HAKHOKHMA Post Post New Entry

Ka Jentel thian in min zawh na

Posted by hakhokhma on June 27, 2013 at 8:10 PM

SENA: Jentel te tan chhandamna eng tin nge?

HK: Jentel te tan chhandamna tih ah hian a hma lama ka sawi tak ang khan, Nova leh afate tana dan 7 zawm famkim te tan tiam sak an ni.

    Chandanma tihah hian kawh hrang hrang a nei thei awm e. Kristianna ah chuan Vanram kai leh Meidila tlak hi tawpna angah an inzirtir a, chu chu kan ngaihtuah chian chuan, chumi vang ringawt pawh chuan Kristianna sakhua hi a hlauhawm ang reng hle a ni.

    Achhanchu, Judaism ah chuan mifel leh misual nih theihna turin dan leh thupek P-athian hnen atanga dawn niin chu chu a hrilhfiahna pawh Mosia khan P-thian hnen atanga a dawn chu tun thlengin Juda te chuan an inzirtir chhawng thin a, a dan leh a thupek anga nung te chauh chu MIFEl / MITHA P-thian in a chhandam turte chu an ni.

    Kristianna ah chan mifel tih emaw, misual tih thu an sawi nasa thin a, amaherawhchu, Juda te angin a point in sualna emaw, fel ni tura a thil tih ngai inzirtirna a awm ngai hran lo, chumi awmzia chu, Kristian ten dan leh thupek kengkawh tura inzirtirna emaw, inzirtirna tura dan leh dun an nei lem chuang lo. A tawi zawngin Free Style sakhua ti ila kan sawi sual tam pui lo ang, amaherawhchu, mihring ngaiha sual kan tih mai hetiangin ruk ruk te, pawi khawihna chi hrang hrang ang erawh chu sual tiin an inzirtir narawh a, mahse, chu chuan eng cheng chiah nge a huam tih an inzirtirna ah a awm lo.

    Chuti anih si chuan Kristian sakhaw zui tute chuan sual tih an hreh em em laiin sualna ho kha hrelo an tam ang. Hei hi enge a pawina kan tih chuan... an inzirtirna ah damlaia thil ti sual tu chu chatuanin Meidil/Hremhmun ah an awm ang, dam laia thil tisual lova mifel te chauh chu chatuanin Vanramah an awm ang, tiin an inzirtir thin a, kan ngaihtuah chian chuan, kan dam lai nun hian Mihring chuan thil tihsual kan nei vek hlawm si, chuti anih chuan kan rilru fim a kan ngaihtuah chian chuan mi zawng zawng chu Meidila tla tur tihna anih chu.

   Mahse, chu chu Kristianna atanga thlir dan mai ani a, Juda te chuan Vanram (thih hnu piah ram) chauh hi chhandamna hmun ani lo kan ti a, Mashiakh (Messia) lo kal hun ah chuan khawvelah hian sualna a awm tawh dawn lo a, a chhanchu, engkim chungah P-thian hriatna hi a khat vek tawh dawn si a, chumi hunah pawh chuan tun huna Nova leh afate tana dan 7 (Jentel te dan) kha Juda ni lo ten an zawm kim erawh chuan, Mashiakh Lal ram ah chuan him damin an lut ve ang a, chutih hunah chuan P-thian hriatna a chak tawh luat tuk avangin, tun hma lama Sakhaw dang te Pathian chungchang thu pawh theihnghilh hial ani tawh dawn a ni.

    Hemi hun Mashiakh Lalram hi mihring leh mihring te inkara inremna awm hun anih dawn avangin, khawvel hi a danglam hle ang a, sipai leh ralthuam tih vel pawh a awm tawh lo vang. Chumi hnu atanga rei vak lo kum 40 hnu ah chuan P-thian leh Mihring te inkarah inremna a awm ang a, hei hi Mihring zawng zawng te pa Adama lo bawh chhiatna ah chuan P-thian in mihringte a ngaihdamna a rawn tilang ang a, tichuan, thihna a awm leh tawh lo ang a, hemi hun thlen hmaa a duh zawng anga nung te chauh chu he hun (Mitthi te thawh lehna hun) rawn chhim ve tur hian P-thian chuan an thlan te hawn sakin a kai tho hlawm ang a, chu chu Mitthi te thawh lehna khawvel a lo ni tawh ang. Hetah hian Jentel mi pawh a dam laia Nova fate dan 7 zawm tute chu a kaitho ve ang. (Hetih hun lai ah hian thi tawh te zing ah an dam laia P-thian dan anga nung lo tute chu kaihthawh an ni lo ang a, ro relna ni ropui ber lo thleng tur nghakin an ruang/ruhro chu thlan ah ala mu ang a, an thlarau chu Mitthite ram (Thlarau ram / Van ram) ah chuan an la awm thung ang.

    A dam laia mifel tluantling tih ah khian, P-thian duh loh zawng lo ti thin tawh tu te tan pawh , a dam lai chhung chuan P-thian chu zawng hmuin alamah kir hmanin a dan leh thupek te ang chuan a thih thlengin  a nun chhun zawm chuan he chhandamna ni (Mitthi te thawh lehna) hun ah hian kaihthawh ani tho dawn a ni.

    Tichuan, chumi hnu ah chuan P-thian hun tiam leh Mihring leh khawvel a siam chhanna khawvel chu a lo inher chhuak tawh ang a, chu chu Khawvel lo la awm tur tia kan nghah hleh leh, he leia kan awm laia P-thian thupek te kan zawm avanga a lawmman rah kan eina hmun tur khawvel chu a lo inher chhuak tawh dawn a, amaherawhchu, chumi khawvel luh hma chuan mitin / Adama atanga mi hnuhnung ber thlengin P-thian rorelna hmaah kan ding dawn a, chu khawvel lut tlak kan nih chauhvin chu khawvel lo la awm tur ah chuan lutin kan chanvo chu kan va ei thei ang a, chatuan nunna kan chang tawh ang.

    He khawvel thleng thei tur hian P-thian chuan a duh taka a siam mihring te (Juda leh Jentel te) tan hmun a buatsaih in, chumi atan chuan he khawvel ah hian mihring te min siamin min piantir ta a, mahse, chumi hmun thlenna tur chuan kei mahnin kan thawh a ngai thung a, mahse, chu a thawh dan chu engmah hre lova he leia piang ve mai tan chuan in zawn chhuah a har sa hle a, mahse, khawngaihtu P-thian chuan a duh taka a siam ten chu khawvel thlen theihna tur atana a duh zawng hna kan thawh thiam theihna tur chuan Lehkhabu hmanga kan inzir theih nan a TORAH (Gen, Ex, Lev, Num, Deut) te chu min lo pe ta a, he lehkhabu chhung ah hian he khawvel a kan awm chhunga kan tih tur te chu mitin hriatthiam theih turin thawn thu hmangin min lo chhawp chhuah sak ta a, chu chu thil mak pawh ani reng a, Khawngaih tu P-thian chuan mitin te chhandam a duh avangin, hnam tin zingah a thil tihtheihna hmanga thehdarh niin, khawvel hnam mawl ber pawhin an mahni tawngin Hebrai tawng atanga an leh chhawn chu in tinah an lo kawl ta a ni.

   Chu lehkhabu ah chuan Juda te tan dan 613 a awm a, Jentel te tan dan 7 lek a awm thung a ni.

    Hei vang hian mi tam tak chuan P-thian chuan Juda te aiin Jentel te a hmangaih zawk  ani mai lo maw? Jen tel ten awlsam tea dan 7 lek an zawm a Khawvel lo la awm tur, a lawmman pekna hmun tura an luh theih laia Juda te tan dan 613 lai a pek mai? an ti thin a, mahse, hei hi a chhanna chu a ni, hei hi P-thian chuan a fate Juda te chu a hmangaih em avang a ni a, mahse, sawi tawh ang khian ava inmil si lo ve, kan ti a ni mai thei, heti hian entirna pe ta i la, 'Mi pahnih an awm a, hna thawhna hmun in ang an ni a, an hna thawhna hmuna an boss chuan pakhat hnenah chuan nang chu i fel bawk a, kar khat ah ni hnih chauh i thawk ang a, i thawh ni ni khat ah pawh darkar khat lek i thawk thin dawn nia, nuam sa takin awm rawh khai....  a ti a, tin, a pakhat dang leh hnenah chuan , nang chu nitin darkar 9 i thawk ang a, i tin dar kar 9 bak hna thawh tur a awm pawhin i thawh belh zel dawn nia, a ti thung a  ni...' He entirna ah hian hnathawhna Boss pa chuan a hmasa zawk khi (thawk tlem zawk) a duhsak zawk leh atana hah dam zawk a zawn sak niin a lang a, mahse, thla tawp a hlawh an lak ni ah chiah chuan tu zawk nge an boss pa chuan a lo duh sak zawk tih an hre thei dawn ta a ni.

    Khi tiang ang chiah khian he khawvela Juda te leh Jentel te, an nihna ang rau rau va nakin huna thil la awm dan tur chu a ni a, mahse, sawi tak ang khian P-thian chu a fel in a tha a, Jentel te hnenah pawh chuan lawmman tam tak pek an nih theihna turin he khawvela an dam lai hun ngei hian Khawngaihtu P-thian chuan Chance a pe a, chu chu a fate nihna a tel ve turin Juda a inlet (Giur) thei turin tun ah hun pein a nghak reng a ni. Chumi tur atan chuan a lawm Jentel Kristian te hnenah pawh an mahni tana chumi atan mai tih chauh lova kan (Juda) dan bu (Thuthlung hlui) te pawh an zak ah a zeh tir ve trit tret ni. Chuti ni lo se, an tana tangkai miah lo Juda te dan bu chu thinlung maiin a rin tir lul lo vang, Juda te sakhua a tel ve tur leh a fate zinga tel ve tur atan a kohna niin, an chhiar huna an hriat theihna turin tawng chikimin he khawvel ah hian a theh darh zawk a ni. 

    Mahse, P-thian chu a ropuiin a fate dinhmun chu a sang a, chuvangin, he nihna luaha chang ve tur chuan mitin te tana phak chi zia zang ani lo, rilrua thil dang awn ru tlat tute tan chuan thil theih ani lo a, chu chu SAM 115 chang 5 naah khan a sawi chiang em em a, P-thian tak ni lo Milem Pathian ring lui tur tlat te chuan he thil dik hi an hmu thei dawn lovin, an hre pha dawn lo a ni.

   Mahse, thinlung harhfim chunga he P-thian dan hmua a tak ram bawh zui duh lo te tan chuan an thlarau leh nunna chu chatuan atan thai bo ani zawk dawn a ni, Deuteronomy bung 29 chang 19 naa a inziah ang khan. 

Categories: Judaism, Article

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments