, bawnghnute nen emaw an lo ei pawlh palh loh nan a ni.

 

      Hetianga ur pawlh theihdan hi chi thum a awm a chungte chu;

(1)Chhangthawp chu abik leh a pianhmang tihdanglam bikin.

(2)Chhangthawpah chuan san en emaw, bawnghnute nena tihpawlh ani tih hriat thiehna siamin.

(3)Chhangthawp chu avaia eizawh dawnin- Sfardim- Tum khat eiah. Ashkenazim- ni khat chhunga ei zawh dawnin.

 

7. Chhangthawpah chuan sa tui emaw, bawnghnute emaw a lo buak chuan, ei thiang tho a ni nachungin, a chhangthawpah chuan chhinchhiahna siam tur a ni a, achhanchu, miin hre lovin a engemaw zawk zawk nen chuan an lo ei pawlh palh loh nan a ni.

 

8. Chhangthawp zaina tur chemte chu abik neih tur a ni a, hei hi sa emaw, bawnghnute lam zei palh loh nan ani a, tin, sil hunah pawh abikin a hrana sil tur a ni, tui saah phei chuan fimkhur lehzual a ngai.

Engemaw thut thilah pawh bawnghnute lam thi kan ei pui dawnin Chhangthawp chu Sa zaina chemin kan zai tur ani lova, chutiangin, Sa lam thil kan eipui dawn hunah chhangthawp chu bawnghnute chemin kan zai tur a ni lo.

 

9. Sa kan eipuina Chhangthawp bang chu bawnghnute kan ei pui thiang lova, chutiangin, bawnghnute kan eipui chhangthawp pawh chu sa nen kan ei thiang lo a ni.

 

10. Sa kan eina a kan hman dawhkan khuhna chu bawnghnute kan ei hunah kan hmang thiang tawh lova, chutiangin, a letling pawhin, chuvangin, ahran kan hmang tur a ni.

Dawhkan khuhna chu a phui tha leh a chhah tha anih chuan, a lehlam sa lam ei nan, alehlam bawnghnute lam ei nan kan hmang thei, mahse, hriat hranna neih ngei tur a ni, chutianga kan tih dawn chuan.

 

11. Mitsvah tha taka zawm duh te chuan, sa ei laia chhawp hnu engemaw , abik a a suah chhuahna fian bik hman pawh nise, bawnghnute einaah an chhawp leh ngai lo, chutiangin, a let zawng pawhin.

 

                                                        A kil tute a hranin

 

1.Khakhamim te chuan dawhkan pakhat kilin mi pahnihte chuan sa leh bawnghnute an ei rual tur ani lova, tin, bawnghnute lam thil awmna dawhkanah mi chuan sa lam a ei tur ani lo,m chutiangin, a let zawng pawhin an lo ti a, he thu ah hian sa chu eng sa pawh a kawkin, ke pali nei leh ke pahnih nei sa pawh a kawk a ni.

 

      A hmaa thil lo ei te chuan dawhkan pakhat chungah chuan sa leh bawnghnute lam thil an lo dahin an lo kal san ta a, chutiang kan hmuh vaih chuan, kan hmuh veleh a chi khat zawk zawk chu kan paih tur a ni.

 

2. Mi pahnih , a pakhat zawk chuan sa eiin, a pakhat zawk chuan bawnghnute ei ta se, chhangthawp tlawn khat ami an ei dun thiang lova, chutiangin, chi chhawp pawh hmun khat ami an inliah tawm thiang lo. Chutiangin, intur chi chhawp pawh chu no hran ve ve a thli chhuak chung pawhin an in inpawlh loh chu a tha a ni.

 

3. Mi pahnih, inhmelhriat te chu dawhkan pakhatah, a pakhat zawkin sa eiin, a pakhat zawkin bawnghnute a ei chuan, daidanna leh hriat hranna hetiang hian an siam tur a ni; (1) dawhkan khuhna hran ve ve. (2) an thleng hnuaia chaw eina a hman thin loh thil an dah sanin. (3) dawhkan sei anih chuan, a sir tawp ve ve a an thut hranin. (4) an mahni inban pawlh loh tura vengtu, thil ei ve lo a awmin.

 

4. Mi chuan sa a ei hnuah darkar ruk pawh la ral lo mahse, Parve (sa leh bawnghnute lam nilo) lam a ei dawnin, bawnghnute ei ho dawhkan chu a kil ve thiang a, amaherawhchu, a thil ei tel tur zinga mi Thei emaw chu, ahmaah a dah lang vang tur a ni.

 

5. Nu emaw chuan, sa a ei hnuah darkar ruk pawh la ral lo mahse, bawnghnute lam thil chu chhumin a siam thei a, amaherawhchu, a tem palh loh nan a fimkhur hle tur a ni.

 

                                                  Ei hun dai danna

 

1.Sa lam reng reng ke pahnih emaw ke pali nei sa emaw, sa tui leh a kaihhnawih thil chhum tel ang reng reng chu ei kham san anih atangin darkar ruk aral pumhlum hma chuan bawnghnute lam thil reng reng chu a ei thiang lo a ni. He darker hi sa kan ei kham hnua 'Brakha akhrona' (chaw ei kham lawmthu sawina) kan sawi hnu atanga chhiar tan tur a ni.

 

2. Darkar ruk nghah hian sa kan ei laia kan ka a a tuina leh kan ha kara sa them la chambang te chuan darkar ruk thleng riral nan hun a duh a, tin, sa mawm chu hrawk leh chaw kawng a a chamban hunchhung anih avangin, hemi hunchhung hian bawnghnute ei lo tura inserh tura a ni.

 

          Darkar ruk hnuah kan ha kara sa ala tang tih kan hriat chuan, bawnghnute lam la ei loh tur a nia, tin, kan kherchhuah emaw, kan lak chhuah chuan, kam kan thuah phawt tur ani a, kam thuah hma hian bawnghnute ala ei theih lohva, tin, kam thuah hnu hian darkar ruk nghah kher a ngai tawh lo bawk.

 

        Tin, mi thenkhat darkar thum leh darkar khat chauh nghak thin an awm bawk a (Europe thlang lama chengte leh Holand lam chhuakte tih thin dan ), amaherawhchu, Israel ram tih dan leh Torah hmanga nung mi tan chuan darkar ruk chu nghah ngei tur a ni.

 

        Tin, mi thenkhat, darkar 6 vel ral tawh awma hriat emaw, zan mutthilhin darkar 6 chu a pawt tawi ti an awm a, amaherawhchu , chu chu Halakha ani lo a ni.

 

3. Sa eia thial a, lem lova chhak leh chuan, darkar ruk a nghah tho a ngai a, amaherawhchu, sa tem chhina, thial si lova chhak leh mai chuan, anghah angai lem lova, amaherawhchu, akam chu a thuah fai ngei tur a ni.

 

4. Eitur teng chi (Limon, hmarcha etc..) chu sa lam zaina chemte a chan leh zai a nih chuan, bawnghnute lam thil nen ei kawp thiang lo ani a, amaherawchu, chutiang anga zai hnu ei chuan darkar ruk nghah kher a ngai hran lo.

 

5. Artui pum, sa chhumna a chhum vein, lakchhuah hnuin fai taka sil pawh nise, a artuia chuah pawh ei ila, bawnghnute ei leh nan darkar ruk tho nghah angai.

 

          Amaherawhchu, artui chu a pumin, sa chhumna bel chhin chungah chuan dah hmin ta ringawt ila chuan, bawnghnute nen ei a thiang.

 

                                                  Eitur dang Sa belah

 

1. Sa bel fai taka sil hnu, sil fai anih atanga darkar 24 chhung hman loh hnuah , chu belah chuan Bawnghnute leh Sa lam ni lo eitur (Parve) chhum ta ila, chu chu Ashkenazim ho pawhin bawnghnute nen an ei thei a, amaherawhchu, chu thil chhumah chuan eitur thak chi emaw, thur chi emaw a tel chuan bawnghnute nen ei pawlh thiang lo a ni.

 

        Sa bel chu sil fai anih atangin darker 24 chhungin Parve thil chhum ta ila, chu chu bawnghnute nen Sfaradim ho chuan an ei pawlh thei a (Bediavad in), amaherawhchu, Ashkenazim ho chuan a rualin an ei pawlh thiang lova, a hnuah emaw, a hmain emaw chuan an ei thei.

 

2. Eitur Pashtida emaw ah chuan sa tui emaw a them emaw lo tla palh tase, a tlakna bawr vel chu (Kedei Klipa) a tlakna chin chiah aia tam deuh paih thlak tur ani.

 

3. Thleng plastic emaw thil danga siam pawh nise, pakhat nisi a chhungah dai danna fel tak awmin sa leh Parve thil awm kawp tase, a parve lai chauh chu kan ei zawhin bawnghnute lam pawh kan ei zui thei, amaherawhchu, aruala ei loh tur aniin, fimkhur hle tur a ni.

 

                                                            Marit Ain

 

1.Eitur Parve thil, bawnghnute ang taka siam ang chi Vur diak (Glida), aphuana siam chi (Ktsefot) ang chite chu Chocolate rawnga siam pawh nise Parve an nih miau chuan sa nen ei pawlh thiang an ni a, tin, Margarina (giu lam thil) angte pawh Parve an nih chuan sa emaw bawnghnute emaw nen ei pawlh thiang an ni a, amaherawhchu, kan ei lai hian kan eina bulah a tuam kawr chu kan dah lang ngei tur a ni , hei hi miin bawnghnute leh sa kan ei pawlh emaw an tih loh nan (Marit ain) ani.

 

2. Sa leh Khalav Shkedim (theite mu tui sawr var) chu kan ei pawlh reng rengin kan thlengah chuan a theite mu (Shkedim) chu kan dah tel ngei tur ani, hei pawh hi miin sa leh bawnghnute kan ei pawlh emaw an tih loh nan ani.

 

           Chutiangin Parve atanga bawnghnute an siam ang chi reng reng chu sa nen kan ei pawlh tur ani lova, amaherawhchu, kan eipawlh anih chuan, a funna kawr chu kan thil eina bulah chuan kan dah lang vang tur a ni.

 

                                    Brakha chung chang a tihsual palh

 

1.Mi chuan sa a ei atanga darkar ruk ala ral hma chuan theihnghilh palhin bawnghnute lam thil lo ei ta se, a hriatchhuah rual rualin a kham san anga, akam chu fai takin athuah tur a ni.

 

2. Hetia darkar ruk ala ral hma hian theihnghilh palhin bawnghnute lam thil lo ei dawn tase, a brakha a sawi chiah tihin hrechhuak leh ta se, sa a ei atanga darkar khat aral hman chuan tlem te a tem thei ang, hei hi, a brakha sawi kha a loh thlawna a chan tir loh nan ani, abikin ke pahnih nei saah.

 

                                             Naupang leh Naute tan

 

1.Naute kum thum la tling lo chu sa a ei zawh chiah ah pawh bawnghnute ei zui tir thiang ani a, amaherawhchu, aka ah chuan sa them leh hnuhma kai lo tura tihfai sak phawt tur a ni.

 

         Naute kum thum leh kum nga inkarah chuan darkar khat nghah tir tur ani a. Tin, kum nga atanga kum sawm inkarah chuan darkar thum nghah tir tur a ni a, tin, kum sawm chin chunglam atang chuan naupang hrisel pangai an nih chuan hmeichhia pawh mipa pawh darkar ruk nghah tir ve tur ani.

 

                                        Damlo, Nau nei leh hnute pe lai

 

1.Damlo chu hlauhthawn awm pawh nilo mahse, doctorte thu rawn angin sa a ei hnuah bawnghnute ei zui ngai tase, ke pali nei sa pawh ei mahse, darkar khat a nghah chu a tawk a, amaherawhchu, a ha chu a kher faiin a kam athuah hmasa phawt tur a ni.

 

          Raipuar leh hnute pe lai pawh nise, engmaw thila doctor te rawnna anga bawnghnute a in a ngaih chuan hetiang dan tho hi a hmang thei ang.

 

                                          Bawnghnute ei zawh a Sa ei

 

1.Bawnghnute lam atanga thil siam emaw kan ei hnuin, Sa lam ei leh duh ta ila, kan kut leh ka chu fai takin kan sil phawt tur ani a, a dan takah chuan (Meikar hadin) a ei zui nghal theih a, amaherawhchu, minhag khasidut ah chuan darkar chanve tal nghah phawt hnuah an ei thin. Tin, bawnghnute kan eina dawhkan ah khan kan ei zui dawn chuan, dawhkan chu tihfai hmasak phawt tur ani. tin, ke pahnih nei lam sa kan ei dawn chuan tlemin alak zam theih deuh bawk.

 

2. Bawnghnute in zawh hnuah sa kan ei zui dawn chuan kam thuah ringawt chu a tawk ti an awm a, tin, kam thuah kher lovin thil intur dang in phawt hnuah pawh sa chu a ei zui theih ti an awm bawk. Chutiangin, a inkarah hian Brakha Akhrona sawi ngai ti an awm bawk.

 

        Tin, Bawnghnute in hnuah hian darkar khat a liam tawh chuan engmah tizui lem lo pawhin sa chu a ei zui theih bawk.

 

3. Bawnghnute giu a sak chi a siam (Gvina kasha) ei hnu hian sa chu ei leh duh tai la, Ashkenazim chuan darkar ruk nghah a ngai a, amaherawchu, Sfaradim chuan darkar khat chauh nghah an ngai thung ani, tin, ala zam deuh an awm bawk a chu mite chuan nghah hranpa a ngai chuang lo an ti bawk.

 

4. Ha chhiat vanga hnawh phui tawh emaw, Ha chhiat vanga vuah chi reng reng vuah pawhin, a dan pangai ang hian an zawm ve tur a ni a, amaherawchu, an ka chhung an sil hian an fimkhurin uluk takin an tifai tur a ni.

 

5. Ha lem vuah ho te chuan a tha berah chuan sa eina bik tur ha lem leh, bawnghnute lam eina bik tur ha lem a nei hrang tur a ni a, amaherawhchu, Poskim (Halakha siamtu) thenkhat te chuan, a dan pangai ang dan zawm ve vekin, (an ha lem chu Kosher hranpa chuang lovin) an hmang kawp thei ti an awm bawk.

 

                                    Sa leh Bawnghnute insi palh

 

1.Bawnghnute lam thil vawt ro bawk si chuan Sa vawt ro bawk si chu dek palh tase, tihhran tur aniin, a engemaw zawk zawkah chuan apakhat zawk chu a them emaw a kai em tih chu enfiah tur ani a, an inkai loh chuan sil fai kher lo pawhin a ei theih.

 

      A pakhat zawk zawk pawh chu, tlemin hnawng deuh pawh nise, tui vawt pangaia silin a ei theih ani.

 

2. Bawnghnute atanga thil siam vawt chuan sa vawt chu dek palh tase, a pakhat zawk zawka chu mawm tase, an in dehna lai chu fai taka sil tur. Chutiangin a pakhat zawk zawka chu lo al tase, an pahnih chuan silfai tur, a ro pawh nise.

 

3. Chhangthawp chuan sa emaw, bawnghnute emaw a deh palh chuan, a pakhat zawk ang nen chuan ei pawlh thiang lo. Kan ei pawlh kher a ngaih chuan a deh palh nalaia kha zai thlak tur ani. chutiangin, chhangthawp chungah chuan sa tlang tui pai i dah palh chuan, chutiang thilah chuan zai thlak pawh a sawt lo.

 

                                               A sat laia in si palh

 

1.Sa leh bawnghnute sa chu an inpawlh palhin emaw, apakhat zawk chauha chu a sa emaw, hetiangin; bawnghnute vawt chu Sa sa ah a tla lut emaw, sa vawt chu bawnghnute sa ah a tla lut emaw a nih chuan, an vai chuan ei thiang lo ani a, amaherawhchu, apakhat zawk aia apakhat zawk kha a let sawmruk a atam zawk chuan, a ei theih.

 

            Sa tlang bawnghnute a tla lut chu, a sir kual chu zai thlak (kedei klipa) tur ani a, tichuan a chhung lampang chauh chu ei thiang a niin, a bawnghnte a pawh chu ei a thiang. Tin, sa emaw chu bawnghnute a atlak luh veleh chuan kuta lakchhuah vat tur a ni a, hmanraw hmanga lak chhuah loh tur a ni.

 

2. Sa bel chhunga atui ah chuan bawnghnute far palh tase, a let sawmruk a tlin chuan ei theih a ni a, bel chhunga a tui chim lohna hmuna sa tlangah chuan bawnghnute far palh tase, a satlang kha bawnghnute far thla let sawmruk a tling em tih enfiah tur ani a, a tlin chuan ei theih.

 

3. Sa bel chhunga a tui chim lohna hmuna sa tlangah chuan bawnghnute a far palahin, kha sa tlang kha bawnghnute far ai khan a let sawmrukin a tet zawk chuan, kha sa tlang kha, lak chhuah tur a ni a, tichuan, bel chhunga sa dang leh a tui awmte chu kha sa tlang ai khan alet sawmrukin a tam zawk em tih enfiah tur ania, a tam zawk chuan kha sa tlang tello khan a ei theih.

 

                                         A hnawng chunga insi

 

1.Sa leh bawnghnute thil tuiril chhunga an awm pawlhin darkar sawmhnih pali chhung an inchiahin, chhum anga ngaih aniin ei a thiang tawh lo.

 

2. Sa leh Gvina (bawnghnute khal) chu thil teng (kharif) chhungah lo inchiah pawlh tase, hetiangin, thil al chhungah emaw, thil thak chhungah emaw, thil thur chhungah emaw lo awm pawlh tase, Sa chu ahnuah chhum leh duh tai la, kha thil teng chhungah khan minute sawm chhung a awm em tih kan fiah tur ani a, minute sawm a awm tlin chuan, chhum thiang ani tawh lo ani.

 

        Sa chu chhum kher duh lo ta ila chuan, minute sawm pariat an awm tlin loh chuan, ei an thiang a ni. Sa sir kual chu vel thlak tur.

Categories: Kashrut, Halakhot, Juda dan

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments