Oops! This site has expired. If you are the site owner, please renew your premium subscription or contact support.

HAKHOKHMA Post Post New Entry

Shmita kum chungchang dan leh dun

Posted by hakhokhma on April 12, 2014 at 7:10 PM

SHMITA KUM


Kum 7 na thlai leh thei thianghlim te Halakhot


1.    Peirot Shviit (Kum 7 na thei): Shmita kum chhiara a kum 7 na thei rah te chuan "Kedushat Shviit" (Thianghlimna) an nei a, chung thianghlimna te avang chuan thil thiang lo chi 4 a awm a, chung te chu;

(1)Tih riral thiang lo.
(2)Zawrh leh hralh thiang lo.
(3)Israel ram pawna ken chhuah thiang lo.
(4)Jentel hnena pek thiang lo.

Hei mai bakah hian Thlai lam bik ah thianglo dang a awm leh a, "Sfikhin" thiang lo te, "Shamur veneebad" thiang lo te, "Biur" ngei ngei ngai te an awm leh a, chung te chu kan zir chiang dawn a ni.

2.    Israel ram thianghlima Thei rah reng reng Shmita kuma rah sen (Khanata) te chuan Shmita thianghlimna an nei vek a, chu chu 'Kedushat Shviit' tia koh a ni.
Rah sen "Khanata" hi thei rah a par a tlak chiaha a rah rawn sen tir sawina hi a ni. Chumi awmzia chu Shmita kum tir Rosh Hashana hnua rah sen reng reng te chuan kum 7 na thianghlimna an nei vek tawh tihna a ni.

3.    Thlai lam (Yerakot) ho ah chuan, a kum 6 naa phun leh chin pawh nise, kum 7 na huam chhunga lawh leh thliah reng reng te chuan kum 7 thianghlimna (Kedushat Shviit) an nei vek bawk a ni.


Tin, thlai te hi a kum 7 na huam chhunga chin leh zung kaih te chu "Sfikhin" an ni a, ei a thiang lovin, ei tur atan an lo siam hman palh phei chuan a bungbel vel zawng zawng pawh chu a ti thianglo vek tawh tihna ani a, a bul atanga Kosher that leh an ngai a ni.


Hetiang "Sfikhin" kum 7na a chin hote hi a kung kan hria anih chuan phawi tur ani a, tichuan, sahar ah emaw dah chhiat a, chumi hnuah paih tur a ni.
Thei lamah zung kaih hun chhung hi ni 14 anga chhut ani a, chumi awmzia chu kum 7 na Rosh Hashana thlenhma ni 13 china kan ching anih chuan kan thlai chin chu 'Sfikhin' ani tihna niin, a thiang lo a ni, thlai lamah chuan a zung kaih hun chhung hi ni 3 chin tih a ni.


4.    JENTEL THLAI:  Israel ram chhunga Jentel huan kum 7 na thlai leh thei ho te chu Jerusalem Rabi hote chuan 'Kedusha' (Thianghlimna) a awm lo an ti a, chuvangin Shmita thlai leh thei anga en a ngai lo an ti a ni.


Amaherawhchu, 'Khazon Ish' kaihhruaina hnuaia kal Benei Barak ho te chuan hetiang kum 7na Jentel thlai leh thei ah pawh chuan thianghlimna a awm an ti thung a, chutiang ang chuan Ashkenazim Khasidim tam tak te chu an kal a ni.


5.    Hetiang Jentel thlai leh theia 'Kedusha' awm ti chuan a awm lo ti te khuaah mikhuala a kal hunin a lo kalna dan ang tho khan langsar lo turin a chhunzawm tur a ni. Tunlai ah chuan Jerusalem a mi thenkhat te pawhin Jentel kum 7na thlai ah thianghlimna a awm tih dan zula kal te pawh an awm nual.


Ashkenazim Jerusalem a mi te chu Jentel thlaiah thianghlimna a awm tite khuaa an kal hunin a khaw mi te tih nat palh loh nan an fimkhur tur a ni a, amaherawhchu, Sefaradim ho te chuan an duhna hmun hmun ah Jerusalem dan ang chuan an hmang thei thung a ni.



ISUR "SFIKHIN"


6.    Israel ramah Shmita kuma Israel huana thlai chin leh zung kaih te chu Sfikhin tih an ni a, chu chu ei thiang ani lo a, tin, a chhumna bungbel te pawh chu thiang lo an ni.

Eng le khaw le chutiang thlai leh chhum tawh te pawh chu tih nawmnah thiang ani lo a, dah thata a chhiat hunah paih chauh tur a ni.

7.    Buh lam chi leh Kitniot lam chi te chu an 'Shlish gidulam' (an to atanga ei atana an tlak hun hma, hmun thuma thena hmun khat) chu Shmita kum ah a tlak chuan 'Sfikhin' an ni bawk a, ei a thiang lo a ni. (An 'Shlish gidulam' chu Shmita kum tir Rosh Hashana hnuah anih chuan tihna a ni.)

Amaherawhchu, an 'Shlish gidulam' chu Rosh Hashana hma ah anih chuan Shmita kumah ei a thiang a, tin, chutiang buh leh kitniot angah te chuan 'Kedushat Shviit' (Shmita thianghlima) a awm thung a ni.

8.    Thei kung ah leh kung te kum hlun chi angah chuan 'Sfikhin' a awm lo a, amaherawhchu, thlai lam chi ang ah chuan a kum hlun chi pawh nise 'Sfikhin' a awm thung a ni.

Thlai lam chi chu a kum 7 na ah chuan lo to vin lo thang chho zel ta ang se, a kum 7 zawh hnu (Shmita kum chhiara a kum 1 na) ah pawh chuan la than chhunzawm zel ta ang se, chutiang thlai ang chi chu kum 7 zawh chiaha chin tan ang puitlin hun vel ah ei a thiang tawh a, tin, a kum 1 na 'Khanuka' kut thlenga nghah tur ti an awm bawk a ni. Chutiang hma ah chuan Sfikhin ang thoa en tur niin ei ala thiang lo a ni.

9.    Israel ram chhung ah pawh nise, Jentel huan chhunga thlai to te ah chuan 'Sfikhin' a awm ve lo a, tin, Jentel mi pawh chuan Shmita kum chhungin a huan ah chuan thlai lo ching pawh nise, chutiang ah chuan 'Sfikhin' thian lohna a awm lo a ni.

Chutiangin, 'Sade Bor' an tih thlai chinna hmun atana rem lo ang chi ah te, 'Sade Nir' an tih huan leh phuh sa, a lei tih thatna tura kum tluana thlai chin lohna hmun tur atana an buatsaih ang ah te, Thlai dang chinna leh awmna hmuna thlai chi dang to angah te leh 'Kerem' Grape huan anga thlai lo to te ah pawh 'Sfikhin' thiang lohna hi a awm lo bawk a ni. Tin, In chhung a thlai to leh pot (bur) mawng phuia thlai to ang ah te pawh 'Sfikhin' thian lohna a awm lo bawk a ni.




KHOVAT BIUR

10.    Shviit (Shmita) Thei rah te chu ramhnuaia a kung ami ransa leh sava ten tlan tur an neih chhung chu in lamah kawlin kan ei thei a, amaherawhchu, ramhnuaiah pawh sa leh sava ten tlan tur an neih tawh loh hunah chuan in lama kan la kawl te chu 'Biur' (Tih ral) tih an ngai a ni. Hei hi Torah atanga dan hmuh ani ti te pawh an awm a ni.

11.    Biur hun bituk dan chungchang hi a chip chiarin a dan a tam em em a, chuti anih avangin kan ziak vek seng dawn lova, a tawi deuh dan zawnga zir kan tum ang a;

Biur hun a lo thlen ve leh chuan chutiang ang chi thei te chu kan in chhung ata pawn ah kan la chhuak ang a, tichuan chhuat ah kan dah ang a, mi pathum te hmaah "Peirot ele hefker lekol" (Heng thei te hi nei tu awm lo an ni e) tiin kan puang ang a, chumi hnu ah chuan a duh apiangin chung thei te chu an la thei tawh ang a, tin, keini ngei te pawh chuan lain kan in chhung ah kan dah lut leh thei tawh ang.

12.    Biur hun bituk a ral hnu ah pawh mahni in chhunga thei te "Mafkir" (Neitu neilo nih puang) ve lo te thei chu ei thiang ani tawh lova, khawvel ata tih riral bo tur a ni. Chutiang anih avangin, 'Shmita' serh lo mi hnen ata chu lei thiang ani lo va, tin ei sak emaw, chutiang thei leh thlai chhum / siam te pawh chu a bungbel chhunga thil reng reng te chu ei thiang ani lo a ni.

13.    Shviit thianghlimna nei thei te chu Biur hun laia Jentel ta te chu Biur tih ve nilo mahse, ei thiang tho an ni a, tin, Jentel thei rah Biur hun laia Israel ta te chu Biur tih ve an ngai lo va, chutiangin, Jentel thei rah a Shmita serh thin te tan pawh ei thiang tho a ni.

Tin, Biur hun laia 'Otsar Beit Din' thei rah te pawh chu Biur tih ang ngai   lova, chutiang chu a hnu leh zel ah pawh ei zui thiang a ni.




SHMITA KUM A THLAI LEH THEI LEI CHUNG CHANG
(Thil thianglo kaihhnawih hrang hrang te)

14.    Thlai leh thei Shviit thianghlimna nei 'Hashgakha' (A dan hria te enkawlna) nei si lo zuartu hnena thlai leh thei lei tu chuan a zuar tu chu "Mit del hmaah a tlukna tur thil i dah tur ani lo" tih Torah dan bawh chhiain a zuar tu chu a titlu tihna a ni.
Tin, a lei tu chuan Torah dan kalh a thil a lei avangin a zuartu chu a thil zawrh ah a tanpui tihna ani a, Shmita dan "Isur Skhora ba peirot shviit" (Shmita thlai zawrh thiang lo) a zuartu mai bak ah amah pawh chu a titu nihna a nei tel a ni.

15.    Shviit thianghlimna nei thlai leh thei lei tu chuan a thil lei chu a rih zawng buk emaw, a tamlam teh chunga a lei phei chuan thil thiang lo dang ala tih belh bawk tihna a ni.

16.    Miin Shmita kum ah Shviit thianghlimna nei thlai leh thei lo lei ta ang se, a leina pawisa ah chuan Shviit thianghlimna chu a inhlan chhawng tihna ani a, chuti anih avangin, a pawisa chu a duh duh lei nan a hmang thiang lova, eitur lei nan chauh a hmang tur a ni. Tichuan, a eitur lei chu Shviit thianghlina nei angin a sawngbawl zui tur a ni.

17.    Khakhamim te chuan dan chhiah siamin Shmita serh lo hnen ata thlai leh thei te chu a kum dang ah pawh lei sak chu an khap a, chuti chunga Shmita serh lo hnena chutiang lei lui tu chu Khakhamim te dan siam ngai pawimawh lova zawm lo tu a ni.



SHMITA DAWR
Shmita kuma thlai leh thei lei thian anih loh dan kan zir ta a, amaherawhchu, Shmita kuma Shmita thlai leh thei zawrh anih dan kan lo zir leh ang.

18.    Kum tluana thlai leh thei zawrhna dawr a hetiang thlai an zawrh te chu lei theih ani a, chung te chu; Jentel thar thlai leh thei ang te, ram pawn atanga an lak luh ang te, Shmita kum chhiara a kum 6 na thlai leh thei ang te, Rabbi te enkawl leh an phalna hmanga a bika siam Khamemot (Green House) lei nena inzawmna nei lo chhunga thar thlai leh thei te an ni.


JENTEL THLAI LEH THEI A SHVIIT THIANGHLIMNA SERH TE DAWR

19.    A lei tur mipui ten dawr kai pa chu an tana Jentel hnen atanga thlai leh thei a zawrh chhawn tur lei tura "Shaliakh" (palai) atana Ziak leh sign hnan ngeia an hman mi chuan Jentel hnen ata thlai leh thei lei a, chu chu a zuar chhawng thei a, tichuan, a leina man zat mai bakah khan a leitu Israel te hnen atangin a tha hah man a bituk belh thei a ni.

Chupa dawra thlai leh thei ah te chuan a leitu turte ta nihna a awm tawh a ni, hetianga tih thin dan ah hian Jentel hnena lei tu pawl "Vaadat Shmita" an awm a, chung ho chuan Jentel te hnen ata an lei ta a, chutiang anih avang chuan a zuartu pa tak chuan hetiang dan si se ah hian a intih hah kher angai ta lo a ni.
 

HEITER MEKHIRA DAN HMANG TE DAWR

20.    Dawr thenkhat hetiang "Heiter Mekhira" dan hmanga an zawrhna dawr a awm a, chu chu Israel huan ami thlai leh thei te an ani a, chutiang ah chuan Shviit thianghlimna dan famkim zawm angai thung a ni. Tunlai ah chuan Poskim lian hote chuan hetiang dana an zawrh hi hmang lo turin an ti a ni.


OTSAR BEIT DIN

21.    'Otsar Beit Din' hi huan leh lo chu Beit Din ta ni tura pek chhawn na dan system a ni a, hei hi "Vehaita shabat haarets lakhem leokhla" (Ram chu in tan ei turin a chawl tur a ni) tih dan zawm si a, zawrh leh lei thian theihna dan a ni. Hei hi Poskim (Halakha siam tu Rav te) tam zawk te chuan an pawm a, chutiang hman dan tlem a zawng kan zir ang;

22.    Hetiang "Otsar Beit Din" thlai dawr hrang hrang ah te hian Beit Din palai (mi chhawr) ho te chuan Shmita dan thlapa an enkawl thlai leh thei te chu an hlan chhawng a, tichuan, chung zawrhna atanga a leitu mipui te chuan a thlai man ni lo, Beit Din mi chhawr te tha hah man te, a percel man te, a phurh man te, Beit Din in a senso ang zat te chu a leitu mipui te hnen atanga bitukin an zuar ta thin a ni.

23.     Heng thlai leh thei te hi Beit Din ta an nih chhung hi chuan "Hefker" (nei tu nei lo) an nih reng tho avangin, kum tluana tih dan pangai angin palai te hian bukin emaw, zat chhiarin emaw, lovin an la thei a, chutih hun chhung chuan Biur tih pawh angai chuang lo va, amaherawhchu, a leitu te chuan an huang chhung a thlen tawh chuan Shviit thianghlimna dan famkim an zawm pui tur niin Biur pawh a hun takah an ti tur a ni.


SHVIIT THEI RAH EI CHUNG CHANG

24.    Shviit thlai leh thei te hi ei thiang an ni a, amaherawhchu, a dan pangaia ei thin ang chauh vin ei a thiang thung a ni, hetiangin; A hela ei thin ang te chu a hel chauh vin ei a thiang a, chhum hmin emaw chi leh acid a chhiah hmin a thiang lo a ni, tin, chhum hmina ei thin ang te chu a chhum hmin chauhvin ei a thiang a, a hela ei a thiang lo a ni. Tin, chhum hmin emaw, a hel emaw a ei thin tho ang te chu duh duh danin kan ei thei a ni. (Chhum hmin tih hian ur hmin emaw, kan emaw, hem hmin emaw sawina a ni.)

25.    Thei pho rep ro thin tho ang te chu pho rep ro thiang ani a, chutiang chu ei theih a ni.

26.    Shmita kuma thei leh thlai ah te chuan "Trumor leh Maasrot" lak an ngai lova, amaherawhchu, Shmita kum ah kum 6 na thei angah te chuan lak tho an ngai thung a ni.

Amaherawhchu, Jentel huana thar, mahse, a "Gmar Melakha" chu Israel kuta tih ang ah chuan Brakha tel lova "Trumot leh Maasrot" chu lak tho tur a ni, hetiangin; Jentel Grape thar atanga wine siam ang ah te.


KHEH, RAWT SAWM LEH A TUI SAWR

27.    Thlai leh thei a dan pangaia kheh chi chu kheh thiang ani a, amaherawhchu, a kawr kan kheh hunin a tak chu chhah taka zai thlak emaw kheh thla tel lo tura fimkhur tur a ni.
Tin, dan pangaia kheh loh chi chu Shmita kum hian kheh thiang ani lo a ni.

28.    Thlai leh thei ei tura rawt sawm thin ang chu rawt sawm emaw chu thiang ani a, mahse, kan rawt sawmnaa a tui tling ho te chu paih loh tur niin ei turah chuan kan chhung lut vek tur a ni.

29.    Rawt diak thin ang chi te pawh chu ei turin rawt diak thiang an ni. Amaherawhchu, hetia rawt diak hnuah hian meia chhuan vakin emaw a, a tui chi a kan siam chhuah dawn emaw, dah khang avanga eitur tlang ang chi a kan siam anih chuan, chutiang ang chu thiang lo ti an awm thung.

30.    A dan pangai anga a tui sawr chhuah chi ang chu Shmita kum hian sawr thiang ani a, hetiangin; Wine te, Shemen Zait te. Amaherawhchu, dan pangaia a tui sawr thin ni lem lo, Apple te, Carrot ang te chu a tui sawr thiang ani lo a ni.
Lemon te, Tapuz te, Sertawk te, ser ang chi reng reng te chu a tui sawr thiang lo ani a, amaherawhchu, a tak tel chung chuan sawr theih a ni. Tin, a tak tela kan sawr duh anih chuan a ser chhunga a ei theih lai zawng zawng chu a tui ah chuan kan telh vek tur a ni.


SHVIIT THEI TIH RIRAL CHUNG CHANG

31.    Shviit thlai leh thei te hi ei kher kher emaw, ei zawh vek kher tur tihna ani lo a, a kung ah emaw, kan dah na hmun ah pawh an mahniin an tawih chhe thei tho va. Amaherawhchu, kan kut atangin emaw, kan thil tih avangin a chhiatna turin kan ti thiang lo thung a ni. Chumi awmzia chu bawlhhlawh bawm ah emaw hmun tawp eng emaw ah paih thiang ani lo a, tin, an chhiat na turin khomer emaw leih te, thil sa a dah te chu a thiang lo bawk a ni.

32.    Shviit thei chu a chhiat hma phah na tur pawh ni se, tun leh tuna kan ei nghal dawn anih loh pawhin zai phel chu thiang ani a, amaherawhchu, naute khalh mai mai turin Shviit thlai leh thei chu pek thiang lo a ni.

33.    Shviit thlai leh thei te chu a tiha tih chhiat thiang an ni lova, amaherawhchu, kan ei duh tawh loh ang chi anih chuan, amaha tawih chhe turin emaw, ei tlak lohva awm turin kan dah rih thung thei a ni, tichuan, an chhiat hnuah chuan bawlhhlawh bawm ah a paih theih tawh ang. Tin, mihring ei duh ang chi ni lo mahse, ran tana ei theih si ang chi te pawh chu tih nawmnah leh tih chhiat thiang ani lo a ni. Chutiangin, mihring ei thin ni si, mahse, a ei duh tawh loh dawn chuan ran pek turin a dah thei thung a ni.

34.    Thei tui leh wine te chu ei turah leih luh theih ani a, mahse, an tuina chu hriat theih an ni tur a ni. Chutiangin purun leh Tavlinim (Masala) ho ang te pawh chu ei turah pawlh theih ani a, tin, Shviit thianghlimna nei tel pawh chuan eitur kan kang thiang a ni.

35.    Wine chu "Yain Nesekh" (Jentel avanga wine in thiang lo) laka venhimna tura chhum chu thiang lo a ni a, amaherawhchu, "Lefaster" (a tuihu tih tlin khawm) chu a thiang thung a, mahse, hetia kan tih hian, a wine kan chhuan sat na bel chu phui takin kan siam tur a ni.

36.    Shviit thianghlimna nei wine chu Kidush tih nan te, Havdala tih nan te leh Brakha sawia in hrim hrim te chu a thiang a, amaherawhchu, leih buak leh tih riral chu a thiang lo thung a ni. Mahse, chutiang wine ang chuan Havdala mei chu leih hlum thiang ani lo a, tin, Leil Seder ah Makot (Hremna) chhiar laia leih buak atan hman a thiang lo bawk a ni.


NAUPANG EI TIR

37.    Naute hnen ah Shviit thei kan pekin, kan thil pek chu a tam zawk a ei dawn anih chuan, a tlem a zawng chu ei tlak lohvin chhuah dawn pawh ni se, kan pe thiang a, hetiangin; Balhla te, Apple te leh a dang dang te. Eng le khaw le, chutianga naute kan pe anih a, a thil ken chu ei lovin emaw, a ei bang chu a hnua ei tlak lova siam tura a khal mai mai ani tih kan hmuh chuan lak sak vat tur a ni.

38.    Dan pangai anga rawt diak leh rawt chip ang chi ni lo mahse, naute eitur atan chuan rawt diak thiang ani a, chutiangin, naute ei tur bik atan chuan dan pangaia kawr kheh thin loh ang te pawh chu kheh sak thiang a ni.



SHVIIT THLAI LEH THEI EI BAN LEH CHUANG BANG

39.    Thlai leh thei hawng / kawr te chu mihring ei chi leh ei tlak an nih emaw, a kawr ah chuan a thei them ala kai anih hrim hrim chuan paih mai a thiang lo a, chuvangin, amaha chhe tur emaw, tawih chhe turin kan dah rih phawt ang a, a chhiat hnuah chauh kan paih tur a ni.


Mahse, thlai leh thei hawng leh kawr ang chi te chu mihring leh ran ei chi ang an nih lem loh chuan paih mai theih a ni.



SHMITA THIL PAIHNA BAWM

40.    Shviit thlai leh thei te hi tih riral leh tih theng ral mai mai thiang an ni lo a, chuvangin, "Pakh Shmita" (Shmita bawlhhlawh bawm) siam tur a ni a, chutah chuan sahar ip dahin chutiang ang ei atana kan duh tawh loh Shviit thianghlimna nei thlai leh thei ang te chu kan dah khawm tur a ni a, tichuan, an chhiat hun ah bawlhhlawh bawm pangai ah kan paih thei tawh ang.

41.    He "Pakh Shmita" bawm chhung ah hian heng te hi kan paih tur a ni.


1)    Thei leh thlai kan ei bang te.
2)    Thei leh thlai hawng / kawr mihring emaw, ran emaw la ei theih.
3)    Thei mu a thei them la kai te.
4)    Chaw hmeh bang nawi te.


  Mahse, heng ang thil te hi he "Pakh Shmita" bawm chhung ah hian kan paih ve kher a ngai lo thung;


1)    Chawhmeh bang nawi bel pang vela bet mai mai te.
2)    Shviit thlai leh thei chhumna tui te.
3)    Shviit thei mu ei atana tlak kher lo te.
4)    Shviit thlai nena chhum pawlh sa ruh te.
5)    Ei tur tih tui nan chuahva hman tel thin hnah emaw, chutiang ang chu ei chi ni lem lo ang te.

42.    Thlai leh thei te chu an lo chhiat tanin ran tana ei tlak a la nih chhung chuan, ran pek chi an nih chuan an chhiat zawh thleng nghah tur ani a, chumi hnu ah chauh chuan paih a thiang a, amaherawhchu, ran pek chi ang ni lem lo an nih chuan an lo tawih chhiat tan chuan paih mai thiang ti an awm bawk.

43.    Shviit thianghlimna nei thil ei bang nawi te chu tlem tham tak an nih chuan a bel chawp chuan sil hnan thiang a ni. Amaherawhchu, "Pakh Shmita" a paih tura a bang nawi te kan la khawm anih chuan chutah chuan paih tur a ni.

44.    Thei mu mihring leh ran ei atana tlak lo ang chi ah chuan a thei thlem a kai lem loh chuan bawlhhlawh bawm pangai ah paih mai thiang a ni. Thei mu mihring leh ran tana ei theih chi mahse, tunlaia kan ei ngai tawh thin loh anih chuan paih mai thiang ti an awm bawk.

45.    Thei a a mu la bet ang reng reng te chu a thei laia chuan thianghlimna ala neih tlat avangin kan la ei zui tur anih chuan kan paih thiang lova, mahse, chutianga awm a mu te chu la chhuak in kan paih thei thung a, tin, tuina nei thei mu te chu a thei kan ei zawh hnuah pawh la fawh zui dek dek chi ni mahse, chutianga fawp duh an awm lem loh chuan paih mai theih ani bawk a ni.

46.    Shviit tel hmanga thil kan kan in a tel bang nawi chu bati anga ala chhit zui theih chhung chuan paih ala thiang lo a, mahse, thirbel mawng nawi leka tlem tham anih tawh erawh chuan paih kher lovin sil hnan theih a ni.

47.    Shviit thlai leh thei chhumna tui emaw, chiah hminna tui chu thil tui (taim) anih lem loh chuan leihbuak emaw paih mai thiang ani a, mahse, an tui (taim) anih chuan an chhiat hma chu paih thiang ani lo, entirnan; soup tui ang chi te.
Tavlinim (Masala) ang chi chu amah ei duh kher lovin eitur tih tui nana hman anih hnuah paih thiang a ni. entirnan; thingpui fe.

Categories: Judaism, Halakhot, Juda dan, Kashrut

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments