HAKHOKHMA Post Post New Entry

P-thian hming ziah chungchang

Posted by hakhokhma on May 20, 2013 at 7:05 PM

    Torah atangin P-thian hming ziah sa nawhreh chu thiang lo ani tih kan zir a, amaherawhchu, chutianga ziah chu Hebrew (Ivrit) a ziah te chuah ani thung a ni. A chhanchu, Ivrit chu tawng thianghlim anih vang ani a. He tawng thianghlim hmang hian khawvel siam ani a, tin, he tawng hmang hian P-thian chuan mihring ten amah an koh dan tur chu a ruat bawk a ni. Chuti anih avang chuan he tawng thianghlim hmanga a hming ziak nawhreh chu thiang lo alo ni ta a ni.


 
     Zawhna lo awm thei ta chu, chuti anih chuan tawng dang (Jentel tawng) hmanga amah kohna tur atana a hming an pek ve chung chang chu alo ni ta a, hetiangin, Got (German tawng leh Idish in), 'God' (English in), Bog (Russian in). A rik dan chu Ivrit a amah kohna nen chuan a inper san hle nachungin, Juda te P-thian sawina anih chuan, a awmzia leh a tum chuan thianghlimna aneih avangin tihnawmnah thiang ani lo va, chuvangin, hmun tawp leh tenawm ah sawi leh ziah thiang ani lo a ni. Amaherawhchu, Torah in P-thian hming leh kohna a sawi ang anih loh avangin, a rau lama thianghlimna (Kedusha) erawh a awm lova, chuti anih avangin, hetianga tawng dang hmanga lo inziak te chu a tul anih chuan nawhreh pawh a thiang a ni. Tin, halakha (Juda dan) hre thui lo ten Chanchinbu ah emaw, Lehkha thawn ah te an lo ziak palh anih pawhin Gniza (thil thianghlim paih/dah na) ah dah kher a ngai lem lova, bawlhhlawh bawm ah paih mai thiang a ni a, hetah hian tihnawmnahna lian tling a awm lo a ni. Amaherawhchu, chuti chung pawhin chutiang ang chanchinbu leh lehkha thawn ang te chu a uchuak zawnga hman kher chu thiang lo a ni, hetiangin; hnap hnit nan te, thil tenawm hrukfai nan te.

     Chutiang ang chiah chuan P-thian hming ziak aia hawrawp hmanga chhinchhiahna an hmang ang ( יי , ה , ד ) thin te pawh chu a chunga kan sawi tak ang khian thianghlimna nei ni hran lo mahse tihnawmnah thiang ani lo bawk a, mahse, bawlhhlawh bawm ah te chuan paih mai theih an ni thung a, hei hi 'Rov Haposkim' (Halakha siamtu tam zawk te) ngaihdan a ni.

     Amaherawhchu, 'Akhronim' (Halakha siamtu hnuhnung) hote zingah hetianga P-thian hming tawng dang hmanga ziah ang te hi an fir pui em em thung a, chuvangin, bawlhhlawh bawma paih pawh chu tihnawmnahna thil ani an ti a. Chuti anih avangin a ziaktu chuan tawng dang hmanga P-thian hming a ziah dawn chuan a inkar ah daidanna awm turin thai phei emaw a dah tur a ni a, tin, a hawrawp pakhat emaw ziah tel loh tur an ti a ni. Hetiangin; G-d , G' .

      Tin, a duh fir leh zual an awm a, chung hote chuan Ivrit ah pawh nise, a chhinchhiahna atana hawrawp an hman ang te chu P-thian hming zinga hawrawp ani tur ani lo an ti a, chuvangin, 'P-thian zarah' (ב"ה ) tia ziah pawh an duh lo va, chuvangin, a aiah 'Chung lam atanga tanpuina in' (בס"ד ) tiin an ziak ta thin a ni.

     Amaherawhchu, Halakha chu hetiang em ema khirh leh fir khi ani hran lova, chuvangin, a duh fir te avanga intihhrehawm a ngai hran lem lo a ni.

* Khiti thleng khi Harav Eliezer Melamed Shlit"a sawi a ni a.

-------------

     Computer lamah ve thung chuan, Computer a Print chhuak kher lo tura P-thian hming ziah hi a thiang em? tiin, tunlaia Poskim (Halakha siam tute) hote chuan an lo ngaihtuah nasa tawh thin a, a Halakha chu hei hi a ni, THIANG LO ani a, a chhan bawk chu, nawhreh leh theih thil anih vang a ni a, amaherawhchu, miin an lo ziah tawh sa emaw, a thlalak emaw chu kan computer ah lo download in lo save palh ta ila, a HD (Hard disk) chu Gniza ah dah kher a ngai lo a, a chhanchu, a chhungah reh lovin a awm ani mai a, chu chu ziak tihna a ni lo a ni. Tin, a keyboard hmanga kan thil type te hi ziak anga ngaih chiah ani lova, amaherawhchu, kan print chhuah erawh hi chu ziak a ngaih ani thung a, chuvangin, Computer a P-thian hming ziak/thlalak kan dah luh te chu miin an lo print chhuak palh theih avangin, tunlaia Halakha siam tu te chuan a tir phat atangin Computer ah pawh nise, P-thian hming chu Type emaw, a hming ziak thlalak chu dahluh loh tur an lo ti a ni.

* Harav Shlomo ben Elyiahu.
------------------------------------------- 


     Tun, Shabat (Parshat Naso) kan hman zawh tak Erev Shabat khan Arvit kan tawngtai zawhin kan Beit Kneset Rav chuan mipui te hriattirna puangin a rawn ding chhuak a, inkhawm zawh tih takah naupang te chuan bengchheng an siam nasa ang reng hle a, chuvangin, a thusawi tir lam chu ka lo hre lo deuhva, mahse, a sawi chhunzawm zelna ah khan ngaihruat chu ka nei a, tin, a thusawi chu a pum hlumin ka hre chak em em a, pawnah mi ka zawt chawp tawh mai ang tiin, ka inhnem a, tichuan, pawnah chuan, thiante ho ka han zawh chuan an lo hre chiang bik vak lo hlawm ve tho va, chuvangin, hun remchang ah Rav chu ka zawt chiang mai ang tiin, amah chu hmuh ka tum ta a ni.



    Rav chuan, Beit Kneset a a thu puan ka hriat ah chuan "....  A phek 12 naah P-thian hming a inziak a, hei hi Gniza ah dah mai loh tur a ni a, hei hi a pawi em em a, hman deuh lai phei chuan Ashkenaz ram leh ram pawnah phei chuan Sidur bu ah tak ngial pawh P-thian hming hi an zep tel duh lova, a chhinchhiahna hawrawp hmangin an ziak mai thin a ni... " tiin a sawi a, tin, Gniza an sawng bawl dan leh hemi chungchanga Moatsa Dati lam ten harsatna an tawn hrang hrang te, a chinfel dan kawng zawnga ngaihtuahna an hman thu te chu a sawi zawm zel bawk a, tin, Mezuzah leh Tefilin a P-thian hming inziak chungchang thua fimkhur a ngaihdan hrang hrang te pawh chu a sawi zawm bawk a. A thu sawi chuan ngaihtuahna min neih thui tir em em a, kei ni hote hi Halakha ril hre si lo hian kan pawng paw huai hlawm a, internet ah te leh chanchinbu ah te kan duh duh danin kan ziak ta mai mai hlawm si a, han inhrilhfiah ila, insawisel leh indeusawh in kan inchhang let hlawm thin bawk si tiin, ka dawn thui viau va, mahse, a lehlamah, miin a tilui anih chuan ama thu a ni a, mahse, a hriat loh avanga a lo ti palh anih chuan hrilh hriata a bawhchhiat zel lohna tura pui thei tu ka ni tiin, zawh fiah ngei chu ka tum ta hle mai a.



    Ka vanneih a siamin ka u te ina Shabat chaw ei tura kan kal pah chuan Rav inkhawm bang chu an in bulah ka tawk hlauh mai a, tichuan, Rav chu ka zawt chiang ta a, ani chuan, chiang tak leh dam tak chuan min hrilhfiah ta a.



     Tunkar khan Shabat chanchinbu pakhat 'Gilui Daat' chhuak ah khan a phek 12 naah P-thian hming an ziak a, chumi chungchang chu a ni a, in kawl thain in vawng tha reng dawn anih loh chuan, Gniza a dah lovin ka hnen ah min rawn pe dawn nia, ka ti a nih kha, a ti a, tichuan, zawhna te chu ka han siam belh ta zel a, "Keini ho te hian Shabat chanchinbu te leh Internet lamah te hian 'Divrei Kodesh' (thu thianghlim) lam te hi kan ziak ve thin a, hetianga P-thian hming kan ziah tel ah te hian enge a dan ni ang? Eng tin nge kan ziah ang? tiin, ka zawt a, ani chuan, "In koh dana a hming pum ang chuan ziah thiang a ni lova, a inkarah hawrawp pakhat tal ziak tel lovin a karah daidanna siamin thai phei hlek te in telh thin ang a, tin, chuti anih loh pawhin, hawrawp hmangin in hriatthiam tur angin chhinchhiahna (entirnan; P' , H' ) te in siam mai ang a, tichuan, in paih dawn hun ah bawlhhlawh bawm ah ni lovin Gniza ah in dah thei ang. Tin, Gniza ah dah nachang hre lova bawlhhlawh bawma paih tur te an awm dawn ni anga in hriat chuan a chanchinbu ah emaw chuan 'Gniza a dah tur' tiin emaw, hriattirna in ziak tel ang a, anih loh vek pawhin, a hming chu ziak tel kher lovin, a 'Kavana'  (a tum ah) amah ani tih hriat theihna turin 'Bore Olam' (Khevel siamtu) ti ten emaw in, a ziah theih bawk a, tin, P-thian hming tel kher lo pawh nise, 'Divrei Kodesh' (thu thianghlim) ang chi reng reng chu eng tawng pawhin ziah nise, Gniza ah dah tur. Tiin, min hrilh a, ka lawm hle mai a ni.



    Kei pawh hi Chanchinbu lam te khawih thin ka nih avangin ka khawih tirh atangin ka fimkhur em em thin a, kan chanchinbu tihchhuah te a tet deuh thin avangin renchem thil thu ah leh P-thian hming hman sual hlauh avangin fimkhur thuhla ah P' tiin ka ziak mai thin a, upa lam te hnen atangin hemi chungchang ah hian zawhna ka tawng hnem thawkhat hle a, tin, Eng vangin nge 'P-thian' tiin i ziah ve loh, hei hi hetianga ziah hi ka tih hmasak ber a ni a, tia, min hrilh bawng bawng lah bo lo, tin, chu mai ni lovin, kan website lamah a bikin Jentel hote hnen atangin, hetianga P-thian tia kan ziah hi lo la sek fe fe an tam bawk.



    Website (www.hakhokhma.org) lamah pawh thu ziak tur ten an hriat hmasak tur dan kan siam a, chutah chuan P-thian hming an ziah dan tur te chu kan hriattir a, tin, Hk_Channel a Chat na ah pawh P-thian ti hi a hawrawp kima ziak thei lo turin kan set nghal bawk.



    Tin, thil pakhat leh chu, hetianga ziah fimkhur ngai ang chi hi kan (Juda) te P-thian hming sawina hun ah chauh ani a, chuvangin, Jentel te Pathian sawi nana kan hman hunah fimkhur a ngai ve lovin, pathian tiin kan ziak mai thei bawk a ni.

Categories: Judaism, Halakhot, Juda dan, Article

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments