HAKHOKHMA Post Post New Entry

Pawng paw ei ngawt suh.

Posted by hakhokhma on October 22, 2010 at 6:40 PM

                         מאכלי סכנה 

        (Eitur chung changa hlauhthawn awm)

                                           ספר הכשרות פרק יח' 

      Kan Torah mifingte chuan "Khamira Sakana Miisura" an lo ti a, chu chu 'a thiang lo lam aiin a hlauhthawn awmna chu a pawimawhin a thalo zawk' tihna ani a. Devarim 4;15 ah chuan 'Venishmartem meod lenafshoteikhem' (in nunna atan fimkhur hle rawh u) tih ziak kan hmuh atang hian hetianga eitur chungchanga kan taksa tana thil hlauhawm thei ang chi reng reng atanga kan intih hlat hi Torah thupek (Mitsvat Ase) pakhat ani.

      He thil thianglo chuchang hian eitur leh intur chungchang chauh nilo pawh a huam a, chu chu kan taksa hriselna atana thil thalo reng reng aniin, hetiang chungchanga kan Torah mithiam ten ei pawlh loh tur emaw an tih ang chi reng reng laka mahni indah hranga, ka tan he thil hian thil thalo min thlen sak lovang, ti a, mahni in la hrang a, tilui tu chuan Khawvel lo la awm tur 'Olam Haba' ah chanvo anei lovang, an ti hial a ni.

     Hetiang chungchang reng rengah hian mi chuan ka chungah thil tih mak (Nes) a lo thleng anga, eng em ka ti lovang, ati tur ani lova, hman laiin mipakhat chuan Yom Kipur dawn niah tui inchhin lo a ina, Yom Kipur chu chhandamna ni anih angin kei pawh min chhandam thovang ti chungin a ina, a tui inah chuan rul tur a lo awm si a, tichuan, a hnu rei lo teah a thih phah ta a ni.

     Torah mifingte leh Rabi te chu P-thian thu zirtir chhawng tute an nih angin, an thu chu ngaihchan tur ani a, chuvangin, ei loh tur, in loh tur tia an sawi reng reng  ngai pawimawh lova ei leh in lui tu chu Juda dana Misual a ngaih ani.

    Juda te Halakha dana ei leh in thiang lo ang chi hnam dang ten an ei leh in pawha an chungah engmah a thleng lo anih pawhin Juda ten chung ang chu an ei ve tur ani lova, Juda chu P-thian hnam thlan, a hnam kan nihna tura hnam dangte lak ata min tihhran kan nih avangin, hetiang kawngah hian Hnamdangte tihdan kan entawn tur ani lo.

     Hetiang eitur chungchanga thil hlauhawm chi hi chi tam tak a awma, tun tumah hian kan rawn tarlang vek seng lo anga, hun remchang dangah rawn tihchhuah chhunzawm kan tum ang.

 

Chung ei thianglo thenkhat chu a tawi zawngin i han thlir teh ang.

 

1)Sa leh Sangha- Sa (Besari) leh Sangha chu ei pawlh, chhum, ur, kan leh rawh pawlh thiang lo a ni. A khawi zawk emaw ei zawh hnuah chuan a a dang pawh chu a ei chhunzawm theih a, Sfaradim chuan kut leh ka an sil phawt tur ani a, chu chu 'Maiim Emtsaim' an ti. Ashkenazim chuan an ei inkar thlakah hian chhang emaw an ei phawt thin.

 

2)Sangha leh Bawnghnute - Sfaradim chuan Sangha leh bawnghnute an ei pawlh ngai lova, mahse Bawnghnute Giu (Khema) erawh chu an eipawlh thiang. Tin, Ashkenazim chuan Sangha leh bawnghnute lam reng reng chu an eipawlh thei vek.

 

3)Artui, Purun var, Purun sen- Artui, Purun var leh Purun sen te hi a hawng (Kawr) kheh tawh hnua zan riah tir reng reng chu, chhin phui leh tuam phui pawh nise, ei thiang ani lo.

Amaherawhchu, a hawng tlem ala awm emaw, a purun sam ala awm emaw, Salat tura chan sawm tawh hnu emaw, Tel emaw, chi emaw phul tawh hnu, chu ei thiang ani.

 

4)intur chhin phui loh- intur chi chi thum Tui, Wine leh Bawnghnute te chu Rul leh Khawmual kaikuang awm theihna chi hmuna chhin phui loha awm, a vengtu awm bawk si lo chu rei lote chhung pawh nise, a hnuah in thiang ani lo, hetiang intur chhinphui loh te hi mipui vantlang hmunah leihbuak thiang ani lova, tin, Ran intur atan pawh pek thiang ani lova, chutiangin, in leh chhuat vel sil nan leh zing thawh kut sil nan hman a thiang lo bawk.

    Tin, hetianga Wine chhin loh hi 'Kidush' nan leh 'Havdala' nan hman athiang lova, tin, hetiang hmun kher lovah pawh Wine chhin loh hrim hrim chu darkar 5 chhung chhin phui lohva awm chu, Brakha sawi nan a tlak tawh lo a ni. Chutiangin, Wine chu a rim leh ama tuina chu a danglam tawh chuan, Brakha sawi nan a tlak tawh lo bawk.

 

5)Eitur leh Intur khum hnuaia awm- Eitur leh Intur chi reng reng, chhinphui leh tuam phui pawh nise, khum hnuaia daha a chungah mi a mutthilh hnan tawh hnu chu, ei thiang lo ani.

 

6)Eitur min ti haihawt thei tu- Eitur leh intur thenkhat kan ei leh kan inin kan

Torah zir thiam tawhsa min theihnghilh tir thei tu an awm a, chungtechu; Chhangthawp hmin tha lo, Sa ut a bela bet, Khawkherh, Zeitim, Sa lung, Eitur Zawhte, Ui leh Sazu ten an lo ei tawh hnu, Dawnfawh, Mai te, Hnim, Purun var leh sen, leh Tui tam deuh inin min ti haihawt theiin, kan Torah zir thiam tawhsa min theihnghilh tir thei ani.

 

7)Inthiarna in chhunga eitur- Eitur leh intur reng reng Inthiarna in (Shirutim) chhunga kenluh chu thiang lo a ni a, chutiang kenluh tawh hnu chu ei thiang ani lo. Amaherawhchu, a intuam phui tha erawh chu ei theih a ni.

   Sawi tawh angin, duh angin a chipchiar tha lova, hun remchang dangah chipchiar zawka rawn tihchhuah leh tum a ni ang.

Categories: Kashrut, Halakhot, Juda dan

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments