HAKHOKHMA Post Post New Entry

Benei Menashe leh Politics

Posted by Moshe Ilan on January 7, 2011 at 1:05 AM

   Politics tih thu han hriat hian kan rilruah a kawi zawng leh a thalo zawngin ngaihdan a rawn lut tel thin. Chuvangin, thil tihna reng rengah politics rilru pu lovin , tih emaw, a politics lutuk hei chu, tia miin thil an sawi emaw, kei mahni ngei pawhin kan sawi chuan thil thalo lam awn tir leh kawh tir lam thu sawi nan kan hmang thin, hei hi a dik reng em?

 

 

    Mi tam tak ten hei hi kan hriatthiam dan anih si chuan a tha zawnga herh ngil tum chu thil har tak a ni mai thei, mahse, kan chhut chian chuan khawvel ram pum mai inrel bawl dan leh kalphung ani tlat bawk si. Tin, chulo rengah ram leh hnam tana thil tha titu, an thih hnu thleng thleng a an chanchin hming dai lova chhertu chu he Politics vang hi a ni chawk.

 

 

    Chuti a lo nihsi a, chutianga ram leh hnam tana thil tha titute leh ram leh hnam chawikanna hmanrua anih si chuan Politics chu thil thalo nge thil tha lam zawk tih hi ril taka fingvar tak chunga chhut chian alo va han tul em.

 

 

    Ani renga hetiang taka hmanraw tha hi mi tam tak ten an mahni dinhmun leh hming chher nan chelek takah hmangin an vawrhvir chawk reng a, chuvangin, zahpah leh miten an mahni chungchang an thlir dan tur chu dawn lova en khumin an mahni dinhmun tha tur siam nan hmangin , athente chu an hlawhtling viau thin a nih hi.

 

 

    Chem chu a hmanna tur dik taka i hman chuan thil tha takah i hmangin thil ropui tak tak i sat chhuak thei a, amaherawhchu, a hmanna tur lo zawnga i hman erawh chuan i him theih nan leh i dinhmun tihsan nan erawh a sual zawnga hmangin i hmelma te pawh i sam fai vek thei narawh a, chuvangin, thil tha rau rau pawh hi a hmanna tur hmun leh hun azir hian hman tlak leh thil dikah i chhuahin ralthuam hriamhreiah i chhuah thei bawk.

 

 

    Chutiang alo nih chuan, chu hmaraw tha Politics chu engtin nge kawng dik hmangin kan hman tak ang? a chunga kan sawi tak ang khian a hun leh hmuna kan hmana kan chelek thiam chuan ram leh hnam hmangaihtu inti chuan he Politics hmanna hmun leh hun hi zir thiam a tul em em dawn ani. Mi thenkhat chuan, he thu a a chanve lek hmang hian ram leh hnam tih hmasawnna leh chawikan nan tiin an thlenna leh an awmna apiangah a hun leh hmun dik nih leh nih loh dawn hmasa lovin he hmanraw tha Politics hi hmatheh ve tehah an hmang chawk thin a, mahse, chu chuan a thian tha te leh a bumtluk theih mi thenkhatte chu lam tangah siam pui thei mahse, mi tam zawkte huat leh ngei nih a hlawh chhuah tir thin fo.

 

 

    Mipui zawng zawngte len vena hmun, an duh duh pawh an sawi ngam ve theihna hun anga he hmanraw tha Politics hi mi dangte tihchhiat natur nilova, engemaw hmasawnna thil ngaihtuah leh hmalak nana i hman erawh chuan, he Politics hi thil tha tak leh thil dikah i chantirin i cha chhuah thei a. Chu chuan he hmanraw Politics hmanga i thawhrah a zir hian hming thatna leh hming daih lohna kumkhaw daihah a vawrh tawh ang che.

 

 

    He Politics hi Power (thu neihna) thil anih avangin kan hman dawn hunah a huam chin tur kan hriat hmasak a pawimawh leh a, a huam chin tur chhungah chuan i duh tawkin he Politics hi a hrawtin i vawrhvir thei a, amaherawhchu, chu i huang chu i pelh a i huang chin bak thilah i Politics power chu i hman vaih chuan thil lian tak tak i tihchhiat theih phah dawn avangin hetianga an huang pela che a Politics hmatheh thin hi mi dik ani ni lo chawk tih hriat a tha.

 

 

   I thil tihna a Politics i rawlh vanga i thil tihna huam chhunga mi si mi dangte tana hmun a awm ve loh anih chuan i thil tih tum chu thil tha leh hmasawnna thil ni mahse nangmah kha mi dik zan inih lohna i lantir ani. Tin, i thil tihna leh hmalakna a i huam tel tir si , an thu leh ngaihdante lak khuma i thil tihtheihna Politics power chu i hmang anih chuan, i Politics chu a thianghlim tawh lovin Diktator ah i insiam tawh tihna ani.

 

 

    Ram leh hnam pum huapa thil tihna hmun, huam zau tak kan neih tir dawn chuan fel takin thil kan duang lawk hmasa thin tur a ni a, entirnan; Israel ram pum leh hnampum ngaihtuah tur chuan Kneset fel takin a awm a, chu Kneset chhungah chuan mi chitin, ngaihdan pawh inang lo tak tak mi 120 lai mai an thu khawm a, chutah chuan, a Sawrkhar pawl leh a opposition te awmin, an duhdante chu a sawrkhar lam leh a ngaihdan kalh tu pawl hote chuan an sawi pawp pawp theia, amaherawhchu , thu tihtluk dawn hunah chuan khang ho khan ban pharin a tam lamte duhdan ang chuan thu an titlu ta thin a ni.

 

 

    Politics rilru chhia leh Politics atana siam nilo thil awmsa, lo awm tawhte Politics khelh nana i hmang anih chuan mi dik inih loh mai bakah misual nihnaah i insiam tihna ani a, mi tenawm takah miin an ngaih loh che pawhin i thil tih avang chuan i tenawm tawh hrim hrim. Hetiangin; Sefardi leh Ashkenazi chungchang Politics anga la tute ang te.

 

 

    A chunga kan sawi tak te khi Politics a chhe lamah leh a tha lama hman thiam theih dan kawngte a ni a, tunah chuan a thupui ang deuhin Benei Menashe te Politics dinhmun i han thlir leh ila.

 

 

   Hman lai chuan han ti ila, tlem lai deuh kha chuan Israel rama Benei Menashe te hian hma lak nan leh kan hun lo kal zel tura hmasawnna thil ngaihtuaha hma theh tur atana kan aiawh tu turte thlangin Benei Menashe Council te kan nei ve thin a, khang hun lai kha han thlir let ta ila, mi tupawh kum 18 a chin chuan kan aiawha kan hmatheh turte chu he BMC (Benei Menashe Council) hruaitu turte ni tur hian zalen tak leh Democracy takin vote hmangin kan thlang ve thin a, a tha hle a, kan mi duhte an tlin chang phei chuan nuam kan ti thei em em a, amaherawhchu, kum 2009 kuma Machon Meir Jerusalema kan inhmuhkhawm tuma he BMC lo din chhuak tupa sawi ang khan BMC chu Organisation ani a, a lo tih ang vang khan nge ni, he BMC ah hian an inrelbawl dan reng rengah, hetianga a chunga kan sawi tak ang khian mi zawng zawngte tana hmun len theihna tur Opposition lam ang chi thuang engmah a awm kan hre ngai lova, chuvangin, a thlantlinte khan an thu chu hnial kalhtu leh ngunthluk taka ngaihtuah theihna tura Opposition an awm loh avang chuan, thu chu tlang tak leh awlsam tak taka relthluk a nifo thin reng a, amaherawhchu, hetianga, mipui zawng zawng huapa thil tih anih chuan, kan ngaihdan leh duh dan ang vek kha kan mipuite duhdan alo ni hauh lo thei a, inthlan lai khan keimah kha min duh em em pawh nise, tun hun azira kan thil relte chu mi tam zawkten an lo duh lo pawh a lo nithei a, chuvangin, rilru pakhat lek pua kan duhdan chauh chu vung taka rel tluk leh kal pui anih chuan, keimahni ngei pawh humsual daitirtu kan lo chan phah theih avangin, BMC pawh chuan zawi zawin mipuite a lo hloh ta hret hret zel a.

 

 

    Hetianga ro rel thu hlaah hian rorel laia ngaihdan hran nei erawh chu a awm ngei anga, amaherawhchu, Opposition ten huai taka an duh dan leh ngaihdan an hrik ve ngam theihna tur Opposition thuang chu fel taka a awm miau loh chuan chung mimal ngaihdan hran nei ho chu Opposition ho tia koh theih an ni tlat lo a ni.

 

 

   Hetianga rorel dan mumal tha a awmloh lai tak hian BMC chuan nakin hun lola kal zel tura an dinhmun tihchhiat theihna tur thil lian tham 'Amuta' chungchang chu an lo khel ve bawk si , chutah, hnung lam leh hma lama zawnga thil dawn tir tu tur Opposition thuang awm loh na na na chuan chu an thil er 'Amuta' pawh chu mumal lo tak chuan din alo nita rut mai a ni.

 

 

   Chutah hetia nakin zela thil lian tham lekkawh tur an din lai vel chuan engemaw neuh neuh karah, pawn lam atanga kei mahni Benei Menashe te Israel rama hruai kir kan nih theihna tura Rav Avichail-a leihlawn dawh sa a min hlangkai tu tur Shavei Israel chuan chu BMC chu thawhpui turin a rawn bel ta a, amaherawhchu, thawk ho tura vawi duailo BMC leh Shavei Israel ho chu an indawrh hnuah an duh dan leh an thu chu a inhmuh tak lohvah chuan thawk ho lo turin an in tha then ta a anih kha.

 

 

   Hetia an thawh ho theih dawn loh na na na chuan tiin, a chunga kan sawi tak ang Politics rimchhia ang ki chuan Shavei Israel chuan a hminga Benei Menashe hruaitu awm ve si te chuan an thawhpui theih dawn loh avang chuan, 'Akifat Samkhut' (Hruai tute dinhmun khuma thil tih) hmangin, hruaitute chu engahmah ngai baksak lovin, a duh apiang tan Shavei Israel thu zawma BMC ban sana lam tang tur atan Benei Menashe hnam te chu namnul takin an hmuia chithlum tah sakin Shavei Israel vuan apiangte tan Israel ram kal leh chhungte hruai a awlsam dawn tur thu chu huai tak leh tlangzar tak chuan tih alo ni ta a, chutiang taka 'Pitui' tha chu hawisan chi anih lo chu tiin, Benei Menashe hman tam takte hetianga Benei Menashe hnam tualchhung Politics lama inhmang ve vak lote leh heng thu ril hre pha ve vak lote chu an inpe ta ruih ruih reng anih kha, hetih hunlai hian, Sefardi leh Ashkenazi chungchang pawh Benei Menashe hnam zingah hian Politics anga lak chhuah tanna chu a lo intan ta bawk a, chuveleh , hman laia India rama Judaism vuan hmasa tute inkara inlungrualna awm thin hre pha ve lo te te mi thar te te , tun hnua Shavei Israel ten Aliya an tihna a hruai ve te chuan, ruh tak leh khauh takin heng Shavei leh BMC inkar thu te Ashkenazi leh Sefardi inkar thute chu an mahni mawh ni hauh si lovin, an rilruah Politics ang leh lamtang bik niin an inhre ta tlat maia, tunge maw Article ziah ah pawh henga an lamtang hotute hi P-thian emni nita mai le? atih hial ang khan, an thi leh thauah he Politics rilru chhia hi, sawi tawh angin, an mahni mawh ni hauh si lovin, a intuh ta tlat mai anih hi.

 

 

    Chutiang taka 'Akifat Samkhut' hmanga Politics power chu kan huam chhung pela hman anih chinah chuan a tira mipuite pawl nithin BMC pawh chu a lo chau zo tain, ke neilo ang maiin, engmah tithei lo, an thawhrah leh thiltih pawh hmuh tur awm lovah alo chang chho ta a, chutah, atira an thil lo tum ve Aliya chungchang te chu huai tak taka an mipuite hnena an lo intiam tawh si avangin , ti leh thei si lo nih chu zah maka lain Politics rimchhia hmang bawk chuan an lo inrelbawl veta lo thei lova, chuvangin, hun tiam neia BMC hruaitu turte thlan a lo hun meuhah pawh chuan, an dinhmun leh nihna chu midang ten an chelh vaih chuan an intiam tawhnsa chu tihzawm loh anih palh chuan an mahni chu dawheh ni an lo nih chhoh dawn avanga tlawmmaka lain Inthlan pawh chu buatsaih duh lovin Diktator System ang tak chuan zah pawh dawn zo tawh lo chuan an Lalna thuthlengah chuan an thu  zui ta zel a, amaherawhchu, kum engemaw zat hnuah chuan awmlo tihna chen chu nei va tain Kum danga khawtina inthlanna buatsaih ang thin ang lo tak chuan Vote thlak tham pawh kan awm tawh hlei nem tiin, Nitsan khuaah chuan a hming chuan inthlanna chu an buatsaih ve bawk a , amaherawhchu, hruaitu hmel ngai ho bawk kan hmu leh anih kha.

 

 

    Chu chang ni lovin, hetianga Benei Menashe te hi tlema kan awmna ram zira kan han lei kan deuh hnu hian hmang changte kan hre ve chho ta zel a, 'Amuta' (Sawrkar a pawl nih in Registerna) din dan leh in ziahluh dante kan thiam chho veta zel a, amaherawhchu, chutianga kan finna chherchhuah ve te te te chu Politics rimchhia ang bawk hmangin kan dinhmun leh ham thatna tur anih dawn phawt chuan ti ni awm taka zahpah leh enghleh nei lo tak chuan, kan nihna, kan hnam Benei menashe nihna chu, Benei Menashe mi dangte tiam vek si lovin Politics rimchhia ang ki khelh nana hmatheh ah tak kan chelek fam zo ta a, kan Benei Menashe hming chhal siin, Benei Menashe mipuite huap zo tir si lovin, kan theihna leh kan zah lohna te hmang chuan Sawrkarah kan va in Register ve ta hlawm a, hetiangin; 'Amutat Shevet Menashe' te, 'Amutat Benei Menashe Organisation' te, 'Amutat Moetset Menashe' te, 'Amutat Kehilat Bnei Menashe' te tih hming chhalin khawimaw lai atanga tute 'Truma' (thilpek) emaw beisei vang nge, kan hnam nihna zahlo leh ngai pawimawh miah lova langin huai tak chungin, kan Politics thiam then then te hmang chuan kan din veta fur hlawm mai a, hetianga thiltih hi Benei Menashe hnam hmangaihna leh  thil dik , mi dik hna ani ngai angem tih chu mi a nileng lo tan chuan hai der rual chi ani lovang.

 

 

    Hetiang tak hian Benei Menashe hnam chhungah hian Politics hi inrawlh thuk tawh anih avang hian, Politics chu Power thil ani kan tih tawh ang khian tumahin an power chu an hnukdawk phal dawn lo hrim hrim a, a rimchhia emaw, chhelo emaw, siam that leh tum chu thil harsa leh turu tak ani tih chu hai rual ani bawk lo nen, hawh u i indin thar leh ang u, ti a mi tam takten an ngaihdan an sawi phawng phawng thinte chu 'Duhthusam' thil ang lek alo chang zo ta a, chuvangin, hemi siamthat leh theihna tur hian, kawng kaw ruah Benei Menashe mi leh sa tumahin anla zawh si loh awmin ka hria a, chumi kawng zawhdan tur chungchang chu hun remchang hmasa berah rawn ziah leh ka tum dawn nia.....

 

 

 

Categories: Politics, Kehila, Community, Article

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments