HAKHOKHMA Post Post New Entry

Tawng dang hmangin Brakhot sawi

Posted by Moshe Ilan on October 1, 2010 at 12:55 AM

      Tun hnaiah Benei Menashe tualchhung hmun hrang hrangah inhnialna leh rawtna a awm thawm hriat a ni a, chu chu Brakhot (Malsawmna) te hi a Ivrit ai chuan mahni tawng hriat ngei a sawi hi a tha zawk tih chungchang velah ani a. He thu hi Mishna Brura ah chiang taka hmuh theihin a awm a, chu chu tlem azawng ihan tar lang teh ang. 'Shulkhan Arukh' chuan, 'Tsibur' (Juda Kasher mi 10 awmna) hmunah chuan 'Tfila Kvua' (Shmone esreh etc..) te chu tawng dang hmang pawhin a sawi theih a, amaherawhchu, a mal emaw, mi 10 awm tlin lohnaah chuan 'Leshon Hakodesh' (Ivrit) chauh hman tur ani a ti a, hei hi achhanchu, Juda mi 10 awmna ah chuan amah Lalpa  P-thian chuan kan tawngtaina chu Direct in a ngaihthlak vang a ni a, tin, Damlo te bulah pawh tawng dang hmangin a sawi theih bawk a, hei hi a chhanchu, damlo kiangah chuan Lalpa P-thian thlarau 'Shkhina' chu a awm avangin a mal a kan tawngtaina pawh chu Direct in a ngaihthlak vang ani.


         Chutiangin, Mishna Brura chuan engpawh nise, a ziak kan chhiar thiam anih chuan, a Mitsvah tha ber chu Leshon Hakodesh (Ivrit) ngei a sawi chu khawi hmunah pawh a tha ber a, tin, hmun hrang hrangah Mishna Brura (סב ס' ב;) ah te, Khatam Sofer, Orakh Khaim (פד', פו')  ahte chuan heng tawng dang hmanga sawi hi engemaw tun hun bik te atan chuah a sawi theih anih thu leh, a reng (Kavua) tur atana tih chu thil tih thiang lo hul hual anih thu vel ziak chiang tak tak hmuh tur a awm bawk a, ram pawn hmun thenkhatah phei chuan an mahni tawng hmanga Tawngtaina an hman chu sawi loh tawngtaina thu te hial an thlak a, hei hi thiang lo hul hual a ni. Hetia tih hian 'Avera Goreret Avera' (thil sualin thil sual a hring) tih angin, thil sual dangah a hruai lut palh thei bawk a ni.


      Hei tak hi a ni Israel te tawng thianghlim theihnghilh tir tuma hnam dangte tawng ngaisang zawk a, Juda mithate hum sual dai tirna kawng chu. Lalpa P-thian in a zawlneite a biak nana ahman tawng thianghlim (Ivrit) ngei hi Mitsraim (Aigupta) sala kan tan lai pawhin kan pi leh pute khan an lo hman hram hram vangin anih kha Bawih nihna lak ata alo hruai chhuah kha.


     Ka pa (Mishkavo al kaparati) khan a dam laiin , "Aw… ka Mizo tawng thiam zawng zawng hi Ivrit hian min han thlak sak vek mai se, kava han ti tak em…." atih fo thin kha tuna he thu ka han zir chian hian a ropuina leh a dikna ka hrechhuakin ropui ka va han ti teh lul em.


    Mishna Brura chuan hetiang a Israel te tawng thianghlim her danglam duhna ngaihdan leh rilru neih hi 'Deot Epikorsut' (Judate dan kalh zawnga kuai tu leh hruai kawi tu) te ngaih dan aniin, heng mite lak atang hian Lalpa P-thian chuan min veng him hram rawh se, tiin a ziak tel bawk.


     Tin, Beur Halakha ah chuan Leshon Hakodesh (Ivrit) hrethiam lo pawhin , Leshon Hakodesh hmanga tawngtai na a hmang anih chuan, a tawngtaina chu pawm leh dawn ani tih a ziak tel bawk.


(Leshon Hakodesh tih hi Ivrit chiah chu ani lo na a, amaherawchu, kan hriat thiam dan tur zawngin Ivrit tiin ka rawn hmang ani e, Leshon Hakodesh chu Sidur,Mishna leh Torah a ziak kan hmuh tawng ang hi a ni e.)

Categories: Judaism, Halakhot, Juda dan

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments