Oops! This site has expired. If you are the site owner, please renew your premium subscription or contact support.

HAKHOKHMA Post Post New Entry

Nevata fapa Yerovama

Posted by Moshe Ilan on July 30, 2015 at 6:00 PM

He Israel Lal Yerovam-a thu ah hian thu mak deuh deuh kan lo ngaihtuah ngai loh lam thil tam tak kan hmuh ngei ka ring a, a chanchin zawng zawng kan sawi vek seng lo ang a, chuvangin tun tumah hi chuan a thil tih a thil mak deuh Israel ten thlalera an awm laia an lo bawhchhiat tawh, chumi avanga mipui tam tak an thih phahna te chu ani hian a lama tang tura mipui te a hip khawm nan Political tactic atan a rawn tuai thar leh dawn a, chung a chanchina thil mak deuh deuh te chu kan thlur bing dawn a ni. A thu hi rilru taka chhiar tur leh he thu chhiar hma hian Lalte 1na Bung 11;26 na atang chuan a chanchin te chu han chhiar hmasa thei ula, tichuan, ama ngaihdan te chu chhutin rilru takin han chhiar ula, a ngaihnawm zual sawt ka ringin, a mamawh te tan mahni tana zir tur pawh in chhar chhuah theih ngei ka beisei. Chhiar nuam u le.


Bible ah Lalte bu a kan hmuh Israel lal Jeroboama, Yerovam ben Nevat (Nevat-a fapa Yerovam) chanchin hi kan chhiar hlawm tawh ngei ang a, anih hi Juda lalram leh Israel lalram then hran anih hnua Israel lal hmasa ber kha a ni. A ni hi Thil sual lian tak tia Israel te humsual dai tira milem biakna hiala hruai lut tu niin, a hnua lal te sual zia khaikhin nan vawi sawm hnih ngawt a hming pawh thailan hial a ni.


Amah Yerovam-a chu a tirah chuan mi naran niin Lal Shlomo-a chhiahhlawh pakhat ve mai ani a, Yosef-a fapa Efraim hnam mi niin Tsreda khuaa hmeithai Tsrua-i fapa a ni.


Lal Shlomo-a chuan hna thawk tha, mi huaisen leh leadership nei mi ani tih a hriatin Yosefa fate hnathawk chunga hotu ah a hlangkai a, khatih hunlai kha Shlomo-an Beit Hamikdash (Temple) a sak lai niin, hnathawka lak luih mi tam tak a nei a, chung zingah chuan Yosefa thlah (Menashe leh Efraim hnam) pawh tam tak an tel a ni. Hetia lal in hotu a a dah hnu pawh hian Lal Yesman nih a tum ngawt chaung lo a ni.


He Yerovam-a hi P-thian hmuh ah mi ropui leh thil tihtheihna tha tak a neih avangin P-thian chuan Lal David-a anga P-thian rawng bawla a dan leh thupek te a zawm phawt chuan Lal David-a angin a Lalna chu tihngheh leh a thlah te zel chu Israel lal zeding an nih theihna turin a tiam a ni. Amaherawhchu, a sualna avang chuan amah leh a thlah te chu hremna Karet lian ber pek an ni zui ta zawk a ni.


Yerovam-a chu lal anih hnu khan Thlalera Israel fate tluk chhiatna angin Jerusalem pawn ah maicham leh se bawng lim te siamin thil a ti ta thut anih kha, kha a thil tih kha eng vanga ti nge anih leh eng rilru pua ti ta mai nge ani tih finfiah kan tum dawn a ni.


Lal Shlomo-a chu Lal ropui leh mi zawng zawng te hlauh a ni a, (lalte 11;27) a nupui te zinga mi Paro (Pharoah) fanu in tur chu sain Milo a siam a, he Milo tih hi Milui (chhung/vur khat) tih thumal atanga rawn kal niin chu chu Ir David, lal David-a khawpui leh Temple inkar a ruam awm chu leia vur khatin a dawh zawl a, chutah chuan Paro fanu in tur chu a sa a ni. Hei hi Temple chhim lam leh Davida khkawpui hmarlam Olive tlang hnaih lampang chu a ni.


Hei hi Yerovam an a hmuhin a ngaihdan ani lo hle mai a, Lal hlauhawm Lal Shlomo-a chu a kamkhat chhuah hial a, Jerusalem chu Tlang lian pui pui kara awm anih avangin, hmelma ten an rawn run theihna tur khan tha i pa David-a pawhin a tih duh loh chu i siam ani, tun thleng hian thil tha i siam a, I pa khan heng hmun te hi Israel ten Aliya la regel an tih theihna tura a lo zuah awl chu nang hian i mimal interes Paro-a fanu tan hungin i sa vel anih hi, tichuan, Jerusalem chu hmelma lakah him lovin i chhuah a nih hi, tiin.


Tichuan, (Lalte 11;29) tum khat chu Yerovam-a chu ramah a chhuak a, Shilo khaw zawlnei Akhia chu a tawk a, ani chuan kawrfual thar a sin a, chu chu sawm leh pahnih ah phelin sawm chu Yerovam-a hnenah a pe a, Lal Shlomo-a chuan hnam dang te Pathian min biak san tak avangin ram hi ka chhuh sak ang a, nang hi hnam sawm te chunga Lal ah ka siam dawn che a ni, amaherawhchu, a pa David-a avangin Jerusalem erawhchu ka chhuh sak lo ang a, hnam khat chungah erawh ro a rel zui ang, P-thian in a ti a ni, a ti a.


Yerovam-a leh Yosefa chuan Inanna tak an nei a, Bible ah hian Naar (Tlangval) tih leh Eved (Chhiahhlawh) tia koh ve ve niin a hnuah hotu a hlankai ve ve an ni bawk a, tin, an awm hmun atanga chhuakin mi an tawh thu ziak kan hmu ve ve bawk a, tin, kawr fual chungchang thu ziah lan ani bawk a, tin, an pahnih hian Mitsraim (Aigupta) rama kal v eve annih mai bakah a tawpa Paro-a hmaa inlan v eve te an ni bawk a ni.


Hetiang deuh hian Yehuda hnam mi Lal David-a pawh Yehuda nen chuan inanna tak an nei ve tho va, Yehuda leh Tamari chungchang leh David-a leh Bat Sheva chuangchang ah hian. He thu hian min hrilh a duh chu David-a chu Yehuda hnung zuitu niin, chutiangin, Yerovam-a pawh chu a pu Yosefa hnung zuitu an nih thu a ni. Chutiang bawk chuan Reuven-a chu fa tir ni mahse, Yehuda chu fatir chanpual ni awm tak Lal hnam ni tura thlan niin, Yosefa fa te pahnih chungchang ah pawh Menashe leh Efraim te unau ah a te zawk Efraim chu a pu in malsawmna a pek ah khan upa zawk chanpual tur chu a chungah a hlan ta zawk a nih kha. Tin, an ropui chhuah chhoh zel dan ah pawh hian a tirah chhiahhlawh mai mai niin, a hnu ah Yerovam leh Yosef ate chu hotu ni chhovin Lal hial an ni phak ta a ni.


Tichuan, (lalte 11;38 ) Yerovam-a chu P-thian thupek te a zawma chutiang anga a nun chhoh phawt chuan Lal David-a anga a lalna chu tihngheh anih tur thu pawh chu zawlnei chuan a hrilh a ni.


Tichuan, Lal Shlomo-a chuan Yerovam-a chu a lo haw ta a, thah a tum a, ani chu Mitsraim ramah a tlan chhe ta a ni.


Tichuan, Shlomo-a a thih hnu chuan a fapa Rekhavam-a chu Lal a lo ni ta a, tichuan, mipui te chu lal chungah chuan an lo hel tan ta a, lal ram chu a lo keh chhe dawn dawn ta a, hetia lal ram kehchhiat inmunna ah hian Yerovam-a chuan engmah kut a thawh ve hran lova, a chhanchu ani chu Mitsraim ram ah Paro Shishak-a hnenah a awm avang a ni.


Tichuan, mipui te chuan an hotu ni turin Yerovama chu an ko haw ta a. A ho chuan Lal Rekhavam-a hnenah chuan kalin "I pa khan kan nghawngkawl a lo ti rit em thin a, chu chu min tihzangkhai sak rawh khai, tichuan, I chhiahhlawh kan ni reng ang e", an ti a, ani chuan " Lo va haw leh rih ta ula, tichuan, ni thum hnu ah kan in be leh dawn nia", a lo ti a, Rekhavam-a chuan apa bula thu thin upa ho te chu a rawn ta a, an ni chuan "an thu ang chuan ti la, kumkhuain I chhiahhlawh an ni reng dawn a lawm", an ti a, mahse chu chu pawm lovin, a thian te ho zawk chu a rawn leh ta zawk a, an ni chuan "ni lo ve, an lal I ni tih an hriat theih nan chang takin chhang la, ka pa phurrit siam cheu kha chu a ve mai ani a, kei chuan vuak mai duh tawk lovin khawmualkaikuangin ka hrim ang cheu ti rawh khai" an lo ti a, chu chu pawm ta zawkin, Israel mipui te leh Yerovam-a hnenah chuan chutiang ang chuan alo chhang ta thawr mai si a, tichuan, chu thu avang chuan Israel mipui te chuan inla hrang tain an Lal atan Yerovam-a chu an lo siam ta a, tichuan, Zawlnei Akhia hrilhlawkna kha alo thleng dik ta a ni.


Tichuan, Yerovam-a chu Israel lal alo ni ta a, Yerovam-a chuan kumtin hmun thianghlim tlawh kut (Shalosh Regalim) ah Israel mipui te chu Yerushalaim ah Beit hamikdash a inthawi turin an kal thin ang a, a tawp ah mipui te chu Rekhavam a lamah kir lehin kei hi min that mai ang tiin rilru a lo siam ta a, tichuan, mipui te laka amah chu Lal a nih reng theih nan Politic tactic pali alo ngaihtuah chhuak ta a.


A pakhatna atan chuan, mipui ten inthawi tura Jerusalem khua khera an kal kumtin angaih loh na turin hmun thianghlim siam chu alo rilruk ta a, amaherawhchu, Beit Hamikdash awm lai si a a dang han sak chu thil ni thei ani si lo, chuvangin, Israel ram pum pui huap thei turin hmun thianghlim pahnih siamin chhim lamah Beit El khua ah leh hmar lamah Dan ram ah chuan Se bawng no lim pahnih siamin chutah chuan mipui te chu inthawi tura hrilhin, "Hine Eloheikha Israel asher heelukha meerets Mitsraim" (Israel te u hei hi in P-thian Mitsraim ram ata hruai chho tu cheu kha anih hi) tiin. Tichuan, Bamot (Maicham) te siamin Levi hnam ni lo Israel te zing atang chuan Kohanim (Puithiam te) a siam bawk ta a ni.


He thu ah hian eng vangin nge Yerovam-a chuan 'Khet Haegel' (Se bawng no lem siam bawhchhiatna) Am Israel te thlalera an awm laia an lo bawhchhiat tawhna chu tuna taka rawn tuai thar leh nge anih tih hi thil mak ani khawp mai.


Amaherawhchu, Lalte bu atanga kan hmuh ah hian milem Pathian Baal biakna (Avoda Zara) chungchang leh he Khet Haagalim (Se bawng no lem te bawhchhiahna) chung chang hi thil inang lo leh inhlat tak ani a, Se bawng no lim hmanga bawhchhiatna hi mi lem biakna ni lovin Avodat Hashem (P-thian rawngbawlna) diklo zawnga hmanna (Lo taase lekha pesel ve khol tmuna) mai a ni, Israel Lal te hnena Milem biakna (Avoda zara) lo luhna chu Lal Akhav-a lal lain a ni a, (Lalte 1na 16;31) Nevata fapa Yerovama thil lo tihsual te chu engmah lo ang maia ngaiin Baal Pathian te an lo be ta vel a ni. Tichuan, Akhav-a thlah te zel chuan Baal Pathian chu biain P-thian an hawisan ta zel a, (Lalte 2 – 10;29) a hnu daiha lal Lal Yehu-a chuan chung Israel te zinga milem biakna Baal Pathian biakna te chu rawn tichhiain Yerovama siam Se bawng no te laka bawhchhiatna chauh chu a rawn chhunzawm ta zawk a ni, tichuan P-thian pawhin a alaka a mit a tlun avangin lawman pawh pein a fate chu chhuan li na thlenga lal a tiam a ni. tih thu kan hmu a ni.


Tichuan, Lal Yerovam-a chuan Shmot bua kan hmuh angin Khet haegel chungchanga bawhchhiatna te chu a hre ngei si a, eng vanga rawn tuai thar leh ta mai nge ni? Khami avanga an hremna dawn a mi tam tak an thih te pawh a hre vek si a, chumai duh tawk lovin, Thlaler ah khan Se bawng no lim kha pakhat chauh an siam a, ani erawh chuan, pahnih lai a siam ta mai lehnghal, ava mak em. Chumai bakah a lama tang tura mipui te auh khawmna atana tuna a tactic hman hi mipui te chuan an pawm dawn em ni? Mipui te pawh chuan thlalera mi kha an hre vek si a, khami avanga kum khua atana ngaihdam dilna nit e klan siam hial hial kha ani si a. ava make em..


He thu kan hriatthiamna tur atan hian a hnu lamah han kir leh ta ila, Yerovam-a aia ropui leh thlarau lamah pawh mi sang zawk Aharona puithiam khan eng vanga kha Se bawng no lim kha din ta mai nge ani tih chu kan hriatthiam angai phawt dawn tihna a ni.


Ekhezkel (Ezekiela) bu a Maase Merkava chungchang ah chuan Ekhezkel-a chuan hetiang hian inlarna ahmuh chanchin a sawi a, (Ekhezkel bung 1) Tawlailir hmuin thil nung pali ahmu a, chung ho te chuan ke pali neiin hmai pali bawk leh thla pali an nei a ni. Chung ho chungah chuan Rakia awmin chumi chungah chuan mihring hmel ang a awm a, chu chu P-thian ropuina chu a ni. Heta a thil nung hmuh te hi Mihring, Sakeibaknei, Bawng leh Mu te an ni. Tichuan, a bung 10 na ah a hrilhfiahna a sawi leh a, chutah chuan a thil hmuh te chu a pakhatna ah Kruvim, pahnihna ah Mihring, pathumna ah Sakeibaknei, palina ah Mu te an ni.


Hetah hian thil danglam awm ta chu Bawng ai ah khan Kruvim hote a sawi ta a ni. Tichuan, Kruvim kan tih te hi Bawng an ni tih kan hrethiam thei ta a ni. Tin, chu lo reng ah Aramit tawng chuan Karav tih chu bawng tihna ani tih Mishna Avot atangin kan hmu thei bawk. Tichuan, Ekhezel-a chuan Kruvim chung ah chuan Rakia awmin chumi chungah chuan Sapir lung anga Thuthleng a mihring hmel ang (P-thian ropuina hmel) chu a hmuh thu a lo sawi tawh a.


Tichuan, (Shmot 24;10) Moshe leh Aharona leh afapa Nadav-a leh Avihu-a te leh upa 70 te chuan P-thian chu hmuin a kephah hnuai chu Sapir lung ang anih thu te Shmot bu ah chuan kan hmu bawk a ni.


Tichuan, Ekhezkel-a hmuh ang 'Maase merkava' chu Ekhezkel-a hmuh hma hian hmu an lo awm tawh tih thu Ramban ziak atangin kan hmu thei bawk a ni.


Tichuan, Aharona chuan P-thian awmna Shkhina chu Bawng (Kruvim) ho chung ah chuan a awm tih a hre thiam ta a, chuvangin, thlalerah pawh chuan P-thian lem/lim siam thiang lo ani tih a hria a, chuvangin, P-thian a hmuh laia a hnuaia awm bawng ang lim chu siam tain chu chu P-thian atana hman tur ni lovin P-thian ropuina puan chhuah nana a thil ropui hmuh ang, symbol a siam chu alo ni ta a ni.


Amaherawhchu, a hmuh ang thil ropui hmu phak ve lo mipui te chuan Aharona hriatthiam ang leh a duh dan chu an tawmpui ve phak loh avangin mipui te chuan chu a thil siam chu Pathian anga lo ngai tain a hnenah chuan inthawina te an rawn hlan tain, mipui te chu an tluchhe ta a ni. Mipui te chuan kan P-thian chu 1 ani tih leh hnam dang te Pathian milem te erawh chu pakhat aia tam ani tih an hria a, amaherawhchu, Aharona chuan Se bawng no lim chu pakhat a siam si a, mipui te chuan an thil hmuh chu pakhat anih avang chuan P-thian ngei anih dawn hi an ti ta a ni.


Tin, Mishkan (Thlaler biakbuk) ah pawh chuan a chhungril Kodesh Hakodasim ah chuan Kruvim lim chu pahnih a awm bawk a, chutiangin, Beit Hamikdash (Temple) ah pawh Kruvim chu pahnih a awm a ni. Tichuan, Yom Kipur ah Kohen Gadol chu chutah chuan lutin P-thian ropuina Shkhina chu chung Kruvim te inkar ah chuan a rawn inlar thin a ni.


Tichuan, Yerovam-a chuan khami (Khet Haegel) tuma mipui te tlukchhiatna kha 1 leh 2 inkar ah mai ani a, Aharona khan 1 alo siam avangin mipui te chu an tluchhe ta a, khami tuma Aharona kavana (thil tum) tih sual palh kha siam tha (Tikun) in tun ah chuan 2 ka siam ang a, tichuan, Israel te chuan hei hi P-thian ani lo tih an hre thiam tawh ang a, a chhan chu "Hashem ekhad ushmo ekhad" (P-thian chu pakhat ani a, a hming pawh pakhat a ni) anih tlat avangin, tichuan, mipui te chuan P-thian chu Beit El khua atanga Dan khaw inkar ah te hian a awm ani tih an hre dawn a ni. Thlaler ah khan Aharona chuan Se bawng no lem a siam zawh khan naktuk ah P-thian tan khawmpui kan siam dawn nia, a ti a, mahse, a siam hman ta lova, kha a siam hman loh kha kei hian ka ti puitling ang a, P-thian tan khawmpui thianghlim chu ka siam mai dawn ani, tiin, Thlalera an tawngkam hman ang te chu hmangin, "Hei hi in P-athian Mitsraim ram ata hruai chhuak tu cheu kha a ni" ati ta a ni.


Heta tanga kan hriatthiam theih tak chu, Yerovam-a khan Se bawng lim pahnih a siam khan P-thian tur atan leh a ang pawha hman tur atana a siam ni lovin, Aharona kavana hlen puitlin sak tur atana a siam leh Temple chhunga Kruvim ang zawk niin, chu chu mipui te hui nana a political tactic atan a lo hmang ta a ni. Hetah hian Yerovam-a chuan mitin hmuha awm Temple awm laia a dang siam chu mipui ten an hrethiam dawn lova, chuvangin, mipuite hmuh ve theih lohva awm a chhungrila mi Kruvim te kha a din ta a, tin, a tawngkama "Hine Elo-heikha Israel" (Hei hi Israel te u in P-thian chu ani e) atih ah hian Hine = hei hi/heta hi tih hi, a thil siam (bawng no lim) te chu a sawi lo tih a hriat thiam theih bawk a ni, a chhan chu, thil pahnih a siam a, pakhat zawk phei chu Dan khua ah a dah daih leh nghal, Ele=Heng te hi ti lovin, Hine=hei hi/heta hi tih tawngkam a hmang ta a, chuta a sawi leh a kawh zawk a chu Beit El leh Dan inkara P-thian awm chu a sawina zawk a ni.


He a thil tih hi thil dik lo ani a, thil tha pawh ani hek lo, amaherawhchu, a thil tih chu milem Pathian biakna tura a tih leh Kavana ani lo a, tin, P-thian ai awh tura a tih ani lo bawk a ni, a duh dan leh ngaihdan chuan P-thian biaka chawimawina tura a tih zawk a ni. Amaherawhchu, Aharona'n kavana thianghlim tak chunga a thil siam chu mipui ten Pathian atana an lo neih zui tak ang khan, Yerovam-a thil siam pawh chu mipui te chuan Pathian atana hmang tain, chung hnenah te chuan an lo inthawi zui ta a, Aharona tluk chhiatna ang ah bawk chuan Yerovam-a chu a lo tluchhe ve ta a ni.


Yerovam-a chuan Aharona bawh chhiatna Tikun siam saka titha leh turin amah chu a inhmu a, hei hi a fate hming a phuah sak atang pawh hian a chiang em em a ni. (Lalte1 14;1) A fa pakhat hming chu Avia ani a, Aharona fapa Avihu-a ang khan, tin, (lalte1 14;20) a fapa dang leh a thih hnua lal chu Nadav-a ani bawk a, Aharona fapa Nadav-a ang khan, a fate hming pawh hi Aharona fapa te hming ang kha a put tir a ni.


Eng le khaw le, hetianga Aharona hnung zuia ama bawhchhiatna siam tha tura a inngaihna hi thil dik leh thil tha ani lo va, chutiangin, a bawhchhiatna leh Israel te humsual a daitirna ah chuan a chungah mawhphurhna chu a tla a ni.


Tichuan, (Lalte1 12;31) Yerovam-a chuan he a political tactic hman mek pahnihna atan hian Beit El khua a a Sebawng no lim dinna ah chuan Maicham te siamin Levi chi ni lo Puithiam te a siam ta a ni. He thu ah pawh hian an zingah pawh chuan Levi hnam ho an awm awm reng si a, eng vangin nge chung te chu Puithiam atan a ruat loh? Kan tih chuan, Puithiam Kohanim ho te chu an rawngbawlna hmun turin Beit Hamikdash ala awm si a tin lawm, chuvangin, Thlalera Israel fate bawhchhiatna siam that a tum lai a ni a, chuvangin, (Shmot 19;6) Thlaler ah khan P-thian ngeiin Israel te chu atan Puithiam (Kohanim) chi ah a lo ruat tawh a, tichuan, ama ngaih dan angin an lo bawhchhiatna te siam that anih hnu ah chuan P-thian sawi ang khan Israel te chu Kohanim an lo nithei reng ani tih hrethiamin, chu point chu hmangin Levi hnam kher ni lo Israel mite atang chuan Puithiam te chu a lo siam ta a ni.


Tin, Yerovam-a hian a tawngkam hman reng reng ah hian Thlalera Israel fate bawhchhiat hunlaia an tawngkam hman ang kha a hmang ve zel a, amaerawhchu, ani chuan an bawhchhiatna Tikun siam lai mek anih avangin, an tawngkam ang te chu a tawmpui ve zawk a ni, (lalte1 12;28 )  "Rav lakhem mealot Yerushalaim" (In tan Jerusalema lawn te chu a nasa em si a) tih tawngkam a hman pawh Korakh-a chuan thlalerah khan lo hmang vein, (Bamidbar 16;3) "Rav lakhem ki kol haeda kulam kedoshim" (In nasa em mai mipui zawng zawng te pawh an thianghlim vek si a) tih ang khan. Hei pawh hi thil tha lo chu a ni naa, Korakh khan ama interes atan he tawngkam 'Rav lakhem' tih hi alo hmang ani a, tichuan, Yerovam-a chuan mipui te tan he tawngkam bawk hi a lo hmang ve ta a ni.


Tichuan, Yerovam-a chuan a tactic hman mek pathumna atan chuan Israel calendar thar siam a ni a, chutah chuan Juda ten Sukot kut hmun thianghlim tlawh kut, a thla sarihna a awm Tishrei ni 15 a an hman thin ang chu a thla riatna Kheshvan thla ni 15 ah chuan a sawn ta a, ani chuan Israel te chu Jerusalem atanga a hmar lama awm kan ni a, Sukot kut chu Rah seng kut anih angin hmar lamah chuan thla khat velin rah seng hun hi a muang zawk a, tiin, hetah hian thla dang a belh ni hran lovin, Juda tena Shana meuberet (kum khata thla khat neih belh) ang calendar thar chu a siam ta a ni. Pesakh kut pawh Aviv laia tla tura an siamrem ang chuan a Calendar thar Israel calendar ah chuan hun a siksawi ta a, chutah chuan Juda te calendar hmana Tishrei ni 15 ni chiah chu Israel Calendar ah chuan Kheshvan ni 15 a lo tla ve chiah ta a, he tactic hi Israel mipui te chuan an Calendar hmana Tishrei ni 15 ah chuan Sukot kut hman tuma Jerusalema an kal chuan Jerusalem chhunga Juda calendar ah chuan Elul ni 15 alo ni thung ang a, chu ni chu hmun thianghlim tlawh ni ala ani dawn si lo a, mipui te chuan a thla leha kal nawn ai chuan a hnai vai zawk Yerovam-a hmun thianghlim tlawh kuta an kal zawk na tur leh, mipuiten Jerusalem a hmun thianghlima an kal ni ti hresual turin he calendar thar hi a duang ta a ni.


Heng tun thlenga political tactic pathum a hman te hi thil sual lian tham em em an la tling lo va, amaherawhchu, a pali na erawh hi chu a tluk chhiatna bul a rawn ni chho thung dawn a ni.


A palina chu (lalte1 12;32) Yerovam-a chuan ama duh dana a thla siam chawp thla 8 na ni 15 na ni ah chuan Beit El ah chuan a Bawng no lem siam chawp hma ah chuan maicham siamin chutah chuan Bawng no lem hmaah chuan a inthawi ta a ni.


(Lalte1, 13) Yehuda ram atanga mi pakhat P-thian thu rawn kengin P-thian mi a lo kal a, chu chuan Maicham (Mizbeakh) a Yerovam-a inthawi tur lai chu a rawn zilh ta a ni.


He thu atanga kan zir chhuah chu Yerovam-a hian a hma lama a thil lo siam tawh, Bawng no lim te, Puithiam a siam chawp te, Calendar a siam te ah chuan zilhhauna a dawng lova, tuna Maicham a siam chawpa inthawina a hlan tak avang hian P-thian zilhhauhna a tawk ta tih kan hmu a, a hma lama a thil lo siam te pawh chu thil dik ni lo mahse, he maicham a siam ah hian inthawi ta lo se, hetiang tak hian a chungah P-thian a thin a u rang em? Tih chu a ni.


Hetia zawlnei in Maicham hmaa zawlneihna thu a rawn sawi hian Yerovam-a chuan thinrim zetin "Man rawh u" a ti a, he a thil sawi hian tunhma lama Yerovam-a nihna ang kha a nei ta lo tih a sawi chiang a ni. A chhan chu P-thian zawlnei te chuan an zawlneihna thu an sawi ah an mahniin mawhphurhna an nei lo a, tin, an mahni duh dan leh ngaihdan a au chhuak pawh an nei hek lovin, P-thian thu an ka atanga rawn chhuak zawk ani a, chu chu tunhma lam kha chuan Yerovam-a pawh chuan a hria a ni. Chu tiang ang lo chuan Jentel zawlnei te ve thung chuan an mahni duh dan leh ngaihdan angin thu an phuh chhuak a, tichuan, rikrap leh vau an nih phei chuan an zawlneihna thu te chu a dangin an puang leh ta thin zawk a ni.


Chutiang chu Jentel te pawh chuan an hria a, chuvangin, Bilaam-a thu ah pawh a zawlneihna ti danglam turin vawi tam tak Balaka chuan a beih nawn tir thu kan hmu a, tin, Naaman-a leh Elisha thu ah pawh Elisha-in tih tura a thu pek ang chu Naaman-a chuan ho tiin a awih sak lo anih kha. Chutiang ang chiah chuan tunah pawh hian Yerovam-a chuan Zawlnei chu rikrapa mana a thu sawi te chu sut leh turin a ti a ni. Heta tang hian Yerovam-a chu Jentel milem bia ang rilru a lo pu tan ta ani tih kan zir chhuak thei a ni.


Tin, "man ru" tia thu a pek paha a ban a phar chu a ban chu a lo zeng ta a, tichuan, a dam leh theihna tura ngenin Zawlnei hnenah chuan P-thian hnena dil sak turin a ngen ta a, hei hi Yerovam-a tana inlamletna tura chance ani a, hetia a mit ngei a P-thian in thil mak a hmuh tir anihna chu P-thian in ka lam ah lo kir rawh a tihna ani a ni. I ban zeng tawh pawh a pangaia titha leh thei tu chuan sual tawh mah la inlamleta ka hnena I lo kir leh chuan tun hma ang bawk khan ka lo lawm lut leh ang che a tihna a ni.


Hemi hnu ah pawh hian Yerovam-a chuan zawlnei chu rikrapna hmanga a thu sut tir chi ani lo tih a hriat hnu ah pawh chuan thil pek pek hmanga tihlungawia chumi avang tal pawh chuan a thu chu a sut theih ala ring cheu a ni. Mahse, chung ang chu thil thleng thei ani tih P-thian chuan a hriat lawk avang chuan zawlnei chu chu rama thil engmah ei lo tur leh a kalna lamah pawh haw leh lo turin thu a pe bawk a, chuti chung chuan Yerovam-a chu ala inlam let ta lo cheu a ni.


Tichuan, ama interes a duh luat tuk na avanga maicham hial a siam chawpa a inthawi tak vel avang chuan (Lalte1 13;33) chung thil zawng zawng hnuah pawh chuan Yerovam-a chuan a thil tihsual te chu a sim duh chuan loh avang leh ala tih chhunzawm zui zel avang chuan amah leh a chhungkua te zawng zawng tan hremna Karet a chungah a lo inleihbuak tir ta a ni.


Khazal te chuan khi chang "Chung thil zawng zawng hnu ah chuan" tih khi, eng hnu ah nge ni? Tiin an lo sawi a, "P-thian chuan Yerovam-a kawr fual ah chuan vuanin ka fapa ka lamah lo kir leh la, nang leh David-a te nen Gan Eden ah nuam takin kan leng za dawn nia tiin, a Tshuva a siam theihna turin P-thian chuan a thlem a, mahse, Yerovam-a chuan Tunge hotu ni ang? A tia, P-thian chuan David-a hotu ani ang, tiin a chhang a, ani chuan, chuti anih chuan ka tel ve lo mai ang e, tiin a la chhang cheu ani" an lo ti a ni. Yerovam-a chuan ama interes a ropuina tur chu hnawl phal lovin ama interes neihna tur anih dawn phawt chuan P-thian hawi sana sualna kawng zawh chu a thlang ta cheu zawk ta a ni.


He a thu ah hian Yerovam-a chuan thil tihtheihna leh ropuina lian tak amah ah hian anei a, a tira zawlneiin Lal David-a ang hial anih theihna tur thu a tiam te, tin, amah ngei pawh Aharona (Puithiam P-thian thlan ngei) ang hiala a inhmuh theihna te chu ani a, amaherawhchu, chung zawng zawng chu ama ropuina duh luat tur na chuan engmah lovah chan ta zawkin Olam Haba a chanbo hloh thak khawpa sualna kawng chu a lo thlang ta zawk a ni.


(Lalte1 14;1) A fapa Avia chu a dam lova, a nupui hnenah chuan zawlneiin Yerovam-a nupui ani tih a hriat lohna turin inchei danglam tirin a tira, hmana a chunga zawlneihna tha thlen sak tu Shilo khuaa Zawlnei Akhia hnenah khan a fapa dam theih na tura dil turin a tir ta a, he thu ah pawh hian Yerovam-a chu milem bia te rilru ang chiah a pu ani tih a hriat theih a, inchei danglam avang mai maia zawlnei chuan tunge ani tih a hai theih chu a ring a ni. Hetah pawh hian a thil tum chu a hlen chhuak ta chuang lo a ni.


(lalte1 14;7) Yerovam-a hnena hrilh let turin a nupui hnenah chuan zawlnei chuan thu a lo hrilh a, heta a thu hrilh ah hian Pathian lem te i siam a, tiin Avoda zara milem a biak thu a lo hrilh ta mai a ni. Amaherawhchu, Yerovam-a thu ah hian milem Pathian emaw, Avoda zara a siam thu kan hmu si lo va, Thu pek sawm a a pakhatna leh a pahnihna ah chuan (1) Kei hi Lalpa i P-thian Mitsraim ram ata hruai chhuak tu che u ka ni. (2) Keimah lo chu Pathian dang reng reng i nei tur a ni lo. Tih kan hmu a, he thu hi kan Khakhamim te chuan lo hrilhfiahin, hetah hian Lalpa P-thian chuan amah a inpuanna leh Pathian dang milem Pathian te kan biak a phal lohna thu a ni a, chutah chuan tuna Yerovam-a siam pawh hi ama tum dan ang leh anihna takah chuan Pathian tura a siam ni lovin, Avoda zara atana a siam ani lo va, P-thian biakna tura ama ngaih dana dik a tih chu hmangin P-thian rawngbawl nan a siam ani mai a, amaherawhchu, chu chu P-thian thupek leh Torah danin a sawi loh dana ama ngaihdana P-thian biak na anih avang zawkin chu chu Avoda zara (Milem biakna emaw, Pathian dang tana rawng bawlna) ah alo chang ta tihna a ni.


 

He Yerovam-a thu kan zir atang hian P-thian thu kan tih leh a thupek anga kal dan tur chu chiang takin a zir theih awm e, Torah ah thupek 613 Juda te tan leh, hnam dang te tan dan 7 kan hmu a, chung te chu a zawm dan tur kan Khakhamim te ka atangin Torah Shebeal pe (ka a inhlan chhawn Torah) kan dawng leh bawk a, heti lo liam, keimahni ngaihdana a tha kan tih dan zawng emaw, kan duh dan dana kan lo kal pui emaw, zawm dan tur kan lo insiam ve ringawt chuan Milem biakna Avoda Zara ah kan lo tlu reng dawn tihna a lo ni.


 

Entir nan mai mai, keini chu Kristian ram atanga sei lian leh Israel rama pem kan ni a, kan zinga tam tak phei chu Kristian sakhua pawh lo zawm ve tawh a, an tih dan leh an tawngtai dan leh an hla sak thin te pawh lo tui pui ve viau tawh kan ni hlawm ngei ang a, hman deuh khan Kristian hla kan sak thian ve loh dan te pawh kan sawi tawh a, heng mai bak ah hian an tawngtai dan ang, hetiangin; mipui zingah mi pakhat tawngtai turin a ding a, chutih lai chuan mi dang te chu an lo maimitchhing a, tichuan, tawngtai tu chuan tawngtai thu a chham a, a tawp ah Amen an lo pek ang thin Kristian tih dan te pawh chu kan tih ve a thiang lo a, heng mai bak ah hian Torah Mitsvot te zinga mi "An Pathian biak dan te chu in zawt vel tur ani lo" tih kan hmuh angin kan kal san tak rama hlimna thleng chanchin emaw, Kelkang chanchin emaw ang te pawh chu zawt emaw, an chanchin sawi vel te pawh chu thiang lo alo ni tihna a nih chu. Chuti lo zawng thil tha Mitsvot tam tak kan tih kar ah P-thian huat ber Milem biakna vaivut hmanga kan lo intihbawlhhlawh ve vaih zawngin Yerovam-a ang hian kan thil tha tih te pawh chu thai bo leh thil tenawm ah kan tihchan ve hlauh a hlauhawm hle a ni.


Tin, heng chang hi ani lo, kan tih tura innghat Mitsvot hrang hrang te pawh a awlsam zawng kan tihchak luat ah emaw, kan zir that peih loh avangin pehhelna kan zawn luat ah anih dan tur lovin thil kan tih mai te a hlauhawm em em a, entirna han pe zel ila, Chhang thawp ka ei si a, mahse, Birkat Hamazon ka sawi peih loh avangin "Bore Nefashot" ka sawi ta mai a, emaw, huan thlai ka lova, ka duh dan danin Maaser leh Truma ka pe ve ringawt a, ka tih dan a dik si lova, chutiang ang te pawh chu tuna Yerovam-a chanchin kan zir ang chiah tho hian P-thian thu Torah chu kan lo bawhchhe reng tihna alo ni a ni.

 


Categories: Judaism, History, People

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments