HAKHOKHMA Post Post New Entry

Khag Shavuot (Chawlhkarte kut)

Posted by Moshe Ilan on January 12, 2011 at 4:45 PM

     Shmot 34;22 -"וחג שבועות תעשה לך ביכורי קציר חיטים" (Shavuot kut, Wheat thar tirh kut chu, kum a lo ral a, Wheat khung vek hnua Khag Haasif nen I nei tur a ni,) tih ziak kan hmuh ang in Shavuot Kut chu Sivan thla ni 6 ni chuan neih thin a ni, Israel ramah chuan ni khat ,Sivan ni 6 na pum hlum hman tur a ni a, Ram pawnah chuan ni hnih chhung hman tur a ni.

 

                                         Shavuot Kut hming hrang hrang te

 

* Shavuot kut chuan hming 4 a nei a, Khag Hashavuot te, Khag Habikurim te, Atseret te leh Khag Matan Tora te an ni. He Khag Shavuot (chawlhkarte kut) hming hi Pesach kut Omer chhiar tan atanga chhiara a ni 50 na chawlhkar 7 te atanga lakchhuah a ni.

 

        Tin, he Kut , Shavuot Kut hi Am Israel ten Pathian hnenah "I Torah chu 'kan zawm anga kan ngaithla zel ang" tia kan intiamna ni a ni a, tin , Pathian-in a hnam thlan kan nihna atiamna ni leh "eng hnam dang te mahin ka thlak lovang" tia a intiam na ni a ni bawk.

 

* 'Khag HaBikurim' (Rah thar hmasa kut) hming hi a put na chhan chu Hmun thianghlim tlawh kut a nihna chhan ber a ni a, a chhan chu , hemi kut ni hian, Ke in Yerushalaim ah kal in Israel ram thei chi 7 (Khita, Seora, Gefen, Teena, Rimon, Zait leh Tamar) te ken thin a ni a, Israel Ram mipui tam zawk te chu Yerushalaim ah lawn in , Yerushalaim mipui te lah chuan an hna thawh te lo chawl meuh in mikhualte chu an lo lawm thin a, tichuan hlim takin Yerushalaim a Rah thar hmasa rawn keng te chuan an Rah thar ken te chu Beit hamikdash ah Kohen te hnen ah hlan in Kohen te chuan 'Mikra Bikurim' te chu lo sawi sak in , an thil sawi khar nan te chuan Pathian hnenah lawmthu sawiin, 'Hei tunah aw Lalpa I thlai thar hmasa min pek te chu ka rawn hlan e' ti chungin lawm thu hlim takin an sawi thin a ni.

 

* 'Atseret' (Khawmpui thianghlim) tih hming a put nachhan chu, Talmud hun lai atanga koh tan a ni a, Sukot zawhna nemngheh nana a ni riatna ni 'Shmini Atseret' tih ang deuh in , Pesach ni 8 na Atseret a chu he Shavuot Kut hi niin , chu a ni 8 na ni a chu Pesach zawh atanga Omer hmanga chhiar chhunzawm char char a, a tawp thlengin a kar Ruk chhunga te chu ,chu Pesakh ni 8na zawm na chu a ni .

 

* 'Khag Shavuot' chu Pesach tana Khawmpui thianghlim Atseret anih ang deuh in, he kut ni hi Sinai tlanga Torah pek kan nih na turin Mitsraim ata Pathianin min hruai chhuak ani tih lan tir nan, 'Khag Matan Tora' tih ani. He kut ni a tawngtaina a kan sawi thin pakhat chu 'Khag hashavuot haze, zman matan Toratenu', tih a ni. Enga ti nge 'Matan' (pek) ti lovin 'kabala' (dawn ni) tih a nih loh? Achhan chu, Pek tih chuan engtik lai pawh a sawi na a ni a, chhun leh zan, kum tluan in, amaherawh chu, Dawng tih chuan dawn fel tawh lam a kawk ani, chuvangin 'Khag Matan Tora' (Tora pek kut) tih a lo ni ta a ni. Kan Khazal te chu hemi a ni chiah chung chang ah hian in hnial na leh ngaihdan inan lohna an lo nei thin tawh a, amaherawh chu , a Halakha chu a ni 6 na ni chu a lo nita a ni.

 

 

                           'Tikun' Leil Shavuot (Shavuot zan a 'Siamthatna')

 

          (Shmot 19;17) 'Tin, Moshe-a chuan mipuite chu P-thian lo dawngsawng tur chuan riah hmun ata chu a hruai chhuak a' tih kan hmuh ang hian, Moshe Rabeinu ngei chuan mipuite chu a kaitho ani tih kan zir chhuak thei a, a chhan chu, Rosh Khodesh Sivan chuan P-thian in Moshe Rabeinu hnenah a lo kal hma nithum chhung chu inpuahchah nan Tlanga lawn lo tur leh Hmeichhe bula kal lo turin a hrilh a , chu veleh Moshe Rabeinu chuan mipuite chu a hrilh chhawng ve leh a, mipui te chuan an phur tawh na luatah a hrilh ni atang pang chuan an lo in serh tan tawhin an lo nghakhlel em em tawhin mut pawh mu phal loin an lo nghak reng a, mahse, a ni 3 ni ah chuan a lo lang leh ta si lo chu an chau ta hle mai a, an lo muhil zo ta a, chutah , ani tiam ni taka Sivan ni 6 chu a lo thlen meuh chuan, mipuite chu, an lola mu thuap si a , Moshe Rabeinu meuh chuan P-thian lo chhuk tur lo dawngsawng tur chuan a kaihthawh chawp an lo ngai ta chu thil dik a ni lova, chu thil dik lova chu, kum tinin a siamthat nan kaihthawh kan ngaih chawp leh tawh loh nan, chu Torah pek ni chu phur taka kan hman tawh na turin a 'Tikun' Siamthatna chu kan lo siam a ngai ta a, chuvangin chu kan Siamthatna kan siam nan chuan Tlaivar a Torah zir chunga Torah pek ni lo thleng tur chu phur taka lo hmuah thin a ni ta a ni. Hemi zan hian, Israel mi zawng zawng te chuan hmun hrang hrang ah Yeshiva ah te, Batei Keneset ah te, mimal inah te, School ah te chuan Torah leh a hrilhfiahna te chu zir thin a ni a, a theih hram chuan 'khavruta' mi pahnih in emaw, ahuhova hlim tak in zir tur a ni a, tin zir pah hian a khat tawkin zai ho nate, lam hona te neih thin a ni bawk. Tichuan, zing vartian ah 'Vatikin' ah Shakharit tawngtai nghal thin a ni.

 

        Shavuot kut hi Shalosh Regalim (hmun thianghlim tlawh kut 3 ) te zinga mi anih avangin, tawngtai nan hian, sidur bua Shalosh Regalim tawngtaina chu hman tur a ni a, tin, Torah chhiar turin mi 5 koin, a maftir hun ah chuan, Torah dang la chhuaka Thusawm pek inziak laia chu thluk dang deuh hmangin mipui zawng zawng te chu ding veka chhiar thin a ni a, tin, he chang chhiar tur hian, Torah lama mi zawhawm deuh Rav lian te chhiar tura koh thin a ni. Tin , chhiar tura koh hmasak ber thin Kohen chu koh a nih hnu in, a la chhiar hma chuan, 'Akdamot' Torah chhiar tan phalna lakna chu Aramit tawnga chhiar thin a ni a, hei hi, Rabi Meir ben Rabi Itskhak Nehorai, Khazan pakhat Rashi hun laia Vurmiza leh Magnetsa khua ami phuah a ni, he hla hi 'P-thian fakna hla niin, Khawvel a siam vang te, Vantirhkoh ho ama rawng bawl tura a siam avang te, ata ni tura Israel hnam te chu a thlan avanga fakna hla' a ni, tin, he hla bung hnihna hi Israel te leh hnam dang te inkar thu hla niin Israel hnam te chu hnawh darh an nihna ramah te chuan, nasa taka Jentel te tih duhdah niin an Sakhuana te chu phatsan tura an tih nate aniin , an chhanna chu pakhat ani a, lengkir kokam ah pawh ding mahse an sakhuana Yehadut chu an phatsan dawn chuan loh zia leh khawi hmun atang pawhin Chhandamna ni leh Chhanchhuahna ni leh Olam Haba chu an nghak zel dawn a ni tih thu vel a ni, he hla thu tlar hawrawp bul tin hi רבי ביר רבי יצחק יגדל בתורה ובמעשים טובים אמן וחזק ואמץ tih chhuak a phuah a ni, (in lo en chin ve mai mai dawn nia) .  

 

 

                                     Megilat Rut (Rut-i lehkhabu zial)

 

       Shavuot kut ni hian Torah chhiar hma in Ruthi bu Bung 4 te chu chhiar thin a ni a, Ashkenazi ho chuan a Savun lehkha zial ami, a Brakha nen chhiar in, Kehilot dang ho chuan Tanakh bu ami emaw, Makhzor bu amiin an chhiar thin a, He kut ni hian Megilat Rut kan chhiar thin nachhan chu; Shavuot ni chiah hi Lal David-a pian ni leh thih ni a ni a, a pi Ruthi chuan Boaz-a Yehuda hnam mi a nei a, Oved-a an hring a, Oved-a chuan Ishai-a a hring ve leh a, chu chuan David-a a hring ve leh a, tichuan David-a atang chuan nakin ah Mashiakh a lo la piang dawn a ni.

 

        Megilat Rut a Buh vui (Khitim) chungchang a lan angin, Shavuot kut chuan Beit Hamikdash ah chuan 'Shtei Halekhem' Khita atanga siam chu hlan thin a ni. Tin, Ruthi chanchin chu mi entawn tlak niin Ger-Tsedek(Judaa inlet mifel) dik tak a ni a, hei hian inngaihtlawmna a entir a, a chhan chu a pa Lal in nuam tak kal sana Yehuda ram tam tlakna rama a pi zui athlan chu inngaihtlawmna niin hei hian Torah chu inngaitlawmna a dawn ani tih a entir a , bakah, Am Israel te chu mi ram Mitsraim ramah rei tak lo awm tawh in, an chin thin ang zawng zawng te pawh Mitsraim ram mite tih dan vek lo ching tawh hnam an nihna ata Torah dawng tura Juda hnam dik taka in Giur thar in "Naase Ve Nishma" kan zawm anga kan ngaithla zel ang' an lo tih na nen chuan a in ang a ni. Tin, Ruthi chu ahma in hnam dang mi niin tuna Juda a a in Giur tak chuan a Gimatria a ahming tlukpui zat רות=606 leh Nova dan 7 te zat belh khawm chuan 606+7=613 alo ni chiah a, chuchuan Juda dan 613 a entir bawk a ni.

 

 

                                       Bawng hnute lam ei thin a ni

 

          Talmud chuan Shavuot kut chu kan thlarau tan chauh ni lovin kan taksa tan pawh a ni, a lo ti a, achhan chu, 'Atseret LaHashem Elokeikha'(khawmpui thianghlim i P-thian tan) tih leh 'Atseret tihie lakhem' (in tana khawmpui thianghlim) tih a nih avangin Thlarau lam leh tisa lam a sawi a ni an lo ti a, chuvangin hman lai chuan , mi chak lo te leh chau te tih chak nan Bawng hnute in tir thin ani a, chuvangin , Shavuot ni chuan Bawnghnute lampang ei thin a ni, tin, Shir Hashirim chuan Torah chu Khawizu leh Bawnghnute in a tehkhin a, chuvangin, Shavuot chu Torah dawn ni a nih avangin Bawnghnute leh khawizu lam ei thin a ni bawk, tin, Bamidbar 28 na ah chuan "מנחה חדשה לה' בשבועתיכם" tih ziak anih angin, a hawrawp bul theuh te chu lakkhawmin Mikhalav (Bawng hnute atangin) tih a chhuak bawk a, tin, חלב tih Gimatria chu 40 ani a, chu chuan, Moshe Rabeinu chu Sinai Tlang ah chuan ni 40 a thang ani tih a entir bawk, tin, hemi ni hian Torah an dawng a, chu Torah ah chuan ei tur tih thianghlim dan 'Kashrut' chung chang vel a lo tam ta mai si a, vawi lehkhatah an thiam nghal mai si lova, chuvangin, an bungbel te chu hmang ngam rih lovin, a kosher leh dan an thiam hma chuan chaw ah bawng hnute chu a kosher ve sise a ngaih loh a vangin an ring ta a ni, chuvangin, Shavuot kut ni chuan chaw ah Bawnghnute lam rin thin a lo nita a ni. (Khag Sameakh)

 

 

 

 

                       •Khag HaShavuot (Chawlhkarte Kut) (2009 תשס"ט Shavuot)

Eiruv Tavshilim

1. Khag Shavuot chu  Yom Shishi (Zirtawpni)  a atlak chuan, Shabat ni nen a in zawn dawn tihna ani a, chuvangin Shabat rawng chu Kut ni ah chuan kan bawl a lo ngai dawn tihna a ni a, amaherawh chu Erev Khag (Yom Khamishi) a Eiruv Tavshilim kan dah(siam) loh chuan kan bawl thiang dawn lo tihna a ni a, chuvangin, Yom khamishi tlaiah chuan Eiruv Tavshilim chu kan siam a ngai ani, chu Eiruv chu Chhang (Pat) leh Ei tur(Tavshil) chhum hmin sa , Erev Khag a dah/siam Shabat nia ei tur atana dah that chu a ni a, chuvangin , dah rei a ngaih dawn avangin, ei tur chhe har deuh Pita (chhang thawp) leh Artui chhum hmin sa emaw dah a tha.

 

•2. Chu Eiruv a Chhang kan dah a chu, Leil Shabat(Shabat tlai) a ei thin niin, a Tavshil (Artui emaw ) chu Shabat ni Seuda Shlishit ah ei thin a ni.

 

•3. Eiruv chu Yom Khamishi a dah tur a ni a (Yom Shishi chu kut ni a nih chuan), dah hma hian Sidur bu ami hmangin Brakha sawi phawt tur a ni , kan lo dah theihnghilh palh a nih chuan, ni tlak hnu Arsi lan hma thlengin ala dah theih a mahse Bracha sawi lovin, amaherawh chu, Arvit ka tawngtai tawh a nih chuan, Eiruv chu ka siam thei tawh lo a ni.

 

• 4. Engemaw loh theih lohna (Shaat Hadakhak) avanga kan lo siam hman ta ngang lo a nih chuan, kan awmna khaw Rav Siam chu kan tawm pui ve thei a, amaherawh chu, chutiang vang anih hran loh chuan, ka tawmpui thiang chuang lova, chuvangin , he Mitsvah hi mitin in kan ti thei a (Hmeichhia pawn), chhungkaw tin in an chhungkaw tan an ti ve theuh tur a ni .

 

•5. Eiruv kan siam a chu Shabat nia rawng kan bawl na tur ani lova, Kut ni ah Shabat ni atana rawng kan bawl theihna tur a nih avangin Yom Shishi dang ang thovin Shabat tana rawng kan bawl chu kan hmanhmawhin kan bawl hma tur a ni. Shabat kan bawhchhiat palh loh nan.

 

• 6. Kut ni ah chuan Bati chhitna a Shabat Bati chhi tur a far char chu thiang lo a ni a, chuvangin, Yom khamishi ah Kut ni Bati chhit tur leh Shabat Bati chhit tur chu buatsaih lawk tur a ni , amaherawh chu, (Bediavad) atawk tawk in a tih theih thova, kut ni a Shabat tana kan buatsaih a nih chuan tih than dan thlak danglam tur ani.

 

• 7. Hmeichhia ten Shabat mei chhit hunah a chhit nan ,mei awmsa (Ner neshama) atanga chhit kai tur a ni a, chhit kai anih hnu ah pawh kan lak kaina mei chu chhemhlum thiang lo a ni, chuvangin, chhuat ah emaw, amah a thi mai tura dah tur a ni.

Havdala hman dan tur · Shabat ni nen ain rual chuan Kut ah chuan Kut zawh veleh Havdala hman angai lova, chuvangin , Motsaei Shabat (Shabat zawh) ah apangaia hman mai tur a ni a, hetia hman lai hian, Kut ni leh Shabat ni tana Havdala ani tih Kavana pek chu a tawk mai a ni.

     Tin, Shavuot chu Motsaei Shabat a a intan chuan, Yom Shishi (zirtawp ni) ah Ner Neshama (bati) lo chhit lawk tawh tur a ni a, chuta tang chuan Shabat zawh veleh Kut (Shavuot) mei chu chhit kai tur a ni a, tichuan, Shavuot Kidush hman pah hian Hadala a chhiar thin chu chhiar  el tur a ni a, mahse, 'Hamavdil bein kodesh le KODESH' tia sawi tur a ni.

    Tin, Shavuot chu Motsaei Shabat a a intan dawn chuan 'Eruv Tavshilin' siam a ngai lo bawk.

Categories: Judaism, Khagim, Kut ni te

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments